Ãcõrẽba bio quĩrĩã ɓʉda ẽberãrãra bia pananida. Idjia quĩrĩã ɓʉ bẽrã ẽberãda osia jũma ẽjũãnebemara. Dãrãẽ́ne Ãcõrẽba jõbiya jũma ne cadjirua, ẽberãrãra bia duananamãrẽã. Leadua 1 Timoteo 2:3, 4.

Ni aɓaʉ ẽjũãnebema bororãba jõbiɗacada ne cadjiruara, quĩrãtanoa cacua biẽ́ ɓaɗara, dadjirã beuɗira siɗa. Baribʉrʉ beɗea biada eropanʉda: Dãrãẽ́ne Ãcõrẽba jũma ẽjũãnebema bororãa jõbiya aɓabe idji borodrʉ dãrã ɓaya. Ãcõrẽba jãʉ̃ra obʉrʉɗe ẽberãrãra necai panania idjaɓa jipa duanania. Leadua Apocalipsi 11:15; 21:3, 4.

Ãcõrẽba jõbibara ẽberã cadjiruarã naʉ̃ ẽjũãnebemada dadjirãra mĩã djuburiaɗaẽ́da (2 Tesalonica 1:8). ¿Sãʉ̃be oida? Ãcõrẽ Beɗeaba naẽna jarasida cãrẽã iɗi mĩã djuburiaɗi ɓasia. Naʉ̃ ewariɗera mãwã panʉra acʉbi ɓʉda Ãcõrẽba dãrãẽ́ne jõbiya ne cadjiruara. Leadua 2 Timoteo 3:1-5.

Cawaɗibara Ãcõrẽnebemada Bibliaɗeba. Bibliara carta zezeɗe quĩrãca dji warrarã carea, idjia diaɗara bio quĩrĩã ɓʉ bẽrã. Ãcõrẽ Beɗeaba jara ɓʉda sãwã oɗi bia panani carea naʉ̃ ewariɗera idjaɓa dãrã panani carea ewari zebʉrʉɗera. Ʉ̃cʉrʉba quĩrĩãnacada bʉa cawaira Ãcõrẽ Beɗeara. Baribʉrʉ sopuaẽ́da, Ãcõrẽba ne zocãrã bia poya diaida bʉa cawa ɓʉbʉrʉ idjiɗeda. Leadua Luca 6:22, 23; Apocalipsi 14:6, 7.