• Ãcõrẽba jʉrʉedai ɓasia. “Mʉ̃djiduɓa ɓesida mʉ̃ boroda [...;] mʉ̃a bʉ́a diaya pururã naʉ̃ ẽjũãnebema mʉ̃a eroɓʉɗebemada” (Salmo 2:6, 8).

• Idjira boro ɓai ɓasia David yõnaraɗebema. “Dadjirã warra tomãrẽã diasia [...]. Idji borora jũmara carea jũẽya, necai dãrã ɓaya Davi ãbugue biya quiruɗe. Dji borora jipa ɓaida idjaɓa ariɗe ɓaida, iɗiɗeba dãrã ɓai carea” (Isaías 9:6, 7).

• Idjia toi ɓasia Beleʉ̃ puruɗe. “Beleʉ̃ purura Judaɗebema puru droma ɓea tãẽna dji eɗaara ɓʉẽ́a. Maʉ̃ puruɗeba dji boroda aɓa zeya. Maʉ̃ boroba mʉ̃ puru Israelera bia pe eroɓaya” (Mateo 2:6).

• Igaraɗi ɓasia, idjaɓa beaɗi ɓasia. “Jãʉ̃ umaquĩrãra quĩrĩãnacaa ɓasia, idjaɓa quĩcha panʉ idjira bio ʉɓʉaẽ́ chumuda [...], susiɗaa dadjirã cadjirua carea; catusiɗaa dadjirã cadjirua oɗa carea” (Isaías 53:3, 5).

• Idjira ʉ̃rẽbapeɗa ʉ̃taa biya ɓaida. “Idjia jarasia Ãcõrẽba ẽdrʉ edabarira beuɗarã jaure panabadama ameẽ́da idjaɓa idji cacuara ɓerawabiẽ́da [...]; dadji Zeza Ãcõrẽba idji jʉwa araare Jesura dji dromada ɓʉsia” (Hecho 2:31, 33).

Jũma ewariɗera aɓabe Jesubʉrʉ ara osia. Nezoca aɓa ʉ̃taribema, idjia jarasia Mariaa: “Ãcõrẽba idjira israelerã boroda ɓʉya idji drõãenabema Davi ɓaɗa quĩrãca [...]. Ewariza ãdjirãra pe eroɓaya” (Luca 1:31-33).

Jesura naʉ̃ ẽjũãne zesiɗe idjira boro ɓaẽ́ ɓasida. Baribʉrʉ bajãneba jũma eroɓaida naʉ̃ ẽjũãra. Idjira dji Boro ɓʉda Ãcõrẽ Boroɗe. ¿Cãrẽã Jesura dji Boro bia ɓʉda? Acʉɗida idjia oɗara naʉ̃ ẽjũãne zesiɗe.

•   Jesura sopua ɓasida ẽberãrã carea. Jesura carebasida umaquĩrãrãda, wẽrãrãda, cũdrarã ɓeaɗa, drõã queɗeada, baridua puruɗebema, parata bara ɓea, parata neẽ́ ɓea (Mateo 9:36; Marco 10:16). Ẽberã aiɗa bara ɓʉba jarasiɗe: “Bʉa quĩrĩã ɓʉbʉrʉ, mʉ̃ra poya biabida ɓʉa”, Jesura quĩrã djuburiasida ara maʉ̃da biabisida (Marco 1:40-42).

• Jesuba jaradia ɓasida sãwã poya ĩjãnida Ãcõrẽnera. Idjia jarasia: “Ara maʉ̃ quĩrãca ne bara ɓai awua ɓʉba poya Ãcõrẽda ẽpẽẽ́a”. Idjaɓa idjia jarasida dadjirãba quĩrĩã panʉa djãrãba ne jũmane dadjirã bia oɗida, ara maʉ̃ quĩrãca djãrãra bia oɗibara, jãʉ̃gʉ beɗea jarabadada Regla de Oro. Idjaɓa jaradiasida Ãcõrẽmaarã biara ɓʉda dadjirãba o panʉra, senti panʉra, quĩcha panʉ siɗa. Maʉ̃ carea biara ɓʉda quĩrãcuita acʉɗida dadji sora ĩjãni carea Ãcõrẽnera (Mateo 5:28; 6:24; 7:12). Jesuba jarasia biara ɓʉda capipia pananamãrẽã cawaɗida Ãcõrẽba jaraɗara ara naʉ̃da oɗida (Luca 11:28).

• Jesuba jaradiasida sãwã quĩrĩã ɓʉda. Dewararãba soɗeba ũrĩbadjidada. Bibliaba jara ɓʉ: “Jesuba jũma jaradiaɗacarea ẽberãrãba cawa crĩchaɗaẽ́ basía. Judiorã ley jaradiabadarã quĩrãca jaradiaẽ́ basía” (Mateo 7:28, 29). Ejemploda, idjia jarasia: “Bãrã dji quĩrũra quĩrĩãnadua”. Jesura ʉ̃taa dji idisia idji beabʉda carea: “Zeza, ãdjia o panʉra quĩrãdoadua. Ãdjia adua panʉa cãrẽda o panʉda” (Mateo 5:44; Luca 23:34).

Jesura dji boro biada. Idjia ne jũma bio ne cawa ɓʉda. Ẽberãrã Jesuba bio quĩrĩã ɓʉda idjaɓa bio careba quĩrĩã ɓʉda. Baribʉrʉ, ¿sãʉ̃be Ãcõrẽ Boroba eroɓaida naʉ̃ ẽjũãra?