AYEGHLE 19
Aval avé bi ne wône mebun maa ébe é ngiagh Jehôva ye nféféñ éning ?
« Éyong [Jehôva] a dzô dzam, ye da ye dzalban ? » —NLA. 23:19.
ZA 142 Mbighan mebun maa ya ngu’u
AKIGHE BES a
1-2. Za dzam bia yiène bo nté bia yane nféféñ éning ?
BIA bira ve Jehôva akiba akal é ngiagh dzèñ ya tsen mbia émo di ya nféféñ éning da ye bo sôsôe (2 Pierre 3:13). Amben biaa tugha ki yem é tam nféféñ éning té da ye so, é mam bia yen éning abong di, ma lere naa, biaa ye ki fe yane aayap—Mat. 24:32-34, 36 ; Bisè mintôl 1:7.
2 Nté té, kaa bis abim tam bi tobeyang a bebela été, bia besese bia yiène wône mebun maa ébe ngiagh té. Amu dzé ? Amu naa, mebun me ne ngu’u, maa fe me ne mane takh. Ya dzam té, ntôl Paul a nga luè « nsem ô ne ébubu ya biñ bia » naa, kaa mebun (Behéb. 12:1). Nfa ye naa mebun maa me taa mane takh, éyong ésese, bia yiène fas mendem ma lere naa nféféñ éning é nkune so—Behéb. 11:1.
3. Za dzam bia ye fas ayeghle di été ?
3 Ayeghle di été, bia ye fas meval melal bi ne wône mebun maa ébe é ngiagh Jehôva ye nféféñ éning : (1) éyong bia binan ébe ntang, (2) éyong bia yen é ngu’u Jehôva, ya (3) éyong bia ñong tam naa, bia bo bisèñ bi ya nsisim. Ôsu vèè, bia ye fas aval avé é fuèñ Jehôva a nga kee Habacuc, da wône mebun maa ému. Ve, ôsusua, nfasghan bitéñ bizing bi ne tubane bie éndagha, bia sili naa mebun maa ébe é ngiagh Jehôva ye nféféñ éning me bo ngu’u.
BITÉÑ BIA SILI MEBUN ME NE NGU’U
4. Za minkighane mia sili mebun me ne ngu’u ?
4 Melu mese, bia ñong minkighane mia sili mebun me ne ngu’u. Éfônan, bia ñong minkighane mi bele élat ya memvuiñ, bivuiñ, besikôlô, alukh, boan ye ésèñ ye émo. Bia yiène sili bia bebièn naa : ‘Y’é mam ma top ma lere naa, ma bunu ya n’nem ôse naa, mbia émo di é bele ngura tam, ye naa nféféñ éning Nzame é nkune wô zu tsen ? Nge ki naa, ye ma top naa, ma bo é mam é bôt ba bunu naa béé se ki ning mbèmbèè ba bo ?’ (Mat. 6:19, 20 ; Luc 12:16-21) Bia ye ñong minkighane mia dang mbeng nge bia wône mebun maa naa, nféféñ éning é ntoo bebéñ.
5-6. Amu dzé bia yi mebun me ne ngu’u éyong bia tubane minzukh ? Vakh éfônan.
5 Bia tubane fe minzukh mia sili mebun me ne ngu’u. Bi ne tubane bitsiblé, ôkoan waa let ki, nge ki é mam mefe me ne ve naa, bi mane sulu. Ôsusua, bi ne wôrane naa, bi ne zôme ndzukh té. Ve, aval minzukh mité, abuiñ biyong, mi wôla tobe abuiñ tam, éde bia yi mebun me ne ngu’u naa, bi zôme mie ye tsini naa, bia sèhane Jehôva ya mevakh—Bero. 12:12 ; 1 Pierre 1:6, 7.
6 Éyong bi ne meboblan été, bi ne wôrane naa, nféféñ éning Jehôva a kiagh bia, daa ye ki so môs ézing. Ye dzam té da yili naa mebun maa me taghang ? Se ki éyong ésese. Fasghe éfônane di. Éyong tam menveng é kuihang, bi ne vane wôrane naa, vièn waa ye ki fe bera fèñ môs ézing. Ve, ô wôla sughlane fèñ. Aval té fe évoo, éyong bi manang bira sulu, bi ne wôrane naa, nféféñ éning daa ye ki so môs ézing. Ve, nge mebun maa me ne ngu’u, bia yem naa, mengiagh Nzame ma ye dzalban (Bya 94:3, 14, 15 ; Behéb. 6:17-19). Ya ndzi-n’nem, bi ne tsini naa bia tele ékang bia ve Jehôva ôsu bining bia.
7. Za aval ôsiman bia yiène saalé ?
7 Yeneghe é dzam afe da sili mebun me ne ngu’u. Ésèñ minkanghle. Abuiñ y’é bôt bia kanghle ba tem naa, é « mbemba fuèñ » a daghe nféféñ éning Nzame, déé se ki boban (Mat. 24:14 ; Ézéch. 33:32). Bi taa vaghle likh naa, bia fe bi kôp aval ôsimane té. Nfa ye naa dzam té é taa boban, bia yiène tsini naa, bia wône mebun maa. N’yeneghane meval melal bi ne bo dzam té.
A BINAN ÉBE NTANG
8-9. Aval avé a binan ébe ntang é ne name mebun maa ?
8 Aval évoo bi ne wône mebun maa, é ne a binan ébe ntang. Ntang wa bane bia naa, mengiagh Nzame ma ye dzalban. Éyong bia tugha fas ébe amu dzé be nga ve ntang, ya é dzam é nga sili, bia wône mebun maa naa, é ngiagh Nzame ye éning é ne kaa man, é si da dang mbeng, bebela ya bebela, da ye dzalban. Amu dzé bi ne de dzô ?
9 Éde, ntang ô nga sili za dzam ? Jehôva a nga lôm akikh Moan wèñ a dang dzing, éñi ba ñe be nga dang élat, a kôre ya dzôp naa a zu byale a si, ane é moan môt a ne kaa nsem. Nté a mbe a si va, Yésu a nga zôme minzukh meval mesese. Ôsu vèè, a nga bira dzukh ye wu awu é ne édedèè mintèñ. Za môra tang Jehôva a nga yaane alé ! É Nzame waa a ne édzing, éé mbe vaghlé likh naa, é Moan wèñ a dzukh ye wu amu a kômô bia ve mbemba éning, ve fave ôyôm tam (Jean 3:16 ; 1 Pierre 1:18, 19). Amu Jehôva a nga ve é Moan a dang dzing naa a vole bia, a ye ve naa, bi ning mbèmbèè nféféñ éning.
YENEGHE É NGU’U JEHÔVA
10. Aval ane Beéphésien 3: 20 da lere de, za dzam Jehôva a ne bo ?
10 Aval bèè bi ne wône mebun maa, é ne a yen é ngu’u Jehôva. A bele ngu’u ya dzale é dzam ésese a kiagh naa a ye bo. É ne été, abuiñ bôt ba tem naa, éning é ne mbèmbèè nféféñ éning, déé se ki boban akal deba. Ve, abuiñ biyong, Jehôva a kiagh é mam boan be-bôt béé se ki dzale. A ne bo dzam té amu a ne é Nzame a ne Mengu’u mese (Job 42:2 ; Marc 10:27). Édeeng, biaa sighane ki, éyong a kiagh bia biyaghane bi-mam !—A lang Beéphesien 3:20.
11. Vakh éfônan y’é môra ngiagh ézing y’é bura mengiagh Nzame. (A daghe nkaalé « É bôra mengiagh mézing Nzame me dzalbaneyang. »)
11 Fasghe é mam mézing ma yene ane méé se ki boban, Jehôva a nga kiagh ayong dèñ metam ô mvus. A nga kiagh Abraham ba Sara naa ba ye bele moan a too naa be ntoo min’nôm (Atar. 17:15-17). A nga dzô fe Abraham naa, ba ye kee é mvong dzèñ si Canaan. Ébe abuiñ mimbu, é mvong Abraham, be Israelitas, be mbe minkôm Égipto, é mbe yene ane ngiagh té daa ye ki vaghle dzalban. Ve, é nga dzalban. Ôsu vèè, Jehôva a nga dzô n’nôm Elisabet naa, a ye byèñ moan. A nga dzô fe María, édune ngoan, naa a ye byèñ é Moan Nzame. Dzam té, é nga ye dzale é ngiagh fe Jehôva a nga bo, betoyini mimbu ô mvus, afup Éden été !—Atar. 3:15).
12. Josué 23:14 ya Esaïe 55:10, 11 ba bane bia za dzam nfa é ngu’u Jehôva ?
12 Éyong bia simane mengiagh Jehôva, ye aval a nga dzale me, bia wokh naa, a ne édedèè ngu’u. Éde, mebun ébe ngiagh ye nféféñ éning a nga bo bia, ma bera bo édedèè ngu’u (A lang Josué 23:14 ; Esaïe 55:10, 11). Dzam té da ve naa, bi yem kômane naa, bi vole é bôt bevoo a wokh naa, nféféñ éning Nzame a nga kiagh bia, déé se ki biyeyem nge ki nlang be va té. Nfa nféféñ dzôp ya nféféñ si, Jehôva émièn a dzô naa : « Bifiè bité, bi ne sôsôe ya bebela »—Mel. 21:1, 5.
DZALGHE ÉNING DUÈ YA BISÈÑ BI YA NSISIM
BISULAN BI Y’ÉKÔAN
Aval avé ésèñ ya nsisim di, é ne wône mebun muè ? (A daghe abong 13)
13. Aval avé bisulane bi y’ékôan bi ne wône mebun maa ? Vakh ayilgha.
13 Aval lal bi ne wône mebun maa, é ne a ñong tam akal bisèñ bi ya nsisim. Éfônan, yeneghe aval bia buane bisulane bi y’ékôan bia. Anna, éñi a nga bo ngura aval minkanghle meval mese, a dzô naa : « Bisulan, bia vole ma a baghle mebun mam ngu’u. Amben é môt a yeghle éé se ki édedèè akeng nfa ayeghle, nge ki naa, aa dzô ki nféféñ dzam ézing, abuiñ biyong, ma bèè dzam ézing da ve me naa, me tugha wokh bebela ya Bible ézing, éde, dzam té da wône mebun mam b. » Kaa bisô, mebun maa, ma wôn fe éyong bia bèè biyalane bobedzang ya bekal bèè bisulan—Bero. 1:11, 12 ; 10:17.
ÉSÈÑ MINKANGHLE
Aval avé ésèñ ya nsisim di, é ne wône mebun muè ? (A daghe abong 14)
14. Aval avé minkanghle mia wône mebun maa ?
14 Bia wône fe mebun maa, éyong bia kanghle (Behéb. 10:23). Barbara éñi a sèhaneyang Jehôva a lôt mimbu 70, a dzô naa : « Me yenang éyong ésese naa, ésèñ minkanghle da wône mebun. Nté sese ma bira kobe ya é bôt bevoo nfa ye mbemba mengiagh Jehôva, nté té sese, mebun mam ma tobe ntetèè ya ngu’u. »
AYEGHE MÔT ÉMIÈN
Aval avé ésèñ ya nsisim di, é ne wône mebun muè ? (A daghe abong 15)
15. Aval avé ayeghe môt émièn da wône mebun maa ? (A daghe fe bivaghle).
15 Fasghe ésèñ ya nsisim éfe di, da wône mebun maa : ayeghe môt émièn. Susan a dzô naa, éyong a takh aval ya ôden a ye yeghe, da bira ñe vole. A dzô naa, « É môs Sono, ma yeghe Ô momo y’é sono a zu. É môs ôsua ye é môs bèè ye sono, ma kômane ésulan ye ézizang sono. Melu ma sughlan, ma bo ayeghe dam mamièn. » A baghle mbemba ntaane mam akal ayeghe, da ve naa Susan a tsini naa a long mebun mèñ. Irene, éñi a sèhaneyang abuiñ mimbu a Tsîn étobgha, a dzô naa, a yeghe minkulane medzô me ya Bible da wône mebun mèñ. A dzô naa : « A yen ane minkulane medzô Jehôva mia tugha mane dzalbane ya ke kuiñ boan be-mam, da bira me name c. »
« DAA YE KI BO KAA DZALBAN »
16. Amu dzé é dzam Jehôva a nga bane Habacuc é bele ayilgha akal daa ému ? (Behébreu 10:36, 37)
16 Be-bo bisèñ Jehôva bézing be yaneyang amangha ye ntukh émô di aayap. Bôt bézing ba tem naa, amangha é nga yiène bem so. Ve, Jehôva a yem é dzam be-bo bisèñ bèñ ba wôran. Éde a nga bane nkule medzô Habacuc naa : « N’lerane ô ne akal ngura tam, ye naa, wa ke wa yit bebéñ ndzalane wèñ, amben da lôt abuiñ tam, tsinighe naa wa yane wô ! Waa ye ki bo kaa dzalban. Da ye dzalban é tam dèñ ! » (Habac. 2:3) Ye Nzame a nga bane dzam té fave akal Habacuc ? Nge ki naa, ye bifiè bité bi bele fe ayilgha akal dèè ému ? Ya nsisim wèñ, Jehôva a nga dzô ntôl Paul naa, a tsili bifiè bité akal bekristen ba ye tsini naa ba yane nféféñ éning ya n’nem ôsese (A lang Behébreu 10:36, 37). Ôwé, bi ne bele ndzi-n’nem naa, amben akôre be nga kiagh bia, da fônane naa da bem, « daa ye ki bo kaa dzalban. Da ye dzalban é tam dèñ ébièn ! »
17. Aval avé kal dzaa ézing a nga dzale melepgha Jehôva a nga ve Habacuc ?
17 Abuiñ be-bo bisèñ Jehôva be dzaleyang melepgha mèñ nfa ye « a tsini naa ba yane, » amben bevoo be y’été ba so ba bo de tang abuiñ mimbu. Éfônan, Loisa a nga sum naa a sèhane Jehôva mimbu 1939. A dzô naa : « Tam té, me nga tem naa, Armageddon a ye so kaa naa, me mane bôra besikôlô. Ve, déé dzi ki boban. Nté mimbu mi nga ke mia lôt, me nga ñong abuan a lang é dzam me nga luè naa ‘minlang mi ye ayane’. Minlang mi ya Bible Noé, Abraham, José nge ki Joseph, ya bôt befe be nga yane aayap, kaa naa be ñong é maane Jehôva a nga kiagh bo. A tsini naa bia yane, é nga baghle ma ya bôt befe, ébe ndzi-n’nem naa, nféféñ éning é ntoo bebéñ. » Abuiñ be-bo bisèñ Jehôva be sèhaneyang ñe aayap, baa fe, ba yebe dzam té !
18. Aval avé a bili avele é ne wône mebun maa ébe nféféñ éning da zu ?
18 Bebela a ne naa, nféféñ éning déé be ki so. Ve, simane é mam mézing me ne é si ñi, atétéñ, betsit, bilé, ya boan be-bôt. Môt éé se ki sôô naa, biôm bité bi ne ña biôm, amben tam ézing, biôm bité bii mbe ki éning. Biôm bité bi ne éndagha, fave amu Jehôva a nga vele bie (Atar. 1:1, 26, 27). É Nzame wèè a mana fe takh naa, a ye tuè nféféñ éning. A ye dzale nkômane wèñ. Nféféñ éning, bôt ba ye buane éning é ne kaa man ya mvoa ya nsôn. É tam émièn a va takh de, nféféñ éning da ye bo ña dzam, aval éning se ngura bia yen ému wi, é ne—Esaïe 65:17 ; Mel. 21:3, 4.
19. Aval avé ô ne wône mebun muè ?
19 Nté té, dzenghe naa, ô belane biyong ô bele naa, ô wône mebun muè. Vakh akiba akal ntang éyong ésese. Yeneghe é ngu’u Jehôva. Dzalghe éning duè ye bisèñ bi ya nsisim. Éyong wa bo de, ba ye wô lang nsama « é bôt, ngalane mebun ya ôdzibi, ba buane mengiagh »—Behéb. 6:11, 12 ; Bero. 5:5.
ZA 139 Boghe ane ô ne ô Paradis
a Abuiñ bôt ému béé bele ki mebun ébe ngiagh ya Bible ye nféféñ éning. Ba tem naa, a ne fave biyeyem, minlang ba kanghle boan, ye fe naa, dzam té da dang édedèè mbeng naa é bo bebela. Ve, bi bele ndzi-n’nem naa, mengiagh mesese Jehôva, ma ye dzalban. Ve, amben aval té, nfa ya baghle mbunane wèè ntetèè, bia yiène tsini naa bia wône wô. Aval avé ? Ayeghle di, da ye de lere.
b Be nga tsen biyôla bizing.
c Bi ne kuan abuiñ minlô-medzô nfa, « Profecía nge ki Prophétie » abakh Índice de las publicaciones Watch Tower nge ki Index des publications Watch Tower. Éfônan, daghe nlô-adzô « Lo que Jehová predice se cumple sin falta nge ki Les prédictions de Jéhovah s’accomplissent » a La Atalaya, 1 de enero de 2008 nge ki La Tour de Garde, 1er janvier 2008.
