Ãcõrẽba quĩrĩã ɓʉda dadjirãra ara caita pananida idjime ʉ̃taa dji idi panʉneba (1 Juaʉ̃ 5:14). Baribʉrʉ ẽberãrãba ʉ̃taa dji idi panʉne Ãcõrẽra, idjia jũmarãda ũrĩcada. Ejemploda Ãcõrẽ Beɗeaba jara ɓʉda umaquĩrãrãba puoɗibʉrʉ ãdji quimarãda, Ãcõrẽba ãdji beɗea bia ũrĩẽ́a (1 Pedro 3:7). Idjaɓa israelitarãba ne cadjirua o panabadjiɗaɗe Ãcõrẽba ũrĩẽ́ ɓasida ãdjia jaraɗara. Baribʉrʉ ẽberãrãba ne cadjirua igaraɗapeda Ãcõrẽba dji beɗeara poya ũrĩda. Leadua Hecho 3:19.

Acʉdua dji video ¿Ãcõrẽba ũrĩbarida ẽberãrãba ʉ̃taa dji idi panʉne?

Aɓabe bʉrʉ dadjirãba bia beɗeaɗida Ãcõrẽa maʉ̃ carea Ãcõrẽabʉrʉ ʉ̃taa dji idiɗida panʉa (Mateo 4:10; 6:9). Dadjirãra jipaẽ́ panʉ bẽrã ʉ̃taa dji idiɗibara Jesu trʉ̃neba idjira beuɗa bẽrã dadji cadjiruaɗeba (Juaʉ̃ 14:6). Dairãba Jeowa dji idibʉdaɗe aɓa ɓʉ beɗea jaraɗaẽ́da maʉ̃ cãyãbara Ãcõrẽa dji idiɗibara dadji soɗeba. Leadua Mateo 6:7; Pilipo 4:6, 7.

Dadji quĩchaɗeba ʉ̃taa dji idi panʉne dadji Ãcõrẽba ũrĩ ɓʉda (1 Samuel 1:12, 13). Ʉ̃taa poya dji idiɗida Ãcõrẽra ʉ̃rʉ̃mane wãbʉrʉɗe, cãĩne wãbʉrʉɗe, ne coɗe wãbʉrʉɗe idjaɓa beɗea droma eropanʉne. Leadua 1 Pedro 5:7; Mateo 15:36.

Ẽberãra naʉ̃ ẽjũãnebemada bio cadjirua panʉ bẽrã, ʉ̃cʉrʉmaarã poya zarea ɓaida Ãcõrẽme caita pananira. Ʉ̃cʉru ẽberã ipiɗabadada Ãcõrẽ Beɗeaba jara ɓʉ carea (2 Timoteo 3:1, 4; 2 Pedro 3:3, 13). Maʉ̃ bʉrʉ dadjirãba ãbaa jʉreɗida panʉa carebaɗi carea dadji djabarãme. Leadua Hebreo 10:24, 25.

 Dadji dji biarã quĩrĩã panʉda Ãcõrẽda mãwãra ara caita pananida Ãcõrẽme. Ãbaa jʉrebʉdaɗe Beɗea ɓeara Jeowaɗebemarame poya cawaɗida dewara ẽberãrãba ĩjã quĩrĩã panʉda Ãcõrẽra maʉ̃ bẽrã ãdjirãba poya carebaɗida bʉra. Leadua Romano 1:11, 12.

Ara caita ɓai carea Ãcõrẽme bio quĩchaida ɓʉa bʉa cawaɗara Ãcõrẽ Beɗeaɗebemada. Quĩchadua ʉ̃rãga biada idjaɓa Ãcõrẽba oira. Jãʉ̃gʉra oibʉrʉ idjaɓa ʉ̃taa dji idibʉrʉ bia unuida Ãcõrẽra idjia bio quĩrĩã ɓʉ bẽrã idjaɓa bio ne cawa ɓʉ bẽrã. Leadua 1 Timoteo 4:15, 16.

Aɓabe bʉrʉ ara caita ɓaida Ãcõrẽme ĩjã ɓʉbʉrʉ idjiɗeda. Ejemploda, tʉbʉ urua quirãmãrẽã mãsa tʉbʉ uru eɗa ɓʉeɗida, ara maʉ̃ quĩrãca dadjirãba bio quĩchaɗidabara idjaɓa ʉ̃taa dji idiɗidabara ĩjãnamãrẽã Ãcõrẽnera. Leadua Mateo 4:4; Hebreo 11:1, 6.

Jeowara bio sopuabarida idji quĩrĩã panʉ carea. Maʉ̃ bʉrʉ idjia dadjirãra poya waga ɓʉda, poya jaradiaida mĩga ĩjãni carea idjiɗeda idjaɓa poya carebaida dãrã panani carea (Salmo 91:1, 2, 7-10). Ãcõrẽba jaradia ɓʉda dadjirãba cawaɗamãrẽã cãrẽda oɗida ɓʉsriɗa panani carea idjaɓa dadji cacua bia ɓeaɗamãrẽã. Leadua Santiago 1:25; 4:4, 8.