BEƊEA 22

¿Bʉa sãwã poya jaradiaida beɗea bia Ãcõrẽ Beɗeaɗebema?

ARIMAE EWAIDA

Bʉa cawapeɗa Ãcõrẽ Beɗeaɗebemada bʉa poya quĩchaida: “¡Jũma ẽberãrã jãʉ̃gʉ cawaɗibara!”. Mãwã; jũmarãba cawaɗibara. Baribʉrʉ eɗauɗe bʉra poya ne wayaida jaradiai carea dewararãa Ãcõrẽ Beɗea. Ara naʉ̃da poya cawaida cãrẽda oida necai ɓeaɗi carea, jaradiai carea Ãcõrẽ Beɗea idjaɓa ɓʉsriɗa ɓai carea jãʉ̃gʉ obʉrʉɗe.

1. ¿Bʉa sãwã poya nẽbʉrʉida bʉ dji biarã bʉa cawaɗara?

Jesu nĩbabadarãba jarasiɗaa: “Daiba unupeɗaɗada, ũrĩpeɗaɗa siɗa jaradia panania. Poya chupeaɗaẽ́a” (Hecho 4:20). Ãdjirãba dewararãa jaradia quĩrĩã panasiɗaa bia ununa bẽrã dji wãrãda Ãcõrẽnebemada. ¿Bʉa biɗa aɓari quĩcha ɓʉca? Maʉ̃ carea beɗeadua bʉ cuariarãme idjaɓa bʉ dji biarãme Ãcõrẽ Beɗeaɗebemada (Leadua Colosa 4:6).

Ʉ̃rãga biada oi carea

Bʉa beɗeabʉrʉɗe bʉ cuariarãme poya jaraida: “Naʉ̃ domia mʉ̃a ne bia cawasia Ãcõrẽ Beɗeaɗebemada”.
Bʉ dji biarã sopua ɓʉbʉrʉ wa cacua biẽ́ ɓʉbʉrʉ acʉbidua texto Bibliaɗe.
Ẽberã trajabadarãba bʉme iwiɗibʉrʉɗe bʉra sãwã wãsida domia jõbʉrʉɗe, nẽbʉrʉdua cãrẽ cawasia bʉ curso Bibliaɗe idjaɓa ãbaa jʉreɗe wãsiɗe.
Acʉbidua bʉ dji biarãa internene jw.org ɗe.
Edecadua dewararãa bʉme cawai carea Ãcõrẽ Beɗeaɗebemada wa acʉbidua sãwã poya iwiɗida curso Ãcõrẽ Beɗeaɗebemada internene jw.org ɗe.

2. ¿Cãrẽ cãrẽã bio biara ɓʉda jaradiaida Ãcõrẽ Beɗea dadji djabarãme?

Jesu nĩbabadarãba jũmarãra jaradiabadjiɗada Ãcõrẽ Beɗeaɗebemada. Jesuba “puruza umé uméa wãbisia” Ãcõrẽ Beɗeada jaradiaɗamãrẽã (Luca 10:1). Deza wãida idjaɓa puru ɓeaza wãida jãʉ̃gʉba carebasida jũmarã ẽberãrãba ũrĩnamãrẽã Ãcõrẽ Beɗeaɗe. Idjaɓa ãdjirãra bio ɓʉsriɗa panasiɗada Ãcõrẽ Beɗea ãbaa jaradia panʉ bẽrã (Luca 10:17). ¿Bʉa biɗa poya quĩchaida jaradiaɗe wãi carea Ãcõrẽ Beɗea djabarãme?

BIO CAWAƊIDA NAɄ̃ BEƊEAƊE

Acʉɗida cãrẽba poya carebaida necai ɓai carea jaradiaɗe wãbʉrʉɗe Ãcõrẽ Beɗea idjaɓa ɓʉsriɗa ɓai carea.

3. Jeowara bʉme ɓaida

Ʉ̃cʉrʉ ẽberãrã jaradia quĩrĩã panʉmĩna pera sentibada ẽberãrãba quĩcha panʉra ãdjiɗeda.

¿Bʉa sopua ɓʉda jaradiai carea Ãcõrẽ Beɗeaɗebemada dewararãa? ¿Mãwãda wa mãwãẽ́da?

Acʉɗapeɗa dji VIDEODA, beɗeaɗadua.

VIDEO: Iwiɗisia Jeowaa so zarea ɓai carea (4:05)

¿Cũdrarãba sãwã acʉbisiɗada so zarea panani carea?

Leaɗapeɗa Isaías 41:10, beɗeaɗadua:

¿Cãrẽã ʉ̃taa dji idiɗibara wãbʉrʉɗe jaradiai carea?

¿Cawa ɓasida?

Zocãrã Beɗea ɓeara Jeowaɗebemara quĩchabadjiɗada poya jaradiaɗaẽ́da Ãcõrẽ Beɗeara. Ejemploda, aɓa ẽberã Sergey abada biẽ́ quĩchabadjida idjiɗebemada idjaɓa idjimaarã zarea ɓasida beɗeai carea dewararãa. Baribʉrʉ ewari aɓaʉɗe cawasia Ãcõrẽ Beɗea. Idjia jarasia: “Mʉ̃ra pera ɓasimĩna jaradiasida Ãcõrẽ Beɗea dewararãa. Jãʉ̃gʉba carebasida mʉ̃ra bia senti carea idjaɓa quĩrãdoaẽ́ carea Ãcõrẽ Beɗeaba jara ɓʉra”.

4. Ibiya beɗeadua

Bʉa jaradiai naẽna quĩchadua cãrẽ jaraida idjaɓa sãwã jaraida. Leaɗapeɗa 2 Timoteo 2:24 idjaɓa 1 Pedro 3:15, beɗeaɗadua:

¿Sãwã poya ĩjãida jãʉ̃ beɗeara jaradiabʉrʉɗe Ãcõrẽ Beɗea dewararãa?
Bʉ dji biarã, bʉ cuariara biɗa bʉ quĩrãca quĩchaɗaẽ́mĩna, ¿cãrẽda poya oida idjaɓa cãrẽda poya oẽ́da?
¿Cãrẽã bio biara ɓʉda ibiya beɗeaida bʉ cuariarãme quẽãi cãyãbara ãdjirãra?

5. Beɗeabʉdaɗe Ãcõrẽ Beɗea bia ɓʉsriɗa panʉda

Jeowaba jarasida Jesua jaradiaida beɗea bia. ¿Jesuba sãwã unusi Jeowaba jaraɗara? Leaɗapeɗa Juaʉ̃ 4:34, beɗeaɗadua:

Ne co panʉne paɗa wuarrada mãwãra capipia pananida idjaɓa ibiya pananida. ¿Cãrẽã Jesuba jarasi jaradiaida beɗea bia Ãcõrẽnebemada ne co ɓʉ quĩrãca ɓʉda?
Bʉmaarã jaradiaida beɗea bia Ãcõrẽnebemada, ¿cãrẽ ne bia poya eroɓaida?

Ʉ̃rãga biada

Ãbaa jʉre panʉne domia ẽsãricaɗe quĩrãcuita unuida sãwã beɗeaida naãrã jaradiai carea.
Beɗeadua bʉ jaradiabarida discurso diai carea ãbaa jʉre panʉne domia ẽsãricaɗe. Discurso diabʉrʉɗe poya carebaida cawai carea sãwã jaradiaida dewararãa.
Poya oida jara ɓʉ quĩrãca, jara ɓʉmae “Ẽberãrãba jara panʉra” wa “Aɓaʉba poya idida” naʉ̃ libroɗebema cawai carea idjaɓa panui carea dewararãba iwiɗibʉdaɗe.

AƁAɄBA POYA IDIDA: “¿Sãwã ɓʉ bʉra? ¿Cãrẽda o ɓasida bʉra?”.