Jesuba jaradia ɓasida critiano ɓai carea borocueibara (Leadua Mateo 28:19, 20). Baribʉrʉ, ¿cãrẽda maʉ̃ borocueida? Idjaɓa, ¿cãrẽda oɗida borocueɗi carea?

1. ¿Cãrẽda maʉ̃ borocueida?

Beɗea borocueida griego beɗeaɗebemada, jãʉ̃gʉ jara quĩrĩã ɓʉda “borobara cui idjaɓa biru ɓae cui”. Jesuba Jordaʉ̃ doɗe borocuesiɗe, borobara cuisida , mãwãnacarea “Jesura doeɗaʉba” (Marco 1:9, 10). Maʉ̃ carea critianorã wãrã arada borocuebʉdaɗe borobara cuiɗida jũma.

2. Ẽberãba borocue ɓʉɗe, ¿cãrẽ acʉbi ɓʉda?

Ẽberã borocuebʉrʉɗe acʉbi ɓʉda idjira Ãcõrẽ itea ɓasida. ¿Cãrẽda oida ɓʉ Ãcõrẽ itea ɓai carea? Bʉduɓa ʉ̃taa dji iwiɗida Ãcõrẽa jarai carea nurẽmaza ĩjãida idjira; jãʉ̃gʉba oida borocuei naẽna. Naʉ̃ ʉ̃taa dji iwiɗi ɓʉɗeba, bʉa jaraida aɓabe ĩjãida Jeowaba quĩrĩã ɓʉra ne awara cãyãbara idjaɓa oida Jesuba jaradiaɗa quĩrãca. Jesuba jarasida “Aɓaʉba mʉ̃da ẽpẽ quĩrĩã ɓʉbʉrʉ, idjia o quĩrĩã ɓʉra igarapeɗa. Maʉ̃be mʉ̃ra ẽpẽida ɓʉa” (Mateo 16:24). Ãcõrẽ itea ɓai carea idjaɓa borocueiɗeba jãʉ̃ ẽberã poya ara caita ɓaida Jeowame idjaɓa dewara ẽberãrãme ĩjãbadara biɗa Ãcõrẽa.

3. ¿Cãrẽda oida ɓʉ borocuei carea?

Bʉa borocue quĩrĩã ɓʉbʉrʉ naãrãbema cawaibara Jeowaba quĩrĩã ɓʉra idjaɓa ĩjãida ɓʉa idjira (Leadua Hebreo 11:6). Bʉa mĩga cawa ɓʉbʉrʉ idjaɓa ĩjã ɓʉbʉrʉ Jeowaa, mãsa quĩrĩãida idjira. Jãʉ̃gʉba poya carebaida bʉra jaradiai carea Ãcõrẽ Beɗea idjaɓa oi carea Jeowaba quĩrĩã ɓʉ quĩrãca (2 Timoteo 4:2; 1 Juaʉ̃ 5:3). Wãrã arada ẽberãrãba “jipa nĩbaɗia dadjirã Boroba quĩrĩã ɓʉ quĩrãca”, poya borocueida Ãcõrẽ itea ɓai carea (Colosa 1:9, 10). a

 BIO CAWAƊIDA NAɄ̃ BEƊEAƊE

4. Cãrẽda poya cawaɗida Jesu borocue ɓasiɗe

Mĩga cawadua cãrẽda mãwãsida Jesuba borocuesiɗe. Leaɗapeɗa Mateo 3:13-17, beɗeaɗadua:

• Jesuba borocuesiɗe, ¿idjira caibe ɓasida?

• Jesuba borocuesiɗe, ¿idjira aɓabe bʉrʉ dji boro begueasida? Maʉ̃ne, ¿sãwã borocuesida?

Jesuba borocuesiɗe idjia osida dji traju Jeowaba jarasida. Leaɗapeɗa Luca 3:21-23 idjaɓa Juaʉ̃ 6:38, beɗeaɗadua:

• Jesu borocueɗacarea, ¿idjimaarã cãrẽda bio biara ɓasida?

5. Bʉra poya borocueida

Bʉra pera poya sentibarida Ãcõrẽ itea ɓai carea idjaɓa borocuei carea. Baribʉrʉ bʉra mãsa cawaibʉrʉ Ãcõrẽnera pera sentiẽ́da jãʉ̃ ne bia oi carea. Cawai carea ʉ̃cʉrʉ ẽberãrã jãʉ̃ ne bia osiɗada, acʉɗadua dji VIDEODA.

Leaɗapeɗa Juaʉ̃ 17:3 idjaɓa Santiago 1:5, beɗeaɗadua:

• ¿Cãrẽba poya carebaida ẽberãrã borocuei carea?

1. Ãcõrẽ itea ɓai carea bʉa ʉ̃taa iwiɗi ɓʉ Jeowaa jarai carea ewariza ĩjã quĩrĩã ɓʉa idjia jara ɓʉra

2. Borocuebʉrʉɗe jũmarãba poya ununida bʉra ya ʉ̃taa dji iwiɗisida Ãcõrẽ itea ɓai carea

 6. Borocueɗapeɗa cuariara Ãcõrẽnebemada panʉda

Borocueɗapeɗa ãbaa panʉda dji cuariara bia. Ãdjirãra jũma naʉ̃ ẽjũãnebemada, crĩchaɗacada sãmaʉba zesiɗada idjaɓa naẽna o ɓaɗara crĩchacada. Jũmarãba Ãcõrẽ Beɗeaba jara ɓʉra aɓarida obadada. Leaɗapeɗa Salmo 25:14 idjaɓa 1 Pedro 2:17, beɗeaɗadua:

• Naʉ̃gʉ texto jara ɓʉ quĩrãca, ¿sãwã carebaida borocuebarida?

 JŨMA BEƊEAƊA

Jesuba jarasida critiano ɓai carea borocueibara. Baribʉrʉ, borocuei carea bʉa ĩjãida ɓʉa Ãcõrẽnera, oida Jeowaba jara ɓʉra idjaɓa Ãcõrẽ itea ɓaida.

Cawaɗara

• ¿Cãrẽda maʉ̃ borocueida idjaɓa cãrẽã biara ɓʉda?

• ¿Cãrẽã biara ɓʉda Ãcõrẽ itea ɓaida idjaɓa borocueira?

• ¿Ẽberãba cãrẽda oida Ãcõrẽ itea ɓai naẽna idjaɓa borocuei naẽna?