Tito 3:1-15
3 Djabarãa quĩrãnebabidua naʉ̃ ẽjũãnebema bororã jʉwaeɗa pananamãrẽã. Ãdjia jarabʉdara ĩjã oɗida panʉa idjaɓa ne jũma biada oɗi carea ɓeaɗida panʉa.
2 Djabarãa jaradua: ni aɓaʉɗebemada biẽ́ beɗeaɗiẽ́ panʉa, caicaya ɓeaɗiẽ́ panʉa, ãtebʉrʉ sobia ɓeaɗida panʉa, jũmarã ume aduá ɓeaɗida panʉa.
3 Wãrãda naẽna dadjirã biɗa crĩcha biada neẽ́ panasiɗaa, Ãcõrẽra ĩjãnaẽ́ panasiɗaa, ãĩ crĩcha panasiɗaa. Dadjia cadjirua o awua ɓeara, ɓʉsriɗa o quĩrĩã ɓea siɗa nezoca quĩrãca jũma obadjiɗaa. Baridua cadjiruaɗe nĩbabadjiɗaa, djãrãba eroɓʉ carea soɗe biẽ́ panebadjiɗaa, djãrãba dadjirãra quĩrãmabadjiɗaa, idjaɓa dadjirãba djãrãda quĩrãmabadjiɗaa.
4 Baribʉrʉ dadjirã Ẽdrʉ Edabari Ãcõrẽba idji biada, idji quĩrĩã siɗa jũmarãa cawabisia.
5 Maʉ̃ba dadjirãra ẽdrʉ edasia. Dadjia bia opeɗaɗa carea ẽdrʉ edaẽ́ basía, ãtebʉrʉ idji quĩrã djuburiaɗeba ẽdrʉ edasia. Dadjirã cadjiruara sʉgʉsia djiwiɗi toɗa quĩrãca ɓeaɗamãrẽã idjaɓa Ãcõrẽ Jaureba dadjirãa zocai ɓai djiwiɗida diasia.
6 Dadji Ẽdrʉ Edabari Jesucritoɗeba Ãcõrẽba idji Jaurera dadjirãa wãgaẽ́ diasia.
7 Ãcõrẽba idji biaɗeba dadjirãra jipa unu ɓʉ bẽrã ewariza idji ume zocai panania. Maʉ̃da jʉ̃ã panʉa.
8 Maʉ̃ beɗeara wãrã araa. Mʉ̃a quĩrĩã ɓʉa bʉa maʉ̃gʉra bio jaradia ɓaida Ãcõrẽ ĩjã ɓeaba ne jũma biada o wãnamãrẽã. Maʉ̃ beɗeara bio bia ɓʉa. Jũmarãda carebabaria.
9 Baribʉrʉ baridua beɗea siriẽ́ ɓʉ carea caicayarãdua. Ãcõrẽba Moisea diaɗa ley carea biɗa caicayarãdua. Idjaɓa dadji drõã naẽnabemarã trʉ̃ jaradiabadara igaradua. Jũma maʉ̃gʉra biẽ́ ɓʉ bẽrã carebacaa.
10 Aɓaʉba djabarãda ijarabibʉrʉ, idjira quẽãdua waa mãwã orãmãrẽã. Idjia ĩjãẽ́bʉrʉ, wayacusa quẽãdua. Maʉ̃ne waɗibiɗa ĩjãẽ́bʉrʉ, idji ume ɓarãdua.
11 Bʉa bio cawa ɓʉa maʉ̃ ẽberãba wãrã beɗeara igarapeɗa biẽ́ o ɓʉda. Cadjirua o ɓʉɗeba unubi ɓʉa ara idjida Ãcõrẽ quĩrãpita beɗeaɗe ɓʉda.
Naʉ̃ cartaɗe Pauloba jĩrũare ɓʉɗa
12 Mʉ̃a djaba Artemada wa djaba Tiquicoda bʉmaa wãbiya. Jãma jũẽnacarea isabe Nicopoli puruɗaa mʉ̃ acʉɗe zedua. Mʉ̃a za uru cue jara mama ɓaida crĩcha ɓʉa.
13 Ẽberãare beɗeabari Zenada, Apolo siɗa bʉmaʉba wãbʉdaɗe ne jũmaneba carebadua bia wãnamãrẽã.
14 Dadjirã dji Crito ĩjã ɓeaba biada o cawa wãnida panʉa ne neẽ́ queɗea carebaɗi carea. Mãwãra ara dadji quĩrĩãbe ɓeaɗaẽ́a.
15 Jũma mʉ̃ ume duanʉba quĩrĩã panʉa bʉra bia ɓaida. Dai quĩrĩã panʉ Crito ĩjã ɓeaa jaradua daiba quĩrĩã panʉda ãdjirãra bia duananida. Mʉ̃a quĩrĩã ɓʉa Ãcõrẽba idji biaɗeba jũma bãrãra careba ɓaida.
