Mʉ̃ra caibe ɓasiɗe eɗa naʉ̃ ẽjũãra bio quĩrĩã ɓabadjia idjaɓa animarãra siɗa. Maʉ̃ bʉrʉ mʉ̃a mʉ̃ cuariarãme doɗe wãsiɗaa purreaɗi carea, animarã, misi, usara bio yãga ɓabadjia quĩrĩã ɓaɗa bẽrã. Mʉ̃ra biẽ́ senti ɓasida ẽberãrãba biẽ́ o panabadjiɗaa animarãa, maʉ̃ carea mʉ̃ra ãbaa ɓesida organizacioʉ̃me animarãa carebaɗi carea.

Dadjirãra bio djõma panabadjiɗada ʉ̃cʉrʉ pabricarãme, ãdjirãba wua oɗa bẽrã dji animarã eɗebemada. Maʉ̃ carea dadjirãba organizacioʉ̃ osiɗada bio wagaɗi carea animarãra. Bio djõmaɗa bẽrã animarã carea dji bororãba carceɗe ɓʉsiɗada. Ɓarima zocãrã jidasiɗada mʉ̃ra.

Mʉ̃ra bio djõmabadjida animarã carea idjaɓa jũmarãne carea. Maʉ̃ carea mʉ̃ra ãbaa ɓesida dewara organizacioʉ̃rãme carebaɗi carea jarra queɗeara idjaɓa ne neẽ́ queɗeara. Maʉ̃ bʉrʉ mʉ̃a bio djõma ɓasida mʉ̃ soɗeba, mʉ̃ cacuaɗeba.

Dãrã ɓaɗacarea mʉ̃a cawasida mʉ̃duɓa poya ara oẽ́da naʉ̃ ẽjũãra. Eɗauɗe poyaɗamĩna, beɗea dromara jũma ara oẽ́ ɓasida. Mʉ̃ra bio sopua ɓasida jũma ne cadjirua mãwãna carea, ni aɓaʉba poya beɗeaɗaca ɓasia naʉ̃ ẽjũã carea.

Mʉ̃ra bio sopuabada bẽrã cawa quĩrĩã ɓasida Ãcõrẽnera idjaɓa Ãcõrẽ Beɗeaba jara ɓʉra. Naẽna mʉ̃a estudiabadjimĩna Beɗea ɓeara Jeowaɗebemarame, mʉ̃ra waɗi awara o quĩrĩãẽ́ ɓasida baribʉrʉ mʉ̃ra bio sopua ɓasiɗe ya awara o quĩrĩãsia.

Mʉ̃a jʉrʉsida mʉ̃ Bibliara leai carea Ãcõrẽba cãrẽda quĩcha ɓʉ animarã biẽ́ o panʉra. Mʉ̃a leaɗaba bio necaibi ɓesida. Maʉ̃ne jaraɗida, Proverbios 12:10ɗe jara ɓʉda: “Dji jipa ɓeaba bio wagabadara dji animarãa” (Traducción del Nuevo Mundo). Mʉ̃a cawa ɓasida Ãcõrẽneba djuburiabiɗaẽ́da maʉ̃ cãyãbara dadjirãba djuburia panʉda dadji cuentaɗeba ĩjãnaẽ́ bẽrã Ãcõrẽ Beɗeara. Jãʉ̃ra mʉ̃a cawapeɗa bio bia senti ɓasida cawaɗa bẽrã Ãcõrẽba quĩrĩã ɓʉda dadjirã idjaɓa baridua quĩrũca bẽrã (Salmo 103:8-14).

Jãʉ̃ ewariɗera mʉ̃a idisida jaradiaɗamãrẽã Ãcõrẽ Beɗea. Mãwãnacarea mĩã cãĩnara mʉ̃maa zesiɗaa jaradiaɗi carea Ãcõrẽ Beɗeaba dji libroɗeba ¿Qué enseña realmente la Biblia? Idjaɓa mʉ̃a wãsida ãbaa jʉrebadamae Beɗea ɓeara Jeowaɗebemarame. Mʉ̃a ũrĩsiɗe jãma Ãcõrẽ Beɗeaɗebemada mʉ̃ soɗeba ĩjã quĩrĩã ɓabadjida.

Ãcõrẽ Beɗea cawapeɗa mʉ̃ra awara ɓesida. Mʉ̃a zocãrã itua doẽ́da, cigarrillo doẽ́da; beɗea cadjirua jaraẽ́da, awara osida idjaɓa ya dji bororã bio waya ɓʉda (Romano 13:1). Idjaɓa wẽrã auɗuarame ãbaa nĩbaẽ́ basida.

Baribʉrʉ mʉ̃maarã bio zarea ɓasida mʉ̃ soɗeba ameida dadji organizacioʉ̃ra bio quĩrĩã ɓaɗa bẽrã. Maʉ̃nebemada mʉ̃a cawasida Ãcõrẽ Borobʉrʉ poya carebaida naʉ̃ ẽjũãra biara ɓai carea, maʉ̃ne mʉ̃a mʉ̃ soɗeba, mʉ̃ cacuaɗeba jaradiasida dewarara Ãcõrẽ Boroɗebemada carebamãrẽã (Mateo 6:33).

Mʉ̃ra bio djõma ɓasiɗe aɓabe bʉrʉ quĩrĩã ɓasida ẽberã sobiara, baribʉrʉ mʉ̃a cawa ɓasiɗe Ãcõrẽ Beɗeara ya quĩrãmaẽ́da ẽberãrãa, maʉ̃ cãyãbara bio quĩrĩã ɓʉda jũmarãda (Mateo 5:44). Acʉbi carea mʉ̃a wãrã arada quĩrĩã ɓʉda ẽberãrãra jaradia ɓʉda Ãcõrẽ Beɗea. Jãʉ̃ra bio bia ɓʉda ne bia jʉ̃ã panʉ bẽrã ẽberãrãra necai panani carea idjaɓa ɓʉsriɗa panani carea.

Mʉ̃ra ya necai ɓʉda Ãcõrẽba cawa oi bẽrã. Jeowaba carebaida ẽberãrãa animarã siɗa bia panani carea idjaɓa naʉ̃ ẽjũãra biya ɓai carea. Ãcõrẽ Boroɗeba idjia ara oida jũma cadjirua ẽberãba o ɓaɗara (Isaías 11:1-9). Maʉ̃ bʉrʉ mʉ̃ra bio ɓʉsriɗa ɓʉda jãʉ̃ beɗea bia cawaɗa bẽrã idjaɓa careba ɓʉ bẽrã dewarara. Maʉ̃ bẽrã mʉ̃a waa djõẽ́da awara oi carea naʉ̃ ẽjũãra.