Ne cadjirua mãwã panʉne zocãrã ẽberãrãba idibadada “¿Cãrẽã mãwã ɓasida jãʉ̃ra?”. ¡Bia senti panʉda Bibliaba jãʉ̃ idiɗara panuna bẽrã!

1. ¿Diauruba cãrẽda osi naʉ̃ ẽjũãnaa diabuei carea ne cadjiruara?

Diauruba ĩjãẽ́ basí Ãcõrẽnera. Idjia manda quĩrĩã ɓasida ẽberãra naãrãbema Adaʉ̃ idjaɓa Evara; Diauruba ne cadjirua obisida ãdjirãra ĩjãrãnamãrẽã Jeowaɗeda. Jãʉ̃ra jãwã ɓasida Diauruba sewa jarasiɗe Evada (Genesi 3:1-5). Diauruba quĩchabisida Evara, Jeowara cadjiruada idjaɓa idjia quĩchabisida Ãcõrẽba ne biada mẽrã ɓʉda. Diauruba jarasida ẽberãrãba ĩjãnaẽ́ panʉbʉrʉ Jeowaɗeda bia wãnida. Diauruba jara ɓasiɗe Eva jãʉ̃ nejõ jõnibʉrʉ beuɗaẽ́da, jãʉ̃gʉdrʉ naãrãbema sewa ɓasida. Maʉ̃ carea Bibliaba jara ɓʉda Diaurura “sewa obaria sewaiɗa ɓʉ bẽrã idjaɓa sewa zeza bẽrã” (Juaʉ̃ 8:44).

2. ¿Cãrẽda osiɗa Adaʉ̃ Eva biɗa?

Jeowaba ne zocãrã ne bia diasida Adaʉ̃ Eva biɗa. Idjia ãdjirãra jarasia jũma naʉ̃ ẽjũãne ɓea nejõra jõnida panʉa, baribʉrʉ aɓabe néu ẽsibemanebemara poya jidaɗaẽ́da (Genesi 2:15-17). Baribʉrʉ ãdjirãba cosiɗada jãʉ̃ bacuruɗebemada. Evaba “ɓa edapeɗa jõsia. Jõpeɗa dji quimaa diasia. Maʉ̃ne idjia biɗa jõsia” (Genesi 3:6). Maʉ̃be ãdjirã umé ĩjãnaẽ́ basida Ãcõrẽra. Ãdjirãra jipa panana bẽrã ne bia oɗibara ɓasida, baribʉrʉ ãdjia ĩjãna quĩrĩẽ́ panasiɗaa Jeowara, maʉ̃ bʉrʉ ne cadjiruara osiɗada. Jãʉ̃ ne cadjiruara oɗa bẽrã djuburia panasiɗada (Genesi 3:16-19).

3. ¿Dadjirãra sãwã biẽ́ panʉda jãʉ̃ba Adaʉ̃ Evaba oɗaɗeba?

Adaʉ̃ba Eva biɗa pecao osiɗaɗe ãdjirã jipaẽ́ panesiɗada, maʉ̃ bʉrʉ ãdjirãra jũma ẽberãra ne cadjirua diabuesiɗada. Adaʉ̃neba Bibliaba jara ɓʉda: “Ẽberã aɓaʉɗeba cadjiruara naʉ̃ ẽjũãne zesia. Idjaɓa maʉ̃ cadjiruaɗeba dadji beuɗira zesia. Jũmarãba cadjiruada obada bẽrã beubadaa” (Romano 5:12).

Maʉ̃ carea, ¿cãrẽ cãrẽã djuburia panʉda? Eɗauɗe quĩchabadaa quĩcha cadjirua. Ewari aɓaʉɗe djuburia panʉ ẽberã cadjiruara cuentaɗeba, idjaɓa ne cadjirua jʉ̃ãnaẽ́ panʉmĩna ne cadjirua mãwãbarida (Leadua Eclesiastés 9:11).

 BIO CAWAƊIDA NAɄ̃ BEƊEAƊE

4. Caiɗeba djuburia panʉda

Zocãrã ẽberãrãba quĩcha panʉda Ãcõrẽra naʉ̃ ẽjũãra eroɓʉda, baribʉrʉ ¿jãʉ̃ra wãrãda? Acʉɗadua dji VIDEODA.

Leaɗapeɗa Santiago 1:13 idjaɓa 1 Juaʉ̃ 5:19, beɗeaɗadua:

• ¿Ãcõrẽneba dadjirã djuburia panʉda idjaɓa ne cadjirua mãwã panʉda?

5. Cãrẽda mãwã ɓʉ Diauruba manda ɓaera

1. Adaʉ̃ idjaɓa Eva jipa panasiɗaa naʉ̃ ẽjũã mera quiru ɓasiɗe, baribʉrʉ ĩjãsiɗada Diauru beɗeara idjaɓa ãdjirãba igarasiɗada Jeowara

2.   Ãdjirãba jãʉ̃ ne cadjiruara oɗaɗeba ẽberãrã pecao eropanʉ, djuburia panʉda idjaɓa beubadaa

3. Jeowaba dadjirã ne cadjiruara jõbiya idjaɓa beubadara jõbiya. Ẽberãrã jipa panania idjaɓa ẽjũã mera quiruda panania

6. Jeowaba sopuabarida dadjirãra djuburia panʉne

¿Jeowaba unu ɓʉda dadji djuburia panʉne? Acʉɗida dji boro Davi idjaɓa dji apóstol Pedroba ɓʉpeɗaɗara. Leaɗadua Salmo 31:7 idjaɓa 1 Pedro 5:7, beɗeaɗadua:

• ¿Bʉa sãwã senti ɓʉda cawai carea Jeowaba unu ɓʉda dadjirãba djuburia panʉne idjaɓa dadji beɗea droma eropanʉne?

 JŨMA BEƊEAƊA

Diauruɗeba idjaɓa ẽberãrã naãrãbemaneba djuburia panʉda naʉ̃ ẽjũãne. Jeowaba sopuabarida dadjirãra djuburia panʉne, maʉ̃ bẽrã dãrãẽ́ne djuburiara jõbiya.

Cawaɗara

• ¿Diauruba cãrẽ sewada jarasida Evaa?

• ¿Adaʉ̃ Eva oɗaɗeba jãʉ̃ba sãwã panʉda dadjirãra?

• ¿Cãrẽ cãrẽã jara panʉda Jeowara sopuabarida dadjirã djuburia panʉ carea?