Ôdzibi Jehôva a bele akal émo di, éé nkune man. Bivus min’yebe bi nkune tobe ntsaman, nsama meyong wa ye lumane ayong bôt Nzame, ya naa Jehôva a ye wiñ mbimbia be-bôt a Armagedón. Bekristen ba yane bôra be-mam meté.

Bebela a ne naa biaa yem ki é mam mesese ma tsinane bitsible binen. Éfônan, biaa tugha ki yem éyong dzam té da ye sum. Biaa yem ki mekalgha ma ye tsini bidjié bi politique nge ki política naa be lumane min’yebe. Biaa yem ki abim tam aluman meyong ya ayong Nzame da ye bem, ya é mam mese ma tsinane dzam té. Ya fe naa biaa tugha ki yem é mam Jehôva a ye belane mo naa a wiñ mbimbia be-bôt Armagedón.

Ve, Biblia a ve bia é mam bia yi nfa ye naa bi yan melu ma zu, ya mebun ya ayokh. Éfônan, bia yem naa bi nga ning-hang amanagha « ye melu me ye asughlan. » (2 Tim. 3:1) Bia yem naa aluman nfa min’yebe da ye tobe « moan tam » ye naa ña n’yebe aa ye ki tobe ntsaman. (Mat. 24:22) Bia yem naa Jehôva a ye kôre ayong dèñ. (2 Pierre 2:9) Bia yem naa é môt Jehôva a nga top naa a zu kikh mbimbia be-bôt nsang ya baghle môra nsama Armagedón ane sôsôe ya ngu’u.—Mel. 19:11, 15, 16.

É bôra be-mam ma zu ma ye ve naa ayong « é takh ya ko-wong » ve éyong bia lang ya binane aval Jehôva a nga kôre bôt melu ô mvus ya yen é mam a dzô akal melu ma zu « bi ne tebe ya bere minlô miè » bii bele mebun naa akôre dèè dé ntoo bebéñ.—Luc 21:26, 28.