1-2. Za dzam bia yiène tsini naa bia bo amben bi ñong-hang bautismo nge ki baptême ? Vakh ayilgha.

 BIYONG tang yè mia tsi é nda dzenan ? Tam ézing, kaa naa ô ke tobe wéñ, wa tare de yem mane tsi. Ve, dzé é ne boban nge mi bo kaa tsini naa mia tsi do ? Aval mia yem do, nda té, é ne mane dzéñ ya mvin avôô. Nfa ye naa, é nda dzenan é tobe nfuban, mia yiène de tsi éyong ésese.

² É ne fe aval daa, nfa mesiman ya mefulu mèè. É ne té, kaa naa bi ñong baptême nge ki bautismo, bi nga sèñ ngu’u naa bi tsen mam éning dèè, nfa ye naa, bi « fubu bia bebién a nsôn ya nsisim » (2 Becor. 7:1). Ve, éndagha, bia yiène béé melepgha ntôl Paul nge ki Pablo a nga dzô naa, « tsinighane naa, mia bo nféféñ môt » (Beéph. 4:23). Amu dzé bia yiène tsini ôsu ye ve mengu’u naa, bi tsen bia bebién ? Amu naa, mam me ye éning di, me ne ve naa bi tobe mvin avôô asu Jehôva. Nfa ye naa dzam té é taa boban, ye tobe nfuban asu Jehôva, bia yiène ke ôsu ye fas nge mesiman, mefulu, ya é mam bia kômô, ma vaghane ya nkômane Jehôva.

3. Éfiè « ôsiman wônan ô bo nféféñ » da yili ya ? (Beromain 12:2)

³ Za dzam bia yiène bo naa, ôsimane wèè ô bo nféféñ, da yili naa, a tsen aval bia tem ? (A lang Beromain 12:2). Bifiè Griego nge ki Grecques ba konghlane a Fang naa, « ôsiman wônan ô bo nféféñ », be ne fe wô konghlane naa, « a tsen aval bia tem. » Éde é ne naa, biaa yiène ki sughu fave  naa, bia bo mbemba be-mam éning dèè. Bia yiène fas aval bôt bi ne, ya tsen nfa ye naa, bi kang metsin metsing Jehôva. Biaa yiène de bo éyong évoo, ve, tam ésese.

4. Aval avé bi ne ve naa, mesiman me ye émo di me taa bia tsen ?

⁴ Éyong bia ye bo kaa nsem, bia ye ve Jehôva n’nem mbeng tam ése. Nté bia yane do, bia yiène tsini naa, bia sèñ ngu’u nfa ya ve Jehôva n’nem mbeng. Baghlane naa, nten Beromain 12:2 ntôl Paul a dzô naa, bia yiène ve naa ôsimane wèè ô bo nféféñ, nfa ye naa, bi yem é dzam Nzame a kômô naa bi bo. Ndaane naa, bia likh émo é tsen bia, ôsusua bia bebién bia yiène tare fas nté mbé bia likh mesiman Nzame se ki éma émo, me name mintaane ya minkighane miè.

5. Aval avé a yem naa, è môs Jehôva ô ntoo bebéñ, é ne bia vole a fas aval bia tem ? (Daghe fe évaghle).

⁵ N’tamane ñong éfônan. Jehôva a kômô naa, bi « baghle é môs Jehôva ôsiman wèè été » (2 Pierre 3:12). Silighe wamièn naa : ‘Ye ma ning aval da lere naa, é môs Jehôva ô ntoo bebéñ ? Ye minkighane miam nfa sikôlô ya ésèñ mia lere naa, a sèhane Jehôva éde faa da dang éban éning dam ? Ye me bele mebun naa, Jehôva a ye ve ma yé nda bôt dzam é biôm bia yi, nge ki faa naa, ye ma yep a n’nem tam ése akal akum ?’ Simane mevakh Jehôva a wôran éyong bia tele nkômane wèñ ôsu éning dèè—Mat. 6:25-27, 33 ; Beph. 4:12, 13.

6. Bia yiène ke ôsu ya bo za mam ?

⁶ Bia yiène fas aval bia tem éyong asese, ya tsen é mam maa yiène ki. Ntôl Paul nge ki Pablo a nga dzô Becorinthien naa : « Tsinighane naa mia fas nge mi ne mbunan été ; tsinghane naa, mia lere aval bôt mi ne » (2 Becor. 13:5). A tobe « mbunan été » daa sughu ki fave a  ke bisulan bi ye ékôan, nge ki a ke minkanghle metam m’ézing. Dzam té, da daghe fe é mam bia simane, éma bia yi, ya éma ma tsini bia naa bi bo mo. Bia yiène ke ôsu ye ve naa, ôsimane wèè ô bo nféféñ, bii lang kalare Nzame, bii yeghe fe a tem aval a tem, ya ve mengu’u mesese nfa ya dzale nkômane Jehôva—1 Becor. 2:14-16.

7. Aval ane nten Beéphésien 4:31, 32 wa dzô do, za dzam afe bia yiène bo, ye amu dzé é ne bo ndzukh ?

⁷ A lang Beéphésien 4:31, 32. É dzam afe da dang éban bia yiène bo, a ne « a boat nféféñ môt » (Beéph. 4:24). Dzam té da sili naa, bi sèñ ngu’u nfa ya bo de. Da yili naa, bia yiène vèè mbimbia mefulu ane abé n’nem, meyèè ya ñan. Amu dzé é ne bo ndzukh ? Amu naa, mbimbia mefulu m’ézing me ne bo ayèñ a vèè. Éfônan, bôt b’ézing ba « dzeng mintsiè » ya bo « ébubu a wokh ôlun » (Mink. 29:22). A vèè mbimbia mefulu me tobeyang ayap, da sili naa, bi ve mengu’u nfa ya tsen, amben bi ñong-hang bautismo nge ki baptême, aval ane nlang wa zu wi, wa ye de lere.

8-9. Aval avé nlang Stephen wa lere naa bia yiène ke ôsu ye vèè n’nôm môt ?

⁸ Moadzang ézing a too éyôla naa Stephen, é mbe ñe ayèñ naa a djié meyèè mèñ. A dzô naa : « Amben a kué naa me ñong-hang baptême nge ki bautismo, me nga yiène tsini naa ma djié fulu meyèè dam. Éfônan, éyong me nga ke minkanghle menda-menda, me nga dzirane n’wuwup ézing, amu a nga wup radio metua wom été. Éyong me nga yit ñe bebéñ, éde a nga wua radio ôsi, ane a nga tup mbii. Niène me nga kat é bôt bevoo aval me nga ñong é radio wom, mvene ye angôs minkanghle dèè a nga sili me naa, ‘A Stephen, nga bo naa ô biñ ñe, ô nga ye ñe bo ya ?’ Nsili té ô nga likh me naa me fas ye tum ma asi, nfa ye naa, me tobe a mvoa été ya é bôt bevoo. » b

⁹ Éfônan Stephen da lere naa, bi ne lere mbia mefulu kaa naa bi va yane do, amben bi mba bii tem naa bi vèèyang mo. Nge dzam té da bo wa, ô taa sili mo ôsi, ye tem naa ô ne mbia môt. Ntôl Paul a nga yebe fe naa : « Éyong ma kômô bo é dzam é ne sôsôe, é dzam é ne abé éde da vane so » (Bero. 7:21-23). Amu naa, bekristen besese be ne bôt minsem, ba yiène lumane mbia mefulu meba éyong ésese, aval ane m’bulughe ya mbuén ba mane dzéñ a nda. Bia yiène ke ôsu ye sèñ ngu’u nfa ye naa, bi bo nfuban. Aval avé bi ne de bo ?

10. Aval avé bi ne lumane ya mbimbia abo dulu ? (1 Jean 5:14, 15)

¹⁰ Yaghlane Jehôva akal é fulu wa lumane do, wéé bele mebun naa, a wokh wa, a ye fe wô vole (A lang 1 Jean 5:14, 15). É ne été naa Jehôva aa ye ki bo akengha naa, a vèè bia mbia fulu ézing, ve, a ne bia ve ngu’u naa bi lumane do (1 Pierre 5:10). Nté té, bia yiène bele abo dulu da ke nsama ya meyaghlane mèè, kaa likh naa, bi bo é mam me ne ve naa, bi bera bele mbimbia abo dulu bii mbe bi bele melu mvus. Éfônan, tobeghane nkee ya é mam mesese émo da lere be película nge ki befilm, bingengeng bia lôt a télé, nge ki a lang minlang mia wumu mbimbia abo dulu mia lumane de. Mine taa ki likh naa, ôtemgha wônan ô bembe  ébe mbimbia minkôman—Beph. 4:8 ; Becol. 3:2.

11. Za mam bia yiène bo naa bi ke ôsu ya boat nféféñ môt ?

¹¹ Amben bi vèè-yang n’nôm môt, é ne édedèè éban naa, bi ke ôsu ya boat éwi ô ne nféféñ. Aval avé bi ne de bo ? Bi ne de bo éyong bia vu Jehôva, bii yeghe mefulu mèñ (Beéph. 5:1, 2). Éfônan, éyong wa lang nlang ézing ya Bible wa ngône é fulu ndzamane Jehôva, silighe wamièn naa, ‘Ye ma dzame é bôt bevoo ?’ Éyong ki wa lang é dzam da daghe é fulu éngôngoo Jehôva, nfa é bôt be ne ajèñ, silighe wamièn naa, ‘Ye ma yen é bobedzang be ne ajèñ éngôngoo, ye ma lere ki de mimboane miam été ?’ Tsinighe naa wa ve naa ôsimane wiè ô bo nféféñ, ye bo ôdzibi ya wamién, nté sese wa ke wa boat nféféñ môt.

12. Aval avé Stephen a nga wôran é ngu’u Bible a bele naa a tsen bôt ?

¹² Stephen, éñi bi va tu ayôp, a nga yen naa, ôtetakh-ôtetakh, a mbe éé ke a boat nféféñ môt. A dzô naa : « Até ye éyong me nga ñong bautismo nge ki baptême ya kuiñ ému, me tubane-yang abuiñ bitéñ bii mbe ve naa me yèè. Me nga yeghe a ke é bôt ba song ma ôyap, nge ki a ve naa ntiè ô taa vem. Abuiñ bôt, amben ngal wom, be nga kur me fuas, amu me nga tobe mvoa bitéñ bité. Mamién me nga kam fe dzam té ! Ma yebe naa, se ki ya é ngu’u dam éde me nga tsen aval môt me mbe. Me bele ndzi n’nem naa, é ngu’u Bible a bele naa a tsen bôt, éde é nga tsen ma. »

13. Dzé da ye bia vole naa bi bele mbemba minkôman ? (Begalates 5:16)

¹³ A lang Begalates 5:16. Nfa ye naa, a vole bia a wun aluman ya bo é mam me ne tetele, ya fulu akap, Jehôva a ve bia nsisim wèñ. Éyong bia yeghe Nkobe Nzame, bia likh naa, nsisim wèñ ô name bia. Bia ñong fe nsisim wèñ éyong bia ke bisulan. Éyong bi ne bisulan bité, bi ne lôt tam ya bobedzang ya bekal bèè be ne ane bia, ba ve mengu’u naa, be bo é mam me ne tetele. Éde, dzam té da ve bia ngu’u (Behéb. 10:24, 25 ; 13:7). Éyong bia yit Jehôva bebéñ, bii yaghlane ya n’nem ôse, ye dzaa ñe naa, a vole bia a vèè mbia fulu ézing, a ye bia ve nsisim wèñ wa ye bia wône, naa bi tsini naa bia luman. Afang bo naa, mam meté mesese maa ye ki likh naa mbia minkômane mi mane dzang, ve, ma ye bia vole naa, bi lumane ya mbia minkômane mité. Aval Begalates 5:16 a dzô de, é bôt ba wulu ya nsisim Nzame « baa ye ki dzale minkômane mi ya nsôn. »

14. Amu dzé é ne édedèè éban naa, bi tsini naa bia bele mbemba minkôman ?

¹⁴ Éyong bi sum-hang naa bia bo é mam ma vole bia a bele mbemba élat ya Jehôva, é ne édedèè éban naa bi baghle mefulu meté ya tsini naa bia bele mbemba minkôman. Amu dzé ? Amu naa, nzizing ézing ye minzizing miè, aa sim ki naa a lumane bia. Nzizing té, a ne nkômane ya bo é dzam é ne abé. Amben bi ñong-hang bautismo nge ki baptême, bi ne bele nkômane ye naa, bia bo é dzam bia yiène saalé, bia lang été, bivuiñ bisese bi ne abé, a bira ñu meyok, ya pornografía (Beéph. 5:3, 4). Étong moan kristen ézing a dzô naa : « Mbia nkômane ô nga dang me bo ayéñ naa me lumane a wo, a mbe a kômô ke binong ya befam bevoo. Me nga bunu naa dzam té da ye me man, ve me ngen me bele nkômane té. » Dzé é ne wô vole nge ô bele mbia nkômane ézing ô ne édedèè ngu’u ?

15. Amu dzé da ve bia ngu’u a yem naa « môt asese » a lumane ya mbia minkôman ? (A daghe fe fôrô).

 ¹⁵ Éyong mia lumane ya mbia nkômane ô ne édedèè ngu’u, simghane naa, mii se ki étam. Bible a dzô naa : « Mebobelan mi va tubane mo, môt asese ña tubane fe mo » (1 Becor. 10:13a). Bible nfe a konghlane éfus té naa : « Waa be ki tubane mebobelane m’ézing me ne naa, moan môt nfe aa be ki tare tubane mio. » Be nga kobe bifiè bité akal bekristen be mbe be too a Corinto nge ki Corinthe. Bevoo b’ézing be mbe be-bo medzian, be homosexuales ya be bili meyok (1 Becor. 6:9-11). Ye mia simane naa, niène be nga ñong bautismo nge ki baptême, béé dzi ki bera bele mbia minkômane mité ? Déé se ki boban. É ne été naa, besese be mbe bekristen be ne nwuane mboan, ve, a kué naa, be ngen boan be-bôt a minsem. Kaa de sôô, be nga yiène lumane ya mbia mikômane meté éyong asese. Dzam té da yiène bia ve mengu’u ô ñuu. Amu dzé ? Amu da lere naa, a bo mbia nkômane ésese mia lumane wo, môt nfe a nga wun wo. Ya dzam té, éde mi ne « yem ngu’u a mbunan été, mii yem naa, é bobedzang besese be ne si se ngura, ba tubane fe minzukh mité mivoo »—1 Pierre 5:9.

16. Za ôlam bia yiène saalé, amu dzé ki ?

¹⁶ Mine taa ku ôlam ya tem naa, môt ézing aa yem ki ndzukh mia tubane wo. A simane aval té, é ne bia likh a tem naa, étéñ bi tele déé se ki kômban, ya naa, bii se ki lumane ya mbia minkômane mité. Bible aa dzô ki aval té. A dzô naa : « Nzame a ne sôsôe, aa ye ki likh naa, bi tubane mebobelan abim a yem naa, bii se ki zôme, ve ya abobelan, a ye fe kôm étéñ, aval da ve naa bi zôme de » (1 Becor. 10:13b). Édeeng, amben mbia nkômane  ô ne édedèè ngu’u, bi ne tobe sôsôe ya Jehôva. Jehôva a ne bia vole naa, bi taa bo é dzam é ne abé.

17. Amben bii se ki saalé mbia minkôman, za dzam bi ne bo ?

¹⁷ Éyong ase, simghan é dzam di : Amu bi ne be-bo minsem biaa ye bo kaa bele mbimbia minkôman. Ve, éyong ma so, bi ne tsirane mo, aval José nge ki Joseph a nga bo de, éyong a nga tup ngal Potifar (Atar. 39:12). Déé se ki éban naa, bi dzale mbia minkômane mité !

18-19. Za minsili bia yiène sili bia bebién nté bia ke bia ve naa, ôsiman wèè ô bo nféféñ ?

¹⁸ Ayeghle di été, bi va yeghe naa, a ve naa ôsiman wèè ô bo nféféñ da yili naa, bia yiène ke ôsu ye ve mengu’u naa, mesiman ya mimboane miè mi ve Jehôva n’nem mbeng. Éde bia yiène tsini naa bia fas, bii sili bia bebién naa : ‘Ye mimboane miam mia lere naa, ma ning melu me ye asughlan me ye émo di ? Ye ma ke ma vem nfa ya boat nféféñ môt ? Ye ma likh naa, nsisim Jehôva éwô ô wulu ma éning dam nfa ye naa, me tsirane mbimbia minkômane mi ya nsôn ?’

¹⁹ Éyong wa ye fas wamién aval môt ô ne, ô taa dzeng naa ô bo kaa ékop, ve, tobghe mevakh ya mengu’u ô va-hang nfa té. Nge ô tèè naa, wa yiène tsen mam m’ézing éning duè, ô taa sili mo ôsi. Ndaane de, bééghe melepgha ma so nten Bephilippien 3:16 ma dzô naa : « Éde, a bo abim sese bi vem-hang, n’tsinighane naa bia wulu sôsôe zen té ébién. » Éyong wa ye de bo, tobeghe mebun naa, Jehôva a ye borane mengu’u wa ve naa, ôsimane wiè ô bo nféféñ.