Minkanghle mèñ été, Yésu a mbe é belane mefuèñ m’ézing y’é mam me mbe méé boban é vôm a mbe a too naa a kanghle bôt. (Luc 13:1-5) Wa fe ô ne belane mefuèñ m’ézing me y’é mam ma boban é vôm ô too me ne name bôt naa ô kanghle mbemba fuèñ y’Édjié Nzame. Niène wa mane tu mam ane, éning é ntoo nku abé, é mam ma so a tem-tem, ébiran bôt ba bo akal é dzam édjié da dzô nga bo, é bôt be ne minkôm ye n’ñuane mbang ye mam mefe, éyong té wa sili môt té nsili wa ve naa a fas. Ngeng ézing ô ne sili naa : « Ye wa simane naa môs ézing biaa ye ki fe yen . . . ? » nge ki « Za dzam wa tem naa é ne mane kôm . . . ? » Éyong môt a va-hang éyalan, langhe ya ñe éfus ya Bible da tiè adzô té. Nge môr a lere naa a kômô tsini nlang ôsu, lereghe ñe éngengeng nge ki vakh ñe abakh daa ye éwala bivol akal minkanghle dèè. Nté bia dzeng naa bi name min’nem bôt be ye abeng minkanghle dèè, n’tsinighan ôsu naa bia « bo mam mesese naa bi kanghle mbemba fuèñ. »—1 Becor. 9:22, 23.

Za minlô-medzô mi ne name bôt be ye abeng minkanghle duè?