BEƊEA 8
¿Cãrẽã Ãcõrẽba idu djuburiabibarida idjaɓa ne cadjirua iduaribibarida?
1. ¿Sãmaʉba zesida ne cadjirua?
Ãcõrẽba idu ɓʉsida ẽberãrãba dãrã manda panʉ acʉbi carea ẽberãduɓa poya ara oẽ́da naʉ̃ ẽjũãra
Ne cadjirua zesida naʉ̃ ẽjũãnaa Diauruɗeba, idjia sewa jarasiɗe. Idjira bajãnebema nezocaa, sobia ɓasida idjaɓa jipa ɓasida baribʉrʉ “wãrãneba ɓacaa” (Juaʉ̃ 8:44). Idjia quĩrĩãsida ẽberãrãba bia beɗeaɗida idjía maʉ̃ bʉrʉ cũrũgasida Evara ĩjãrãmãrẽã Ãcõrẽneda. Adaʉ̃ siɗa ĩjãẽ́ ɓasida Ãcõrẽnera maʉ̃ bʉrʉ naʉ̃ ewariɗera djuburia panʉda idjaɓa beubadada. Leadua Genesi 3:1-6, 19.
Satanaba sewa jarasiɗe Eva idjira quĩrũ ɓesida Ãcõrẽme. Diauruba carebaẽ́ ɓasida Ãcõrẽ boroda, aɓabe Jeowababʉrʉ poya manda ɓʉmĩna. Zocãrã ẽberãrãba ẽpẽ panʉda Diauruɗeda idjaɓa ũrĩ panʉda idjia jara ɓʉra maʉ̃ bʉrʉ idjira “naʉ̃ ẽjũãnebema borora”. Leadua Juaʉ̃ 14:30; 1 Juaʉ̃ 5:19.
2. ¿Jũma ne cadjirua naʉ̃ ẽjũãnebemara zebʉrʉda Ãcõrẽneba?
Jeowaba jũma oɗara jipa ɓʉda. Idjia jipa osia ẽberãrãda bajãnebema nezocarã siɗa ãdjirãba ĩjãnamãrẽã jũma beɗeada Ãcõrẽneda (Deuteronomio 32:4, 5). Baribʉrʉ Ãcõrẽba ni aɓaʉa õgo obicada ĩjãnamãrẽã idji beɗeara maʉ̃ cãyãbara dadjirãba ĩjã panʉda idjira quĩrĩã panʉ bẽrã. Leadua Santiago 1:13-15; 1 Juaʉ̃ 5:3.
3. ¿Cãrẽ cãrẽã Ãcõrẽba idu djuburiabibarida?
Jeowaba idu djuburiabibarida. ¿Cãrẽã? Jũmarãba cawaɗamãrẽã ni aɓaʉ ẽjũãnebema bororãba poya carebaɗaẽ́da ẽberãrã (Eclesiastés 7:29; 8:9). Dãrã ɓaɗacare jũmarãba wãrãda cawasiɗada ẽberãrã bororãba poya jõbiẽ́da dji cadjirua, djõbada ni quĩrãtanoa cacua biẽ́ ɓeada. Leadua Jeremías 10:23; Romano 9:17.
Baribʉrʉ ẽberã ĩjãbadarãba Ãcõrẽra bia pananida (Isaías 48:17, 18). Dãrãẽ́ne Jeowaba jõbiya ẽjũãnebema bororã aɓabe bʉrʉ naʉ̃ ẽjũãne pananida ẽberã carebabadara Ãcõrẽ boroda (Isaías 11:9). Leadua 1 Corinto 15:24.
Acʉdua dji video ¿Cãrẽã Ãcõrẽba idu djuburiabibarida?
4. ¿Sãwã careba ɓʉda Ãcõrẽba droa ɓʉ?
Satanaba jarasida ẽberãrãba jũma eropanʉra diaia ãdjiduɓa bia pananamãrẽã. Maʉ̃ bʉrʉ Ãcõrẽba droa ɓʉda naʉ̃ ewari daucha. Ẽberãza ãdji oɗaɗeba poya acʉbiɗida Diaurura sewa obaria idjaɓa poya acʉbiɗida careba panʉda Ãcõrẽ boroda. Leadua Job 1:8-12; Proverbios 27:11.
5. ¿Cãrẽda poya oɗida Ãcõrẽ araare panani carea?
Dadjirãba o panʉra acʉbi panʉ wãrã arada quĩrĩã panʉbʉrʉ Ãcõrẽ Boroda
Dairãba jʉrʉɗibara wãrã arada Ãcõrẽ Beɗeaba jara ɓʉra idjaɓa oɗida Ãcõrẽba quĩrĩã ɓʉra (Juaʉ̃ 4:23). Jesu quĩrãca politicara oɗacada, djõnacada, aɓabe bʉrʉ careba pananida Ãcõrẽ Boroɗeda. Leadua Juaʉ̃ 17:14.
Satanaba quĩrĩã ɓʉda ẽberãrãda ne cadjirua oɗida, ejemploda auɗua nĩbaɗi carea. Jãʉ̃ ne cadjiruarã igarabʉdaɗe dadji cuariara, dadji biarã siɗa eɗauɗe ipiɗa panʉda ĩjãnaẽ́ bẽrã Ãcõrẽneda (1 Pedro 4:3, 4). Jãʉ̃ra mãwã panʉne cãrẽda poya oɗi. ¿Jʉrʉɗida ẽberã Ãcõrẽ quĩrĩã ɓeada? ¿Ãcõrẽ Beɗea ĩjã pananida? Ĩjã panʉbʉrʉ Ãcõrẽneda beɗea droma eropanʉmĩna acʉbi panʉda Satanara sewa jarasida. Leadua 1 Corinto 6:9, 10; 15:33.
Ãcõrẽba quĩrĩã ɓʉ bẽrã dadjirãra, jõbiya jũma ne cadjirua dji djuburia siɗa. Jãʉ̃da ĩjã panʉbʉrʉ dãrã pananida naʉ̃ ẽjũãne. Leadua Juaʉ̃ 3:16.
