Ẽberã aɓa aɓa ãdjirãba eropanʉ ãdji ne jʉ̃nida idjaɓa aɓa aɓa ẽberãrãba ãdji quĩrã djioɗira djiobadaa. Bʉmaarã bia ɓʉa bʉa djio ɓʉra, baribʉrʉ aɓa aɓa quĩrãcuita acʉida ɓʉa Jeowaba sãwãsa unu ɓʉda, idjira capipia ɓamãrẽã. Acʉɗida Ãcõrẽ Beɗeaba jara ɓʉra.

1. ¿Cãrẽ beɗea bia Ãcõrẽ Beɗeaɗe ɓʉba?

Critianorãra “ariɗe djioɗida panʉa, bia ne jʉ̃nida panʉa idjaɓa cawaɗida panʉa cãrẽ wuada bia ɓʉda jʉ̃ni carea idjaɓa cãrẽ wuada biaẽ́ ɓʉda jʉ̃ni carea”. Bio djio pananida panʉa “Ãcõrẽ waya [panʉ] bẽrã” (1 Timoteo 2:9, 10, TNM). Cawaɗida naʉ̃ textoɗe beɗea quĩmãrẽne cãrẽda jara ɓʉda. 1) Dadjirãra “ariɗe djioɗida panʉa”. Ãbaa jʉrebadarame acʉida aɓa aɓa ãdjirã awara awara djio panʉda; baridua bʉdjia jʉ̃ quĩrĩã ɓʉbʉrʉ jʉ̃ida ɓʉa. Baribʉrʉ bʉabʉrʉ cawa ɓʉa bʉ wua jʉ̃ ɓʉra bia acʉbi ɓʉda bʉa waya ɓʉda Jeowara. 2) “Bia ne jʉ̃nida” jara quĩrĩã ɓʉda dadji wuada acʉbiɗaẽ́da dadjirã wua ãcaɗa jʉ̃ ɓʉ quĩrãca idjaɓa dadjirã bia djioẽ́a jũmarã ẽberãba acʉɗamãrẽã. 3) Dadjirãba acʉɗida “cãrẽ wuada bia ɓʉda jʉ̃ni carea idjaɓa cãrẽ wuada biaẽ́ ɓʉda jʉ̃ni carea” quĩrãcuita acʉ panʉbʉrʉ jʉ̃naẽ́ carea dewararãba jʉ̃ panʉ quĩrãca. 4) Dadjirãba bia djio panʉda “Ãcõrẽ waya ɓea bẽrã”, mãwãra jũma ẽberãrãba poya acʉɗida daira Jeowaɗebemada (1 Corinto 10:31).

2. ¿Dadjirã wua ne jʉ̃ panʉba sãmasa acʉbi panʉda awara critianoa?

Aɓa aɓa cawaɗida ãdjirãba cãrẽda ne jʉ̃nida. Baribʉrʉ quĩchaɗida panʉa dewararãba quĩcha panʉda dadji wuaɗebemada. Dairãba bia ne jʉ̃nida panʉa dewararãba biaẽ́ quĩcharãnamãrẽã. Dairãba ĩjã panʉda naʉ̃ beɗeara: “Ãtebʉrʉ djãrãba quĩrĩã panʉdrʉ oɗida panʉa ãdjida bia ɓeaɗamãrẽã idjaɓa biara ĩjãnamãrẽã” (Leadua Romano 15:1, 2).

3. ¿Dadjirãba bia djio panʉne sãmasa careba panʉda dewararãba Jeowa beɗeara ĩjãnamãrẽã?

Dadjirãba cawa panʉda dai wãbʉdamaa cãrẽ wuada jʉ̃nida. Baribʉrʉ dai ãbaa jʉreɗe wãbʉdaɗe idjaɓa Ãcõrẽ Beɗea jaraɗe wãbʉdaɗe daira biya djiobadada. Dadjirãba biaẽ́ djioɗibʉrʉ, biaẽ́ beɗeaɗida dadji Ãcõrẽnebemada. Maʉ̃ cãyãbara daiba quĩrĩã panʉda biara cawaɗida Ãcõrẽnebemada idjaɓa “mãwãra ẽberãrãba cawaɗia Ãcõrẽ dadji Ẽdrʉ Edabari beɗeara bio bia ɓʉda” (Tito 2:10).

 BIO CAWAƊIDA NAɄ̃ BEƊEAƊE

4. Bia dadji wuada jʉ̃ panʉbʉrʉ acʉbi panʉda waya panʉda Jeowara

¿Cãrẽ cãrẽã bia acʉida ɓʉa dadji wuara? Leaɗapeɗa Salmo 47:2, beɗeaɗadua:

• ¿Ẽberãrãba dadjirãa unu panʉne ãdjirãba cawa panʉda dadjirãra Jeowaɗebemada?

• ¿Cãrẽda quĩchaɗida panʉda dadji ne jʉ̃ni carea? ¿Cãrẽ cãrẽã biara ɓʉda ãbaa jʉre panʉne idjaɓa Ãcõrẽ Beɗea jaradia panʉne wua bia jʉ̃nida?

 5. Sãmasa ne jʉ̃ida idjaɓa sãmasa bia djioida

Acʉɗadua dji VIDEODA.

Baridua wua nẽdaɗe ɓʉda edaida ɓʉa wa nẽbʉa ɓʉ siɗa edaida, bio biara ɓʉda bʉ wua mititiaẽ́ ɓʉda jʉ̃ ɓʉda idjaɓa bia djio ɓʉda. Leaɗadua 1 Corinto 10:24 idjaɓa 1 Timoteo 2:9, 10. Mãwãnacarea beɗeaɗadua cãrẽ cãrẽã wua...

• cõã cõã ɓʉda jʉ̃nacada.

• pẽsua ɓʉda jʉ̃nacada idjaɓa wua jʉ̃nacada ãcaɗa ɓʉ quĩrãca ɓʉda.

Daiba naʉ̃ ewariɗe Moiseba jaraɗa leyra ĩjãnaẽ́ panʉmĩna, critianorãba quĩchaɗida panʉa jãʉ̃ leyba jara ɓʉra cawaɗi carea Jeowaba sãmasa quĩcha ɓʉda. Leaɗapeɗa Deuteronomio 22:5, beɗeaɗadua:

• ¿Cãrẽ cãrẽã biaẽ́ ɓʉda wẽrãda umaquĩrã quĩrãca dji oida idjaɓa umaquĩrãda wẽrãca dji oida?

Leaɗapeɗa 1 Corinto 10:32, 33 idjaɓa 1 Juaʉ̃ 2:15, 16, beɗeaɗadua:

• Dadjirãba bia quĩchaɗida dewararãba dai wua jʉ̃ panʉnebemada biẽ́ quĩcha panʉne, ¿jãʉ̃gʉra cãrẽã jãwã quĩchaɗida panʉ?

• Ẽberãrãba bʉ ɓabarimae, ¿sãmasa unubadada ãdjirã djio panʉra?

• Bʉmaarã, ¿jãwã jʉ̃ panʉra critianorãmaarã biara ɓʉda jãwã jãʉ̃ wuara jʉ̃ ɓʉda? ¿Jãʉ̃ra cãrẽ cãrẽã jãwã crĩcha ɓʉ?

 JŨMA BEƊEAƊA

Dadjirãba dai wuada bia jʉ̃ panʉbʉrʉ, dadjirãba bio waya panʉda Jeowara, idjaɓa bio acʉbiɗida waya panʉda dewara ẽberãrãa.

Cawaɗara

• ¿Cãrẽ cãrẽã biara ɓʉda Jeowaba bia unui carea dai wua jʉ̃ panʉa?

• ¿Cãrẽda quĩchaɗida panʉa dadjirãba dai wua jʉ̃ panʉra?

• ¿Dewararãba cãrẽ poya quĩchaɗida dadjirãba jʉ̃ panʉne dai wuara?