MIA bira ñeghe abuiñ bedas Jehôva a ve mina, a lang été, fili ya top aval ô ne belane bedas beté. É dzam é ne mbeng é ne naa, Bible a lere naa vino nge ki vin a ne é das Nzame éyong a dzô naa : « Nfem wa ve naa môt a vakh, vino ki ñ’a ve éning mvèñ (Eccl. 10:19 ; Bya 104:15). Ngeng ézing é kuiyang mia naa mia yen é bôt be nga tubane minzukh étom n’ñuane meyokh. Ve, mesiman ye mimboan mia selan mesi ye metum. Dzé é ne vole bekristen a ñong minkighane ya fakh nfa n’ñuane meyokh ?

A bo é vôm ase bi too nge ki metum me ne é vôm bi va vem, a likh ôsimane Nzame ô wule mesiman ye minkighane, da ye bia ve abuan ye dzale éning dèè ya mevakh.

Aval ane mi yenang de, abuiñ bôt ba bira ñu meyokh y’abuiñ biyong. Abim ba ñu akal é mvèñ meyokh ma ve be. Éba bevoo akal naa be dang minzukh ba tubane mio. Ye naa, ébe mevôm mézing, bôt ba simane naa a ñu abuiñ meyokh da lere naa môt a ne éwôlô ye ngu’u.

Atoo naa, bekristen be bele melepgha me ne fakh ma so ébe Mvele wôba a ne édzing. Éfônan, a lere bia minzukh mia so éyong môt a ñu meyokh aval daa yiène ki. Nge ézing bi nga lang nten Minkana 23:29-35 é vôm wa lere aval é môt a fuèn meyokh a ne, ye minzukh mizing mia biane ñe a. Daniel, é kristen a ne mvene a Europa nge ki Europe, a siman aval éning dèñ éé mbe kaa naa a bo ña kristen, éé dzô naa, « A bira ñu meyokh é nga ve naa me ñong mbia minkighan ye so ma minzukh mi nga name éning dam. »

Aval avé bekristen be ne belan é fili ya top deba ye saale minzukh mi ne so éyong môt a bira ñu meyokh ? É dzam da vole bia é n’a likh ôsiman Nzame ô wule mesiman ye mimboane mia.

N’yeneghan é dzam Bible a dzô nfa meyokh, y’é mam mézing ma ve naa bôt be ñu meyokh.

Nkobe Nzame waa kili ki n’ñuane meyokh ya benié. Bible a lere naa a ñu ôyôm vino é ne bo mvèñ. Bia lang naa : « Dza bidzi buè ya mevakh, ye ñu é vino wiè ya n’nem mevakh » (Eccl. 9:7). Éyong ézing, Yésu a nga ñu meyokh, ye naa besôsôe bebo bisèñ befe Jehôva baa be nga ñu fe meyokh—Mat. 26:27-29 ; Luc 7:34 ; 1 Tim. 5:23.

Ve, Nkobe Nzame wa ve nkane ézang a ñu meyokh ye a fuèñ meyokh. Wa tugha dzô naa : « Ô taa fuèn ya vino » (Beéph. 5:18). Wa lere fe naa « é bôt ba fuèn meyokh [. . .] baa ye ki ñii Édjié Nzame été » (1 Becor. 6:10). Ôwé, Jehôva a kili n’ñuane abuiñ meyokh ye fuèn. Ndaane a ñong minkighane nfa meyokh mia wule nsama ya metum mèè, bia kômô ñong minkighane mia ye ve Nzame n’nem mbeng.

Bôt bézing ba simane naa be ne bira ñu meyokh kaa fuèn. Atoo naa dzam té é ne édedèè abé. Mintsili mia tugha lere naa « a bo nkôm vino » é ne ve naa fam (nge ki minenga) a bo mbia ékop ye bo nsem asu Jehôva (Tite 2:3 ; Mink. 20:1). Yésu a nga bame fe naa a « bira ñu meyokh » é ne ve naa môt a taa ñii nféféñ éning Nzame a kiagh (Luc 21:34-36). Éde, dzé é ne vole kristen a saale melam ma larane n’ñuane meyokh ?

Éyong bia ñong minkighane nfa n’ñuane meyokh, é ne édedèè mbia dzam naa bi daghe fave aval bôt ba bo mam é vôm bi va vem. Ya fakh, bekristen ba bo é dzam da ve Jehôva n’nem mbeng éyong da daghe mam ane bidzi ya meyokh. Bible a simane bia naa : « A bo naa mia dzi nge ki a ñu nge ki a bo dzam afe, boghane asese akal é duma Nzame » (1 Becor. 10:31). Minsili mizing ye metsin metsing bia yiène fas éme ma :

Ye ma ñu meyokh amu ma kômô naa é bôt bevoo be ñeghe ma ? Nten Akôre 23:2 wa dzô naa : « Ô taa béé nsama. » Vèè, Jehôva a mbe éé lere Bisraélite naa, a béé é bôt baa ve ki ñe n’nem mbeng é ne mbia dzam. Mbame té ô ne fe éban akal bia bekristen ému. Nge bia likh naa é bôt bevoo ébe be dzô bia é dzam bia yiène siman ye bo, dzam té é ne ve naa bi ke Jehôva ôyap, bi kaa fe kang menvena mèñ—Bero. 12:2.

Ye ma ñu meyokh amu ma kômô lere naa me ne ngu’u ? Ébe metum mézing, a ñu éyong ése, y’abuiñ, da bobane tam ése, ye naa ba yebe de (1 Pierre 4:3). Ve, baghlane é dzam nten 1 Becorinthien 16:13 da saghe bia naa bi bo : « Tobghane vevee, yemeghane ngu’u mbunan été, boghane ayokh, boghane ngu’u. » Ye meyokh me ne faa vole môt a bo ngu’u ? Kaa, méé se ki de bo. Meyokh me ne ve naa môt a taa tugha fas ye ñong mbemba minkighan. A bira ñu meyokh déé se ki lere naa môt a ne ngu’u, da vane lere naa a ne ôkukut. Esaïe 28:7 da lere é môt a dzimi zen étom meyokh ane é môt a ñong banga, ye kol ôba.

É ngu’u bia yi naa bi bo é dzam é ne sôsôe da so ébe Jehôva ye sili naa ‘bi tobe vevee ye yeme ngu’u a mbunan été’ (Bya 18:32). Bia bo de éyong bia bo nkee naa bi saale mbia bemam ye ñong minkighane miaa ye ki tsam élat dèè ya Jehôva. Yésu a mbe a bele élat é ne ngu’u ya Jehôva, ye naa abuiñ bôt be nga lere ñe ngang amu a mbe ayokh ye bele nkômane ô ne ngu’u naa a bo é dzam é ne sôsôe.

Ye ma ñu meyokh amu ma kômô vuène minzukh miam ? N’tsili Bya a nga tsili ngalane nsisim Nzame naa : « Éyong meyep  me nga nemane ma, wa [Jehôva] ô nga fôlô ma ye sule me n’nem » (Bya 94:19). Nge wa yep a n’nem akal dzam ézing, daghe ébe Jehôva naa a vole wa, se ki a ñu meyokh. Aval bi ne de yeme bo é ne a bira yaghlane Jehôva. Abuiñ é nga yen naa a bele melepgha ma so ébe é mvuiñ é ne éwôlô a nsisim ékôan été é ne éban. Bebela a ne naa, éyong môt a ñu meyokh amu a kômô tup minzukh mièñ, é ne ve naa, môt té a taa fe bele nkômane ô ne ngu’u ya bo é dzam é ne sôsôe (Osée 4:11). Daniel, éñi bi va tare tu ôyô, a nga dzô naa : « Me nga lumane meyep ye fulu ya ve mamièn bidzô. Me mbe méé ñu meyokh naa me taa bera wôrane meyep, ve dzam té é nga so ma abuiñ minzukh, ane me nga dzimle memvuiñ, kaa ki fe kang mamièn. » Dzé é nga sughlane vole Daniel ? A nga dzô naa : « Me nga yen naa, é mbe éban naa Jehôva éñ’a tobe ma nfeng, se ki meyokh. Éyong me nga bo de, Jehôva a nga vole ma, éde me nga dang ndzukh té. » Bebela ane naa, Jehôva a ne nkoghane naa a vole bia, amben étéñ dèè da yene ane daa ye ki kômban—Beph. 4:6, 7 ; 1 Pierre 5:7.

Nge ô wôla ñu meyokh biyong bizing, ô ne fas n’ñuane meyokh wiè wéé sili wamièn minsili mi : ‘Ye môt y’é nda-bôt dzam, nge ki mvuiñ dzam a kobeyang ma akal meyep a bele nfa n’ñuane meyokh wom ?’ Nge é ne aval té, dzam té é ne lere naa, ôô mbele fulu ya ñu meyokh nge ki naa é ntoo wa ôkol-ôba kaa naa wa yem de. ‘Ye me nga ñuang meyokh a lôt melu mvus ?’ A ne bo étéñ é môt éé be ki nkôm meyokh, ve éñ’é é ne sughlan aval té. ‘Y’é ne me ndzukh naa me tobe abuiñ melu nge ki besono kaa ñu meyokh ?’ Nge é ne aval té, da yili naa a ñu meyokh éé ntoo wô é fulu é ne ndzukh a vèè nge ki naa ô ntoo mbokh meyokh. Ng’é ntoo aval té, é ne yili naa, ô nga yiang avole dokira nfa ya dang ndzukh té.

Amu ba yem mbia bemam nge ki minzukh mia so ye n’ñuane meyokh, bekristen bézing be nga top naa baa ñu ki meyokh. Éba bevoo ba top naa baa ñu ki meyokh amu baa  wokh ki me mvèñ. Nge môt y’ébe mina a bo aval ntopbane té, mi ne lere naa mi ne mbemba fulu éyong mia kang nkighane wèñ kaa ñe sua.

Nge ki, éyong ézingmi va yen naa a kikh benié ébe abim meyokh mia ñu é ne fakh. Moan kristen a ne kikh benié ébe abim meyokh a ye ñu. Nge ki, a ne kikh abim biyong a ye ñu meyokh, a ne bo éyong daa ébe sono nge ki a ñu avitsang meyokh éyong a dzi. Éba bevoo be nga ve benié ébe aval meyokh ba ye ñu, ane vino nge ki bière ya benié ve, kaa ñu meyokh me ne ngu’u amben ba fulane me ya meyokh mefe. Éyong môt a yemang ve benié beté nfa n’ñuane meyokh, da ye ñe bo ébubu naa a kang be. Éde, é moan kristen a ne éwôlô a nsisim aa yiène ki wokh ôsoan naa a ñong nkighane té, ye ve mengu’u mese mèñ naa a kang wô.

Éyong bia ñong minkighane nfa meyokh, é ne éban naa bi siman é dzam é bôt bevoo ba wôran. Nten Beromain 14:21 wa dzô naa : « Da dang mbeng naa mi taa dzi tsit nge ki a ñu vino, ng’a bo é dzam ézing é ne kol moanñong ôba. » Aval avé mi ne dzale melepgha meté ? A ne éyong mia lere éñeghe bobeñang. Nge wa simane naa, a ñu meyokh ma fuèn é ne kol moanñong ôba, ô ne top naa waa ñu ki meyokh tam té. Ô ne fe lere naa wa bis ye kang é mam é bôt bevoo ba wôran, wéé dzeng mbeng wôba se ki éé wiè—1 Becor. 10:24.

Ya fe naa, édjié é ne tele metsing nfa n’ñuane meyokh. Moan kristen a ye kang metsing meté. Metsing meté me ne kikh mimbu môt a yiène bele naa a ñu meyokh nge ki a kili n’ñuane meyokh éyong môt a dure metua nge ki a belan éngini ézing—Bero. 13:1-5.

Jehôva a nga ve bia abuiñ mbemba bedas, éde das mboo y’été ane fili ya top aval bia ye belane bedas beté. Dzam té da daghe fe fili ya top é dzôm bia ye dzi ye ñu. Mintopbane miè mi lereghe naa bia dzing fili té, bii belane de aval da ve Ésaa wèè a ne a dzôp n’nem mbeng.