Jeowara dadji Zeze idjia oɗa bẽrã idjira bio ne cawa ɓʉa dadjirã cãyãbara maʉ̃ bʉrʉ idjia quĩrĩã ɓʉda idjaɓa sopuabarida dadjirã carea. Dadjiduɓa bia poya wãnaẽ́da (Jeremías 10:23). Warrarãba necesita panʉda dji zezerã jipa edebarida ara maʉ̃ quĩrãca Ãcõrẽba jipa edebarida dadjirãra bia wãnamãrẽã (Isaías 48:17, 18). Bibliaba jara ɓʉra ne bari quĩrãca Ãcõrẽnebemada. Leadua 2 Timoteo 3:16.

Ãcõrẽ Beɗeaɗe Jeowaba jaradia ɓʉda leyra idjaɓa beɗea wãrãda Ãcõrẽnebemada dadjirãba ĩjã panʉbʉrʉ jãʉ̃ beɗeara bia pananida. Ãcõrẽba dadjirãda oɗa bẽrã idjia bio cawa ɓʉda cãrẽda bio biara ɓʉda dadjirã carea. Leadua Romano 15:4; Apocalipsi 5:11.

Ãcõrẽ Beɗeaba jara ɓʉda beɗea wãrãda Ãcõrẽnebemada, jãʉ̃gʉba poya careba ɓʉda cawaɗi carea cãrẽda poya oɗi. Baribʉrʉ leyra jarabadada cãrẽda oɗida panʉ idjaɓa cãrẽda oɗaiẽ́da panʉ (Hecho 15:29). Ne baridua obʉrʉɗe bio quĩchaida sãwã wãnida (Proverbios 2:10-12). Ejemploda, Ãcõrẽ Beɗeaba jara ɓʉda Ãcõrẽra dadji djibari. Idjia dadjirãra oɗa bẽrã dadjirãba bio wagaɗida panʉa dadji cacuara deda panʉne, trajaɗe wãbʉdaɗe, ãyã wãbʉdaɗe idjaɓa ne baridua o panʉne. Bio quĩrãcuita dadji cacuara idjaɓa wagaɗida panʉda djãrãra. Leadua Hecho 17:28.

Jesuba jarasida beɗea umé wãrãda. Ãcõrẽba oɗa bẽrã dadjirãra maʉ̃ carea dadjirãba cawaɗida  panʉ Ãcõrẽra, bio quĩrĩãnida panʉ idjira idjaɓa ĩjãnida panʉa. Ewariza quĩchaɗibara jãʉ̃gʉ beɗeara (Proverbios 3:6). Ĩjãnibʉrʉ idjia jara ɓʉra dji biarã pananida Ãcõrẽme, ɓʉsriɗa pananida idjaɓa dãrã pananida. Leadua Mateo 22:36-38.

Beɗea umé wãrãda jara ɓʉda bia duananida dewara ẽberãrãme (2 Corinto 13:4-7). Jãʉ̃gʉba jara quĩrĩã ɓʉda bia oɗida dewararãa Ãcõrẽba o ɓʉ quĩrãca. Leadua Mateo 7:12; 22:39, 40.

Dji beɗea wãrãda Ãcõrẽnebemada careba ɓʉda ãbaa panani carea dadji cuariarãme idjaɓa quĩrĩãni carea dadjirãya (Colosa 3:12-14). Ne jara ɓʉ quĩrãca Ãcõrẽ Beɗeaba jara ɓʉda mĩã cãĩnara ãbaa ɓeaɗida panʉ beubʉrʉ daucha. Leadua Genesi 2:24.

Ĩjã panʉne Ãcõrẽ Beɗea jara ɓʉra careba ɓʉda dadji trajuɗe idjaɓa traju jʉrʉɗe wãibʉrʉ. Ejemploda Ãcõrẽ Beɗeaba jara ɓʉda dadjirãba bia trajaɗibara idjaɓa sewa jaraɗaẽ́bara; djibarirãba jãʉ̃gʉra bio bia ununida. Ĩjã panʉbʉrʉ jãʉ̃ beɗeada traju poya ununida idjaɓa dãrã trajaɗida. (Proverbios 10:4, 26; Hebreo 13:18). Idjaɓa Ãcõrẽ Beɗeaba careba ɓʉda dadjirãra capipia pananamãrẽã dadjirãba eropanʉra idjaɓa bia sentiɗi carea dji biarã panʉ bẽrã Ãcõrẽme, jãʉ̃gʉra bio biara ɓʉda dewara cãyãbara. Leadua Mateo 6:24, 25, 33; 1 Timoteo 6:8-10.

Dji beɗea wãrãda Ãcõrẽnebemada careba ɓʉda bia panani carea (Proverbios 14:30; 22:24, 25). Ejemploda Ãcõrẽ Beɗeaba jara ɓʉda ne aseara beu doɗaẽ́da dadji cacua jipa panani carea idjaɓa ne cadjirua oɗaẽ́ carea (Romano 13:13). Jeowamaarã cadjirua ɓʉẽ́da maãrĩ itua doida baribʉrʉ idjia quĩrĩãcada dadjirãra ne aseara beu doɗaẽ́da (Salmo 104:15; 1 Corinto 6:10). Dji beɗea wãrãda Ãcõrẽnebemada jaradia ɓʉda dadjirãra ne bia oɗi carea idjaɓa bia quĩchaɗi carea (Salmo 119:97-100). Critiano wãrãrãda bio wayaɗida panʉa Ãcõrẽ Beɗeada bia wãnamãrẽã idjaɓa bio wayaɗi carea dadji Zeze Jeowara. Leadua Mateo 5:14-16.