BEƊEA 15
¿Caida Jesu?
Jesura naʉ̃ ẽjũãnebemaba bio cawa panʉda idjira trʉ̃ ɓʉga ɓʉda. Baribʉrʉ idji trʉ̃ ũrĩ panʉmĩna bia cawaɗacada idjira caida. Zocãrãrãba cawa panʉda idjiɗeɗebemada. ¿Cãrẽda Ãcõrẽ Beɗeaba jaradia ɓʉda idjiɗe?
1. ¿Caida Jesu?
Jesura jaureda idjira ʉɓʉa ɓʉ, bajãne ɓabarida. Jeowaba naãrã osida Jesura. Maʉ̃ bʉrʉ idjira trʉ̃ jarabada “Ãcõrẽ Warra iwina” (Colosa 1:15). Ãcõrẽ Beɗeaba trʉ̃ jarabari “idji Warra aɓa ɓʉda” aɓabe Jeowabʉrʉ osida idjira idjiduɓaʉba (Juaʉ̃ 3:16). Jesuba dji zeze Jeowaa carebasida ne jũma oi carea (Leadua Proverbios 8:30). Ãdjirã uména ãbaa caita panʉda naʉ̃ ewariɗera. Jesura beɗea abadada dji zezeba quĩrĩã ɓʉra jaraɗa bẽrã (Juaʉ̃ 1:14).
2. ¿Carea zesida Jesura naʉ̃ ẽjũãnaa?
2.000 poaga naẽna Jeowaba idji jaureɗeba ne ununacara osia. Jeowaba bajãneba ɓiogoabisia awẽrã trʉ̃ jarabadjiɗaa Maria. Maʉ̃ bʉrʉ Jesura tosi ẽberã quĩrãca (Leadua Luca 1:34, 35). Idjia zesida naʉ̃ ẽjũãnaa Mesia, Crito ɓai carea idjaɓa ẽberãrãa ẽdrʉbi carea. a Jũma Ãcõrẽ Beɗeaba jaraɗara Jesuɗeba ara mãwãsida, maʉ̃ bʉrʉ ẽberãrãba cawaɗi ɓasia Jesura “Ãcõrẽba ẽdrʉ edabari diai jaraɗaa, Ãcõrẽ zocai ɓʉ Warraa” (Mateo 16:16).
3. ¿Sãma ɓʉda Jesura?
Jesura beuɗacare, Ãcõrẽba ʉ̃rẽbabisida idjira jaure quĩrãca wãya bajãne ɓamãrẽã. Jãma “bajãne Ãcõrẽba idjira dji dromaara ɓʉsia” (Pilipo 2:9). Jeowara Jesu cãyãbara ʉɓʉara ɓʉda, maʉ̃ carea idjia Jesua ʉɓʉada diasida.
BIO CAWAƊIDA NAɄ̃ BEƊEAƊE
Mãsa cawaɗida wãrãda Jesura caida. Idjaɓa acʉɗida cãrẽ cãrẽã bio biara ɓʉda idjiɗebema cawaida.
4. Jesura Ãcõrẽ quĩrãca ʉɓʉa ɓʉẽ́da
Ãcõrẽ Beɗeaba jara ɓʉda Jesura jaure ʉɓʉa ɓʉmĩna ĩjãbarida Ãcõrẽa, Jeowara idji zeze bẽrã. ¿Cãrẽã jãʉ̃gʉ jaraɗida? Acʉɗadua dji VIDEODA cawaɗi carea, Ãcõrẽra ʉɓʉa waiɓʉa ɓʉda Jesu cãyãbara.
Araarebema textoba careba ɓʉda cawaɗi carea Jesura Ãcõrẽ cãyãbara awara ɓʉda. Leaɗapeɗa dji texto aɓa aɓa beɗeaɗadua.
Leaɗadua Luca 1:30-32.
-
Nezoca bajãnebemaba jaraɗa quĩrãca, ¿sãwã acʉbisida awara ɓʉda Jesura Jeowame, “Ãcõrẽ dji dromaara”?
Leaɗadua Mateo 3:16, 17.
-
Jesuba borocuesiɗe Ãcõrẽ bajãneba eda beɗeasida, ¿cãrẽda jarasi?
-
Bʉmaarã, ¿caida jãwã beɗeasi?
Leaɗadua Juaʉ̃ 14:28.
-
¿Caida drõãra ɓʉ idjaɓa ʉɓʉara ɓʉ: Dji Zeze wa dji warrada?
-
¿Jesuba cãrẽ jara quĩrĩã ɓasida idjia jarasiɗe Jeowara idji zeze?
Leaɗadua Juaʉ̃ 12:49.
-
¿Jesuba quĩchabarida idjira dji zezeme aɓa ɓʉda? ¿Bʉra cãrẽ quĩcha ɓʉ?
5. Jesura dji Mesia ɓasi
Bibliaɗe ɓʉda Ãcõrẽneba beɗeabadarãba jarabadara ẽberãrãba cawaɗi carea caida ɓai ɓasia dji Mesia. Jãʉ̃ beɗea jãwã jara quĩrĩã ɓʉ Ãcõrẽba ẽdrʉ edabari diai jaraɗaa. Acʉɗadua dji VIDEODA cawaɗi carea ʉ̃cʉrʉ beɗea Ãcõrẽneba beɗeabadarãba jaraɗara. Jũma jãʉ̃gʉra mãwãsida Jesura naʉ̃ ẽjũãne ɓasiɗe.
Leaɗapeɗa Ãcõrẽneba beɗeabadarãba ɓʉɗara beɗeaɗadua:
Leaɗadua Miqueas 5:2 cawaɗi carea sãma toi ɓasia dji ẽdrʉ edabarira. b
-
¿Naʉ̃ beɗeara mãwãsida Jesu tosiɗe? (Mateo 2:1).
Leaɗadua Salmo 34:20 idjaɓa Zacarías 12:10 cawaɗi carea cãrẽda jaraɗa Jesu beuɗaɗebemara.
-
¿Jãʉ̃gʉ beɗeara mãwãsida? (Juaʉ̃ 19:33-37).
-
Bʉmaarã, ¿Jesuba ara osida jũma mãwãi ɓasia idji zei naẽna?
-
¿Jãʉ̃gʉra cãrẽda unubi ɓʉda Jesuɗebemada?
6. Cawa panʉbʉrʉ Jesua biara ɓʉda dadjirã carea
Ãcõrẽ Beɗeaba jara ɓʉda cãrẽã biara ɓʉda cawaɗida Jesuɗebemada idjaɓa Jeowaba jaraɗara omãrẽã. Leaɗapeɗa Juaʉ̃ 14:6 idjaɓa 17:3, beɗeaɗadua:
-
¿Cãrẽ cãrẽã bio biara ɓʉda cawaɗira Jesuɗera?
Jesuɗeba dadjirãra Ãcõrẽme dji biarã poya pananida. Wãrã arada idjia jaradiasida Jeowaɗebemada idjaɓa Jesuɗeba dadjirãra dãrã poya pananida
ẼBERÃRÃBA JARA PANɄRA: “Beɗea ɓeara Jeowaɗebemarãba ĩjãnaẽ́ panʉda Jesuɗera”.
-
¿Bʉa cãrẽda panuida?
JŨMA BEƊEAƊA
Jesura jaure ʉɓʉa ɓʉda. Idjira Ãcõrẽ warrada idjaɓa ẽdrʉ edabaria.
Cawaɗara
-
¿Cãrẽ cãrẽã jarabadada Jesura “Ãcõrẽ Warra iwina”?
-
¿Jesu naʉ̃ ẽjũãnaa zei naẽna cãrẽda o ɓabadjida?
-
¿Cãrẽ cãrẽã wãrãda cawa panʉda Jesura ẽdrʉ edabaria?
CAWADUA MÃSA
Mãsa cawadua bia ĩjãi carea Jesura ẽdrʉ edabaria.
“¿Ãcõrẽneba beɗeabadarãba ɓʉɗara acʉbi ɓʉda Jesuba ẽdrʉ edabaria?” (Acʉdua internene)
Ãcõrẽ Beɗeaba jara ɓʉda Jesura Ãcõrẽ warraa. Baribʉrʉ, ¿sãwã osida quima neẽ́ ɓʉba?
“¿Cãrẽ cãrẽã Jesua trʉ̃ jarabada Ãcõrẽ warrada?” (Acʉdua internene)
Cawadua cãrẽã Ãcõrẽ Beɗeaba jaradiaẽ́da Jesura, Ãcõrẽ idjaɓa Ãcõrẽ jaure aɓa ɓʉ quĩrãca ɓʉẽ́da.
Leadua wẽrãba Jesuɗebema cawapeɗa jãʉ̃gʉba sãwã carebasida.
“Wẽrã Judiaba jara ɓʉda cãrẽã idji religioʉ̃ ĩjãẽ́da” (Despertad!, 2013, Mayo)
a Dji beɗeaɗe 26, 27 siɗa jaradiaɗida cãrẽã ẽdrʉɗa quĩrĩã panʉda idjaɓa sãwã Jesuba ẽdrʉbida.
