AYEGHLE 43
ZA 90 Sughu é bôt bevoo a si
Aval bi ne dang bisô
« Tughane fas mam mesese » (1 BETH. 5:21).
É DZAM BIA YE YEN
Bia ye yen é dzam bi ne bo naa bi vèè bisô bi ne ndaman ésèñ bia bo akal Jehôva.
1-2. (a) Za bisô bizing bebo-bisèñ Jehôva be ne bele ? (b) Za mam bia ye yen ayeghle di été ?
BÔR be ye memiè mise, be ne bele bisô a biyong bizing. Éfônan, tamane siman, étong moan bengaa, a sili nge Jehôva a bis faa ñe. Ye dzam té, aa yem ki nge a yiène duban. Nge ki naa, mia siman é moadzang wèè ézing a ntoo ñamôrô, ve éyong a mbe étong, a nga top naa a bembe ébe mam me ye Édjié Nzame, ndaane naa a dzeng akum ye é si ñi. Abong di, a ntoo ñamôrô, éde éé bele ki fe abuiñ mono naa a dzale mekômgha me ya nsôn é nda-bôr dzèñ. Éde, a ne sume simane naa, minkighan a nga ñong a too étong mii mbe ki fakh. Tamane ki simane é kal dzèè ñi, a ntoo ñamorô, ye kaa fe abuiñ ngu’u. A ne sili mo ôsi amu éé se ki fe sèhane Jehôva aval a mbe é bo de éyong a mbe étong. Ye é kuiyang miè, naa mia sili aval minsili mi : ‘Ye Jehôva a yen faa ma ? Ye é mbe faa éban naa me yebe naa ma dzimle mam mézing amu me nga kômô sèhane Jehôva ? Ye me ngene faa éban akal Jehôva ?’
2 Nge bi boo kaa bele biyalan ébe aval minsili mité, é ne ve naa bi dzimle mebun mèè ébe Jehôva, éyong ézing ye sim naa bia sèhane ñe. Ayeghle di été, bi ye yen aval Bible a ne bia vole nge bia simane naa (1) Jehôva aa bis ki bia, (2) naa minkighane bi nga ñong melu mvus méé mbe ki fakh, nge ki naa, (3) bii se ki fe éban akal Jehôva.
AVAL BI NE VÈÈ BISÔ BIA
3. Aval avé bi ne bo naa bi taa bera bele bisô ?
3 Aval évoo bi ne vèè bisô bia, é ne a dzeng biyalan bi ye minsili mia, Éfiè Nzame été. Nge bi bo de, mebun bi bele ébe Jehôva ye élat dèè ye ñe bia ye bo ngu’u, ye naa, bia ye « tebe naa bip mebun été » (1 Becor. 16:13).
4. Aval avé bi ne « tugha fas mam mesese » ? (1 Bethessalonicien 5:21)
4 A lang 1 Bethessalonicien 5:21. Baghlane naa, Bible a bane bia naa bi « tugha fas mam mesese. » Aval avé bi ne bo dzam té ? Bi ne ban bia bebién naa, é dzam bia bunu é ne bebela éyong bia vaghane de ye é dzam Bible a dzô. Éfônan, n’fasghan éfônan étong moan da kômô yem nge a ne faa éban é mis Nzame. Ye a yiène fave yebe naa, ôsimane té ô ne bebela ? Kaa dzôm, a yiène « tugha fas mam mesese », é dzeng naa a yem ôsimane Jehôva nfa té.
5. Aval avé bi ne « wokh » Jehôva é yalane minsili mia ?
5 Aval ane bia lang de Éfiè Nzame été, bi ne « wokh » Jehôva a kobe bia. Ve, nfa ye naa bi bele ôsimane wèñ ébe ngura dzam ézing, da sili naa, bia bebién bi ve fe mengu’u. Nlanghane Bible waa, bia yiène bembe ébe é dzam da daghle bia. Bi ne bo mindzeng nfa té, bi belane bivole akal ayeghle Ékôan Jehôva da ve bia (Mink. 2:3-6). Bi ne yaghlane naa, Jehôva a wulu a mindzeng bia bo, ye vole bia a yen ôsimane wèñ nfa dzam té. Éyong té bi ne dzeng metsin metsing me ya Bible ye fe melepgha me ne bia vole. É ne fe bo éban naa bi fas éfônane bôr be ya Bible be nga tebe fe étéñ bi tele.
6. Aval avé bisulan bia vole bia naa bi dang bisô bi bele ?
6 Bia « wokh » fe Jehôva a kobe bia éyong bi ne bisulan bia. Nge bia tobe bisulan éyong ésese, bi ne wokh dzam ézing ntun été, nge ki éyalane môr a ne ve, é ne éyalane ye nsili bi mba bi bele (Mink. 27:17). Abong di, n’yeneghan aval bi ne dang bisô bizing.
ÉYONG Ô BELE BISÔ NAA JEHÔVA A BIS WA
7. Za nsili bôr bézing be ne sili ?
7 Ye é kuiyang mia naa, mia sili mia bebién nsili wi : ‘Ye Jehôva a yen faa ma ?’ Nge mia simane naa, mi ne zeze, mi ne simane naa, a bo amvuiñ ya Mvele y’éning ngura, é ne é dzam déé se ki boban. Éyong ézing kéza David ñe a nga bele fe aval ôsimane té. A nga yaghane naa, Jehôva a yem éning zeze moan môt, éde a nga sili naa : « A Jehôva, dzé é ne moan môt naa, ô yen ñe, é moan moan môt naa ô bis ñe ? » (Bya 144:3) Mi ne bele biyalane bi ye minsili mité ébe za ?
8. Aval ane bia lang de nten 1 Samuel 16:6, 7, 10-12, za mam Jehôva a bili ébe boan be-bôt ?
8 Bible a dzô bia naa, Jehôva a bili é bôr ba yene zeze asu é bôr bevoo. Éfônan, Jehôva a nga lôm Samuel é nda-bôr Jesé, naa a ke top ndôma dzaa ye bendôma bèñ a ye bo kéza ya Israel. Éde Jesé a nga luè bendôma zangbwa ye bendôma muôm bèñ, naa be ke tôbane Samuel, ve, éé dzi ki luè David, mesughlan a moan wèñ b. Atoo naa David, éñe Jehôva a nga top (A lang 1 Samuel 16:6, 7, 10-12). Jehôva a nga yen é môr David a mbe a n’nem été, étong môt é mbe dé bira bis mam me ya nsisim.
9. Aval avé ô ne tobe ndzi-n’nem naa Jehôva a bis wa ? (A daghe fe évaghle).
9 Tame siman aval Jehôva a tareyang wô lere naa a bis wa. A ve mia melepgha ma dang mbeng ya étéñ denan (Bya 32:8). Aval avé a ne yem a bo dzam té nge aa tugha ki wô yem ? (Bya 139:1) Nge ô dzale melepgha Jehôva a ve wa, ye yen aval a vole wa, wa ye tobe ndzi-n’nem naa Jehôva a bis wa (1 Mila. 28:9 ; Bisè mintôl 17:26, 27). Jehôva a yen mengu’u wa ve. A yen mefulu muè, môr nfe aa yen ki, ye naa, a kômô bo mvuiñ duè (Jér. 17:10). A ye tobe édedèè mevakh nge wa yebe naa, wa bo mvuiñ dèñ (1 Jean 4:19).
« Nge ô dzenghe [Jehôva], a ye likh naa ô yen ñe » (1 Mila. 28:9). (A daghe abong 9) c
ÉYONG WA TEM NAA MINKIGHANE Ô NGA ÑONG MELU MVUS MÉÉ MBE KI FAKH
10. Éyong bia fas ébe minkighane bi nga ñong melu mvus, za minsili bi ne sili bia bebién ?
10 Biyong bizing, bôr bézing be ne simane minkinghane be nga ñong metam ô mvus, ye bunu naa béé dzi ki ñong minkighane mi mbe mbeng. Éyong ézing be nga kikh naa, ba likh mbemba ésèñ, nge ki a kôre mbemba mbanegha ézing, amu be nga kômô sèhane Jehôva ya é ngu’u ésese deba. Abong di tam é lôrang, éyong ézing abuiñ mewôm mimbu. Be ne tôban é bôr be nga kikh naa ba tsini besikôlô, ye yene naa, be bele abuiñ mono ye mbemba éning éndagha. Éyong ézing be ne sili bebién naa : ‘Ye é mbe faa éban naa ma dzimle mam mézing akal Jehôva ? Nge ki naa, ye mam meté me nga ve me naa, me dzimle abuiñ mbemba be-mam ?’
11. Amu dzé ntsili Bya 73 a mbe é yep a n’nem ?
11 Nge mia fe, mia sili aval minsili mité, fasghan é dzam Bible a dzô nfa é dzam n’tsili Bya 73 a nga wôran. A nga yen naa, é bôr baa sèhane ki Jehôva, be mbe bé yene ane be ne mvoa minsôn, minkukuma, ye naa, béé mbe ki bé tôbane mindzukh (Bya 73:3-5, 12). Éyong a nga yen naa, bôr beté be mbe bé yene ane be bele mbemba éning, a nga wôrane ane mengu’u a ve naa a sèhane Jehôva méé mbe ki éban. A mbe « é yep a n’nem ngura nté môs » étom mbia mesimane meté (Bya 73:13, 14). Aval avé a nga dang mbia mesimane meté ?
12. Aval ane bia yen de nten Bya 73:16-18, dzé é nga vole n’tsili Bya naa a taa bera bele mbia mesiman ?
12 A lang Bya 73:16-18. N’tsili bya a nga ke nfufup vôm Jehôva ô ne a mvoa été. Vôm té, a mbe tugha fas. A nga wokh naa, amben bining bôr bézing bi ne yene naa bi ne ébubu, béé mbe ki be bele ôyane akal melu ma zu. Ya n’yenane mam té, ane a nga bera bele mvoa ya nsisim, é yem naa, a béé mam ya nsisim éde é ne nkighane wa dang mbeng. Asughlane y’été, a nga bera bele nkôman ô ne ngu’u naa a ke ôsu ya sèhane Jehôva (Bya 73:23-28).
13. Aval avé bi ne bele mvoa ya nsisim nge bia tem naa minkighane bi nga ñong melu ô mvus méé mbe ki fakh ? (A daghe fe évaghle).
13 Mi ne bele mvoa ya nsisim ngalan Éfiè Nzame. Aval avé ? Simghan é mbemba bemam mi bele, bia lang été, biboran Jehôva, ye simane naa, é bôr baa sèhane ki Jehôva béé bele ki avole dèñ. Ébe abuiñ yé bôr baa sèhane ki Jehôva, é dzam da dang éban ébe be, é ne a bele mbemba ésèñ, amu béé bele ki ôyane. Ve, Jehôva a kiagh miè naa, a ye borane mina a lôr-lôt abim mi ne siman (Bya 145:16). Fasghane fe é dzam di : Ye bi nga ye faa yem aval éning dèè é nga ye boban nge bi nga ñong minkighane mife ? Bebela a ne naa, é bôr ba ñong minkighane mi tsii y’édzing akal Jehôva ye akal é bôr bevoo, baa ye ki vaghle shimi, é mam ma dang mbeng.
Boghe wé siman abuiñ bedas besese Jehôva a kiagh akal melu ma zu (A daghe abong 13) d
ÉYONG WA TEM NAA WÉÉ SE KI ÉBAN AKAL JEHÔVA
14. Za étéñ bôr bevoo bézing be tele, ye naa, minsili mivé be ne sili bebién ?
14 Bebo-bisèñ bézing Jehôva ba yen naa be ntoo min’nôm, be be-belane akoan, nge ki naa, ba ning ye éyem ézing. Mam meté me ne be ve naa be wôrane naa béé se ki éban ézing é mis Jehôva. Ngeng ézing, ba sili bebién naa : ‘Ye me ngene faa éban akal Jehôva ?’
15. Za dzam ntsili Bya 71 a mbe tobe de ndzi-n’nem ?
15 N’tsili Bya 71 ñe a nga bele fe aval meyep meté. A nga yaghlane naa : « Ô taa me lame éyong méé bele ki fe ngu’u » (Bya 71:9, 18). Afang faa bo aval té, ntsili Bya a mbe a bele ndzi-n’nem naa, nge a tsini ôsu naa a sèhan é Nzame wèñ ye sôsôe, Jehôva a ye ñe lere zen, ye sukh ñe asi. Aval ntsili Bya a nga yeghe de, é bôr besese ba ve mengu’u naa be sèhane Jehôva amben be bele beniè, Jehôva a yen be mvèñ (Bya 37:23-25).
16. Meval mevé beñabôrô be ne bo éban akal Jehôva ? (Bya 92:12-15)
16 A mina beñabôrô, yeneghan étéñ denan aval ane Jehôva a yen de. A ne mia vole naa mi tsini naa mia sèhane ñe amben mi bele beniè nfa ya nsôn (A lang Bya 92:12-15). Ndaane naa mia bembe ébe é mam mii se ki fe bo, bemghan ôsiman wônan ébe é dzam mi ne bo. Éfônan, vaane é bôr bevoo ngu’u, ye é sôsôe éfônan denan, ye fe aval mia lere be naa mia bis be. Ô ne kobe ya be, aval Jehôva a nga so a vole wa ébe mimbu, ye dzô be naa, ô bele ndzi-n’nem naa, mengiagh mesese mèñ ma ye dzalban. Mi taa vaghle bian é ngu’u meyaghlan mia bo ye n’nem ôsese me ne bele akal é bôr bevoo (1 Pierre 3:12). Afang bo étéñ sese bi tele, bi ne ve Jehôva ye é bôr bevoo dzôm.
17. Amu dzé biaa yiène ki vaghane bia bebién ya é bôr bevoo ?
17 Nge n’nem ô ne wô abé amu naa, wéé se ki bo abuiñ akal ésèñ Jehôva, tobeghe ndzi-n’nem naa a dzing abim sese ô ne bo. Éyong ézing mia kômô vaghane abim mi ne bo ye abim é bôr bevoo be ne bo. Mi taa de bo ! Amu dzé ? Amu naa, Jehôva aa vaghane ki bôt (Begal. 6:4). Éfônan, Marie a nga ve Yésu mboan wa ñum édedèè mbeng, ô too fe tang nden (Jean 12:3-5). Atoo ki naa, nkus minenga ô mbe agèñ, ô nga ve é boan minsang mibèñ, mii mbe ki tang nden (Luc 21:1-4). Ve Yésu a nga ñong bedas bebèñ beté, ane aval é bôr be nga ve be, be nga lere mebun meba. Jehôva, Ésaa wèñ, a dzing é dzam sese mia bo, éyong édzing denan akal dèñ éde é va tsini mina, amben da yene moan dzam ébe mina.
18. Dzé da ye bia vole a dang bisô bia ? (A daghe fe nkaalé « Éfiè Jehôva é ne wô vole a dang bisô buè. »)
18 Bia besese bi ne bele bisô biyong bizing. Ve, aval bi va yen de, Bible a ne bia vole a lumane bisô bité. Éde, vaane mengu’u menan mesese naa mi bele biyalan bi ye minsili mienan, éyong té mia ye bele mebun ndaane meyep a n’nem. Jehôva a yem kada môt y’ébe mina. A dzing fe, metunegha mia ve ñe, éde a ban naa, a ye borane mina. Jehôva a ñeghe kada mbo-ésèñ wèñ sese.
ZA 111 Akalgha ye mevakh maa
a AYILGHA ÉFIÈ : Ayeghle di été, bia ye tsiè adzô bisô bia ve naa bi simane naa bii se ki éban é mis Jehôva nge ki naa minkighan bi nga ñong mii mbe ki fakh. Se ki aval bisô Bible a kobe bie, bia lere naa môr éé bele ki mebun ébe Jehôva ya ébe mengiagh mèñ.
b Amben Bible aa tugha ki bia dzô abim mimbu David a mbe a bele éyong Jehôva a nga top ñe, ve, é ne bo naa, abong té a ngen étong (A daghe La Atalaya, 1 de septiembre de 2011, pág. 29, pár. 2 nge ki La Tour de Garde, 1er septembre 2011, p. 29, §2).
