1. Ôyôm tam kaa naa ntôl Pierre a wu, aval avé Jehôva a nga belane ñe ?

 NTÔL Pierre a nga sèhane Jehôva sôsôe tang abuiñ mimbu. A nga lerane Yésu minkanghle, a nga sum kanghle é bôt béé mbe ki be Judíos nge ki Bejuif, ôsu vèè, ane a nga bo môt mboo ya Tsîn Ékôan. Bebéñ amangha y’éning dèñ éyong a nga yem naa a kuna wu, Jehôva a nga ve ñe abuiñ ésèñ y’a bo. Bebéñ mimbu 62-64 ye melu maa, Jehôva a nga belane ñe naa, a tsili bekalare bebèñ, 1 Pierre ye 2 Pierre. A nga lere mebun a mbe a bele naa, bekalare beté ba ye vole bekristen niène a ye wu—2 Pierre 1:12-15.

2. Amu dzé é mbe édedèè éban naa Pierre a tsili bekalare beté ?

² Pierre a nga tsili bekalare bèñ metam bekristen bevoo « be nga tubane minzukh meval mese » (1 Pierre 1:6). Mbia be-bôt be mbe béé dzeng naa, be ñinghle bivus meyeghle ya mbia abo-dulu ékôan été (2 Pierre 2:1, 2, 14). Abong té, bekristen be nga ning a Jerusalén be nga zuhang tubane « amangha ye mam mese », da yili naa, nsama bizima Beromain ba ye man tsam kisoan y’édjié be Judíos nge ki Bejuif (1 Pierre 4:7). Kaa bisô naa, bekalare Pierre a nga tsili, be nga vole bekristen a tobe sôsôe amben minzukh be nga tubane mio ye kôman akal minzukh ba ye tubane mio ôsu b.

3. Amu dzé bia yiène fas bekalare Pierre a nga tsili ye nsisim Nzame ?

³ Amben Pierre a nga tsili bekalare beté akal bekristen be  ye ntet mimbu ôsua, Jehôva a nga ve naa be tsili wô Nkobe wèñ été. Éde ému, bia fe bi ne buane bekalare beté (Bero. 15:4). Amu bia ning é si da saghe mbia abo-dulu, bia fe, bia tubane minzukh mi ne ve naa é bo ayèñ naa bi sèhane Jehôva. Ya fe naa, bia fe bi nkuna tubane bitsible binen bia lôt ébi Bejuif be nga tubane mio. Bia ye yen ayôm mesiman me ne édedèè éban bekalare bebèñ Pierre été. Melepgha meté ma ye bia vole a tsini naa bia yane é môs Jehôva, bii dang wong akal moan môt ye veme édzing dèè akal bevoo y’éba bevoo. Aval mesimane meté me ne fe vole bemvene a yem aval be ne vole bobeñang ya bekal beba be ye ékôan naa be bo ngu’u nfa y’a nsisim.

4. Aval ane bia yen de nten 2 Pierre 3:3, 4, dzé é ne taghe mebun maa ?

⁴ Bia ning ézizang é bôt béé bele ki mebun ébe nkulan adzô y’a Biblia. É bôt be ne bia é ngam ayat be ne bia poghe, amu ébe abuiñ mimbu, bia so bia dzô naa amangha y’émo di é ntoo bébéñ. Bôt bézing ba dzô naa amangha daa ye ki vaghle so môs ézing (A lang 2 Pierre 3:3, 4). Nge bia wokh aval mam meté ma so anu nlô ya nda-bôt, é môt bia bebe bia sèñ nge ki môt y’é nda-bôt dzèè, dzam té, é ne taghe mebun maa. Pierre a lere é dzam é ne bia vole.

5. Dzé é ne bia vole naa bi bele mbemba ôsiman nfa amangha y’émo di ? (2 Pierre 3:8, 9)

⁵ Bôt bézing be ne yen naa Jehôva a ne ôtong nfa y’a tsam émo di. Bifiè Pierre bi ne bia vole a baghle mbemba ôsiman, bii simane naa, aval Jehôva a lang metam da selan y’aval boan be-bôt ba lang me (A lang 2 Pierre 3:8, 9). Ébe Jehôva, toyini a mimbu é ne ane môs mboo. Jehôva a ne ôdzibi, éde aa kômô ki naa, môt a wu. Ve, éyong é môs wèñ wa ye so, émo di da ye man. Za maa bi bele nfa y’a belan é tam é ligheyang bia naa bia kar fuèñ ébe bôt be ye meyong mesese.

6. Aval avé bi ne « baghle ôsiman » é môs Jehôva ? (2 Pierre 3:11, 12)

⁶ Pierre a saghe bia naa « bi baghle ôsiman » é môs Jehôva (A lang 2 Pierre 3:11, 12). Aval avé bi ne bo dzam té ? Nge é ne boban, kada môs bia yiène binan biboran bia yane bia nféféñ éning Nzame a kiagh bia. Simghane wamièn wèè vebe mbemba nfungha ô ne nfuban, a dzi mbemba bidzi, a ve mbemba nsoan ébe é bôt ô va dzimle be va wômô ye yeghle é bôt be nga ning mintet mimbu ô mvus, minkulane medzô mi ya Biblia mi nga dzalban. A binan aval té da ye vole naa, ô tsini naa wa yane ye bele ndzi-n’nem naa, amangha y’émo di é ntoo faa bébéñ. Bii « yem dzam té kaa naa é boban » nfa melu ma zu, biaa ye ki likh naa bivus beyeghle « be dukh bia »—2 Pierre 3:17.

7. Aval avé a ko moan môt wong é ne bia name ?

⁷ Éyong bia baghle ôsiman é môs Jehôva, dzam té da tsini bia naa, bi kanghle é bôt bevoo mbemba fuèñ. Ve, ébe bitèñ bizing, bi ne ko wong naa bi kobe. Amu dzé ? Amu ébe ôyôm tam bi ne ko moan môt wong. Dzam té, éde é nga biane Pierre. Alu be nga kikh Yésu nsang, Pierre a nga ko wong naa a dzô naa a ne n’yeghe Yésu, éde, ébe abuiñ biyong a nga dzô naa aa yem ki ñe (Mat. 26:69-75). Ve ôsu vèè, ntôl ôvoo-ôvoo té, a mbe dzô ya ndzi-n’nem naa : « Mi taa ko wong é dzôm da ve be wong » (1 Pierre 3:14). Bifiè Pierre bia ve bia ndzi-n’nem naa, bi ne dang é wong bia wôran akal moan môt.

8. Dzé é ne bia vole naa bi dang é wong bia wôran akal moan môt ? (1 Pierre 3:15)

 ⁸ Dzé é ne bia vole naa bi dang é wong bia wôran akal moan môt ? Pierre a dzô bia naa : « Fubghan Christ ane Nti min’nem mienan été » (A lang 1 Pierre 3:15). Da yili naa, bi ne siman bia bebièn naa, Yésu Christ a ne é Kéza waa ye naa, a ne édedèè ngu’u. Nge n’nem ô kele wa ôyôp nge ki naa, wa ko wong naa ô kanghle mbemba fuèñ éyong ô bele tam, simghane é Kéza waa. Simghane ñe éé djié a dzôp été ya bizukh bangele be tele ñe minfeng. Simghane naa, a bele « édjié sese [. . .] a dzôp y’a asi », ye naa, a ye tobe « ye wa melu mesese ya ke kuiñ amangha y’émo di » (Mat. 28:18-20). Pierre a saghe bia naa, bi tobe « nkoghan éyong ésese » nfa ya kame mebun maa. Ye wa kômô kobe é bôt bevoo é mam wa bunu ésèñ, a sikôlô nge ki ébe bitèñ bife bizing ? Tareghe simane é tam ô ne de bo, éyong té wa kôman é dzam wa ye dzô. Yaghlane naa ô bo ayokh ye ndzi-n’nem naa, Jehôva a ye wô vole a dang é wong wa wôran akal moan môt—Bisè mintôl 4:29.

9. Ébe étèñ ézing, aval avé Pierre éé dzi ki lere édzing ? (A daghe fe évaghle).

⁹ Pierre a nga yeghe aval a ne lere édzing. A nga wokh Yésu éé dzô naa : « Ma ve mina  nféféñ atsing, naa mi dzinghane bevoo ya éba bevoo ; aval ane me nga dzing mina, mina fe dzinghane bevoo y’éba bevoo » (Jean 13:34). Amben éde, ôsu vèè Pierre a nga tep naa a dzi ya é bobeñang ya bekal bèñ béé mbe ki Bejuif amu a mbe éé ko bekristen be ne Bejuif wong. Ntôl Paul a nga dzô Pierre naa « a bo medukh » nge ki naa a lere mesu mebèñ (Begal. 2:11-14). Pierre a nga yebe mbamane Paul ye ñong ayeghle té. Bekalare bebèñ bèñ été, a lere naa, biaa yiène ki bo v’a wôran édzing akal bobedzang ya bekal bèè, bia yiène fe lere édzing té.

10. Dzé ne bia vole a lere « édzing bobeñang é ne kaa medukh » ? Vakh ayilgha (1 Pierre 1:22)

¹⁰ Pierre a dzô naa bia yiène bele « édzing bobeñang é ne kaa medukh » akal bekristen bevoo (A lang 1 Pierre 1:22). Bia ye bele aval édzing té nge « bia bo bebela mewokh. » Bebela té, a daghe fe ayeghle da dzô naa « Nzame éé se ki ôbangam » (Bisè mintôl 10:34, 35). Bii se ki bo mewokh ébe atsing Yésu nfa édzing, nge bia lere édzing fave ébe bôt bézing be ye ékôan daa, ve kaa ki de lere éba bevoo. Bebela a ne naa, bi ne wôrane naa bia dang élat ye bôt bézing a lôt éba bevoo, aval Yésu a nga bo de (Jean 13:23 ; 20:2). Ve, Pierre a simane bia naa, bia yiène yem ngu’u naa bi bele « édzing bobeñang », da yili naa, élat é ne ézizang bôt be ye nda-bôt, akal bobedzang ye bekal baa besese—1 Pierre 2:17.

11. « A bira dzing é bôt bevoo ya n’nem ôse » da sili naa bi bo za dzam ?

¹¹ Pierre a saghe bia naa « bi bira dzinghane bevoo y’éba bevoo ya n’nem ôse. » Éyong a nga tsili bifiè bité, « a bira » dzing môt da yili naa, bia dzing môt té amben é ne ndzukh naa bi lere ñe édzing. Éfônan, dzé é ne kuiñ nge moadzang a bo bia mbimbia dzam nge ki naa a dzughu bia aval ézing ? Atarga bi ne ñe kômô bulan é dzam a va bo bia ndaane naa bia lere ñ’édzing. Ve, Pierre a nga yeghe ébe Yésu naa, éyong bia bulane môt abé, daa ve ki Nzame n’nem mbeng (Jean 18:10, 11). Pierre a nga tsili naa : « Ô taa bulan abé akal abé nge ki atè akal atè. Ndaane de, va ñe éyalan ye biboran » (1 Pierre 3:9). Éyong wa bira dzing é bôt bevoo, wa ye bo mbemba fulu ye bo akeng amben y’é bôt be va dzughu wa.

12. (a) Za dzam afe a bira dzing é bôt bevoo da ye bia tsini naa bi bo ? (b) Aval ane bi va yen de éngengeng Baghlan é mbemba das y’élat denan, za dzam bia kômô ve mengu’u naa bia bo ?

¹² É kalare ôsua wèñ été, Pierre a nga belane éfiè « a bira dzing. » Aval édzing té daa buru ki fave ayôm minsem, ve, « abuiñ minsem » (1 Pierre 4:8). Éyong ézing Pierre a nga simane ayeghle nfa ndzamane Yésu a nga ve ñe mimbu ô mvus. Éyong ézing tam té Pierre a mbe éé simane naa a ne mbemba môt éyong a nga dzô naa, a ye dzame moañang « ya ke kuiñ biyong zambwa. » Ve, Yésu a nga yeghle ñe ye bia naa, bia dzame « ya ke kuiñ biyong 77 » da yili naa, éyong ésese (Mat. 18:21, 22). Nge é ne wô ndzukh naa ô dzale melepgha meté, ô taa sili mo ôsi ! Be-bo bisèñ Jehôva besese ba fe, ba yen ndzukh éyong ézing naa be dzame é bôt bevoo, amu be ne be-bo minsem. É dzam da dang éban abong di é ne naa, mi bo é dzam é sese mi ne bo naa mi dzam é bôt bevoo ye bera bo mvoa ye be c.

13. Amu dzé é ne bo ndzukh akal bemvene naa be bele tam ya saghe bobeñang ya bekal beba ?

¹³ Pierre éé dzi ki vaghle vuèn é dzam Yésu a nga dzô ñe niène a nga wômô : « Baghle é boan mintôma miam » (Jean 21:16). Nge mia sèñ ane mvene yemghane  naa, melepgha meté ma daghe fe mina. Ve, é ne bo ndzukh akal mvene naa a bele tam y’a dzale môra ayem té. Amu bemvene ba yiène tare daghe naa, é nda-bôt deba é bele é dzôm asese ba yi naa be ning, naa, bôt besese be ye menda me-bôt meba ba wôrane naa ba dzing be, ye vole menda me-bôt meba a yir Jehôva bébéñ. Ba yiène fe tebe ôsu nfa ésèñ minkanghle, a kôman ye wulu ya minfa mi ye bisulan, bisesang alu daa, ye bisesang melu melal. Bevoo be bele fe meyem ane bôt be ye Comité de Enlace con los Hospitales nge ki Comité de liaison hospitalier, nge ki ba yebe meyem mefe a Departamento Local de Diseño y Construcción nge ki Service locale développement/construction. Bebela a ne naa, bemvene be ne befam be bele abuiñ ésèñ !

14. Za dzam é ne tsini bemvene naa be baghle nsama mintôma ? (1 Pierre 5:1-4)

¹⁴ Pierre a nga saghe bemvene bevoo naa « baghlan nsama mintôma Nzame » (A lang 1 Pierre 5:1-4). Nge ô ne mvene, bia yem naa wa dzing bobeñong ya bekal buè ye naa wa kômô be baghle. Ve, éyong ézing ô ne wôrane naa, wéé bele ki abuiñ tam nge ki naa, ô ne mvoaran aval da ve naa, wéé se ki dzale ayem té. Za dzam ô ne bo ? Dzôghe Jehôva é dzam wa wôran. Pierre a nga tsili naa : « Nge môt ézing a bo ésèñ, a boghe de y’é ngu’u da so ñe ébe Nzame » (1 Pierre 4:11). Bobeñong ya bekal buè be ne tubane minzukh mii se ki mane kômban émo di été. Ve, simghane naa, « ndjié be baghle mintôma », Yésu Christ, a ne be vole a dang é dzam ô ne bo. A ne de bo ému ya nféféñ éning da zu. É dzam étam Nzame a sili bemvene é ne naa be dzing bobeñang ya bekal beba, a baghle be, ye bo « bifônan akal nsama mintôma. »

15. Aval avé mvene a ne baghle nsama mintôma ? (A daghe fe évaghle).

¹⁵ William, éñi a tobe-yang mvene tang abuiñ mimbu a wokh amu dzé ésèñ mbaghle é ne éban. Éyong ôkoan COVID-19 ô nga sum, be nga ñong nkighane naa ba luè kada nkare fuèñ y’angôs minkanghle deba kada sono. A dzô amu dzé be nga bo de : « Abuiñ bobedzang be mbe be too étam menda meba ya mesimane meba, éde avôô-avôô mesimane meba me mbe venghane mbia mesiman. » Éyong bobeñang ya bekal bèñ ba tubane minzukh, William a tugha be bèè naa a yem é dzôm ba yi, y’é dzam da ndaghle  be. Éyong té a dzeng naa a yen mebakh nge ki bingengeng bi y’a nden waa a ne belane bie naa a saghe bobeñang ya bekal bèñ. A dzô naa : « Ésèñ bebaghle é ne édedèè éban melu maa, a lôt melu ô mvus. Bia yiène ve mengu’u mesese maa naa bi vole bôt a yem Jehôva ; bia yiène fe ve mengu’u mevoo-mevoo meté naa bi baghle nsama mintôma, ye vole mintôma Jehôva naa mi tsini naa mia tobe a bebela été. »

16. Meval mevé bi ne dzale meyeghle bi va ñong bekalare Pierre été ?

¹⁶ Bi va yen fave ayôm meyeghle ye bekalare bebèñ Pièrre a nga tsili ya nsisim Nzame. Éyong ézing ô va yen dzam ézing ô ne kômô songhan. Éfônan, ye wa kômô bira binan ébe biboran bia zu nféféñ éning ? Y’ô va ñong nsonghane naa wa kanghle ésèñ, a sikôlô nge ki aval éfe ézing ? Ye wa yen meval mefe ô ne bira lere bobeñong ye bekal buè môra édzing ? A bemvene, ye mi bele nkôman ô ne ngu’u naa mia baghle mintôma Jehôva amu mia kômô de ya n’nem ôsese ? A tugha fas mina bebién, é ne lere naa mi bele mam mézing mia yiène songhan, ve, mi taa sili mo ôsi. « Nti wèè a ne mbemba fulu », éde a ye mina vole naa mi songhane mina bebièn (1 Pierre 2:3). Pierre a ban bia naa : « Nzame [. . .] émièn a ye man ayeghle denan. A ye ve naa mi tebe naa bip, a ye mina ve ngu’u, a ye ve naa mi taa teng »—1 Pierre 5:10.

17. Nge bi tsini naa bia séhane Jehôva ye likh naa a yeghle bia, asughlan da ye bo ya ?

¹⁷ Môs ézing, Pierre a nga wôrane naa, aa yiène ki tobe é moan Nzame nfeng (Luc 5:8). Ve, y’avole édzing Jehôva ya Yésu, Pierre a nga tsini naa, a sèhane Nzame ane n’yeghe Christ. Éde, Pierre a nga bele « ayebe naa a ñii Édjié Nzame é ne mbèmbèè ye Nti ye Nkôre waa Yésu Christ » (2 Pierre 1:11). Za môra maa ! Nge ane Pierre, mi tsini ôsu naa mia sèhane Nzame ye likh naa émièn a yeghle mina, mina fe mia ye bele môra abuane ye éning é ne mbèmbèè. Mia ye « dzale akalgha ye mebun menan, da yili naa, akôre denan »—1 Pierre 1:9.