Mʉ̃ra tosida Sajonia puruɗe, dji República Democrática Alemana. Mʉ̃ zezerãba ibiya o panabadjiɗada, ãdjirãba mʉ̃́a bio jaradiasiɗada jipa omãrẽã. República Democrática Alemana comunistara bẽrã, ãdjirãba religioʉ̃ra quĩrĩãnaca ɓasiɗada. Mʉ̃maarã Ãcõrẽra neẽ́a. Mʉ̃a umé quĩchara bio quĩrĩã ɓabadjida cũdra ɓasiɗe: dji ateísmo, jãʉ̃ra jara quĩrĩã ɓʉda quĩchada Ãcõrẽra neẽ́da, idjaɓa comunismo, jãʉ̃ra jara quĩrĩã ɓʉda quĩchada jũmarãba aɓari quĩrãca eroɓeaɗida.

¿Cãrẽã mʉ̃a comunismo quĩrĩã ɓasida? Mʉ̃a quĩrĩã ɓasida jũmarãra aɓarida eropanasiɗada, mʉ̃a quĩchabadjida jũmarãba aɓari quĩrãca eroɓeaɗi ɓasida. Maʉ̃ carea mʉ̃ra trajasida dji organizacioʉ̃ cũdra ɓearame. Mʉ̃ra 14 poaga ɓasiɗe bio trajasida ãdjirãme. Maʉ̃ bʉrʉ jʉrʉ pe panabadjiɗada carta queduada. Dji bororãba Aueɗebema ibiya jarasiɗada bio trajaɗa bẽrã. Cũdra ɓasimĩna político zocãrã mʉ̃a unusida. Mʉ̃a quĩcha ɓabadjida mʉ̃a oɗara bio bia ɓasi, maʉ̃ bʉrʉ quĩchasida ara maʉ̃ quĩrãca oibara ɓasida.

Baribʉrʉ jũma awara ɓesia. Poaga 1989ɗe Berlín purura auɗu jũrãbadara toɗogozoa ɓasida idjaɓa jũma comunistara Europaɗebemada bié panesiɗaa. Mʉ̃a unusida wãrã arada mãwãnara. Dji comunistarãba ẽberã comunistaẽ́ ɓeara biẽ́ obadjiɗada, maʉ̃ bẽrã mʉ̃ra bio sopua ɓasida. ¿Cãrẽã dji comunistara biẽ́ osiɗada? ¿Ãdjirãba jara ɓaɗara awara ɓeasida? Mʉ̃a cawaẽ́ quĩcha ɓasida.

Mʉ̃a awara o quĩrĩã ɓasida. Mʉ̃a bio quĩrĩã ɓabadjida ne soabarira idjaɓa chiru siɗa, maʉ̃ bʉrʉ mʉ̃a ecuelaɗaa wãsida universidaɗaa wãi carea, jãʉ̃gʉra mʉ̃ soɗeba o quĩrĩã ɓasida. Mʉ̃ zezerãba jaradia ɓaɗara jũma quĩrãdoasida. Aɓabe bʉrʉ mʉ̃a quĩchabadjida so biya ɓʉsriɗa ɓai carea, maʉ̃ bʉrʉ mʉ̃ra zocãrã wẽrãrãme ãbaa ɓasida. Baribʉrʉ mʉ̃a ne zocãrã o ɓaɗamĩna biẽ́ senti ɓasida. Maʉ̃ carea mʉ̃a idisida ¿cãrẽ mãwãida ewari zebʉrʉɗera? ¿Cãrẽã nama ɓʉda?

Ewari aɓaʉɗe ecuelaɗe dji biarãme beɗeasiɗada cãrẽda mãwãi ɓasia ewari zebʉrʉɗera. Aɓa wẽrãba Mandy * abada, idjira Beɗea ɓea Jeowaɗebemada, idjia mʉ̃́a jarasida: “Bʉa cawa quĩrĩã ɓʉra cãrẽda mãwãida ewari zebʉrʉɗera, maʉ̃ careara Ãcõrẽ Beɗeada cawaida ɓʉa”. Jãʉ̃ra cawapeɗa bio biara ɓʉda mʉ̃maarã.

Adua ɓasimĩna pĩãca pĩãca cawa quĩrĩã ɓasida. Mandyba acʉbisia dji libro Danielɗe dji capítulo uméne. Mʉ̃a bio quĩrĩã ɓasida jũma jaraɗara. Jãma leasida Ãcõrẽ Beɗeaba jara ɓʉra dji puru dromane ɓeara ʉɓʉarãda. Mãwãnacare idjia mʉ̃́a acʉbisida beɗea bia Ãcõrẽnebemada ewari zebʉrʉɗe idjaɓa ẽberãrã carea. Wãrã arada mʉ̃a unusida dji panunara mʉ̃a idiɗara, baribʉrʉ ¿caiba ɓʉsida jãʉ̃ beɗea bia? ¿Caibʉrʉ jara ɓʉda wãrã arada ewari zebʉrʉɗera? ¿Jãʉ̃ra acʉbi ɓʉda wãrã arada Ãcõrẽra bʉda?

Mandyba unubisida Beɗea ɓeara Jeowaɗebemada, York Angelica siɗa. Ãdjirãba bio carebasiɗada Ãcõrẽ Beɗea bio cawai carea, ara maʉ̃da cawasida Beɗea ɓeara Jeowaɗebemara wãrã arada, ãdjirãba jaraɗa bẽrã Ãcõrẽ trʉ̃ra (Salmo 83:18; Mateo 6:9). Mʉ̃a cawasida Ãcõrẽ Beɗeaba jara ɓʉda ẽberãrãra dãrã poya pananida naʉ̃ ẽjũãne. Salmo 37:9ɗe jara ɓʉda: “Jeowaɗe ĩjã ɓeadrʉ naʉ̃ ẽjũãne pananida”. Mʉ̃a bio quĩrĩãsida jãʉ̃ cawaɗara ẽberã biarãra dãrã poya pananida naʉ̃ ẽjũãne.

Mʉ̃maarã bio zarea ɓasida ĩjã oi carea Ãcõrẽ Beɗeaba jara ɓʉra. Mʉ̃a ne soabari bẽrã idjaɓa chiruɗebema cawa ɓaɗa bẽrã maʉ̃ bʉrʉ dji dromara quĩcha ɓasida baribʉrʉ awara ɓesida idjaɓa mʉ̃a igarasida wẽrãrã nĩbabadara. Mʉ̃ra bia senti ɓʉda cawaɗa bẽrã Jeowaɗeda idjia careba ɓʉda jũmarã awara o quĩrĩã panʉbʉrʉ.

Mʉ̃ra cũdra ɓasiɗe quĩcha ɓabadjida Ãcõrẽra neẽ́da idjaɓa mʉ̃ra comunista ɓasida. Baribʉrʉ mʉ̃a cawaɗaba Ãcõrẽ Beɗea jãʉ̃gʉba bia sentibisida idjaɓa jãʉ̃gʉba carebasida necai ɓai carea. Poaga 1993ɗe mʉ̃ra borocuesida, ɓesida Beɗea ɓea Jeowaɗebemara, mãwãnacarea poaga 2000ɗe mʉ̃a mĩã cãĩsida Thalitame, ãbaa jaradia panʉda Ãcõrẽ Beɗeaba jara ɓʉda. Ʉ̃cʉrʉba cawa quĩcha ɓasiɗada mʉ̃a quĩcha ɓaɗa quĩrãca, maʉ̃ bʉrʉ mʉ̃ra capipia sentibarida carebai carea jũma ẽberãrãda.

Mʉ̃ra ãbaa ɓesida Beɗea ɓeara Jeowaɗebemarame sopuasiɗada mʉ̃ zezerã. Baribʉrʉ dãrã ɓabʉrʉɗe ãdjirãba cawasiɗada ãdjia mʉ̃a bio bia ɓʉda. Iɗi ãdjirã estudia panʉda Ãcõrẽ Beɗeara idjaɓa ãbaa jʉre panʉda Beɗea ɓeara Jeowaɗebemarame. Maʉ̃ bʉrʉ mʉ̃ra bio ɓʉsriɗa ɓʉa.

Thabita mʉ̃ siɗa esfuerzo o panʉda ne cadjirua oɗa amaaba idjaɓa daunemanaẽ́da. Jãʉ̃gʉba bio capipia sentibibarida idjaɓa careba ɓʉda dai mĩã cãĩnara bio zarea ɓaida (Hebreo 13:4).

Mʉ̃ra ya sopuaẽ́da ewari zebʉrʉɗera. Ɓʉda Beɗea ɓeara Jeowaɗebemarame, ãdjirãra mʉ̃ cuariara quĩrãca ɓʉda. Naʉ̃ cuariarãra jũmarãda aɓarica panʉa, jãʉ̃drʉ jãwã quĩrĩã ɓasida aɓeɗa.