Dzé da so mina ôsiman éyong mina wokh éfia « apocalypse »? É ne ve naa mi simane môra ntsaman, ngeng ézing aval ntsaman da ve naa dzôm aa dzôm déé se ki fe bera ning a si. Bôr b’ézing ba simane naa émô é nkune tobe ntsaman aval té, dang dang amu ba wokh aval mefuèñ ma :

•   « Guerra nuclear (guerre nucléaire) é ne boban melu ma zu. Ngeng ézing é ne kuiñ amu naa môr ézing éñe a va kômane de, nge ki naa é va boban kaa naa be tem de, nge ki faa amu naa môr a va dzime wokh dzam ézing. »—Bulletin of the Atomic Scientists.

•   « Mimbu awôm mi ndeghe lôt mi, bi va yen abim bibubua bi-mam biaa be ki tare yen ane b’akôs, mefan ma dzighi, nkôt, coral (corail) da ke da bo mfum, ayông énen, ya fe mendeme mevôm mevôm me y’a si. »—National Geographic.

•   Mimbu a mimbu, ébiran minsama bitandak ba bo da ke faa ve da neman abé. »—The Associated Press.

 Ye si da ye faa tobe ntsaman étom môra Apocalypse ? Za dzam Biblia a dzô ?

 Koko. Nkobe Nzame, Biblia, da ve bia ndzi-n’nem naa si da ye tobe mbèmbèè. (Ecclesiastes 1:4) Ngaane naa a tsam é si émiéñ a nga vele, Nzame a ye ‘tsam é bôr ba ke ba wuiñ si ntuk.’—Melere 11:18.

 Aval ane Biblia a kobe do, « émô » da zu man, a ne nsama boan bebôt be ne kaa bis Nzame, bé ke ba tiè faa ve é mam meba. Aval ane a nga bo do melu Noé, Nzame a ye mane tsam ‘émô y’é bôr be ne kaa ko Nzame wong.’—2 Pierre 2:5; 3:7.

 Aval 1 Jean 2:17 a dzô do, ‘émô da ke da lôt, nkômane wèñ waa fe.’ Éfus té da lere naa se ki é planeta wèè éwô Nzame a ye tsam, nsama bôt ba tsini naa ba wule abé ébe Nzame a ye tsam.

 Biblia aa tugha ki bia dzô éyong évé amanegha da ye so. (Matthieu 24:36) Ve daa, da lere naa é ntoo bébéñ. Biblia a nga kulu medzô ma :

•   Mam ane meluman, bidzi avitsang, bôra b’akoan, ya fe minfoghane misi mi ne ngu’u mia ye boban ‘mevôm mevôm.’—Matthieu 24:3, 7, 14; Luc 21:10, 11; Melere 6:1-8.

•   Abuiñ bôr ba ye simane faa ve bebiéñ. Éfônan, ba ye ‘dzing mono,’ ‘kaa lang mbeng,’ ya fe ‘kaa djié bebiéñ.’—2 Timothée 3:1-5.

 Abuiñ bôr ba meme naa a té ye mbu 1914, éning é nga ke da bo faa ve aval Biblia a nga kobe do, ya naa amanegha é ntoo bébéñ. Naa mi tugha wokh adzô té, mi ne ke lang « Za dzam nlang y’a Biblia ô nga lere dé deghe mbu 1914 ?» ya fe « Mendem me ye ‘melu me y’asughlan’, nge ki ‘tam amanegha’, me ne dzé ?»

 Éfia ye n’nôm nkobe griego (grec), éwi ba konghlane naa “apocalypse” a Biblia été, da tare yili naa « a wièè » nge ki « a lere ». Biyong bizing, ba belane éfia té éyong ba kulu é fuèñ bôr be mba bé chale. Biblia a kobe fe « nleran [nge ki, apocalypse] Ntî Yésu », dzam té da boban éyong ba lere Yésu ane é môr étam a ne mane vèè abé ésese é ne a si, ya ve é bôr ba kang Nzame ôba wôba.—2 Bethessalonicien 1:6, 7; 1 Pierre 1:7, 13.

 Abakh da sughlane a Biblia été a ne A·po·kaʹly·psis, nge ki Melere. Éyôla té é ne amu da kane é mam ma ye boban melu ma zu. (Melere 1:1) Abakh té é bele mbemba mefuèñ ma ve ôyane. (Melere 1:3) Da lere naa Nzame a ye mane tsam é mam mese méé se ki sôosôe ya ve naa si é venghane paraíso (paradis). Tam té, boan bebôt baa ye ki fe bera wôrane mintèñ, nge yen minzukh ya awu.—Melere 21:3, 4.

 Ye mina kômô yem é mam mefe me lare ya é mbemba mengia Biblia a ve ? Bengaa Jehôva ba ve bôr ayeghle y’a Biblia kaa sili mono. Be ne mina vole. Ye mina kômô kobe ya môr mboo y’ébe be ?