AYEGHLE 23
ZA 28 A Jehôva, za aa ye we bo mvuiñ
Jehôva a bane bia naa bi bo mengom mèñ
« Ébem dam da ye tobe ye be, ma ye bo é Nzame woba »(ÉZÉCH. 37:27).
É DZAM BIA YE YEN
Ayeghle di da ye bia vole a veme mbeng bia wôrane naa Jéhôva a bane bia ébem dèñ, ye aval a kale bia ane é Mié-nda wèè.
1-2. N’luane ôvé Jehôva a bo besôsôe bebo-bisèñ bèñ ?
NGE môt ézing a sili wô naa Jehôva a ne za akal duè ? Ngeng ézing wa ye yalane naa : « Jehôva a ne ésaa wom, é Nzame wom ye mvuiñ dzam. » Ngeng ézing ô va yen fe bifiè bife, naa ô dzô é môt Jehôva a ne akal duè. Ve, ye wa yen fe ñe ane Miè-nda wiè ?
2 Kéza David a nga fônane angôm Jehôva ya besôsôe bebo-bisèñ bèñ ya élat é ne ézizang miè-nda ya beyeng bèñ. A nga sili naa : « A Jehôva, za éñe a ye bo n’neng ye ébem duè été ? Za a ne tobe nfufup nkôô wiè ? » (Bya 15:1) Bifiè bité été, bia yeghe naa, bi ne bo beyeng Jehôva, da yili naa mengôm mèñ. Za môra maa Jehôva a ve bia vèè alé ?
JEHÔVA A KÔMÔ NAA BI BO BEYENG BÈÑ
3. Za a ne n’neng Jehôva a nga tare bele, ye naa kada môr ye été a nga wôran yè nfa éñi mboo ?
3 Kaa naa a sum avele, Jehôva a mbe étam. Ve dèè, a ne a nga vele ntôô moan wèñ. Jehôva a mbe ane mié-nda a luè n’neng wèñ ôsua ébem dèñ été ye naa a mbe a bele abuiñ mesan naa a bo de. Biblia a dzô naa Jehôva a nga « dang bele élat ya » ndôma dzèñ. Nfa mbo ki, « n’neng ôsua a nga tare bele, a mbe mesan éyong ésese asu [Jehôva] » (Mink. 8:30).
4. Beza befe Jehôva a nga bera bane ébem dèñ été ?
4 Jehôva a nga vele fe minsisim mife, ye luè be naa ba fe be bo beyeng bèñ. Bible a luè fe bangele beté naa « bendôma Nzame » ye lere naa be ne mesan éyong be ne ya Jehôva (Job 38:7 ; Daniel 7:10). Tang abuiñ mimbu, angom ye Nzame é nga sughu fave ya minsisim mia tobe ye ñe a dzôp été. Ôsu vèè, a ne fe a nga likh naa, é boan be-bôt be ne asi ba fe be tobe mengom mèñ. Ézizang beyeng bèñ été, bi ne lang Hénoch, Noé, Abraham ye Job. Bible a lere naa, be mbe menvuiñ Jehôva, amu naa be mbe bé bo ñe mewokh, nge ki naa, be mbe, é bôt be mbe « bé wulu ye ña Nzame » (Atar. 5:24 ; 6:9 ; Job 29:4 ; Esaïe 41:8).
5. Za mam bi ne yeghe ya nkulane adzô wa kuiñ nten Ézéchiel 37:26, 27 ?
5 Ébe abuiñ mintet mimbu, Jehôva a nga tsini ôsu ye bane memvuiñ mèñ naa, me bo beyeng bèñ (A lang Ézéchiel 37:26, 27). Éfônan, nkulan adzô Ézéchiel wa yeghle bia naa, Nzame a kômô naa besôsôe bebo-bisèñ bèñ be bele élat é ne ngu’u ya ñe. A kiagh naa a ye bo « élat mvoa ya be. » Nkulan adzô té wa kôbe é tam bebo-bisèñ Jehôva be bele ôyan ye a ning a dzôp été, ye éba be bele ôyan ya ning a si va, ba ye tobe élat ébem Jehôva été, ane nsama « mintôma ôvoo » (Jean 10:16). Tam té, éde bi ntoo ñi !
NZAME A KALE BIA É VÔM ASESE BI NE
6. Aval avé môr a ne bo n’neng ébem Jehôva été, ye naa, éñe ébem dèñ té, é ne vôm mbé ?
6 Metam me ya Bible, ébem é mbe é vôm môt a mbe yem waghan ye tobe nkaman éyong mveng, nge ki vièn, ba siè bo. N’neng a mbe é zu ñi ébem été, a mbe é yane naa miè-nda a yem ñe kale. Éyong bia ve Jehôva bining biè, bia sum bo beyeng be ye ébem dèñ. Bia buane abuiñ bidzi bi ye nsisim, ya fe élat ya é bôt bevoo baa fe be ne beyeng be ye ébem Jehôva été. Ébem Jehôva bia kobe de vèè alé, déé tele ki ngura si ézing (Bya 61:4). Ngeng ézing mi kang ékena si éfe, naa mia ke tobe ngura aval ésesang, ye tubane bôt befe ba ñong biboran ya tobe ébem Jehôva été. Ébem Jehôva, é ne é vôm sese besôsôe bebo-bisèñ bèñ be ne (Mel. 21:3).
7. Amu dzé bi ne dzô naa besôsôe bebo-bsèñ Jehôva be wuhang, ba tsini ôsu a bo beyeng be ye ébem Jehôva été ? (A daghe fe évaghle)
7 Za dzam bi ne dzô nfa bebo-bisèñ Jehôva bewu-hang ? Ye da yiène naa bi tem naa be ngen beyeng ébem Jehôva été ? Ôwé ! Amu dzé bi ne de dzô ? Amu naa be ne vevee ôtemgha Jehôva été. Yésu a nga dzô naa : « Ve, nfa ye naa bewu be ne m’wôman, Moïse émièn a nga lere de éyong a nga kane nlang ye moan élé é bele biyo, a nga luè Jehôva naa ‘é Nzame Abraham, é Nzame Isaac ye é Nzame Jacob.’ Éé se ki Nzame bewu, ve é Nzame é bôt be ngen be tèè, amu akal dèñ besese be ngen be tèè » (Luc 20:37, 38).
Bi ne tsini naa bia ñong besôsôe bebo-bisèñ Jehôva be wuhang, ane beyeng be ye ébem dèñ (A daghe abong 7)
BIBORAN YA MEYEM YE ÉBEM JEHÔVA
8. Za mam beyeng Jehôva ba buane me amu naa be ne ébem dèñ été ?
8 Aval ane môt a ne yem waghan, ye tobe nkaman é ña ébem été, aval dèè fe, ébem Jehôva da kamane beyeng bèñ nfa é mam mesese me ne ndaman élat deba ye ñe, ye ve naa be dzimle mbemba ôyane wôba akal melu m’azu. Nge bi tsini ôsu ya tobe bébéñ Jehôva, Satan aa ye ki bia bo abé da bem aayap (Bya 31:23 ; 1 Jean 3:8). Nféféñ éning da zu, Jehôva a ye tsini naa a kamane besôsôe mevuiñ mèñ, se ki fave nfa ya nsisim, ve a ye fe kamane be naa be taa bera awu (Mel. 21:4).
9. Aval abo dulu avé Jehôva a yane naa beyeng bèñ be bele ?
9 É ne faa môra maa ya bo beyeng be ye ébem Jehôva, ye bele mbemba élat ye ñe. Abo dulu avé bia yiène bele nge bia kômô tsini naa bia tobe beyeng bèñ ? Nge môt a bane wa é nda dzèñ, wa kômô yem é dzam a yane nfa wiè. Éfônan, a ne kômô naa ô vèè mengop kaa naa o ñi a nda été, éde wa ye de bo, ya n’nem ôsese. Aval té fe, bia kômô yem é mam Jehôva a yane nfa é bôt ba kômô tsini naa, ba bo beyeng be ye ébem dèñ. Édzing bi bele akal Jehôva, da tsini bia naa bi bo é dzam ésese da yiène naa bi ve ñe « n’nem mbeng » (Becol. 1:10). Éde, amben bia yen Jehôva ane angom dèè, bia yem fe naa, a ne é Nzame ya Ésaa wèè, a yiène naa bi ve ñe ngang (Bya 25:14). Ye dzam té ôsiman, bia yiène tsini naa, bia ve ñe ôlughu éyong asese, bi kaa ki vaghle vuèn aval é môt a ne. A ve ñe aval ôlughu té, da ye bia vole a saalé abo dulu é ne ñe ve n’nem mintèñ. Bebela a ne naa, « bia kômô wulu ye asili ñuu » ya é Nzame wèè (Michée 6:8).
É FULU KAA ÔBANGAM JEHÔVA É NGA LEREBAN ÉYANG ÉTÉ
10-11. Aval avé Jehôva a nga belane bisraélite éyang ye Sinaï été, ye naa, aval avé dzam té da lere naa aa se ki ôbangam ?
10 Jehôva éé se ki ôbangam éyong a belane beyeng bèñ (Bero. 2:11). Bi ne bele ôyôm éfônan ye fulu kaa ôbangam Jehôva, éyong bia yen aval ane a nga bele Bisrélitas éyang ye Sinaï.
11 Niène a nga kôre ayong dèñ minkôm Egipto nge ki Égypte, ane Jehôva a nga tele besacerdotes nge ki beprêtre naa be bo ésèñ ô tabernáculo nge ki ô tabernacle. A nga ve ki belevitas nge ki belévite naa baa be bo bisèñ bife bi yô tabercle. Ye Jehôva a nga dang bira yem kale é bôr be mbe béé sèñ ô tabernáculo, nge ki éba be mbe be too ñe minfeng, a lôt é bôr bevoo ? Kaa ! Jehôva éé se ki ôbangam.
12. Aval avé Jehôva a nga lere naa éé se ki é Mié-nda a ne ôbangam ? (Akôre 40:38) (A daghe fe évaghle).
12 Kada môt ya Israël a mbe lat angom ya Jehôva, a bo naa a mbe é sèñ ô tabernáculo nge ki kaa, nge ki a bo naa a mbe é tobe bébéñ nge ki ôyap ye tabernáculo. Éfônan, Jehôva a nga ve naa ayong ngura é yen akengha nkum nkut, ya fe nkum nduane, ô mbe ô tabernáculo ayô (A lang Akôre 40:38). Éyong nkut ô mbe wé téé, ye sum ñong nféféñ zen, amben é bôr be mbe bé tobe tabernacle ôyap, be mbe wô yen, ve sum ka é biôm bieba, ye vèè bibem bi ye menda-mebôt meba, ye sum dulu ya é bôr bevoo (Nla. 9:15-23). Môr asese a mbe wokh môra tong, é mbe dé so betrompetas bebèñ be mbe mboane ya miang, dé kar be naa, a nto awala môr ase a yiène téé (Nla. 10:2). Se ki akal naa môr ézing a mbe éé ning bébéñ tabernacle, éde é mbe dé yili naa, élat dèñ ya Jehôva da dang ngu’u a lôt édi é bôr bevoo be mbe bé tobe ôyap. Ndaane de, bôr besese be ye nféfèñ ayong Jehôva a ndaghe tele, be mbe tobe beyeng bèñ, ye buane melepgha ya nkamane wèñ. Aval dèè fe, melu mèè ma, a bo é vôm sese bia ning a si va, Jehôva a dzing biè, a kale biè ye fe kame biè.
É tabernacle a mbe ézizang deba a mbe é lere naa Jehôva éé se ki ôbangam (A daghe abong 12)
JEHÔVA ÉÉ SE KI ÔBANGAM MELU MÈÈ MA
13. Aval évoo avé Jehôva a lere naa éé se ki ôbangam melu mèè ma ?
13 Bengaa Jehôva bézing be ye melu mèè ma, ba ning bébéñ tsin étobgha bengaa Jehôva, nge ki faa bébéñ mintem bikôan. Bevoo ba bo bisèñ mefôô meté été. Éde da ve naa, be ne bele abuiñ ngap, nfa bisèñ bia bobane mefôô meté été, ye bele élat ye bobedzang be ne betebe ôsu be ye ékôan. Éba bevoo ki, ba sèñ ane bendeghe bikôan, nge ki naa, be bele ngura aval meyem ékôan Jehôva été. Nge ô ne môr mboo ye éba béé se ki ngap té été, ô ne buane étéñ ô tele éndagha, ye tobe ndzi-n’nen naa, e Mié-nda wèè, Jehôva, a dzing bia besese ane beyeng be ye ébem dèñ. A tugha wô yem, ye kee wa é dzôm sese wa yi (1 Pierre 5:7). Jehôva a ve é kada mbo ésèñ wèñ sese, bidzi bi ya nsisim, melepgha ye nkaman ba yi.
14. Za éfônan éfe da lere naa Jehôva a ne é Mié-nda wèè éé se ki ôbangam ?
14 Éfônan éfe da lere naa Jehôva éé se ki é mié-nda a ne ôbangam, é ne naa, a ve bôr besese be ye si ése ngura naa, be ne lang Bible ému. Ôsusua, Bible a mbe ntsilan minkobe milal : Hebreo, Arameo, ye Griego nge ki Hébreu, Araméen ye Grec. Ye é bôr ba yem lang Bible minkobe be nga tare ñe tsili, ébe ba dang bele élat é ne ngu’u ya Jehôva, a lôt é bôr bevoo be ne kaa mi yem ? Kaa dzôm, déé se ki nèè (Mat. 11:25).
15. Za mam ma lere naa Jehôva éé se ki ôbangam ? (A daghe fe évaghle).
15 Jehôva aa bane ki bia naa bi bo menvuiñ mèñ, fave nge bi ne n’yeman, nge ki naa, bia yem minkobe be nga tare tsili Bible. Ndaane de, Jehôva a ve naa, môr asese a bele n’yeman wèñ, se ki fave é bôr be nga bo bôra besikôlô. Be nga konghlan nkobe wèñ, Bible, ébe betoyini a minkobe ; aval da ve naa, bôr besese be ye si ése ngura, be ne buane ayeghle dèñ, ye yeghe aval be ne bo menvuiñ mèñ (2 Tim. 3:16, 17).
Bible a ne nkonghlan betoyini a minkobe. Aval avé dzam té da lere naa Jehôva éé se ki ôbangam ? (A daghe abong 15)
TSINIGHE ÔSU NAA WA BO ANGOM JEHÔVA
16. Aval ane bia lang de nten bisè mintôl 10:34, 35, za dzam bia yiène bo naa bi tsini naa bia tobe menvuiñ Jehôva ?
16 A ne bia môra maa, naa Jehôva a yebe biè naa bi bo beyeng be ye ébem dèñ. A ne Mié-nda a dang mbemba fulu, a dang édzing ye éñi a dang añep bi ne siman. Ye fe naa, éé se ki ôbangam, a yebe môr asese, kaa bis é vôm bia tobe, é vôm bia so, abim n’yeman bi bele, nsin wèè, ayong dèè, mimbu miè nge ki abo naa bi ne fam nge ki minenga. Ve dzam dèè, Jehôva a yebe ébem dèñ été fave é bôr ba bo ñe mewokh (A lang Bisè mintôl 10:34, 35).
17. Za vôm ôfe bi ne yen é mam bia yiène bo naa bi tobe beyeng be ye ébem Jehôva ?
17 Aval bia yen de nten Bya 15 :1, David a nga sili minsili mi : « A Jehôva, za a ye bo n’neng ye ébem duè été ? Za a ne tobe nfufup nkôô wuè ? » Jehôva a nga belane David, naa a ve biyalane bi ye minsili mité nten bya 15. Ayeghle da zu, bia ye yen é mam mézing bi ne bo naa, bi bele ayebe Jehôva, ye tobe mengom mèñ.
ZA 32 Ñongh’é ngam Jehôva !
