Tito 2:1-15
2 Baribʉrʉ bʉabʉrʉ wãrã beɗeara jipa jaradia ɓaida ɓʉa.
2 Drõãrãa jaradiadua ãdji cacuara jipa eroɓeaɗamãrẽã, quĩrãipa ɓeaɗamãrẽã, crĩcha biaɗeba nĩbaɗamãrẽã, Critora bio ĩjã ɓeaɗamãrẽã, wãrã quĩrĩãneba ɓeaɗamãrẽã, idjaɓa jũma droaɗamãrẽã.
3 Idjaɓa djorarãa jaradiadua Ãcõrẽ quĩrãpita jipa ɓeaɗamãrẽã, nẽbʉra orãnamãrẽã idjaɓa beu nĩbarãnamãrẽã. Ãtebʉrʉ ne jũma biada jaradiaɗida panʉa.
4 2:4-5 Ãdjirãba awẽrãrãa jaradiaɗida panʉa ãdji quimara, ãdji warrarã siɗa quĩrĩãnamãrẽã, crĩcha biaɗeba jipa nĩbaɗamãrẽã, wẽrã biada ɓeaɗamãrẽã, ãdji dera bia wagaɗamãrẽã, sobia ɓeaɗamãrẽã, idjaɓa ãdji quimaba jara ɓʉra ĩjã oɗamãrẽã. Mãwãra ni aɓaʉba Ãcõrẽ beɗeara biẽ́ jaraɗaẽ́a.
5 –
6 Cũdrarãa jaradiadua crĩcha biaɗeba jipa nĩbaɗamãrẽã.
7 Jũma bia o ɓʉɗeba jũmarãa unubi ɓadua sãwã nĩbaɗida panʉda. Crĩcha biaɗeba jipa jaradia ɓadua.
8 Wãrã beɗeada jaradia ɓadua ni aɓaʉba bʉra biẽ́ jararãnamãrẽã. Mãwã jaradia ɓaibʉrʉ, bʉ ume dji quĩrũra peraɗia. Ãdjia ni maãrĩ biɗa dadjirãra poya biẽ́ jaraɗaẽ́a.
9 Nezocarãa jaradiadua ãdji boroba jara ɓʉra jũma ĩjã oɗamãrẽã. Ne jũmada bia oɗida panʉa ãdji boroba bia unumãrẽã. Ãdji boroba jarabʉrʉra daucha panuniẽ́ panʉa.
10 Ãdji boroɗeda drʉaɗiẽ́ panʉa, ãtebʉrʉ unubiɗida panʉa ãdjia ne jũmada jipa o panʉda. Mãwãra ẽberãrãba cawaɗia Ãcõrẽ dadji Ẽdrʉ Edabari beɗeara bio bia ɓʉda.
11 Ãcõrẽba jũmarãa unubisia idji biaɗeba ẽberãrãra ẽdrʉ edabarida.
12 Maʉ̃gʉba dadjirãa cawabi ɓʉa ne jũma cadjiruara, naʉ̃ ẽjũãnebemarãba quĩrĩãbada siɗa igaraɗida panʉda. Idjaɓa cawabi ɓʉa dadjirã naʉ̃ ẽjũãne panʉne crĩcha biaɗeba jipa nĩbaɗida panʉda Ãcõrẽba quĩrĩã ɓʉ quĩrãca.
13 Dadjirã bia panani ewari jʉ̃ã panʉmisa mãwã pananida panʉa. Maʉ̃ ewariɗe dadjirã Ẽdrʉ Edabari Jesucritora zeya. Maʉ̃ne idji quĩrãwãrẽãra ununia. Idjira dadjirã Ãcõrẽ dji dromaa.
14 Dadjirã carea Jesucritoba ara idjida idu beabisia ne jũma cadjiruaɗebemada ẽdrʉ edai carea. Dadjirãra ara idji itea bia ɓʉsia idji puruda ɓeaɗamãrẽã idjaɓa ne jũma biada o quĩrĩã pananamãrẽã.
15 Jũma maʉ̃gʉra jaradia ɓadua. Carebadua djabarãba maʉ̃ beɗeara ĩjã oɗamãrẽã. Ãĩ o ɓeara quẽãdua, Ãcõrẽba bʉra ɓʉɗa bẽrã mãwã omãrẽã. Djabarãa bʉra idu igarabirãdua.
