BEƊEA 4
¿Caida Jesucrito?
1. ¿Caiba osi Jesura?
¿Cãrẽã ẽberãrãra ara caita panana quĩrĩã panasiɗaa Jesume? (MATEO 11:29; MARCO 10:13-16).
Idjira ẽberã quĩrãca ɓʉẽ́da, idjira jaure ɓasida naʉ̃ ẽjũãnaa zei naẽna (Juaʉ̃ 8:23). Jeowaba naãrã osida Jesura. Ãcõrẽba ne jũmada idjiɗeba osia. Jeowaba idjiduɓa osida dji warrada maʉ̃ bʉrʉ Ãcõrẽ Beɗeaba jara ɓʉda idjira Ãcõrẽ warra aɓabe ɓʉda (Juaʉ̃ 1:14). Idjaɓa jara ɓʉda idjira “Beɗea” abadada, dji zeze beɗeada jaraɗa bẽrã. Leadua Colosa 1:15, 16.
2. ¿Cãrẽ cãrẽã Jesura zesida naʉ̃ ẽjũãnaa?
Ãcõrẽba idji warra naʉ̃ ẽjũãnaa diabuesia. Maʉ̃ carea Ãcõrẽba ne ununacaa osia Mariara biogoabisia. Idjira awẽrã ɓasida, Juda puruɗebemada. Maʉ̃ bẽrã Jesu zezera naʉ̃ ẽjũãnebemaẽ́ ɓasida (Luca 1:30-35). Idjia naʉ̃ ẽjũãne zesida ne ũbea oi carea: 1) jaradiai carea wãrã arada Ãcõrẽnebemada, 2) jaradiai carea idjia oɗaɗeba, dadjirãba oɗi carea Ãcõrẽba quĩrĩã ɓʉra beɗea dromara eropanʉmĩna, 3) idjaɓa beui carea jũmarã ẽberãrãda “ẽdrʉ ɓʉi carea”. Leadua Mateo 20:28.
3. ¿Cãrẽneba ẽdrʉ ɓʉsida Jesuba?
Poya pagaida parataba ẽdrʉi carea ẽberã beaɗia eropanʉda (Exodo 21:29, 30). Ãcõrẽba quĩrĩãẽ́ ɓʉda beuɗira, drõã baɗi siɗa. Jãʉ̃ra jãwa cawa panʉda Jeowaba jaraɗa bẽrã Adaʉ̃ cadjirua oibʉrʉ poya beui ɓasida. Baribʉrʉ Adaʉ̃ba ĩjãnabara beuẽ́ ɓacasia (Genesi 2:16, 17; 5:5). Bibliaba jara ɓʉda Adaʉ̃neba cadjiruara “naʉ̃ ẽjũãne zesia” idjaɓa dadji beuɗira zesia. Jãʉ̃ra jãwã jara quĩrĩã ɓʉda jũmarãba cadjirua obada bẽrã beubadaa. Maʉ̃ carea jũmarãda ẽdrʉɗida panʉa. Leadua Romano 5:12; 6:23.
¿Caiba poya ẽdʉbiya dji cadjiruaɗebemada idjaɓa beuɗaɗebemada? Bʉdjiduɓa cadjirua o ɓʉ carea bʉra beuida. Baribʉrʉ dewara cadjirua o panʉ carea ni aɓaʉda poya beuẽ́da. Leadua Mateo 16:26.
4. ¿Cãrẽã Jesura beusi?
Jesura jipa ɓasida, cadjirua ocaa ɓasida. Maʉ̃ carea idjia beuẽ́ ɓasida idji cadjirua o ɓʉ carea, maʉ̃ cãyãbara idjira beusida dadji ne cadjirua carea. Ãcõrẽba diabuesiɗe idji warra acʉbisida idjia ẽberãra bio quĩrĩã ɓʉda. Jesu biɗa acʉbisida wãrãda quĩrĩã ɓʉda dadjirãra. Maʉ̃ bʉrʉ idjia jũma ĩjãsida dji zezeɗera idjaɓa beusida ẽdrʉbi carea dadjirãra, dadji cadjiruaɗebemada beuɗaɗebema siɗa. Leadua Juaʉ̃ 3:16; Romano 5:18, 19.
Acʉdua dji video ¿Cãrẽã Jesu beusi?
5. ¿Cãrẽda o ɓʉ Jesura iɗi ewariɗera?
Jesura zesiɗe naʉ̃ ẽjũãnaa biabicuasida cacua caya queɗeara, ʉ̃rẽbabicuasi beuɗarã idjaɓa carebasida ẽberãrã djuburia queɗeaɗara. Jãʉ̃gʉba acʉbisida idjia cãrẽda poya oida ewari zebʉrʉɗera Ãcõrẽ ĩjãbadarãra (Mateo 15:30, 31; Juaʉ̃ 5:28). Jesuba beusiɗe Ãcõrẽba ʉ̃rẽbabisida wãya bajãne ɓai carea (1 Pedro 3:18). Mãwãnacare Ãcõrẽ jʉwa araare chũmesia idjia ʉɓʉa diabʉrʉ daucha eroɓai carea naʉ̃ ẽjũãra (Hebreo 10:12, 13). Naʉ̃ ewariɗera Jesura eroɓʉda bajãra maʉ̃ carea dji ẽpẽbadara jaradia panʉda jãʉ̃ beɗea biara nama ẽjũãnebemara. Leadua Apocalipsi 11:15; Mateo 24:14.
Ãcõrẽba Jesua ʉɓʉada diaɗa bẽrã idjira Boro ʉɓʉa ɓʉda jõbi carea ẽberã cadjiruarãra idjaɓa jõbiya ne cadjiruara. Jũma Jesu ĩjãbadara idjaɓa ĩjã panʉra dãrã pananida ẽjũã quĩrãwãrẽãne. Leadua Mateo 5:5.
