1. Za dzam moan kristen a yiène bo naa a vem a nsisim ?

 KÉZA David a nga dzô Salomon naa : « Boghe ngu’u, ye bo mam ane fam » (1 Bed. 2:1-3). Befam besese be ne bekristen ému, ba yiène béé melepgha meté. Naa be bo biwôlô a nsisim, ba yiène yeghe a bo Atsing Nzame mewokh ye dzale metsin metsing me ya Bible minfa mise mi ye bining bieba (Luc 2:52). Amu dzé é ne édedèè éban naa bitong befam be ne bekristen be bo biwôlô nfa ya nsisim ?

2-3. Amu dzé é ne éban naa étong fam é ne kristen é bo éwôlô a nsisim ?

² É fam é ne kristen da yiène dzale meyem me ne éban a nda-bôt y’ékôan été. A bitong bobedzang, ngeng ézing mi simaneyang meyem mia ye bele ékôan été melu ma zu. Mi ne bele nsonghane naa mia bo mpwaghe mefan, amvene, melu ma zu ôsu vèè, mvene. Ngeng ézing mia kômô lughane ye byèñ boan (Beéph. 6:4 ; 1 Tim. 3:1). Naa mi dzale minsonghane mité ye yem vem, é ne éban naa mi bo é kristen a ne éwôlô a nsisim b.

³ Dzé é ne mina vole a dzale nsonghane y’a bo é kristen a ne éwôlô ? Mia yiène dzeng naa mi yem bo mam mézing. Édeeng, za dzam mia yiène bo éndagha naa mi kôman, ye yem dzale meyem menan mese melu ma zu ?

4. Vôm mbé mi ne yen bifônan bi ya vu ? (A daghe fe évaghle).

⁴ Topghan é mbemba bifônan mi ne vu. Biblia a ne ndzalan y’é mbemba bifônane bitong bi ne vu. Befam be ye melu  ô mvus beté, be mbe béé ñeghe Nzame ye dzale meyem meba nfa y’a yem belan ayong Nzame. Mi ne fe yen mbemba bifônan ébe bekristen be ne biwôlô é nda-bôt dzenan ya ékôan été (Behéb. 13:7). Mi bele fe éfônan é ne kaa ékop, Yésu Christ (1 Pierre 2:21). Nté sese mia ye yeghe bifônan bité, tughane bili meval mefulu kada môt a bele (Behéb. 12:1, 2). Éyong té mia kikh aval mia ye vu befam beté.

5. Za mam mi ne bo naa mi yen mam ane Jehôva, ye naa, amu dzé dzam té é ne éban ? (Bya 119:9)

⁵ Neneghe ye « baghle [. . .] n’yenane mam wa yiène » (Mink. 3:21). É fam da yen mam ane Jehôva, a fas é dzam a yiène bo kaa naa a ñong nkighan. Édeeng vaane ngu’u naa mi bele ye baghle fulu té. Amu dzé ? Amu naa é si ñi é ne n’dzalane ya bitong befam ba ñong minkighan ye mesiman meba nge ki aval ba wôrane mam (Mink. 7:7; 29:11). Bingengeng y’é mam ma so a nden, me ne name n’yenane mam wônan y’aval mia bo mam. Ve, aval avé mi ne yeghe a yen mam ane Jehôva ? Sumghane yeghe metsin metsing me ya Bible ye fas amu dzé me ne éban. Ôsu vèè, belane metsin metsing meté naa me vole mia a ñong minkighane mia ye ve Jehôva n’nem mbeng (A lang Bya 119:9). Nge mia nene mbemba fulu y’a yen mam ane Jehôva, mi nga wuleyang zen ya bo éwôlô a nsisim (Mink. 2:11, 12 ; Behéb. 5:14). N’fasghan aval a yen mam ane Jehôva é ne mia vole ébe bitéñ bibèñ bi : (1) aval mia ñong bekal bèè, édi (2) minkighane mia ñong nfa é biôm mia ye boat y’aval mia ye yene ô mis.

6. Aval avé fulu y’a yen mam ane Jehôva da ye vole étong moadzang a lere bekal bèñ ngang ?

⁶ A bele fulu y’a yen mam ane Jehôva da ye wô vole naa ô lere binenga ngang. Déé se ki abé naa étong moadzang a yit kal dzèè ézing bebéñ naa a kômô ñe tugha yem. Ve, étong moadzang a yen mam ane Jehôva, aa ye ki dzô, a tsili nge ki a bo é mam mézing me ne duru mesiman m’édzing, nge aa kômô ki sili kal dzèè té alukh (1 Tim. 5:1, 2). Nge be tsièyang minlang mia tsinan alukh, a ye dzeng naa a baghle é mbemba éwogha dèñ, kaa tobe étam ye  ñe, da yili naa môt a yiène tobe ya be—1 Becor. 6:18.

7. Aval avé fulu y’a yen mam ane Jehôva da ye vole étong ndôm dzèè éyong a ye top bitôp a boat y’aval a kôm ñuu ?

⁷ Aval éfe étong fam é ne lere naa a nga yenang mam ane Jehôva, a ne éyong a yem top bitôp a boat ye kôm ñuu. É bôt ba lat ye kule bitôp metam ma, be ne é bôt baa kang ki Jehôva, nge ki éba bining bi ne édedèè abé. Mesimane meba me ne mvin, ma yene y’aval bitôp ba boat, ébi bia yem be ô ñuu, bia ve naa befam be nga fônane binenga. Éyong a top étôp a ye boat, étong fam é ne éwôlô a nsisim a ye likh naa metsin metsing me ya Biblia ye mbemba bifônan bi y’ékôan bi wule ñe. A ne fe sili émièn naa : ‘Ye mintopbane miam mia lere naa me ne nfuban nfa ya nsisim ye naa ma kang é bôt bevoo ? Y’aval ma boat da likh naa é bôt bevoo be yem naa me ne mbo ésèñ Nzame ?’ (1 Becor. 10:31-33 ; Tite 2:6) Étong fam é bele n’yenane mam wa yiène, a ye bele é ngang da so se ki fave ébe bobeñang ye bekal bèñ, ve y’a fe ébe Ésaa a ne a dzôp été.

8. Aval avé étong fam é ne yeghe a bo é môt be ne tobe a ñe mebun ?

⁸ Boghe é môt be ne tobe a ñe mebun. Étong fam be ne tobe a ñe mebun a yem dzale meyem mese mèñ (Luc 16:10). Fasghe éfônane kaa ékop Yésu. Éé dzi ki vaghle biane meyem mèñ. Ndaane de, a nga dzale meyem mesese Jehôva a nga kee ñe, amben éyong é mbe ndzukh. A nga dzing boan bebôt, dang-dang beyeghe bèñ, ye yebe naa a ve éning dèñ akal deba (Jean 13:1). N’vughane Yésu, bii sèñ ngu’u naa bi dzale meyem mesese ba kee bia. Nge waa tugha ki yem aval ô ne de bo, boghe asili ñuu ye dzaa bobeñong be ne biwôlô a nsisim avole. Ô taa ki vaghle sughu fave ôyôm abim ô ne bo (Bero. 12:11). Ndaane de, tugha dzale ayem duè wéé bo de « akal Jehôva, se ki akal boan bebôt » (Becol. 3:23). Bebela a ne naa, wéé se ki é môt a ne kaa ékop, éde yemeghe menié muè ye yebe ékop ésese ô ne bo—Mink. 11:2.

9. Amu dzé étong fam da yiène yeghe é mam mézing me ne ñe vole ?

⁹ Naa ô tobe é fam é ne éwôlô a nsisim, wa yiène yeghe a bo mam mézing. Mam meté ma ye wô vole a yebe ye dzale meyem ékôan été, a bele ésèñ é ne baghle wamièn nge ki é nda-bôt duè ye bele mbemba élat y’é bôt bevoo. Fasghe bisèñ bizing bi y’été.

10-11. Aval avé étong fam émièn, y’ékôan be ne ñong abuan, éyong a yeghe a yem lang ye tsili ? (Bya 1:1-3) (A daghe fe évaghle).

¹⁰ Yeghe a yem lang ye tsili. Biblia a dzô naa, é fam é ne mvom ye naa mam ma wule ñe mbeng a lôt tam kada môs éé lang Nkobe Nzame ye binane wô (A lang Bya 1:1-3). A lang Bible kada môs, ye yeghe a yem aval Jehôva a tem, dzam té da ye ñe  vole a tugha yen mam ye fas (Mink. 1:3, 4). Aval befam beté éde ékôan da yi. Amu dzé ?

¹¹ Bobedzang ye bekal bèè ba dzeng befam be ne nkoghane naa be yeghle be ye ve be melepgha ma so a Bible été (Tite 1:9). Nge ô ne tugha yem lang ye tsili, wa ye tobe nkoghane naa wa kômane mintun, ye ve mbemba biyalane bia wône mebun. Ya fe naa, wa ye yem tsili é mam me ne wa éban nté wa yeghe, wa bèè mintun ékôan, bisesang alu daa ye bisesang melu melal. É mam wa ye tsili alé, ma ye wô vole a bele mebun me ne ngu’u, ye saghe é bôt bevoo.

12. Dzé da ye wô vole a yem kobe ye bôt ?

¹² Yeghe a tugha bèè ye yem kobe. Moan kristen a yiène yeghe a yem kobe ya bôt. É môt a yem kobe ya bôt a bèè ye wokh mesiman ye awôran é bôt bevoo (Mink. 20:5). A ne yeghe a lang king nkobe, bito mesu ye bito bi ñuu môt nfe. Ô se ki yeghe a bo dzam té nge waa lôt ki tam ya bôt. Nge ô bele fulu ya belane bivole électronique akal a kobe, ane nkoo nden, nge ki mefuèñ me ya telephone, dzam té é ne ve naa ô taa fe yem kobe ya bôt éyong mi ne vôm mboo. Éde, tugha buane biyong ô bele naa ô ne kobe y’é bôt bevoo éyong mi ne vôm mboo—2 Jean 12.

13. Za dzam afe étong fam da yiène yeghe ? (1 Timothée 5:8) (A daghe fe évaghle).

¹³ Yeghe aval ba dzeng mono naa ô baghle wamièn. É moan kristen a ne éwôlô a nsisim a yiène tobe nkoghane naa a dzale mekômgha mèñ, y’éma é nda-bôt dzèñ (A lang 1 Timothée 5:8). Mesi mézing, bitong bi ne yeghe ésèñ ya bésaa nge ki ya bôt befe. Mesi mevoo, étong é ne yeghe ésèñ amben éé dzi ki bo bura besikôlô. A bo aval ése é ne bo, é ne mbeng naa ô yeghe é dzam é ne wô vole a dzigha yen asu ésèñ (Bisè mintôl 18:2, 3 ; 20:34 ; Beéph. 4:28). Ba yiène bia yem ane é bôt ba sèñ ngu’u, y’éba ba sum ésèñ ye bo de ya ke kuiñ da tugha man. Nge mia bo de, da ye mia bo ébubu a yen ésèñ, ye baghle de. Mefulu ya bisèñ bi va kobe bio, me ne fe éban akal é fam é ne kristen, naa a dzale meyem mèñ melu ma zu. N’yeneghane meyem mézing me y’été.

14. Aval avé étong ndôm dzèè a ne kôman éndagha akal a bo ngum aval ésèñ ékôan été ?

¹⁴ Ngum aval ésèñ ékôan Jehôva été. Abuiñ befam bekristen be ne biwôlô a nsisim, be nga sum ésèñ mpwaghe mefan be too bitong. A bo mpwaghe mefan da vole  étong a yeghe a tugha yem sèñ ya bôt meval mese. Da vole fe ñe a yem belan é mono a wun ye naa a taa ñong memvôla a lôt abim a wun (Beph. 4:11-13). A ñong ésèñ mpwaghe mefan étun éyong é ne wô vole a dzale ésèñ mpwaghe mefan. Abuiñ da sèñ ane mpwaghe mefan étun éyong tang ôyôm tam, dzam té da vole be a tobe nkoghan akal ésèñ mpwaghe mefan. Ésèñ mpwaghe mefan é ne wô wuè mimbèñ akal meval bisèñ bife ékôan été ane, a sèñ ane nlong menda bikôan nge ki Bethelite.

15-16. Dzé da ye vole étong fam naa a tobe amvene nge ki mvene y’ékôan ?

¹⁵ Amvene nge ki mvene. Befam be ne bekristen ba yiène bele nsonghane ya dzale metsin metsing ma ve naa be sèhane bobeñang ye bekal beba bikôan été ane bemvene. Bible a dzô naa befam ba dzeng naa be dzale nsonghane té, ba « kômô mbemba ésèñ » (1 Tim. 3:1). Kaa naa a bo mvene, moadzang wèè a yiène dzale metsin metsing ma daghe é bôt ba kômô sèñ ane bamvene. Bamvene ba vole bemvene abuiñ meval. Bemvene ya bamvene ba sèñ akal bobeñang ya bekal beba y’asili ñuu, be ne fe ayông ésèñ minkanghle. Bitong befam be ne tobe nkoghane a sèñ ane bamvene be ye ékôan amben éyong be ngene bong. Amvene a ndeghe dzale mimbu 20 a ne tobe nkoghane naa a tobe mvene y’ékôan.

¹⁶ Aval avé mi ne sèñ naa mi tobe bamvene, ôsu vèè bemvene ? Ngum nlong metsing wéé se ki nfa dzam té. Ve, simaghane naa mefulu ba sili é môt a kômô bo mvene nge ki amvene ma so a Bible été, ye naa, môt té a bele édzing akal Jehôva, é nda-bôt dzèñ ye akal ékôan (1 Tim. 3:1-13 ; Tite 1:6-9 ; 1 Pierre 5:2, 3). Dzenghane naa mi yem wokh tsin atsing ése y’été. Dzaaghane Jehôva avole meyaghlan été nfa ya dzale minsonghane mité c.

17. Aval avé étong fam é ne kôman éndagha naa a bo n’nôm ye nlô ya nda-bôt ? (A daghe fe évaghle).

¹⁷ N’nôm ye nlô ya nda-bôt dzèñ. Ane Yésu a nga lere de, befam bézing be ne biwôlô a nsisim ba tobe minkuèñ (Mat. 19:12). Ve, nge wa top naa wa lughane, wa ye yiène dzale meyem mesese n’nôm ye nlô ya nda-bôt a bele (1 Becor. 11:3). Jehôva a yane naa n’nôm a dzing ngal ye dzale mekômgha mèñ nfa ya nsôn, awôran ya nsisim (Beéph. 5:28, 29). Mefulu ya bisèñ bi va yen ayeghle di été, ane, a yen  mam ane Jehôva, a bele ngang akal binenga, ye bo é môt be ne tobe a ñe mebun, ma ye wô vole éyong wa ye lughan. Wa ye yem kômane naa ô dzale meyem muè ane n’nôm ye nlô ya nda-bôt.

18. Aval avé étong fam é ne kômane naa a bo ésaa ?

¹⁸ Ésaa. Niène wa lughane ô ne bo ésaa. Za dzam Jehôva a ne wô yeghe nfa a bo mbemba ésaa ? A ne wô ve abuiñ meyeghle (Beéph. 6:4). Jehôva a nga dzô é Moan wèñ Yésu, a bôt été naa, a ñeghe ñe ye naa, a bele ayebe dèñ (Mat. 3:17). Nge ô bo ésaa, dzenghe naa wa ban é boan buè naa wa ñeghe be éyong ése. Saghe be abuiñ akal é mbemba be-mam ba bo. É bésaa ba vu éfônane Jehôva, ba vole é boan beba a bo befam ye binenga bekristen be ne biwôlô a nsisim. Ô ne kôman akal meyem meté éndagha éyong wa lere é nda-bôt duè y’ékôan édzing duè ye yem be baghle. Vakh mengu’u naa ô dzô be naa wa ñeghe be, ye dzô be naa be ne édedèè éban akal duè (Jean 15:9). Dzam té da ye wô vole a dzale ayem duè ane n’nôm y’ésaa melu ma zu. Nté wa yane de, wa ye bo édedèè éban akal Jehôva, é nda-bôt duè ye akal ékôan.

19-20. Dzé é ne vole bitong bobedzang a bo bekristen be ne biwôlô a nsisim ? (A daghe fôrô ye atarga).

¹⁹ A bitong bobedzang, miaa ye ki sia bo bekristen be ne biwôlô a nsisim. Mia yiène top é mbemba bifônan mi ne vu, nfa ye naa mi yen mam ane Jehôva, mi bo é môt be ne tobe a ñe mebun, a bele ayôm mesu m’ésèñ ye kômane akal meyem menan me ye melu ma zu.

²⁰ Éyong mia simane meyem ma yane mina melu ma zu, mi ne wôrane naa mii se ki de bo. Ve, mi ne dang étéñ té. Simghane naa Jehôva a kômô mina vole (Esaïe 41:10, 13). Bobedzang ye bekal benan be y’ékôan baa fe ba ye mina vole. Éyong mia ye dzale nkômane wônan ya bo é kristen a ne éwôlô a nsisim, aval té éde éning denan da ye bo mbeng ye ndzalan. A bitong bobedzang, bia ñeghe mina ! Jehôva a tsinighe naa a bira borane mina nté sese mia k’ôsu ye bo bekristen be ne biwôlô a nsisim—Mink. 22:4.