Ẽberãrãba ewa mĩã cãĩ panʉda ãdjirãra mĩã cãĩsiɗaa ewariɗe quĩchasiɗada dãrã ãdjirãra capipia ewariza pananida. Jãʉ̃gʉra poya mãwãida. Critianorã dãrãbʉrʉda mĩã cãĩpeɗaɗara ãdjia jʉrʉ panʉda beɗea biada Ãcõrẽ Beɗeaɗebemada capipia panani carea.

1. ¿Cãrẽ beɗea biada Ãcõrẽ Beɗeaba dia ɓʉda umaquĩrãrãa?

Jeowaba diasida umaquĩrãrãda dji cuaria boro ɓamãrẽã (Leadua Epeso 5:23). Jeowaba quĩrĩã ɓʉda umaquĩrãba quĩcha biada quĩchamãrẽã dji cuariara bia pananamãrẽã. Ãcõrẽ Beɗeaba ʉ̃rãga biada jaradia ɓʉda umaquĩrãa: “Umaquĩrãrã, bãrã quimara quĩrĩã ɓeaɗadua” (Epeso 5:25). ¿Cãrẽda jara quĩrĩã ɓʉda jãʉ̃ra? Umaquĩrãba dji wẽrã quĩrĩãda acʉbi ɓaibʉrʉ idjiduɓa biɗa quĩrĩãda acʉbi ɓeida idjaɓa zocãrã panʉne biɗa quĩrĩãda acʉ ɓeida. Umaquĩrãba bio dji wẽrãra waga ɓʉda, idjia dia ɓʉda idjia necesita ɓʉra idjaɓa quĩrĩãda acʉ ɓaida ɓʉa (1 Timoteo 5:8). Biara ɓʉa umaquĩrãba dji wẽrãa Ãcõrẽ Beɗeada bia jaradiaida (Mateo 4:4). Ejemploda, Umaquĩrã dji wẽrãme ʉ̃taa idiɗida idjaɓa leaɗida Ãcõrẽ Beɗeada. Umaquĩrãba dji wẽrãda quĩrĩãda acʉbi ɓaibʉrʉ mãwãra idjira dji biada ɓaida Ãcõrẽme (Leadua 1 Pedro 3:7).

2. ¿Cãrẽ ʉ̃rãga biada dia ɓʉda Ãcõrẽ Beɗeaba wẽrãa?

Ãcõrẽ Beɗeaba jara ɓʉda “wẽrãba idji quimara waya ɓaida ɓʉa” (Epeso 5:33). ¿Jãʉ̃ra sãmasa poya oida? Bio quĩchaida ɓʉa dji quimaba ne bia eroɓʉda, idjaɓa bio acʉida ɓʉa dji quimaba bio zarea traja ɓʉda dji wẽrãra waga ɓʉda dji warraa biɗa. Wẽrãba wayaida ɓʉa umaquĩrã jara ɓʉra, beɗeaida idjía quĩrĩãneba idjaɓa bia beɗeaida idjiɗebemada Ãcõrẽ Beɗea ĩjãẽ́ ɓʉmĩna.

3. ¿Umaquĩrãba wẽrãme cãrẽda oɗida ãdji bia panani carea?

Ãcõrẽ Beɗeaba jara ɓʉda mĩã cãĩnarãa: “Cacua aɓa ɓʉ quĩrãca panania” (Mateo 19:5). Jãʉ̃ra jara quĩrĩã ɓʉda baridua ne awara carea tʉmʉ wãnaẽ́da. Maʉ̃ba jara ɓʉda ãdjirã dji quimame ãbaa pʉrrʉa pananida, ãdji nĩbadama dji quimame caita pananida, beɗeaida ãdji quĩcha panʉra idjaɓa ibiya beɗeaida soɗeba. Maʉ̃ bʉrʉ, aɓabe bʉrʉ biara ɓʉda dji quima cãyãbara Jeowada. Idjaɓa quĩrãcuita pananida panʉa ãdji uména, umaquĩrã siɗa awara wẽrãme dji bia ɓaẽ́ carea, wẽrã siɗa awara umaquĩrãme dji bia ɓaẽ́ carea.

 BIO CAWAƊIDA NAɄ̃ BEƊEAƊE

4. Umaquĩrãba bio quĩrĩãida dji wẽrãra idjaɓa bio wagaida

5. Wẽrãba quĩrĩãida idji quimara idjaɓa wayaida

Bibliaba jaradia ɓʉda wẽrãa quimara wayaida Ãcõrẽ Beɗea ĩjã ɓʉmĩna wa ĩjãẽ́ ɓʉmĩna. Leaɗapeɗa 1 Pedro 3:1, 2, beɗeaɗadua:

• Bʉ quimaba Ãcõrẽ Beɗea adua ɓʉbʉrʉ bʉa quĩrĩã ɓʉda idjira Ãcõrẽ Beɗea cawamãrẽã. ¿Cãrẽdrʉ biara ɓʉda: Ãcõrẽ Beɗea ewariza jaradiaida, wa bʉa o ɓʉɗeba cawabida bʉ quimaa? ¿Cãrẽ sãwãya jãwã quĩcha ɓʉda?

Umaquĩrãba idji wẽrãme ne biada oɗida ãdji umé uménena. Eɗauɗe dji wẽrãba aɓarica quĩchaẽ́da dji quimaba quĩcha o ɓʉ quĩrãca. Idji  quĩcha ɓʉra poya jaraida idji quimaa, necai jaraida idjaɓa bia beɗeaida. Baribʉrʉ dji wẽrãba quĩrãnebaida Jeowaba diasida dji umaquĩrãra jãʉ̃ dji ne bia oi carea idji cuariara carea. Dji wẽrãba carebaida idji quimaba quĩcha ɓʉra. Jãʉ̃da jũma oibʉrʉ ãdjirã bia so ɓʉsriɗa pananida deda. Leaɗapeɗa 1 Pedro 3:3-5, beɗeaɗadua:

• ¿Jeowara cãrẽ quĩcha ɓʉda idjia unu ɓʉɗe dji wẽrãba idji quimara waya ɓʉda?

6. Umaquĩrã dji wẽrãme beɗea droma eropanʉmĩna poya ɓʉsriɗa pananida

 JŨMA BEƊEAƊA

Umaquĩrã idji wẽrãme bio so ɓʉsriɗa pananida wãrãda quĩrĩã panʉra, waya panʉra idjaɓa Ãcõrẽ Beɗea ĩjã panʉra.

Cawaɗara

• ¿Sãwãbʉrʉ acʉbida umaquĩrãba wãrãda idji quimara quĩrĩã panʉda so ɓʉsriɗa pananamãrẽã?

• ¿Cãrẽda poya oida wẽrãba so ɓʉsriɗa pananamãrẽã idji quimame?

• Bʉ quima eroɓʉbʉrʉ, ¿cãrẽba Bibliaɗebemaba bʉ́a carebaida bia pananamãrẽã bʉ quimame?