BEƊEA 17

¿Sãwãbʉrʉ ɓʉ Jesu?

ARIMAE EWAIDA

¿Sãwãbʉrʉ ɓʉ Jesu?

Bʉa mãsa cawaibʉrʉ Jesuba oɗara idjaɓa idjia jaraɗara naʉ̃ ẽjũãne ɓasiɗe, bio poya cawaida idjiɗera idjaɓa dji Zeze Jeowaɗera ãdjirãme caita pananamãrẽã. ¿Cãrẽda Jesuba osida idjaɓa jarasida? Idji quĩrãca oɗi carea, ¿cãrẽda oɗida panʉ?

1. ¿Cãrẽ cãrẽã Jesuba dji Zeze quĩrãca obarida?

Jesura zocãrã poaga bajãne ɓasida idji Zezeme. Acʉ ɓasida dji cʉ̃ãga dji Zezeɗera, cawasida idji Zezeba o ɓabadara, maʉ̃ bʉrʉ idji Zeze quĩrãca quĩchabarida idjaɓa obarida (Leadua Juaʉ̃ 5:19). Jesuba dji Zeze quĩrãca o ɓʉda, maʉ̃ carea mãwã jarasia: “Mʉ̃ unu ɓʉba mʉ̃ Zeza siɗa unu ɓʉa” (Juaʉ̃ 14:9). Maʉ̃ bʉrʉ bʉa mĩga cawaibʉrʉ Jesuɗera bio cawaida Jeowaɗe. Ne jara ɓʉ quĩrãca, Jesuba mĩã djuburia unusia ẽberãrãa, jãʉ̃gʉba unubi ɓʉda Jeowaba mĩã djuburia unu ɓʉda bʉra.

2. ¿Jesuba sãwã unubisida dji Zeze bio quĩrĩã ɓʉra?

Jesuba jarasia: “Mãwã mʉ̃ Zezaba obi ɓʉda mʉ̃a ĩjã oya. Maʉ̃gʉɗeba naʉ̃ ẽjũãnebemarãba cawaɗia mʉ̃a mʉ̃ Zezara bio quĩrĩã ɓʉda” (Juaʉ̃ 14:31). Jesuba ẽjũãne ɓasiɗe unubisida bio quĩrĩã ɓasida idji Zeze maʉ̃ bʉrʉ idji beɗea ĩjãsida bio djuburia ɓasimĩna idjaɓa Jesuba ɓʉsriɗa jaradiasia dji Zezeɗeda dewararãa Ãcõrẽme dji biarã panani carea (Juaʉ̃ 14:23).

3. ¿Jesuba sãwã unubi ɓʉda quĩrĩã ɓʉda ẽberãrãa?

Ãcõrẽ Beɗeaba jaradia ɓʉda Jesuba “bio quĩrĩã ɓabadjida jũma ẽberãrãa” (Proverbios 8:31, beɗea eɗaare). Jãʉ̃gʉba unubisida bio carebaɗa bẽrã ẽberãrãa idjaɓa jʉ̃ãẽ́ basía dewaraʉba aɓarica oɗamãrẽã. Idjia ne ununacara osia, mãwã unubisida idjira ʉɓʉa ɓʉda idjaɓa mĩã djuburia unu ɓʉda (Marco 1:40-42). Idjia ibiya beɗeabadjia idjaɓa bia obadjia ẽberãrãa. Idji beɗeaɗeba jũma ẽberãrãba ũrĩbadjiɗara ãdji so necaibicuasia. Bio quĩrĩãna bẽrã ẽberãrãa Jesura beusia ãdjirãra ẽdrʉ edai carea. Baribʉrʉ bio quĩrĩã ɓʉda ẽberã idji beɗea ĩjã ɓeara (Leadua Juaʉ̃ 15:13, 14).

BIO CAWAƊIDA NAɄ̃ BEƊEAƊE

Cawaɗida Jesuba oɗara. Acʉɗida idji quĩrãca sãwã quĩrĩãnida idjaɓa carebaɗida dewararãa.

4. Jesuba quĩrĩã ɓʉda dji Zezera

Idjia oɗaɗeba Jesuba unubisida dadjirãba sãwã unubiɗida quĩrĩã panʉda Ãcõrẽra. Leaɗapeɗa Luca 6:12 idjaɓa Juaʉ̃ 15:10; 17:26 beɗeaɗadua:

¿Sãwã careba ɓʉda Jesuba oɗara acʉbiɗi carea quĩrĩã panʉda Jeowaa?

Jesuba acʉbisida bio cʉ̃ãgabadjia idji Zeze maʉ̃ bẽrã ʉ̃taa dji idibadjia

5. Jesuba ẽberã ne neẽ́ queɗeara mĩã djuburia unu ɓʉda

Jesura bio sopuabadjia dewara carea idji cãyãbara. Eɗauɗe sẽ ɓasimĩna bio carebabadjia dewararãra. Leaɗapeɗa Marco 6:30-44, beɗeaɗadua:

Naʉ̃gʉ texto jaraɗa quĩrãca, ¿Jesuba cãrẽda osi carebai carea dewararãa? (Acʉɗadua dji caibea 31, 34, 41, idjaɓa 42).
¿Cãrẽ cãrẽã Jesuba carebasida jãʉ̃ ẽberãrãa? (Acʉɗadua dji caibea 34).
Jesuba idji Zeze quĩrãca obarida maʉ̃ bʉrʉ idjia oɗaɗeba, ¿bʉa cãrẽda cawa ɓʉda Jeowaɗebema?
Jesuba oɗa quĩrãca, ¿sãwã poya careba ɓʉda dewararãa?

6. Jesuba aɗuba diabarida

Jesuba ne zocãrã eroɓaẽ́ basimĩna aɗuba diasia, idjia quĩrĩã ɓʉda dadjirãba aɓarica oɗida. Leaɗapeɗa Hecho 20:35, beɗeaɗadua:

Jesuba jaraɗa quĩrãca, ¿cãrẽba capipiabibarida?

Acʉɗapeɗa dji VIDEODA, beɗeaɗadua.

VIDEO: “Djãrãa ne dia ɓʉra Ãcõrẽ quĩrãpita biara ɓʉa djãrãneba ne eda ɓʉ cãyãbara” (djubibi ɓʉ) (4:00)

¿Sãwãbʉrʉ ne bia diaɗida panʉa ne waiɓʉa eropanʉẽ́mĩna?

¿Cawa ɓasida?

Ãcõrẽ Beɗeaba jaradia ɓʉda dadjirãba ʉ̃taa iwiɗida panʉa Jesu trʉ̃neba (Leadua Juaʉ̃ 16:23, 24). Jãʉ̃gʉ o panʉne bia ɓʉaɗa a panʉa Jesuba oɗa carea Jeowame dji biarã panani carea.

ẼBERÃRÃBA JARA PANɄRA: “Ãcõrẽmaarã beɗeaẽ́da ẽberãrã djuburia panʉne”.