BEƊEA 7
¿Cãrẽda maʉ̃ Ãcõrẽ Boro?
1. ¿Cãrẽda maʉ̃ Ãcõrẽ Boro?
¿Cãrẽã Jesura dji Boro bio biara ɓʉda? (MARCO 1:40-42).
Dji boro bajãnebema. Jãʉ̃ boroba carebaida Ãcõrẽba quĩrĩã ɓʉra oi carea bajãnebema ẽjũãnebema siɗa. Jãʉ̃ boro bio biara ɓʉda ẽberãrã carea. Jãʉ̃gʉ boroba jõbiya dji bororã naʉ̃ ẽjũãnebemara. Aɓabe jãʉ̃ borodrʉ dãrã ɓaya idjaɓa carebaida jũmarãda ãbaa duanani carea. Jãʉ̃gʉ beɗea biara. Leadua 1 Corinto 15:24; Mateo 6:9, 10; 24:14.
Jũmarã bororãba quĩrĩã panʉda ãdji boroda. Maʉ̃ carea Jeowaba jʉrʉ edasida idji Warrada, Jesucrito, dji Boro ɓamãrẽã Ãcõrẽ Boroɗebemada. Leadua Apocalipsi 11:15.
Acʉdua dji video ¿Cãrẽda maʉ̃ Ãcõrẽ Boro?
2. ¿Cãrẽ cãrẽã Jesura dji Boro bio biara ɓʉda?
Ãcõrẽ warrara dji Boro bio biara ɓʉda sobia ɓʉ bẽrã idjaɓa ariɗe ɓʉ bẽrã (Mateo 11:28-30). Idjira ʉɓʉa ɓʉda maʉ̃ carea poya carebaida ẽberãra naʉ̃ ẽjũã eroɓebʉrʉɗe jũma ara oi carea. Jesuba ʉ̃rẽbapeɗa bajãnaa wãsida, maʉ̃be Ãcõrẽ jʉwa araare chũmesia mama jʉ̃ã ɓasida Ãcõrẽba ʉɓʉada diabʉrʉ daucha. Mãwãnacarea Ãcõrẽba ʉɓʉara diasia. Leadua Hebreo 10:12, 13.
3. ¿Cairãba mãsa mandaɗida Jesume?
Ãcõrẽ Beɗeaba jaraɗa quĩrãca dewara ẽberãrãba mandaɗida idjime Ãcõrẽ Boroɗe (Luca 22:28, 29; Daniel 7:27). Naãrãbema Ãcõrẽba jʉrʉ edasida Jesu nĩbabadara. Jeowaba naʉ̃ ewariɗe eɗa jʉrʉ eda ɓʉda ẽberã biara, umaquĩrã wẽrã siɗa mandaɗi carea Jesume. Jesu quĩrãca jãʉ̃ ẽberãrãba beuɗapeɗa ʉ̃taa wãnida jãma pananamãrẽã. Leadua Juaʉ̃ 14:1-3; 1 Corinto 15:42-44.
¿Jũmasã bajãnaa wãnida? Ãcõrẽ Beɗeaba jara ɓʉda ẽberã zocãrãẽ́ panʉdrʉ ʉ̃taa wãnida, Jesuba trʉ̃ jarasida “cãbana panʉẽ́” (Luca 12:32). Ẽberã mandabadara Jesume naʉ̃ ẽjũãra 144 mil panʉda. Leadua Apocalipsi 14:1.
4. ¿Cãrẽda mãwãsi Jesuba manda ɓʉ eɗa?
Jesura manda ɓʉda poaga 1914 eɗa, ara maʉ̃da idjia Satanara idjiare panʉ siɗa ẽjũãnaa ɓatabuesiɗaa. * Diaurura bio quĩrũ ɓʉ bẽrã naʉ̃ ẽjũãne zocãrã bio cadjirua o ɓʉda (Apocalipsi 12:7-10, 12). Jãʉ̃ ewariɗe eɗa ẽberãrã wetara cadjirua o wãnia. Naʉ̃ ewariɗera djõbada, de uremiada, quĩrãtanoa cacua biẽ́ ɓeada idjaɓa jarrabada. Naẽnaena Ãcõrẽ Beɗeaba jarasida jãʉ̃gʉra naʉ̃ ewariɗera mawãi ɓasia. Dãrãẽ́ne Ãcõrẽ Boroba ara oida naʉ̃ ẽjũãra. Leadua Luca 21:7, 10, 11, 31.
5. ¿Cãrẽda o ɓʉda iɗi Ãcõrẽ Boroba idjaɓa cãrẽda oida ewari zebʉrʉɗera?
Ãcõrẽ Beɗea jaradia panʉneba, Ãcõrẽ Boroba ẽberãrãda zocãrã ãbaa jʉre panʉ druazabemada. “Ẽberãrãda zocãrã” umaquĩrã wẽrã siɗa sobiara ĩjã panʉda Jesuɗeda. Ãcõrẽ Boroba ãdjirãra ẽdrʉbiya idjia jõbʉrʉɗe naʉ̃ ẽjũã cadjiruara. Maʉ̃ bẽrã dadjirãba ne biada eropanana quĩrĩã panʉbʉrʉ ĩjãnida panʉa Jesuɗeda. Leadua Apocalipsi 7:9, 14, 16, 17.
Jesuba carebaida ẽberãra bia duananamãrẽã Ãcõrẽ Boroɗeba Ãcõrẽba quĩcha ɓaɗa quĩrãca naẽna. Ẽjũãra mera quiruda ɓaida. Mãwãnacarea Jesuba idji Zeza dji Boro jiruãbẽrã diaida (1 Corinto 15:24-26). ¿Bʉa beɗea quĩrĩã ɓʉda dewarame jãʉ̃ beɗeaɗe? Leadua 2 Pedro 3:13.
^ par. 6 Mĩga cawai carea poagaɗe 1914ɗe, acʉdua páginarã 217-220 libroɗe ¿Qué nos enseña la Biblia?
