¿Ewari aɓaʉɗe bʉ cuariarã beusida? Jãʉ̃ ewariɗe bʉa bio sopua ɓasida maʉ̃ carea poya iwiɗida: “¿Ẽberã beuɗacare wãya zocai ɓaida? ¿Wãya unuida bʉ cuariarã beuɗara?”. Naʉ̃ beɗeaɗe idjaɓa dewara beɗeaɗe cawaɗida Ãcõrẽ Beɗeaba jaradia ɓʉra.

1. ¿Beuɗacare waɗi zocai pananida?

Jesuba jarasida beuɗara cãĩ ɓʉ quĩrãca ɓʉda. ¿Cãrẽã beuɗara cãĩ ɓʉ quĩrãca ɓʉ? Ẽberã cãĩ ɓʉɗe adua ɓʉda cãrẽda idji caita ne o panʉne. Beuɗaba cacua puara adua ɓʉda idjaɓa ne cadjirua senticada. Ãcõrẽ Beɗeaba jara ɓʉda “beuɗarãra aɓeɗa quĩcha neẽ́ panʉda” (Leadua Eclesiastés 9:5).

2. ¿Cãrẽ cãrẽã bio biara ɓʉda cawaida dji wãrãda beuɗaɗebemada?

Zocãrã ẽberãba waya panʉda beuɗarã. Bʉa aɓari quĩrãca quĩcha ɓʉbʉrʉ, Ãcõrẽ Beɗeaba jara ɓʉda beuɗaɗebemada poya carebaida necai ɓamãrẽã. Jesuba jarasia: “Ãcõrẽra wãrãda cawaɗia. Maʉ̃ba bãrãra [...] ẽdrʉ ɓʉya” (Juaʉ̃ 8:32). Religioʉ̃ sewaida ɓeaba idjaɓa ʉ̃cʉrʉ ẽberãrãba jarabadada dadji cacua beuɗaẽ́da idjaɓa dadji jaurera pʉrrʉa ɓʉda, baribʉrʉ Bibliaba awara jara ɓʉda. Ni aɓaʉba zocai pananaẽ́da beubʉdaɗe, maʉ̃ba beuɗacare djuburiaɗaẽ́da. Beuɗa adua panʉ bẽrã ne cadjirua poya oɗacada. Maʉ̃ bʉrʉ necesitaɗaẽ́da dji iwiɗida ãdjirã carea carebamãrẽã.

Ʉ̃cʉrʉ ẽberãrãba jarabadaa poya beɗeaɗida beuɗarãme. Baribʉrʉ jãʉ̃ra sewada. Naẽna ununa quĩrãca, “beuɗarãra aɓeɗa quĩcha neẽ́ panʉda”. Aɓaʉba quĩcha ɓʉbʉrʉ beɗea ɓʉda cuariarã beuɗarãme wãrã arada beɗea panʉda jairame. Jairara beɗeabadaa ẽberã beuɗa quĩrãca idjaɓa obadaa ãdji quĩrãca. Maʉ̃ bʉrʉ cawa panʉbʉrʉ wãrã beuɗaɗebemada poya wagaida jairaɗebemada. Jeowaba jara ɓʉda beɗearãnadua ẽberã beuɗarãme, idjia cawa ɓʉ bẽrã jãʉ̃gʉra minijĩchia ɓʉda (Leadua Deuteronomio 18:10-12).

3. Wãrã arada mãwã ɓʉda ẽberã beubʉrʉɗe

Naʉ̃ ẽjũãne jũma ẽberãrãba awara quĩchabadada beuɗaɗebema, baribʉrʉ jũma beɗeara wãrãẽ́da.

• Bʉ ɓabarimae, ¿cãrẽda jarabada beuɗaɗebemada?

 4. Dji wãrãda beuɗaɗebemada careba ɓʉda

Dji wãrãda cawa panʉne beuɗaɗebemada, maʉ̃ba dadjirãba wayaɗaẽ́da ãdjirãra. Leaɗapeɗa Eclesiastés 9:10, beɗeaɗadua:

• ¿Ẽberã beuɗarãba ne cadjirua poya oɗida dadjirãa?

Ãcõrẽ Beɗeaba jara ɓʉra careba ɓʉda dadjirãa cawai carea wãrã arada wayaɗaẽ́da panʉ beuɗarãra idjaɓa bia beɗeaɗaẽ́da panʉ ãdjirãra. Leaɗapeɗa Isaías 8:19 idjaɓa Apocalipsi 4:11, beɗeaɗadua:

• Bʉmaarã, ¿Jeowaba sãwã sentibarida unubʉrʉɗe aɓaʉba waya ɓʉda idjaɓa bia beɗea ɓʉda beuɗarãa carebamãrẽã?

5. Cawaɗida dji wãrãda beuɗaɗebemada careba ɓʉda dadjirãa sobiabi ɓamãrẽã

Zocãrã ẽberãrãba quĩchabadada beuɗacare djuburia pananida ne cadjirua o panana bẽrã. Baribʉrʉ dadjirãra necai pananida cawa panʉ bẽrã beuɗarãra djuburia pananaẽ́da ne cadjirua oɗamĩna naẽna; ni ẽberã cadjirua bio ɓasimĩna. Leaɗapeɗa Romano 6:7, beɗeaɗadua:

• Ãcõrẽ Beɗeaba jara ɓʉ quĩrãca, aɓaʉba beusibʉrʉ cadjiruaɗebemada ẽdrʉsia. Bʉmaarã, ¿beuɗarãba djuburia panʉda ãdjia ne cadjirua o ɓaɗa bẽrã naẽna?

Mãsa cawa panʉne Jeowaɗeda, cawaɗida Ãcõrẽba beuɗarãra djuburiabeẽ́ ɓʉda. Leaɗapeɗa Deuteronomio 32:4 idjaɓa 1 Juaʉ̃ 4:8, beɗeaɗadua:

• Naʉ̃ textoba jara ɓʉ quĩrãca Ãcõrẽba bio quĩrĩã ɓʉda ẽberãrãa. Maʉ̃ba, ¿Ãcõrẽba beuɗarãra djuburiabi ɓʉda?

• Bʉmaarã, ¿cawaɗida wãrãda beuɗaɗebemada necaibi ɓʉda dadjirãa? ¿Cãrẽ cãrẽã?

 JŨMA BEƊEAƊA

Ẽberã beuibʉrʉ zocai ɓʉẽ́da. Beuɗarãra ne cadjirua poya oɗaẽ́da idjaɓa djuburia pananaẽ́da.

Cawaɗara

• ¿Beuɗacare wãya zocai pananida?

• ¿Sãwã careba ɓʉda dadjirãa cawaɗida dji wãrãda beuɗaɗebemada?

• ¿Cãrẽã sobiabi panʉda cawaɗida dji wãrãda beuɗaɗebemada?