BEƊEA 5
¿Cãrẽã Ãcõrẽba osi naʉ̃ ẽjũãra?
1. ¿Cãrẽã Ãcõrẽba osi naʉ̃ ẽjũãra?
Jeowaba osia naʉ̃ ẽjũãra ẽberãrãra nama pananamãrẽã. Ãcõrẽba osiɗe Adaʉ̃ Evame, idjia oẽ́ ɓasida ãdjirãra ʉ̃taare pananamãrẽã. Ãcõrẽba naẽna osida bajãnebema nezocarã ʉ̃taare panani carea idjia ɓʉɗa quĩrãca (Job 38:4, 7). Jeowaba ẽberã nabema edapeɗa ẽjũãne ɓʉsia neú iɗa biya quiruɗe trʉ̃ jarasida Edeʉ̃ (Genesi 2:15-17). Jeowaba quĩrĩã ɓasida ãdjirãra dji yõnarã siɗa dãrã pananida naʉ̃ ẽjũãne. Leadua Hecho 17:26; 1 Juaʉ̃ 2:17.
Baribʉrʉ ẽjũã jũma quĩrãwãrẽãẽ́ ɓasida. Adaʉ̃ Evame warra zocãrã ununibara naʉ̃ ẽjũã birai carea. Pĩãca pĩãca naʉ̃ ẽjũãra ãdji jʉwa eɗa eroɓeaɗi ɓasia idjaɓa ẽjũãra mera quiru ɓaida (Genesi 1:28). Ẽjũãra waa jõẽ́ ɓai ɓasida. Leadua Mateo 5:4.
Acʉdua dji video ¿Cãrẽã Ãcõrẽba osi naʉ̃ ẽjũãra?
2. ¿Cãrẽ cãrẽã iɗi naʉ̃ ẽjũãra quĩrãwãrẽã ɓʉẽ́da?
Adaʉ̃ba Eva biɗa ĩjãnaẽ́ ɓasiɗaa Ãcõrẽ beɗeada maʉ̃ carea ãdjirã ẽjũã Edeʉ̃nebemada Ãcõrẽba ãyã jʉretasia. Maʉ̃ bẽrã ẽjũã quĩrãwãrẽã aduasiɗada, maʉ̃ bʉrʉ ni aɓaʉba jãma poya pananaẽ́da. Ãcõrẽ Beɗeaba jara ɓʉda ẽberã cadjiruarãba “wetara cadjiruara o wãnia” (2 Timoteo 3:13). Leadua Genesi 3:23, 24.
¿Jeowa quĩcha ɓaɗara igarasida? Mãwãẽ́a. Ãcõrẽra ʉɓʉa ɓʉda maʉ̃ carea idji beɗea wãrã arada (Isaías 45:18). Ewari zebʉrʉɗera, Ãcõrẽba oira idjia quĩcha ɓaɗa ẽberãra bia pananida idjia quĩrĩã ɓʉ quĩrãca. Leadua Mateo 5:5.
3. ¿Sãwã biya ɓaida naʉ̃ ẽjũãra?
Jesura dji Borora Ãcõrẽ Boroɗebemada, maʉ̃ bẽrã idjia ẽjũã bia quirua oida. Idjia bajãnebema nezocarãme Ãcõrẽ dji quĩrũrãra jõbiya idji djõnaneba trʉ̃ jarabada Armagedoʉ̃. Idjia Satana jidapeɗa mil poa jõ ɓʉsia cũrũgaɗa bẽrã Adaʉ̃ Eva siɗa ĩjãnaẽ́ ɓaɗa bẽrã Ãcõrẽ beɗeara. Ãcõrẽ ĩjãbadarãra ẽdrʉɗia, Jesuba carebai bẽrã idjaɓa bio wagai bẽrã. Ẽjũã pananara dãrã pananida ẽjũã quĩrãwãrẽãne. Leadua Apocalipsi 20:1-3; 21:3, 4.
4. ¿Sãʉ̃be djuburiara jõbiya?
¿Sãʉ̃be Ãcõrẽba jõbiya ne cadjirua? Jesuba “sẽya” jarasida cawaɗamãrẽã sãʉ̃be jõbiya jũma ne cadjirua. Ne jũma ne cadjirua mãwã panʉne naʉ̃ ewariɗera acʉbi ɓʉda “naʉ̃ ewarira jõbʉrʉda”. Leadua Mateo 24:3, 7-14, 21, 22.
Jesuba eroɓebʉrʉɗe naʉ̃ ẽjũãra mil poaɗe, maãrĩ maãrĩ idjia jõbida jũma ne cadjirua (Isaías 9:6, 7; 11:9). Jesura dji Boro ɓaida idjaɓa Sacerdote ɓaida, maʉ̃ bʉrʉ Ãcõrẽ ĩjãbadarãba waa ne cadjirua oɗacaa. Ãcõrẽba Jesuɗeba jõbiya quĩrãtanoa cacua biẽ́ ɓeara, drõãɓabadara idjaɓa beubadara. Leadua Isaías 33:24; 1 Corinto 15:26.
5. ¿Cairãdrʉ ẽjũã quĩrãwãrẽãne pananida?
Ẽberãrã wãbadaa ãbaa jʉrebadamae, ununida ẽberã sobiara bio quĩrĩã panʉda Ãcõrẽra idjaɓa ĩjã quĩrĩã panʉda idjira
Ẽberã ĩjãbadarãra Ãcõrẽneda ẽjũã quĩrãwãrẽãne panania (1 Juaʉ̃ 2:17). Jesuba dji ẽpẽbadarãa jarasida wãni ɓasia ẽberã sobiara jaradiaɗi carea Ãcõrẽba jara ɓʉra idjia bia unui carea. Iɗi, Jeowaba careba ɓʉda ẽberãra zocãrã ẽjũã quĩrãwãrẽãne panani carea (Sofonías 2:3). Ẽberãra wãbada ãbaa jʉrebadamae Beɗea ɓeara Jeowaɗebemarame bio cawa panʉda dji quimame bia ɓai carea idjaɓa cawa panʉda cãrẽ beɗea biada Ãcõrẽba jara ɓʉda bia wãi carea. Leadua Apocalipsi 15:4.
