መዝሙር 9:1-20
ለሙዚቀኞች ቡድን መሪ፤ በሙትላቤን።* የዳዊት ማህሌት።
א [አሌፍ]
9 ይሖዋ ሆይ፣ በሙሉ ልቤ አወድስሃለሁ፤ስለ ድንቅ ሥራዎችህ ሁሉ እናገራለሁ።+
2 በአንተ ደስ ይለኛል፤ ሐሴትም አደርጋለሁ፤ልዑል አምላክ ሆይ፣ ለስምህ የውዳሴ መዝሙር እዘምራለሁ።+
ב [ቤት]
3 ጠላቶቼ ወደ ኋላ ሲያፈገፍጉ+ተሰናክለው ከፊትህ ይጠፋሉ።
4 ለማቀርበው ትክክለኛ ክስ ትሟገትልኛለህና፤በዙፋንህ ላይ ተቀምጠህ በጽድቅ ትፈርዳለህ።+
ג [ጊሜል]
5 ብሔራትን ገሠጽክ፤+ ክፉውንም አጠፋህ፤ስማቸውን ለዘላለም ደመሰስክ።
6 ጠላቶች ለዘላለም ጠፍተዋል፤ከተሞቻቸውን አፈራርሰሃል፤መታሰቢያቸውም ሁሉ ይደመሰሳል።+
ה [ሄ]
7 ይሖዋ ግን በዙፋኑ ላይ ለዘላለም ተቀምጧል፤+ዙፋኑንም ለፍትሕ ሲል አጽንቷል።+
8 ዓለምን* በጽድቅ ይዳኛል፤+ለብሔራት ትክክለኛ የፍርድ ውሳኔዎች ያስተላልፋል።+
ו [ዋው]
9 ይሖዋ ለተጨቆኑ አስተማማኝ መጠጊያ ይሆናል፤+በመከራ ጊዜ አስተማማኝ መጠጊያ ነው።+
10 ስምህን የሚያውቁ በአንተ ይታመናሉ፤+ይሖዋ ሆይ፣ አንተን የሚሹትን ፈጽሞ አትተዋቸውም።+
ז [ዛየን]
11 በጽዮን ለሚኖረው ለይሖዋ የውዳሴ መዝሙር ዘምሩ፤ሥራውንም በሕዝቦች መካከል አስታውቁ።+
12 ደማቸውን የሚበቀለው እሱ ያስታውሳቸዋልና፤+የተጎሳቆሉ ሰዎች የሚያሰሙትን ጩኸት አይረሳም።+
ח [ኼት]
13 ይሖዋ ሆይ፣ ቸርነት አሳየኝ፤ከሞት ደጆች የምታነሳኝ አምላክ ሆይ፣+ የሚጠሉኝ ሰዎች የሚያደርሱብኝን እንግልት ተመልከት፤
14 ያን ጊዜ የሚያስመሰግኑ ተግባሮችህን በጽዮን ሴት ልጅ ደጆች አውጃለሁ፤+በማዳን ሥራህም ሐሴት አደርጋለሁ።+
ט [ቴት]
15 ብሔራት፣ ራሳቸው በቆፈሩት ጉድጓድ ውስጥ ገቡ፤የገዛ እግራቸው በስውር ባስቀመጡት መረብ ተያዘ።+
16 ይሖዋ በሚወስደው የፍርድ እርምጃ ይታወቃል።+
ክፉ ሰው በገዛ እጁ በሠራው ነገር ተጠመደ።+
ሂጋዮን።* (ሴላ)
י [ዮድ]
17 ክፉ ሰው፣ አምላክን የሚረሱ ብሔራትም ሁሉወደ መቃብር* ይሄዳሉ።
18 ድሃ ግን ለዘላለም ተረስቶ አይቀርም፤+የየዋሆችም ተስፋ ፈጽሞ ከንቱ ሆኖ አይቀርም።+
כ [ካፍ]
19 ይሖዋ ሆይ፣ ተነስ! ሟች የሆነ ሰው እንዲያይል አትፍቀድ።
ብሔራት በፊትህ ይፈረድባቸው።+
20 ይሖዋ ሆይ፣ ፍርሃት ልቀቅባቸው፤+ሕዝቦች ሟች መሆናቸውን ይወቁ። (ሴላ)
የግርጌ ማስታወሻ
^ የቃላት መፍቻውን ተመልከት።
^ ወይም “ፍሬያማ የሆነችውን ምድር።”
^ የቃላት መፍቻውን ተመልከት።
^ ወይም “ሲኦል።” የሰው ልጆችን ሁሉ መቃብር ያመለክታል። የቃላት መፍቻውን ተመልከት።
