Ãcõrẽba ãbaa jʉrebisida Abrahaʉ̃neba yõnara idjaɓa Ãcõrẽba diasida ley ĩjãnamãrẽã. Jãʉ̃ purura trʉ̃ jarabada Israel. Ãdjirãba bia beɗeasiɗada Ãcõrẽneda idjaɓa bio cawasiɗada Ãcõrẽ beɗeara (Salmo 147:19, 20). Ãdjirãneba ẽberã zocãrã dewara puruɗebemara bia beɗeasiɗada Ãcõrẽra. Leadua Genesi 22:18.

Ãcõrẽba jʉrʉ edasida israelitarãra beɗeaɗi carea idjiɗeɗebemada. Ãdjirãba o ɓaɗara acʉbi ɓʉda dadjirãba ĩjã panʉbʉrʉ Ãcõrẽ Beɗeara dji leyra siɗa bia wãnida (Deuteronomio 4:6). Israelitarãneba dewara ẽberãra poya cawaɗi ɓasia Jeowara Ãcõrẽ wãrãda. Leadua Isaías 43:10, 12.

Ãcõrẽba igarasiɗe dji puru Israel cadjirua obada bẽrã Jeowaba jʉrʉ edasida idji carea dji congregacioʉ̃ critiana (Mateo 21:43; 23:37, 38). Maʉ̃ bʉrʉ naʉ̃ ewariɗera critianorãba wãrãda ĩjã panʉda Jeowaɗeda idjaɓa beɗea panʉda idjiɗeɗebemada. Leadua Hecho 15:14, 17.

Jesuba jʉrʉ edasida dji ẽpẽbadara ãdjirãba jaradiaɗi carea Ãcõrẽ Beɗeara idjaɓa carebaɗi carea dewarara borocueɗi carea (Mateo 10:7, 11; 24:14; 28:19, 20). Iɗi jaradia panʉda Ãcõrẽ Beɗea jũma ẽjũãne. Naʉ̃ ewariɗera Jeowaba ãbaa jʉrebi ɓʉda ẽberã zocãrã puruzabemada ĩjãnamãrẽã idjiɗeda dji religioʉ̃ wãrãneba (Apocalipsi 7:9, 10). Critianorãba wãrã arada ãbaa panʉne carebaɗida panʉda ãdjirãya idjaɓa aɓarida estudiabadada ẽjũã enteroda ãbaa jʉre panʉne. Leadua Hebreo 10:24, 25.

1870 eɗa ẽberã zocãrãẽ́ panʉ Ãcõrẽ Beɗea cawabadara bio estudiasiɗada Bibliaba jaraɗara dji wãrãda ununi carea. Jesuba jʉrʉ pesida ẽberãrãra ãbaa panani carea idji congregacioʉ̃ne. Jãʉ̃ ewariɗe eɗa jaradiaɗa Ãcõrẽ Beɗea naʉ̃ ẽjũãne jũmarãba cawaɗamãrẽã Ãcõrẽ Boroba oira. Poaga 1931ɗe Ãcõrẽ Beɗea cawabadara awara trʉ̃ ɓʉsiɗaa Beɗea ɓeara Jeowaɗebema abadaa. Leadua Hecho 1:8; 2:1, 4, 11; 5:42.

Siglo naãrãbema jũma congregacioʉ̃nera critianorãra ũrĩsiɗada dji djabarã bororã baribʉrʉ dji boro aɓabe ɓʉda Jesura (Hecho 16:4, 5). Ara maʉ̃ quĩrãca dadjirãra Beɗea ɓeara Jeowaɗebemara iɗi ewariɗera zocãrã bara panʉ bẽrã naʉ̃ ẽjũãne dji djabarã bororãba carebaɗida dadjirãba jaradiaɗi carea Ãcõrẽ Beɗea. Ãdjirãra carebaɗida dji sucursalerã, Ãcõrẽ derã, bio cawa panʉ bẽrã. Ãcõrẽ deɗera beɗea aɓa dewara beɗeada o panʉda idjaɓa cartara zocãrã diabueɗida 800 beɗeara auɗu. Djabarã bororãba Bibliaɗeba jaradia panʉda 120 mil congregacioʉ̃ auɗu naʉ̃ ẽjũãnebemara. Congregacioʉ̃ra djabarã wagabadarãba bio waga panʉda Ãcõrẽ purura. Leadua 1 Pedro 5:2, 3.

Beɗea ɓeara Jeowaɗebemarãba jaradia panʉda beɗea bia Ãcõrẽnebemada puruzabema. Jesu nĩbabadara quĩrãca jaradia panʉda Ãcõrẽ Beɗea deza (Hecho 20:20). Dadji organizacioʉ̃ dadji cuariara quĩrãca ɓʉda. Maʉ̃ carea dadjirãya jarabadada djabarã, djabawẽrãrã siɗa; Jeowara dadji zeze quĩrãca maʉ̃ bʉrʉ bio wagabarida dadjirãra (2 Tesalonica 1:3). Ĩjã panʉ bẽrã dadji Ãcõrẽra idjaɓa quĩrĩã panʉ bẽrã djãrãra daira bio ɓʉsriɗa panʉda dewara cãyãbara. Leadua 1 Pedro 2:9.