BEƊEA 2
¿Caida Ãcõrẽ?
1. ¿Cãrẽã bia beɗeaɗida panʉa Ãcõrẽa?
Ãcõrẽba ne jũmada osia. Idjira aɓeɗa ɓasida idjaɓa dãrã ɓaida (1 Timoteo 1:17). Bibliaba jara ɓʉra jũma beɗeara biara ɓʉda Ãcõrẽnebemada (1 Timoteo 1:11). Idjia dadjirã oɗa bẽrã, aɓabe bʉrʉ dadjirãba ĩjãnida panʉa idjaɓa bia beɗeaɗida panʉa. Leadua Apocalipsi 4:11.
2. ¿Sãwã ɓʉda Ãcõrẽra?
Ni aɓaʉba idjira ununacaa idjira jaure bẽrã. Idjira dadjirã quĩrãca ɓʉẽ́a (Juaʉ̃ 1:18; 4:24). Baribʉrʉ poya cawaɗida idjira sãwã ɓʉda unubʉdaɗe idjia oɗara. Ne jara ɓʉ quĩrãca, dadjirãba unu panʉne nepõnõda wa nejõda poya cawaɗida idjia wãrã arada bio quĩrĩã ɓʉda, idjira boro biada. Idjaɓa bajã unubʉdaɗe poya unu panʉda idjira ʉɓʉa ɓʉda. Leadua Romano 1:20.
Biblia lea panʉneba cawa panʉda Ãcõrẽra. Jãma jara ɓʉda idjia sãwã oida ẽberãrãra, cãrẽda quĩrĩã ɓʉra, cãrẽda quĩrĩãcada idjaɓa idjira sãwãbʉrʉ ɓʉda. Leadua 1 Juaʉ̃ 4:8; Santiago 4:6.
3. ¿Ãcõrẽ trʉ̃ bara ɓʉda?
Jesuba jarasia: “Daira Zeza bajãne ɓʉ, bʉ trʉ̃rã bio bia quirua” (Mateo 6:9, TNM). Ãcõrẽra zocãrã titulorã bara ɓʉmĩna aɓabe bʉrʉ ɓʉda idji trʉ̃ arada. Beɗeaza Ãcõrẽ trʉ̃ awara jara ɓʉda. Ẽberã beɗeaɗe jarabadada Jeowa, idjaɓa jarabadaa Yavé. Salmo 83:18ɗe jara ɓʉ: “Ẽberãrãba cawaɗamãrẽã bʉ trʉ̃ra Jeowada, aɓabe bʉdrʉ dji Dromara ɓʉda dewara ɓea cãyãbara”. Leadua Salmo 83:18 (82:19 ʉ̃cʉrʉ Bibliarã).
Zocãrã Bibliarã aɓabe jarabadaa Ãcõrẽ wa Zeza, baribʉrʉ Ãcõrẽ trʉ̃ra ɓʉɗaẽ́da. Baribʉrʉ Ãcõrẽba ɓʉbisiɗe idji beɗeada, idji trʉ̃ra Bibliaɗe ɓabadjida ɓarima 7 mil auɗu. Maʉ̃ carea Jesuba ẽberãrãa Ãcõrẽ trʉ̃da cawabisia. Leadua Juaʉ̃ 17:26.
Acʉdua dji video ¿Ãcõrẽ trʉ̃ bara ɓʉda?
4. ¿Ãcõrẽra sopuabarida dadjirã itea?
Zeze bia quĩrãca, Ãcõrẽba bio carebaida dadjirã dãrã pananamãrẽã
Jeowaba wãrãda quĩrĩã ɓʉbʉrʉ dadjirãra, ¿cãrẽ cãrẽã Ãcõrẽba idu djuburiabibarida? Ʉ̃cʉrʉba jarabadada Ãcõrẽba ne cadjirua dia ɓʉda. Baribʉrʉ jãʉ̃ra sewada. Leadua Santiago 1:13.
Jeowaba õgo obicada dadjirãra ĩjãnamãrẽã idjiɗera, maʉ̃ cãyãbara idjia iduaribibarida dadjirãba jaraɗi carea cãrẽda o quĩrĩã panʉda. Bia ɓʉaɗa aɗida panʉa Ãcõrẽa idu ĩjãbibari bẽrã (Josue 24:15). Baribʉrʉ zocãrã ẽberãrãba cadjirua obadaa maʉ̃ bʉrʉ dadjirãra mĩã djuburia panʉda. Jeowara sopua ɓʉda unubʉrʉɗe jãʉ̃ ne cadjirua. Leadua Genesi 6:5, 6.
Jeowaba bio quĩrĩã ɓʉda dadjirã. Maʉ̃ carea idjia quĩrĩã ɓʉda dadjirãra bia duananida. Dãrãẽ́ne idjia jõbiya jũma cadjiruara idjaɓa ẽberã cadjiruarã. Maʉ̃misa idjia cawa ɓʉa cãrẽ cãrẽã idu djuburiabibarida. Dji beɗea 8ɗe mãsa jaradiaida jãʉ̃ beɗeaɗe. Leadua 2 Pedro 2:9; 3:7, 13.
5. ¿Sãwã poya ara caita ɓaida Ãcõrẽme?
Jeowaba quĩrĩã ɓʉda dadjirãra ara caita pananida idjimaa ʉ̃taa dji idi panʉne. Idjira sopua ɓʉda dadjirã carea, aɓa aɓaʉ carea (1 Juaʉ̃ 5:14). Idjia dadji ne cadjirua quĩrãdoaida. Idjia unu ɓʉda dadjirãba o panʉra ĩjãnamãrẽã idjia quĩrĩã ɓʉra eɗauɗe cadjirua o panʉmĩna. Maʉ̃ba dadjirãra jipaẽ́ panʉmĩna, poya ara caita pananida Ãcõrẽme dji biarã panani carea. Leadua 1 Juaʉ̃ 1:9; Santiago 4:8.
Dadjirãba quĩrĩãnibara Jeowara idjia dadjirã oɗa bẽrã (Marco 12:30). Bʉa poya cawabi ɓʉda wãrãda quĩrĩã ɓʉda cawa ɓʉbʉrʉ idjiɗeɗebemada idjaɓa ĩjã ɓʉbʉrʉ idjia jaraɗara, jãʉ̃da jãwã oibʉrʉ bʉra ara caita ɓaida Ãcõrẽme. Leadua 1 Timoteo 2:4; 1 Juaʉ̃ 5:3.
