Ãcõrẽ Boroba ya manda ɓʉda, dãrãẽ́ne ara oida naʉ̃ ẽjũãra. Acʉɗida Ãcõrẽ Boroba cãrẽ ne bia oida idjaɓa cãrẽã dadjirãra jʉ̃ã panʉda.

1. ¿Cãrẽda oida Ãcõrẽ Boroba naʉ̃ ẽjũãra wãya ariɗe ɓai carea idjaɓa necai pananamãrẽã?

Armagedoʉ̃neba Jesu dji Boro Ãcõrẽ Boroɗebemada jõbiya jũma ẽberã cadjiruara idjaɓa ẽjũãnebema bororãra (Apocalipsi 16:14, 16). Jãʉ̃ ewariɗera naʉ̃ beɗea mãwãida: “Dãrãẽ́ne ẽberãrã cadjiruara neẽ́ ɓaida” (Salmo 37:10). Naʉ̃ Boroɗeba Jesuba carebaida dadjirãra necai pananamãrẽã idjaɓa naʉ̃ ẽjũãra ariɗe ɓai carea (Leadua Isaías 11:4).

2. ¿Sãwã pananida Ãcõrẽba obʉrʉɗe idjia quĩrĩã ɓʉra naʉ̃ ẽjũãra?

Ãcõrẽ Boroba mandabʉrʉɗe, “dji jipa ɓeada djibari ɓaɗida naʉ̃ ẽjũãne idjaɓa jãma dãrã pananida” (Salmo 37:29). Quĩchadua sãwã pananida ẽberã cadjiruara neẽ́bʉdaɗe, ẽberãrãba quĩrĩãbʉdaɗe Jeowaa idjaɓa bio quĩrĩãbʉdaɗe ãdjirãya. ¡Jãʉ̃gʉra bio biara ɓʉda! Ni aɓaʉda cacua biẽ́ ɓeaɗaẽ́da, maʉ̃ cãyãbara jũmarãra dãrã pananida.

3. ¿Ãcõrẽ Boroba cãrẽda oida ẽberã cadjiruara jõnacare?

Ẽberã cadjiruara jõnacare Jesura dji Boro ɓaida mil poaga. Jãʉ̃ poagaɗe Jesura idjaɓa ẽberã 144 mil idjiare panʉ biɗa carebaɗida ẽberãrãra ne cadjirua igaraɗi carea idjaɓa jipa panani carea. Jãʉ̃ ewarira jõnacare ẽjũãra quĩrãwãrẽã ɓaida idjaɓa ẽberãrãra ɓʉsriɗa pananida ĩjã panani bẽrã Jeowaɗera. Mãwãnacarea Jesuba dji zeza Jeowa dji Boro jiruãbẽrã diaida. Maʉ̃ba Jeowa “trʉ̃ra bio biya quirua” (Mateo 6:9, 10). Jũmarãba poya ununida Jeowara dji boro bio biara ɓʉda dewara ɓea cãyãbara bio waga ɓʉ bẽrã idji purura. Tẽãbe Jeowaba jõbiya Diaurura idji jairame idjaɓa jõbiya baridua ẽberã siɗa ĩjãnaẽ́ra idjiɗeda (Apocalipsi 20:7-10). Ãcõrẽ Boroba ne bia oira dãrã ɓaida.

 BIO CAWAƊIDA NAɄ̃ BEƊEAƊE

4. Ãcõrẽ Boroba jõbiya ẽjũãnebema bororã

“Ẽberãrãba manda panʉda dewara ẽberãra biẽ́ ɓamãrẽã” (Eclesiastés 8:9). Ãcõrẽ Boroɗeba Jeowaba ara oida jũma cadjiruara ẽberã bororãba o panʉra.

Leaɗapeɗa Daniel 2:44 idjaɓa 2 Tesalonica 1:6-8, beɗeaɗadua:

• Jeowaba idji warra Jesu biɗa, ¿cãrẽda oɗida ẽjũãnebema bororãme idjaɓa ẽberãrãme carebabadada?

• Bʉa cawa ɓʉra Jeowaɗebema idjaɓa Jesuɗebemada, ¿sãwã careba ɓʉda ĩjãi carea wãrãda ãdjirãba ne jũma ariɗe oɗida idjaɓa ni aɓaʉda quĩrã awara oɗacada?

5. Jesura dji Boro bio biara ɓʉda

Jesura dji Boro bẽrã Ãcõrẽ Boroɗebemada, idjia ne zocãrã bia oida carebamãrẽã ẽberãrã jũma naʉ̃ ẽjũãne. Acʉɗadua dji VIDEODA cawaɗi carea Jesuba careba quĩrĩã ɓʉda ẽberãrãa idjaɓa poya carebaida, Ãcõrẽba dji ʉɓʉada diaɗa bẽrã.

Jesuba oɗara naʉ̃ ẽjũãne ɓasiɗe, jãʉ̃gʉba acʉbi ɓʉda idjia oira ewari zebʉrʉɗera Ãcõrẽ Boroɗeba. Ãcõrẽ Beɗeaba jara ɓʉɗeba, ¿bʉa sãʉ̃gʉda unu quĩrĩã ɓʉda? Leaɗadua jũma textora unui carea Ãcõrẽ Beɗeaba jara ɓʉra.

6. Ãcõrẽ Boroɗeba bio biara duananida

 JŨMA BEƊEAƊA

Ãcõrẽ Boroba oida Ãcõrẽba quĩcha ɓaɗa quĩrãca naẽna. Ẽjũãra jũma quĩrãwãrẽã ɓaida. Ẽberãrãra dãrã pananida naʉ̃ ẽjũãne, jũma ẽberã biara dji idiɗida idjaɓa bia beɗeaɗida Jeowaa.

Cawaɗara

• ¿Ãcõrẽ Boroba cãrẽda oida Jeowa trʉ̃ra biya ɓamãrẽã?

• ¿Cãrẽ cãrẽã wãrãda cawa panʉda Ãcõrẽ Boroba oira Bibliaba jara ɓʉ quĩrãca?

• Ãcõrẽ Boroba o ɓʉɗebemada, ¿bʉa cãrẽda unu quĩrĩã ɓʉda?