¿Sãʉ̃be Ãcõrẽ Boroba eroɓaida naʉ̃ ẽjũãra?
Ʉ̃cʉrʉ ẽpẽbadarã Jesuɗe cawa quĩrĩãsiɗaa sãʉ̃be Ãcõrẽ Boro zei ɓasia eroɓai carea naʉ̃ ẽjũãra. Jesuba panusia mãwãi ewarira ãdjirãba cawaɗié panʉa (Hecho 1:6, 7). Jesuba jaraɗara jãʉ̃gʉ unu panʉneba cawa ɓʉdada Ãcõrẽ Boroɗera ya caita ɓabʉrʉda, idjaɓa jãʉ̃ ewarira idjia eroɓaira (Luca 21:31).
¿JESUBA CÃRẼDA JARASI MÃWÃI ƁASIA?
Jesuba jarasia: “Aɓaʉ puruda dewara puru ume djõnia; aɓaʉ druaɗebema borora dewara druaɗebema boro ume djõnia. De uremia minijĩchiada baraya, puru zocãrãne jarrabada zeya, idjaɓa cacua biẽ́ ɓaida quĩrãtanoa odjacuaɗia” (Luca 21:10, 11). Dadjirãba unubʉdaɗe nepõnõ tabʉrʉɗe jãʉ̃gʉɗeba cawa panʉda ne ta zocãrã ɓʉda, ara maʉ̃ quĩrãca idjiɗera ne mãwãnũmʉda acʉbi ɓʉda Ãcõrẽ Boroda dãrãẽ́ne ara caita ɓʉa. ¿Jãʉ̃gʉba cãrẽda acʉ panuda? ¿Naʉ̃ ẽjũãne jũma mãwãnũmʉda?
1. DJÕNIA
Jãʉ̃gʉ poaga 1914ɗe, jãʉ̃ djõ panʉra zarea ɓasida dewara djõ panʉ cãyãbara. Nẽbʉrʉbadara jarabadada jãʉ̃ poagaɗe bio zarea ɓasida dewaraʉ poagara cãyãbara. Jãʉ̃ ewariɗe djõ panʉne põwaba quenasiɗada ẽberãrã zocãrã. Mãwãnacare djõbada waiɓʉa Segunda Guerra Mundial abada idjaɓa ẽberãrãba osiɗaa bomba waiɓʉa. 1914 ɓaɗacare naʉ̃ ẽjũãne ne cadjirua mãwãnũmʉda, zocãrã ẽberãrã beubadada djõ panʉneba.
2. DE UREMIADA
Enciclopedia Britannica Academic jara ɓʉda poagaza zebarida 100 auɗu de uremiaba bio ãrĩbarida. Idjaɓa dji Servicio Geológico Estados Unidosɗebemada jara ɓʉ: “1900 ɓaɗacarea poagaza 16 de uremia waiɓʉada jʉ̃ã panʉda”. Ʉ̃cʉrʉba jarabadada mãsa de uremiara neẽ́a iɗiɗera mãsa cawa panʉ bẽrã deuremiaɗebemada. Baribʉrʉ, zocãrã ẽberãrãra djuburiabadada idjaɓa beubadada de uremianeba.
3. JARRABADA
Iɗiɗera zocãrã ne coɗira neẽ́ panʉda, bororãba parata ne drʉaɗa bẽrã, cue zenũmʉba ẽjũãra jũma ãrĩbarida, ne uɗi ɓaɗara. Idjaɓa bororaba ẽberãrãra carebaɗacada. Beɗeada dji Programa Mundial de Alimentos jara ɓʉ: “Naʉ̃ ẽjũãne 821 miyoʉ ẽberãrã bio jarrabadada, 124 miyoʉ ẽberãrã beubʉrʉa coɗira neẽ́ panʉ bẽrã” (2018 Year in Review). Poagaza 3.1 miyoʉ warrarã zaquera beubadada caya queɗeara bẽrã. Poaga 2011ɗe, naʉ̃ ẽjũane warrarã zaquera ẽsadra auɗu beusiɗada caya queɗeara bẽrã.
4. CACUA BIẼ́ ƁAIDA
Organización Mundial de la Salud jara ɓʉ: “Poa 2001 ɓaɗacare zocãrã ẽberãrãba cacua biẽ́ ɓaɗa. Enfermedades naẽna wãya ɓʉda cólera quĩraca, peste quĩrãca, fiebre amarilla quĩrãca. Idjaɓa awara enfermedades djiwiɗi ɓʉda: síndrome respiratorio agudo grave, la gripe pandémica, síndrome respiratorio de Oriente Medio, el ébola idjaɓa el zika”. Ne cawa ɓeara, nẽãrabadara ne cawa panʉmĩna poya carebaɗaẽ́da dji cacua bia ɓai carea.
5. ÃCÕRẼ BEƊEA JARADIAƊIA JŨMA NAɄ̃ ẼJŨÃNE
Jesuba jarasia cãrẽda mãsa mãwãi ɓasia: “Maʉ̃ne beɗea bia Ãcõrẽba pe eroɓʉɗebemada jũma naʉ̃ ẽjũãne jaraɗia puru ɓeaza ũrĩnamãrẽã. Mãwãnacareabʉrʉ naʉ̃ ewarira jõya” (Mateo 24:14). Naʉ̃ ẽjũãne mãwã panʉmĩna 8 miyoʉ ẽberãrã auɗu awara puruzaɗebemada Ãcõrẽ beɗea bia jaradia panʉda 240 druaza idjaɓa 1.000 beɗearã auɗu. Naẽna aɓari ununacabadjiɗaa.
¿CÃRẼ CÃRẼÃ JESUBA JARAƊARA BIO BIARA ƁɄDA?
Jesuba jaraɗara iɗi mãwã ɓʉda. ¿Cãrẽ cãrẽã jãʉ̃gʉra bio biara ɓʉda? Jesuba jaraɗa bẽrã: “Ara maʉ̃ quĩrãca bãrãba jũma maʉ̃ unubʉdaɗe cawaɗia Ãcõrẽ jũmarã Boro bai ewarira caita ɓʉda” (Luca 21:31).
Dãrãẽ́ne, Ãcõrẽ Boroba carebaida Ãcõrẽba quĩrĩã ɓʉra naʉ̃ ẽjũãnebemarãba oɗida.
Jesuba jaraɗara Bibliaba jara ɓʉ quĩrãca acʉbi ɓʉda Ãcõrẽ Boroda 1914 eɗa ʉ̃tari ɓʉda. * 1914ɗe Jeowaba Jesura ɓesida boro ɓai carea (Salmo 2:2, 4, 6-9). Dãrãẽ́ne Ãcõrẽ Boroda naʉ̃ ẽjũãra eroɓaya. Ẽberã cadjiruarã jũma quininia idjaɓa ẽberã bororã jũma quininia, baribʉrʉ ẽberã so biarã ẽjũã quĩrãwãrẽane panania.
Dãrãẽ́ne Jesuba jaraɗara ara maʉ̃ quĩrãca mãwãida, idjia ʉ̃taa dji idisia: “Bʉra jũmarã Boro bai carea isabe zeida. Quĩrĩã panʉa bʉa quĩrĩã ɓʉra naʉ̃ ẽjũãnebemarãba oɗida, bajãnebemarãba obada quĩrãca” (Mateo 6:10). 1914 ɓaɗacarea, ¿cãrẽda o ɓʉ Ãcõrẽ Boroba? ¿Cãrẽda oida Ãcõrẽ Boroba ẽberãrã carea?
^ par. 17 Bʉa mãsa cawa quĩrĩã ɓʉbʉrʉ 1914ɗe acʉdua libroda ¿Qué nos enseña la Biblia? Nota 22, páginas 217 a 220 (Beɗea ɓeara Jeowaɗebemaba oɗa).
