Critianorã wãrãba bia ĩjãnida panʉa Jeowara. Dewaraʉba baridua beɗea panʉne Jeowaɗebemara maʉ̃gʉra quĩchaiẽ́ ɓʉda. Bʉa biɗa jipa quĩchabarida idjaɓa ewariza Jeowame caita ɓa quĩrĩã ɓʉda (Leadua 1 Cronica 28:9). ¿Cãrẽã bʉa poya idu ɓʉida Ãcõrẽra, idjaɓa cãrẽda oida bʉa Ãcõrẽra idu ɓʉẽ́ carea?

1. ¿Dewararãba cãrẽda o panʉda dadjirãba enemãrẽã Jeowara?

Ʉ̃cʉrʉ ẽberãrãba quĩrĩã panʉda dadjirãba amenida Jeowara. ¿Cairãba? Ʉ̃cʉrʉ ẽberãrã naãrã Jeowaɗebemara ɓasia, ãdjia cawabadjiɗaa Jeowaɗebemada. Baribʉrʉ iɗi ewariɗe ãdjia jãʉ̃gʉba dadjirãra cũrũga quĩrĩã panʉda Ãcõrẽ puruɗebemada biaẽ́ beɗeaɗi carea amei carea Jeowara. Jãʉ̃ ẽberãrã trʉ̃ jarabadada apóstatas. Ãcõrẽ Beɗea sewa jaradia ɓeabariba ãdjirãba biẽ́ beɗea panʉda dadjirãba Ãcõrẽ wãrãda ĩjãrãnamãrẽã. Bio minijĩchia ɓʉa ãdjirãme beɗeaida, maʉ̃ bʉrʉ acʉiẽ́da ɓʉda ãdji ne acʉbiɗi carea, ũrĩcada ãdjia jarabʉdaɗe idjaɓa acʉiẽ́ ɓʉda ãdji videora ni leaɗaẽ́da ãdji cartara internene. Ʉ̃cʉrʉ ẽberãrãba quĩrĩã panʉda amenida Jeowara, maʉ̃ne Jesuba jarasia: “Pariseorã carea crĩcharãnadua. Ãdjirãra dauɓerrea ɓea quĩrãca panʉa. Ãdji ẽpẽbʉda siɗa dauɓerrea ɓea quĩrãca panʉa. Dauɓerrea ɓʉba dewara dauɓerrea ɓʉda eronĩbaibʉrʉ umena uriaɗe ɓaeɗia” (Mateo 15:14).

2. ¿Dadjirãba o panʉra sãwã acʉbiɗida jipa panʉda Jeowame?

Dadjirãba bio quĩrĩã panʉ bẽrã Jeowara, maʉ̃ bʉrʉ dadjirãba awara religioʉ̃ sewa jaradiabadarãme poya caita pananaẽ́da. Dadji trajuɗe idjaɓa dadjirãba wãbadamae, Ãcõrẽnebema sewa jaradiabadarãa carebaɗaẽ́da. Jeowaba nãwã jara ɓʉda beɗea bia idji puru carea: “Ãyã wãbʉrʉɗadua”, jãʉ̃ra jãwã jara quĩrĩã ɓʉda Babilonia puru dromanebemada ãyã wãbʉrʉɗamãrẽã (Apocalipsi 18:2, 4).

 BIO CAWAƊIDA NAɄ̃ BEƊEAƊE

3. Quĩrãcuita ɓadua Ãcõrẽ Beɗea sewa jaradiabadarãme

Bʉa ũrĩ ɓʉbʉrʉ Ãcõrẽ organizacioʉ̃ne sewa jarabadarãda, ¿bʉa cãrẽda oibara ɓʉ? Leaɗapeɗa Proverbios 14:15, beɗeaɗadua:

• ¿Cãrẽ cãrẽã ĩjãiẽ́ ɓʉa jũma beɗea panʉra Jeowaɗebemada?

Leaɗapeɗa 2 Juaʉ̃ 9-11, beɗeaɗadua:

• ¿Sãmasa trataida critianoba Jeowaɗebema sewa jarabadarãme?

• Dadjirãba cawaɗaẽ́ panʉmĩna jãʉ̃ ẽberã Jeowa amenara, ¿sãwã poya ũrĩnida ãdjia beɗea panʉra?

• ¿Jeowaba sãwã crĩcha ɓʉda dadjirãba ũrĩ panʉbʉrʉ beɗea cadjirua beɗea panʉne idjiɗebema idjaɓa idji puruɗebemane?

4. Djababa cadjirua oibʉrʉ jipa ɓaida Jeowame

Bʉa cawa ɓʉbʉrʉ djaba aɓa congregacioʉ̃nebemada ne cadjirua osibʉrʉ, ¿bʉa cãrẽda oibara ɓʉ? Acʉida cãrẽ beɗeada Ãcõrẽ leyɗe jarasida Israel puru carea. Leaɗadua Levitico 5:1.

Naʉ̃ textoba jara ɓʉ quĩrãca, dadjirãba cawa panʉbʉrʉ dadji djababa cadjiruada osida, dadjirãba beɗeaɗida panʉa dadji djabarã wagabadarãme daira cawa panʉɗebemada. Baribʉrʉ beɗeai naẽna ãdjirãme beɗeaɗe wãida ɓʉa dji djaba ne cadjirua oɗame. Jãʉ̃ra biara ɓʉa idji ne cadjirua oɗada beɗeamãrẽã djabarã wagabadarãme. Maʉ̃ba idjia beɗeaẽ́bʉrʉ djabarã wagabadarãme jarai carea idji ne cadjirua oɗada, dadjirãba mãwãra beɗeaɗida panʉa djabarã wagabadarãme idjia ne cadjirua oɗada. Dadjirãba jãʉ̃gʉra oɗida panʉa jipa panʉ bẽrã Jeowame. Dadjirãba jãʉ̃gʉda oɗibʉrʉ, ¿sãwã acʉbiɗida jipa panʉda...

• ... Jeowame?

• ... ẽberã cadjirua oɗame?

• ... dai djabarãme?

 5. Tʉmʉ ɓaida Babilonia puru dromane

 JŨMA BEƊEAƊA

Jipa ɓa quĩrĩã panʉbʉrʉ Jeowame, dadjirãra poya pananaẽ́da Jeowaɗebema sewada jarabadarãme.

Cawaɗara

• ¿Cãrẽ cãrẽã ũrĩnaẽ́da Jeowaɗebema sewada jarabadarãa?

• Dadjirãba cawa panʉbʉrʉ djababa ne cadjirua osida, ¿cãrẽda oɗida?

• ¿Cãrẽda oɗida panʉ ãyã ɓai carea Ãcõrẽ Beɗea sewa jaradiabadarãme?