ደም ለሕይወት በጣም አስፈላጊ ነገር ነው። ያለደም ማናችንም በሕይወት መቀጠል አንችልም። አምላክ ፈጣሪ እንደመሆኑ መጠን ደም ጥቅም ላይ ሊውል የሚገባው እንዴት እንደሆነ የመናገር መብት አለው። ይሖዋ ደምን በተመለከተ ምን ብሏል? ደምን መብላት ወይም ለሌሎች መለገስ ተገቢ ነው? በዚህ ረገድ ጥሩ ውሳኔ ማድረግ የምትችለውስ እንዴት ነው?

1. ይሖዋ ለደም ምን አመለካከት አለው?

ይሖዋ በጥንት ዘመን ለነበሩ አገልጋዮቹ “የሥጋ ሁሉ ሕይወት ደሙ [ነው]” ብሏቸዋል። (ዘሌዋውያን 17:14) በይሖዋ ዓይን ደም ሕይወትን የሚወክል ነገር ነው። ሕይወት ከአምላክ የተገኘ ቅዱስ ስጦታ ስለሆነ ደምም ቅዱስ ነው።

2. አምላክ ደም ለምን ዓላማ እንዳይውል ከልክሏል?

ይሖዋ ከክርስትና ዘመን በፊት የነበሩ አገልጋዮቹን ደም እንዳይበሉ አዟቸዋል። (ዘፍጥረት 9:4⁠ን እና ዘሌዋውያን 17:10⁠ን አንብብ።) በበላይ አካሉ አማካኝነት ለክርስቲያኖችም ‘ከደም ራቁ’ የሚል ትእዛዝ በመስጠት በዚህ ረገድ ያለው አቋም እንዳልተለወጠ አሳይቷል።—የሐዋርያት ሥራ 15:28, 29⁠ን አንብብ።

‘ከደም ራቁ’ የሚለው ትእዛዝ ምን ነገሮችን ያካትታል? ሐኪም አልኮል እንዳትወስድ ቢነግርህ የአልኮል መጠጥ እንደማትጠጣ የታወቀ ነው። ሆኖም አልኮል ያለባቸውን ምግቦች ትበላለህ? ወይም በደም ሥርህ አልኮል ለመውሰድ ትሞክራለህ? እንዲህ እንደማታደርግ ግልጽ ነው። በተመሳሳይም ከደም ራቁ የሚለው የአምላክ ትእዛዝ ደም ከመጠጣት ወይም ደሙ ያልፈሰሰን ሥጋ ከመብላት መቆጠብን ያካትታል። ከዚህም ሌላ ደም የተጨመረበት ምንም ዓይነት ምግብ መብላት አይኖርብንም።

ደምን ለሕክምና ስለመጠቀምስ ምን ማለት ይቻላል? አንዳንድ የሕክምና ዓይነቶች የአምላክን ሕግ በቀጥታ የሚጥሱ ናቸው። ሐኪሞች ደምን ለሕክምና የሚጠቀሙበት ጊዜ አለ። ታካሚው በደም ሥሩ በኩል ሙሉ ደም ወይም ዋና ዋና የደም ክፍሎች ለምሳሌ ቀይ ሴሎች፣ ነጭ ሴሎች፣ ፕሌትሌቶች ወይም ፕላዝማ እንዲሰጠው ሊያደርጉ ይችላሉ። እነዚህ የሕክምና ዓይነቶች የአምላክን ሕግ በቀጥታ የሚጥሱ ናቸው። ሆኖም የመጽሐፍ ቅዱስ ሕግ የማይከለክላቸው ደም ለሕክምና ጥቅም ላይ የሚውልባቸው መንገዶች አሉ። ለምሳሌ ከደም ወይም ከዋና ዋና የደም ክፍሎች ማለትም ከቀይ ሴሎች፣ ከነጭ ሴሎች፣ ከፕሌትሌቶች እና ከፕላዝማ ላይ ንዑሳን ክፍልፋዮችን ማለትም ፕሮቲኖችን፣ ቪታሚኖችን ወይም ሌሎች ነገሮችን በመውሰድ መድኃኒት ይሠራል። ሐኪሞች፣ የታካሚውን የራሱን ደም በመጠቀም ሕክምና የሚሰጡበት ጊዜም አለ። ከእነዚህ የሕክምና አማራጮች ጋር በተያያዘ እያንዳንዳችን የራሳችንን ውሳኔ ማድረግ ይኖርብናል። a—ገላትያ 6:5

ጠለቅ ያለ ጥናት

3. የሕክምና ምርጫህ ይሖዋን ደስ የሚያሰኝ ይሁን

አምላክ ስለ ደም ካለው አመለካከት ጋር የሚስማማ የሕክምና ምርጫ ማድረግ የምትችለው እንዴት ነው? ቪዲዮውን ተመልከቱ፤ ከዚያም የሚከተሉትን እርምጃዎች መውሰድ ባለው ጥቅም ላይ ተወያዩ፦

• ጥበብ ለማግኘት ጸልይ።—ያዕቆብ 1:5

• በመጽሐፍ ቅዱስ መሠረታዊ ሥርዓቶችና ተግባራዊ በሚሆኑበት መንገድ ላይ ምርምር አድርግ።—ምሳሌ 13:16

• አንተ በምትኖርበት አካባቢ የትኞቹ የሕክምና አማራጮች እንዳሉ ለማወቅ ጥረት አድርግ።

• ፈጽሞ የማትቀበላቸውን አማራጮች ለይ።

• ውሳኔው ሕሊናህ እንዲወቅስህ የሚያደርግ አለመሆኑን እርግጠኛ ሁን።—የሐዋርያት ሥራ 24:16 b

• ሕሊናህን ተጠቅመህ በምታደርጋቸው ውሳኔዎች ረገድ የትዳር ጓደኛህን፣ የጉባኤህን ሽማግሌ ወይም የመጽሐፍ ቅዱስ አስጠኚህን ጨምሮ ማንም ሰው ምን ማድረግ እንዳለብህ ሊወስንልህ እንደማይገባ አስታውስ።—ሮም 14:12

• ውሳኔህን በጽሑፍ አስፍር።

4. የይሖዋ ምሥክሮች ጥራት ያለው ሕክምና ለማግኘት ጥረት ያደርጋሉ

አምላክ ስለ ደም የሰጠውን ሕግ ሳይጥሱ ያለደም የሚሰጥ ጥራት ያለው ሕክምና ማግኘት ይቻላል። ቪዲዮውን ተመልከቱ።

ቲቶ 3:2⁠ን አንብቡ፤ ከዚያም በሚከተለው ጥያቄ ላይ ተወያዩ፦

• የሕክምና ባለሙያዎችን ስናነጋግር አክብሮትና ገርነት ልናሳይ የሚገባው ለምንድን ነው?

 5. ንዑሳን የደም ክፍልፋዮችን በመጠቀም የሚሰጡ ሕክምናዎች

ደም አራት ዋና ዋና ክፍሎች ያሉት ሲሆን እነሱም ቀይ የደም ሴል፣ ነጭ የደም ሴል፣ ፕሌትሌትና ፕላዝማ ናቸው። እነዚህ ዋና ዋና ክፍሎች በርካታ ንዑሳን ክፍልፋዮች አሏቸው። c ከእነዚህ ንዑሳን ክፍልፋዮች መካከል አንዳንዶቹ በሽታን ለመዋጋት ወይም ደምን ለማስቆም በሚሰጡ መድኃኒቶች ውስጥ ይገኛሉ።

ንዑሳን ከሆኑት የደም ክፍልፋዮች ጋር በተያያዘ እያንዳንዱ ክርስቲያን በመጽሐፍ ቅዱስ የሠለጠነ ሕሊናውን ተጠቅሞ የራሱን ውሳኔ ማድረግ ይኖርበታል። አንዳንድ ክርስቲያኖች ንዑሳን ክፍልፋዮችን መጠቀም የሚጠይቁ የሕክምና ዓይነቶችን ላለመቀበል ሊወስኑ ይችላሉ። ሌሎች ደግሞ እንዲህ ያሉ ሕክምናዎችን ለመቀበል ሕሊናቸው ይፈቅድላቸው ይሆናል።

ውሳኔ ስታደርግ በሚከተለው ጥያቄ ላይ አስብበት፦

• አንዳንድ ንዑሳን የደም ክፍልፋዮችን የምወስድበትን ወይም የማልወስድበትን ምክንያት ለሐኪም ማስረዳት የምችለው እንዴት ነው?

ማጠቃለያ

ይሖዋ ደምን አላግባብ ከመጠቀም እንድንርቅ ይፈልጋል።

ክለሳ

• ይሖዋ ደምን ቅዱስ አድርጎ የሚመለከተው ለምንድን ነው?

• አምላክ ከደም እንድንርቅ የሰጠው ትእዛዝ ደም ከመውሰድ መራቅንም እንደሚጨምር በምን እናውቃለን?

• ደምን ለሕክምና ከመጠቀም ጋር በተያያዘ ጥሩ ውሳኔ ማድረግ የምትችለው እንዴት ነው?