ይሖዋ ልዩ ስጦታ ሰጥቶናል፤ ይህ ስጦታ መጽሐፍ ቅዱስ ሲሆን በውስጡ 66 ትናንሽ መጻሕፍትን ይዟል። ሆኖም ‘መጽሐፍ ቅዱስ ወደ እኛ የደረሰው እንዴት ነው? የዚህ መጽሐፍ ባለቤት ማን ነው?’ ብለህ ትጠይቅ ይሆናል። በዚህ ምዕራፍ ውስጥ የእነዚህን ጥያቄዎች መልስ እንመለከታለን።

1. መጽሐፍ ቅዱስን የጻፉት ሰዎች ከሆኑ የአምላክ ቃል ነው ሊባል የሚችለው እንዴት ነው?

መጽሐፍ ቅዱስን የጻፉት 40 የሚሆኑ ሰዎች ናቸው፤ የተጻፈውም ከ1513 ዓ.ዓ. እስከ 98 ዓ.ም. ድረስ ባሉት 1,600 ዓመታት ገደማ ውስጥ ነው። ጸሐፊዎቹ የተለያየ አስተዳደግና የኑሮ ደረጃ ያላቸው ናቸው፤ ለምሳሌ አንዳንዶቹ ገበሬዎች፣ ሌሎቹ ዓሳ አጥማጆች ወይም ነገሥታት ናቸው:: ያም ቢሆን ሁሉም የመጽሐፍ ቅዱስ ክፍሎች እርስ በርስ ይስማማሉ። ይህ ሊሆን የቻለው እንዴት ነው? መጽሐፍ ቅዱስ የአምላክ ቃል ስለሆነ ነው። (1 ተሰሎንቄ 2:13⁠ን አንብብ።) ጸሐፊዎቹ የመዘገቡት የራሳቸውን ሐሳብ አይደለም። ከዚህ ይልቅ ‘ከአምላክ የተቀበሉትን በመንፈስ ቅዱስ ተገፋፍተው ተናግረዋል።’ a (2 ጴጥሮስ 1:21) አምላክ ሰዎች የእሱን ሐሳብ እንዲጽፉ ለመምራት ወይም ለማነሳሳት መንፈስ ቅዱስን ተጠቅሟል።—2 ጢሞቴዎስ 3:16

2. መጽሐፍ ቅዱስን የማንበብ አጋጣሚ ያላቸው እነማን ናቸው?

“በምድር ላይ [የሚኖር] ብሔር፣ ነገድ፣ ቋንቋና ሕዝብ ሁሉ” በመጽሐፍ ቅዱስ ውስጥ የሚገኘውን ምሥራች የመስማት አጋጣሚ አለው። (ራእይ 14:6⁠ን አንብብ።) አምላክ መጽሐፍ ቅዱስ በታሪክ ዘመናት ውስጥ ከተዘጋጁት መጻሕፍት ሁሉ ይበልጥ በብዙ ቋንቋዎች እንዲገኝ አድርጓል። ሁሉም ሰው ማለት ይቻላል፣ መጽሐፍ ቅዱስን ማንበብ የሚችልበት አጋጣሚ አለው። ሰዎች የሚኖሩት የትም ይሁን የት ወይም የሚናገሩት ቋንቋ ምንም ይሁን ምን መጽሐፍ ቅዱስን ማግኘት ይችላሉ።

3. ይሖዋ መጽሐፍ ቅዱስ እስከ ዘመናችን ድረስ ተጠብቆ እንዲቆይ ያደረገው እንዴት ነው?

መጽሐፍ ቅዱስ የተጻፈው እንደ ቆዳና ፓፒረስ ባሉ በጊዜ ሂደት ሊበላሹ የሚችሉ ነገሮች ላይ ነው። ሆኖም ለመጽሐፍ ቅዱስ ጥልቅ ፍቅር ያላቸው ሰዎች መልእክቱን በእጃቸው በጥንቃቄ ይገለብጡ ነበር። ከፍተኛ ሥልጣን ያላቸው ሰዎች መጽሐፍ ቅዱስን ለማጥፋት ጥረት ቢያደርጉም አንዳንዶች ሕይወታቸውን ጭምር አደጋ ላይ በመጣል መጽሐፍ ቅዱስን ታድገዋል። ይሖዋ ምንም ነገር ወይም ማንኛውም አካል ሐሳቡን ለእኛ ከመግለጽ እንዲያግደው አልፈቀደም። መጽሐፍ ቅዱስ “የአምላካችን ቃል . . . ለዘላለም ጸንቶ ይኖራል” ይላል።—ኢሳይያስ 40:8

ጠለቅ ያለ ጥናት

5. መጽሐፍ ቅዱስ ብዙ መሰናክሎችን አልፏል

6. ሁሉም ሰው ሊያገኘው የሚችል መጽሐፍ

በታሪክ ውስጥ የመጽሐፍ ቅዱስን ያህል በስፋት የተተረጎመና የተሰራጨ መጽሐፍ የለም። የሐዋርያት ሥራ 10:34, 35⁠ን አንብቡ፤ ከዚያም በሚከተሉት ጥያቄዎች ላይ ተወያዩ፦

• አምላክ ቃሉ ይህን ያህል በስፋት እንዲተረጎምና እንዲሰራጭ የሚፈልገው ለምንድን ነው?

• ስለ መጽሐፍ ቅዱስ ካነሳናቸው ነጥቦች መካከል ትኩረትህን የሳበው የትኛው ነው?

ማጠቃለያ

መጽሐፍ ቅዱስ የአምላክ ቃል ነው፤ አምላክ ሁሉም ሰዎች ይህን መጽሐፍ ማግኘት እንዲችሉ አድርጓል።

ክለሳ

• አምላክ፣ ሰዎች በመንፈስ ተመርተው መጽሐፍ ቅዱስን እንዲጽፉ አድርጓል ሲባል ምን ማለት ነው?

• መጽሐፍ ቅዱስ መሰናክሎችን ካለፈበት፣ ከተተረጎመበትና ከተሰራጨበት መንገድ ጋር በተያያዘ አንተን የሚያስገርምህ ምንድን ነው?

• አምላክ ሐሳቡን ለአንተ ለማስተላለፍ ይህን ሁሉ እንዳደረገ ስታውቅ ምን ይሰማሃል?