1. Za dzam bi ne bo naa, bi ve Jehôva n’nem mbeng ?

 TAME simane naa, wa ve môr ngura aval das é ne mbeng é too fe éban. Ke da ye wô bo n’nem mintéñ, nge môr té a ñong das té, ye ke de bui vôm ézing, kaa belane de, nga ! Nfa mboo ki, ke da ye wa bo n’nem mbeng, nge môr té a yem belane das té, é lere vèè naa, a yem mbeng akal é das ô va ve ñe. Ayeghle é ne yè ? Jehôva a nga ve Ndôma dzèñ akal dèè. Éde, Jehôva a ne édedèè n’nem mevakh, éyong a yen naa, bia yem mbeng akal das té, ye akal édzing dèñ é nga tsini ñe naa, a ve ntang ! (Jean 3:16 ; Bero. 5:7, 8).

2. Za mam bia ye yen ayeghle di été ?

² Nté mimbu mia ke mia lôt, bi ne sum naa bia dzimle n’yemane mbeng bi bele akal ntang. Nge bi dzimle n’yemane mbeng wèè akal ntang, a ne ane bia ñiè é mbemba das Jehôva a va ve bia vôm ézing, é vôm biaa yen ki wô, ye naa, biaa si-simane ki wô. Ayeghle di, da ye bia vole naa, bi taa dzimle n’yemane mbeng wèè akal das té. Bia ye fe yen aval bi ne buane ntang éndagha, ye aval bi ne buane wô, melu ma zu. Asughlan, bia ye yen aval bi ne lere naa bia yebe édzing Jehôva, dang-dang é tam Ésesang ôsiman awu Yésu.

AVAL BIA BUANE NTANG ÉNDAGHA

3. Aval évoo évé bia buane ntang éndagha ?

³ Éndagha, bi nga buaneyang ntang Yésu Krist a nga ve. Éfônan, ngalane ntang, Jehôva a djii minsem mia. Môr ézing aa yemle ki ñe naa, a djii bia. Ve, émién a kômô de bo. Ntsili bya a nga lere naa, a yem mbeng akal ndjiiane Jehôva. A nga dzô naa : « Édi da daghe wa, a Jehôva, ô ne mbemba n’nem ye nkoghane naa wa djii » (Bya 86:5 ; 103:3, 10-13).

4. Jehôva a nga yaane ntang akal beza ? (Luc 5:32 ; 1 Timothée 1:15).

 ⁴ Bôr bézing ye ébe bia, be ne wôrane naa, baa yiène ki ndjiane Jehôva. Bebela a ne naa, bia besese biaa yiène ki wô. Ntôô Pablo a nga yen naa, « aa yiène ki naa, be luè ñe naa ntôô ». Éde, a nga koghle naa : « Ngalan é mvam Nzame maa yiène ki de, me ne, é môr me ne » (1 Becor. 15:9, 10). Éyong bia dzôbane minsem mia, Jehôva a djii bia. Amu dzé ? Se ki amu naa, bia yiène de, ve, amu naa a dzing bia. Éde, nge bia tem naa, biaa yiène ki ndjiane Jehôva, nsimeghane naa, Jehôva a nga ve ntang, se ki akal é bôr be ne kaa minsem, ve, akal bebo-minsem ba dzôban (a lang Luc 5:32 ; 1 Timothée 1:15).

5. Ye é ne sibamekôm naa, Jehôva a lere bia é mvam dzèñ ye djii bia ?

⁵ Môr ézing aa yiène ki simane naa, é ne sibamekôm naa Jehôva, a djii ñe, amben a va sèhane ñe tang abuiñ mimbu. Bebela a ne naa, Jehôva a dzing é sôsôe dèè (Behéb. 6:10). A nga ve é Moan wèñ ane das, se ki naa a yaane bia akal ésèñ bi nga bo ñe. Éde, daa yiène ki naa bi simane naa, amu bi va bo abuiñ mam akal Jehôva, éde bia yiène ndjiane wèñ. Nge bi bunu de, da yili naa, ébe bia, bia tem naa, ntang wéé se ki éban akal dèè (a vaghane ye Begalates 2:21).

6. Amu dzé ntôô Pablo a nga sèñ ngu’u akal Jehôva ?

⁶ Pablo a mbe é yem naa, a bo abim ésèñ ésese a nga bo akal Jehôva, déé mbe ki sibamekôm naa, Jehôva a djii ñe. Éde, amu dzé a nga sèñ ngu’u akal Jehôva ? Se ki amu a nga kômô lere naa, a nga yiène ndjiane Jehôva, ve, amu a nga kômô lere naa, a yem mbeng akal é fulu mvam Jehôva, a ne kaa yiène de (Beéph. 3:7). Éde, ane Pablo, ntsinighane naa, bia sèñ akal Jehôva ye ayông, se ki amu bia yiène é mvam dèñ, ve, amu bia kômô lere naa, bia yem mbeng akal é dzam a nga bo bia.

7. Aval avé afe, bia ñong abuan ébe ntang éndagha ? (Beromain 5:1 ; Jacques 2:23).

⁷ Aval afe bia buane ntang éndagha é ne naa, bi ne yir Jehôva bébéñ ye bele élar é ne ngu’u ye ñe a. Aval bi va yen de ayeghle é ndaghe mane di, éyong bia byale, bii bele ki élar ézing ya Jehôva. Ve, amu ntang, bi ne tobe « mvoa ye Nzame », ye yir ñe bébéñ (a lang Beromain 5:1 ; Jacques 2:23).

8. Amu dzé bia yiène lere naa bia yem mbeng akal é maa Jehôva a ve bia naa bi yaghlane ñe ?

⁸ A yaghlane Jehôva, a ne ngura aval dzam bi ne bo ngalan é mbemba élar bi bele ye ñe. Jehôva aa bèè ki fave meyaghlan ayong dèñ éyong da kôane nsama, ve, a bèè fe meyaghlan kada môr ye ébe bia a ne bo éyong a ne étam. Meyaghlan me ne bia sili n’nem ôsi, ye ve bia mvoa ya nsisim. Ve, déé se ki é mam étam meyaghlan me ne bo. Meyaghlan me ne wône élar dèè ye Jehôva (Bya 65:2 ; Jacq. 4:8 ; 1 Jean 5:14). Éyong a mbe a si va, Yésu a mbe é yaghlane mban amu a mbe é yem naa, Jehôva a mbe é bèè ñe, ye naa, meyaghlan me nga ye ve naa, a baghle élar dèñ ngu’u ya Ésaa wèñ (Luc 5:16). Bia bira ve akiba, amu ngalan atunegha Yésu a nga ve, bi ne tobe mengom Jehôva, ye fe naa, bi ne kobe ñe meyaghlan été !

AVAL BI NE BUANE NTANG MELU MA ZU

9. Aval avé besôsôe bebo-bisèñ Jehôva be ye melu ma zu, ba ye buane ntang ?

⁹ Aval avé besôsôe bebo-bisèñ Jehôva be ye melu ma zu, ba ye buane ntang ? Jehôva  a ye be ve éning é ne mbèmbèè. Abuiñ bôr da tem naa, dzam té déé se ki vaghle boban, amu naa, bôr ba so ba wu é ntoo betoyini a mimbu. Ve, nsonghane Jehôva ôsua, ô mbe naa, boan be-bôr be ning mbèmbèè. Nge Adán ba Eva béé dzi ki bo nsem, môr ézing éé nga ye ki simane naa, a ning mbèmbèè da dang mbeng naa, é bo é dzam é ne bebela. Amben é ne ndzukh naa bi simane naa, moan môr a ne ning mbèmbèè éndagha, bi ne bunu naa, bia ye de bele, amu bia yem naa, Jehôva a nga yaane é tang da dang nden, éning é Moan wèñ, naa dzam té é boban (Bero. 8:32).

10. Za dzam minwoane mboan ye mintôma mivoo mia yane ya avôô ?

¹⁰ Amben éning é ne mbèmbèè é ne dzam ye melu ma zu, Jehôva a kômô naa, bi siman éning té a téé ye éndagha. Minwoane mboan mia yane ya avôô éning ya dzôp été, nté ba ye djié si ngura ya Krist (Mel. 20:6). Mintôma mivoo, mia yane naa, mi ning é si é venghaneyang Paraíso, nkôran ébe mintéñ ye mindzukh misese (Mel. 21:3, 4). Ye ô ne môr mboo ye nsama mintôma mivoo mi bele ôyane ya ning a si va ? Éborane té, déé se ki édi ba kee, amu môr a va chimi éning ya dzôp. Jehôva a nga vele boan be-bôr naa be ning a si va. Éning té, da ye bia ve, mevakh ma dang mevakh mesese.

11-12. Za biboran bi ne yane naa, bi ne bele a paraíso été ? (A daghe fe bivaghle).

¹¹ Tamane siman aval éning denan da ye bo a paraíso. Miaa ye ki fe ko dzôm ézing wong, a koan, nge ki a wu (Esaïe 25:8 ; 33:24). Jehôva a ye mane dzale mekômgha menan mesese. Za mam ô ne dzing wa bo ? Ye wa kômô yeghe mam mézing ma daghe, betsit, anoan, nge ki mam mefe ? Ye wô kômô yeghe a bôm évole mezik ézing, nge ki faa, a yeghe a vaghle ? A paraíso été, da ye bo éban naa bi bele é bôr ba yem vaghle ya é bôr ba yem long menda. Ba ye fe yi, é bôr ba bèñ bidzi, a yam bie, a bo bivole, a  bèñ mefup mesam ye a yem me baghle (Esaïe 35:1 ; 65:21). Éyong wa ye ning mbèmbèè, wa ye bele tam ye a bo mam mesese meté, ya abuiñ mam mefe.

¹² Za mevakh ki bia ye wôran éyong bia ye ve é bôr ba ye wôme mbemba nsohan ! (Bisè mintôl 24:15). Tame fe siman, nté mbé wa ye wôrane mevakh, ye a yeghe abuiñ mam nfa Jehôva, wé fas abuiñ biôm bi ye avele (Bya 104:24 ; Esaïe 11:9). Édi da dang bera bo mvèñ, waa ye ki vaghle bera bo nsem, fave naa, wa ye sèhane Jehôva aval da yiène, kaa bera bo éban naa, ô dzaa bidjiiya ! Ye wa ye mane lame biboran bisese bité, fave amu naa, éndagha wa kômô « buane nsem ôyôm tam ? » (Behéb. 11:25). Bebela ane naa, kaa dzôm ! Biborane bité bia dang é dzam ésese bi ne dzimle éndagha. Simeghane naa, éning ye ô paraíso, daa ye ki sughu fave étéñ ngiagh akal melu ma zu. Dzam té, da ye boban. Mam mesese meté, méé nga ye ki boban, nge Jehôva éé dzi ki bia dzing, ye ve é Moan wèñ ane ntang !

N’YEBEGHAN ÉDZING JEHÔVA

13. Aval avé bi ne lere naa bia yem mbeng akal édzing Jehôva ? (2 Becorinthien 6:1).

¹³ Aval avé bi ne lere naa bia yem mbeng akal Jehôva a nga ve ntang ? A ne éyong bia tele ésèñ dèñ ôsu, bining bia (Mat. 6:33). Da yiène, amu Yésu a nga wu nfa ye naa, « é bôr ba ning be taa ning akal bebièñ, ve akal é môr a nga wu akal deba, ye wômô » (2 Becor. 5:15). Jehôva a nga lere bia édedèè mbemba n’nem ye djii bia. Éyong bia bo é dzam ésese bi ne bo naa bia sèhane ñe, bia lere naa, bia wokh é dzam ésese a nga bo akal dèè, ye naa, bia bira yem mbeng té (a lang 2 Becorinthien 6:1).

14. Aval avé bi ne lere naa bi bele mebun ébe é zen Jehôva a lere bia ?

¹⁴ Bi ne lere naa bia yebe édzing Jehôva éyong bia lere mebun ébe é zen a lere bia. Aval avé ? Éyong bia yiène ñong minkighane mizing, ane a kikh abim sikôlô bia yiène bo nge ki aval ésèñ bia ye yebe, bia yiène tugha fas é dzam Jehôva a kômô naa bi bo kaa naa bia yebe de (1 Becor. 10:31 ; 2 Becor. 5:7). Éyong bia ñong minkighane mia bembe ébe mebun bi bele ébe Jehôva, mbemba dzam a boban. Mebun mèè ébe Jehôva ye angom dèè ye ñe, ma bo édedèè ngu’u. Ye naa, ôyane wèè ya ning a Paradis wa tugha bera wôneban (Bero. 5:3-5 ; Jacq. 2:21, 22).

15. Aval avé bi ne lere nyemane mbeng wèè, é tam Ésesang ôsiman awu Yésu ?

¹⁵ Bi ne fe bera lere naa, bia yebe édzing Jehôva aval afe. A ne éyong bia belane tam ye Ésesang ôsiman awu Yésu naa bia lere Jehôva nté mbé bia yem mbeng akal ntang. Ya fe naa, nté bia kômane naa bi tobe Ésesang ôsiman awu Yésu, bi ne fe bane bôr befe naa be zu tobe ye bia (1 Tim. 2:4). Tughane be yem mane dzô é dzam da boban Ésesang ôsiman awu Yésu. Da ye bo mbeng  nge mi lere be bingengeng, Amu dzé Yésu a nga wu? ye Siman awu Yésu, bia yen a nden jw.org. Bemvene ba yiène bo dzam asese naa, be bane é bôr be mana vuébé a nsisim. Tamane simane mevakh me ne a dzôp été ye a si va, éyong mintôma mizing Jehôva mi va dzimi, mia bera bulan ébe ñe ! (Luc 15:4-7). Ésesang ôsiman awu Yésu, bia yiène dzeng naa bi baran, se ki fave bevoo ye éba bevoo, ve ye fe minféféñ mi-bôt, nge ki é bôr be ntoo ayap ave be tobe bisulan. Bia kômô naa be wôrane naa be ne mbemba nsohan ! (Bero. 12:13).

16. Amu dzé bia yiène dzeng naa bi veme ésèñ minkanghle dèè é tam Ésesang ôsiman awu Yésu ?

¹⁶ Ye ô ne veme ésèñ minkanghle duè besono kaa naa Ésesang ôsiman awu Yésu é bo, ye besono ba zu ôsu vèè niène ésesang é lôrang ? A ne é mbemba aval bi ne lere naa bia yem mbeng akal é dzam ésese Nzame ba Krist be nga bo akal dèè. Nté sese bia ye ke bia veme ésèñ bia bo akal Jehôva, aval té, éde fe Jehôva a ye bia sukh asi. Asughlan, mebun bi bele ébe ñe ma ye wôneban (1 Becor. 3:9). Tugha fe lang bifus bi ya Biblia bi ne ntopban akal té, abakh Examinemos las Escrituras todos los días nge ki Examinons les Écritures chaque jour, nge ki faa, ntaane ô ne é kalare akal ésulan bia belane ñe ésulan ézizang sono. Ô ne fe belane bifus bité naa wa bo ayeghe Bible duè.

17. Za dzam da ve Jehôva n’nem mevakh ? (A daghe fe nkaalé «  Meval bi ne lere naa bia yebe édzing Jehôva »).

¹⁷ É ne kuiñ naa, wéé se ki fe bira sèhane Jehôva amu étéñ duè. Ve, simeghane naa, Jehôva aa vaghane ki abim wa bo ye abim é bôr bevoo ba bo. Jehôva a yen é dzam é ne n’nem wiè été. Da ve ñe bura mevakh éyong a yen é mura nyemane mbeng wiè akal é das dèñ, ntang (1 Sam. 16:7 ; Marc 12:41-44).

18. Amu dzé bia ve Jehôva ba Yésu Krist akiba ?

¹⁸ Nge bi ne bele minsem miè ndjiane, a bo memvuiñ Jehôva ye bele ôyane ya ning mbèmbèè, a ne fave amu Jehôva a nga ve ntang. Éde, nkehane ôsu naa bia lere naa bia yem mbeng akal édzing Jehôva, é nga tsini ñe naa, a ve bia biboran bisese bité (1 Jean 4:19). N’lereghane fe n’yemane mbeng wèè akal Yésu, éñi a nga bira bia dzing ye ve éning moan môr dèñ akal dèè (Jean 15:13).