AYEGHLE 3
DZIA 35 « Mi fas é mam ma dang éban »
Ñonghe minkighane mia ve Jehôva n’nem mbeng
« A ko Jehôva wong é ne atarga fakh, ye naa, a yem Éñi a dang ôyap yô, éde é ne mbemba n’woghane mam » (MINK. 9:10).
É DZAM BIA YE YEN
Bia ye yen aval bi ne belane n’yeman, mbemba n’woghane mam ye a yen mam ôyap naa bi ñong minkighane mi ne fakh.
1. Ndzukh dzam ôvé bia bese bia tubane wô ?
MÔS misese, bia yiène ñong minkighan. Mivoo mi ye été mi ne ébubu a ñong, ane é dzôm bia ye dzi kikiri, nge ki awala bia ye dzoghbe ô si. Vedaa, minkighane mife mii se ki ébubu a ñong. Minkighane miè mi ne name é mvoa ya nsôn dèè, é mvom dèè ye édi é nda-bôr dzèè, ye aval bi ne yem sèhane Jehôva. Bia kômô naa, bia bebièn ye nda-bôr dzèè bi ñong abuan ébe minkighane miè. É dzam da dang éban é ne naa, bia bele ndzi-n’nem naa, minkighane miè, mia ye ve Jehôva n’nem mbeng (Bero. 12:1, 2).
2. Za mam me ne wô vole naa ô ñong minkighane mi ne fakh ?
2 É ne wô bo ébubu naa ô ñong minkighane mi ne fakh nge (1) wa dzeng naa ô yem é mam mesese ma tsinane nkighane wa kômô ñong, (2) wa dzeng naa ô yem ôtemgha Jehôva nfa nkighane wiè, ye (3) nge wa tugha fas mesughlane me ye nkighane wiè. Ayeghle di été, bia ye yen mam meté, da ye fe bia vole naa bi yen aval bi ne yem belan é fulu a yen mam ôyap dèè (Mink. 2:11).
DZENGHE NAA Ô YEM É MAM MESESE MA TSINANE NKIGHANE WIÈ
3. Za éfônan é ne wô vole a wokh amu dzè wa yiène dzeng naa ô yem é mam mesese ma tsinane nkighane wa kômô ñong, kaa naa ô ñong wô.
3 É dzam ôsua wa yiène bo naa ô ñong mbemba nkighan, é ne a yem é mam mesese ma tsinane wô. Amu dzé é ne éban ? Tame simane naa, nkôkoan wa ke yen dokira amu a bele mura ôkoan ézing. Ye wa tem naa, dokira a ye ñe tsili mebiang kaa naa a tare ñe bo minsili, nge ki a bo ñe menálisis nge ki bexamen ? Bebela a ne naa, éyalan é ne kaa. Wa fe, wa ye ñong mbemba minkighan, nge ô tare fas é mam mesese ma tsinane wô. Za aval ô ne de bo ?
4. Aval ane bia lang de nten Minkana 18:13, za dzam ô ne bo nfa ye naa, ô yem é mam mesese ma tsinane nkighane wa kômô ñong ? (A daghe fe évaghle).
4 Ô ne yem é mam ma tsinane nkighane wa kômô ñong éyong wa sili minsili. Tame simane naa, ba bane wa ésesang ézing. Ye wa yiène ke ? Nge ô ne kaa yem za a bane, nge ki ntaane mam y’ésesang té, da ye bo éban naa ô sili minsili ane : « Vôm mbé ye éyong évé ba ye bo ésesang té ? Ye bôr ba ye bo abuiñ ? Za a ye ke a daghe naa mam ma wulu mbeng ésesang ? Beza ba ye tobe ésesang té ? Mam mevé ma ye boban wéñ ? Ye ba ye ve meyokh wéñ ? » Biyalane bi ye minsili mité bia ye wô vole naa ô ñong nkighan ô ne fakh (a lang Minkana 18:13).
Dzenghe naa ô yem é mam ma tsinane nkighane wiè wé sili minsili (A daghe éfaghle 4) a.
5. Za dzam wa yiène bo niène ô maneyang yem é mam mesese ma tsinane nkighane wa kômô ñong ?
5 A kôre ye vèè, niène wa mane yem é mam mesese ma tsinane nkighane té, wa yiène dzeng naa ô tugha tem nfa dzam té. Éfônan, wa ye bo ya nge ô yem naa é bôr baa kang ki metsin metsing me ya Biblia ba ye tobe ésesang té ? Nge ki naa, ye ba ye ve bôr meyokh wèñ tugha ? Ye wa simane naa, ésesang té é ne sughlan ésesang é ne mvin ? (1 Pierre 4:3). Nfa mboo ki, za dzam ô ne bo nge ésesang té da tuban ye awala wa yiène ke bisulan nge ki minkanghle ? Éyong ô maneyang fas mam meté mesese, ô nteleyang mbemba zen nfa ye naa ô ñong mbemba nkighan. Ve, wa yiène bera bo dzam afe. Ô nga yemang aval wa yen mam ; vedaa, za dzam Jehôva a tem nfa té ? (Mink. 2:6).
DZENGHE NAA Ô YEM ÔTEMGHA JEHÔVA
6. Aval ane bia lang de nten Jacques 1:5, amu dzé bia yiène dzaa Jehôva avole meyaghlan été ?
6 Dzaaghe Jehôva naa, a vole a wokh ôtemgha wèñ. Jehôva a kiagh naa, a ye bia ve fakh ya yem nge nkighan ézing wa ye ñe ve n’nem mbeng. A ve aval fakh té « ya n’nem ôsese kaa ki ve bidzô » (a lang Jacques 1:5).
7. Za aval ô ne yeghe a yem ôtemgha Jehôva nfa nkighane wa kômô ñong ? Vakh éfônan.
7 Niène ô maneyang yaghlane Jehôva naa a lere wô zen, tugha daghe naa ô yen éyalan a ve wa. Éfônan : Nge ô ne kaa yem é zen wa yiène ñong éyong wa ke ékena vôm ézing, ô ne sili é môr a too vôm té. Ve, ye wa ye ke kaa naa a mane yalane wa é dzam ô va sili ñe ? Kaa dzôm. Wa ye tugha bèè é zen a lep wa. Aval daa-daa fe, éyong ô maneyang dzaa Jehôva naa a ve wa fakh, dzenghe naa ô yem éyalane dèñ, wé bo mindzeng metsing ye metsin metsing me ya Biblia ma tsinane étéñ duè. Éfônan, éyong wa ñong nkighane nge wa ye ke ésesang bi va tu ô yô, ô ne dzeng é dzam Biblia a dzô nfa mefet me ne mvin, mbia bilat, ye éban ya tele Édjié Nzame ôsu ndaane mekômgha maa (Mat. 6:33 ; Bero. 13:13 ; 1 Becor. 15:33).
8. Za dzam ô ne bo nge wa kômô avole nfa ya yen melepgha ma tsinane nkighane wa kômô ñong ? (A daghe fe évaghle).
8 Metam mézing, ô ne kômô avole nfa ya yen melepgha ma tsinane nkighane wa kômô ñong. Éyong ézing ô ne bele melepgha meté ébe ndôm dzaa nge ki kal dzèè ézing é ne éwôlô a nsisim. Ô ne fe ñong abuan éyong wamièn wa bo mindzeng. Ô ne kuane abuiñ avole bivole akal ayeghe biè été, ane, Guía de estudio para los testigos de Jehová ya Textos bíblicos para la vida nge ki Guide de recherche pour les Témoins de Jéhovah ya Versets pour la vie chrétienne. Simeghane naa, nsonghane ô bele éyong wa bo mam mesese meté ô ne naa, ô ñong nkighane wa ye ve Jehôva n’nem mbeng.
Dzenghe naa ô yem ôtemgha Jehôva (A daghe éfaghle 8) b.
9. Za aval bi ne tobe ndzi-n’nem naa, nkighane wèè wa ye ve Jehôva n’nem mbeng ? (Beéphésien 5:17).
9 Za aval bi ne tobe ndzi-n’nem naa, nkighane wèè wa ye ve Jehôva n’nem mbeng ? É dzam ôsua bia yiène tare bo, é ne naa, bi tugha ñe yem. Biblia a dzô naa : « A yem Éñi a dang ôyap yô éde é ne mbemba n’woghane mam » (Mink. 9:10). Ôwé, mbemba n’woghane mam wa so éyong bia yem é mbemba mefulu Jehôva, nkômane wèñ, ye é mam a dzing ye fem. Silighe wamièn naa, ‘Éyong ma mbembe ébe é dzam me nga yemang nfa Jehôva, za nkighane me ne ñong ô ne ñe ve n’nem mbeng ?’ (A lang Beéphésien 5:17).
10. Amu dzé metsin metsing me ya Biblia ma dang éban a lôr aval bia bo mam a nda-bôr été nge ki é vôm bi too ?
10 Nfa ye naa bi ve Jehôva n’nem mbeng, biyong bizing bia yiène bo é dzam é ne ve é bôr bèè n’nem abé. Éfônan, bebyèñ bézing ba kômô mbeng é ngoan dzeba é ntoo ñamôrô, be ne ñe yemle ñe naa a lukh é fam é bele abuiñ mono nge ki éñi a ne be ve be abuiñ mono, amben ñi té éé se ki ngu’u nfa ya nsisim. Bebela a ne naa, ba kômô naa ngoan dzeba é bele akum, ve za a ye ñe vole naa a vem nfa ya nsisim ? Za aval Jehôva a yen dzam té ? Bia yen éyalane nten Matthieu 6:33. Été, ba saghe bekristen naa be ke ôsu ye « tare dzeng Édjié Nzame ». Amben bia kômô bere bebyèñ bèè ô yôp, ye ve bôr be ye memvong mèè ngang, ve, é dzam da dang bia éban é ne naa, bi ve Jehôva n’nem mevakh.
TUGHA FAS MESUGHLAN ME YE NKIGHANE WA KÔMÔ ÑONG
11. Za fulu ba tu nten Bephilippien 1:9, 10 da ye wô vole a tugha fas mesughlan me ye nkighane wa kômô ñong ?
11 Niène ô maneyang yen metsin metsing me ya Biblia ma daghe nkighane wa kômô ñong, é ne éban naa ô tugha fas mesughlan me ye nkighane wiè (a lang Bephilippien 1:9, 10). Fulu n’yenane mam ôyap, da ye wô vole naa ô yen asughlan ye kada nkighane wa kômô ñong. Biyong bizing, nkighan ézing ô ne bo ébubu a ñong. Vedaa, minkighane mife mii se ki ébubu a ñong. A yen mam ôyap da ye wô vole naa, ô ñong minkighane mi ne fakh, amben bitèñ bi ne ndzukh.
12-13. Za aval, a yen mam ôyap é ne wô vole a ñong minkighane mi ne fakh nfa ésèñ ngoman ?
12 Tame simane é dzam di. Wa dzeng ésèñ da ye wô vole a kale é nda-bôr duè. Ba kiagh wa bisèñ bibèñ. Wa tem é mam mesese ma tsinane bisèñ bité, ane, aval ésèñ wa ye bo, ntaane mam ye ésèñ té, é tam wa ye ñong naa ô ke kuiñ é vôm ésèñ té é ne, ye abuiñ mam mefe. Bible aa kîlî ki bisèñ bibèñ bité. Éyong ézing, wa dang kômô top évoo ye été, amu a ne aval ésèñ wa dzing nge ki naa, ba ye yaane wa abuiñ mono a lôr édi voo. Vedaa, wa yiène daghe mam mefe kaa naa ô ñong nkighan.
13 Éfônan, ye ésèñ ézing ye été da ye ve naa, ô taa tobe bisulan bizing bi ye ékôan ? Ye ésèñ ézing ye été, da ye saghe é tam wa yi nfa ye naa, ô vole é nda-bôr duè naa be wôrane naa be ne nkaman, mvom, ye naa, be yir Jehôva bébéñ ? A sili wamièn aval minsili mité, da ye wa vole naa ô tele « é mam ma dang éban » ôsu, da yili naa, ékang duè, é mam é nda-bôr duè da yi, ndaane a dzeng abuiñ mono. Aval té, wa ye ñong nkighane Jehôva a ye borane wô.
14. Za aval a yen mam ôyap, ye a lere édzing, da ye bia vole naa bi taa ve naa é bôr bevoo be kol-ôbak ?
14 A yen mam ôyap é ne bia vole naa bi yen aval nkighane wèè ô ne name é bôr bevoo, nfa ye naa bi taa ve naa é « bôr bevoo be kol-ôbak » (Beph. 1:10). Dzam té é ne éban éyong bia ñong minkighane mia daghe fave bia bebièn ane, aval bia boat ye kôm é ñuu dzèè. Éfônan, bi ne dzing bia boat ngum aval bitô bizing, nge ki a kôm é ñuu dzèè ngum aval ézing. Vedaa, za dzam é ne boban nge da tobe bôr be ye ékôan nge ki bôr be ye atan abé ? A yen mam ôyap da ye bia vole a kang awôrane deba. Édzing da ye bia tsini naa bi ke ôsu ye dzeng mbeng « é bôr bevoo » ye yem meniè mèè (1 Becor. 10:23, 24, 32 ; 1 Tim. 2:9, 10). Aval té bia ye ñong minkighane mia lere naa bia dzing ye kang é bôr bevoo.
15. Za dzam wa yiène tem kaa naa ô dzale nkighane wiè ?
15 Nge ô va ñong môra nkighane ézing, simeghan é dzam wa yiène bo naa ô dzale wô. Yésu a nga yeghle bia naa, bi « tare fas abim bi bele » (Luc 14:28). Éde, fasghan abim tam, biôm ye é ngu’u mia ye yi nfa ye naa nkighane wônan ô wulu mbeng. Biyong bizing ô ne kobe ye é nda-bôr duè, nfa ye naa, kada môr ye été a yem é dzam a ne bo naa nkighane té ô wule mbeng. Amu dzé aval mboane té ô ne mvèñ ? Amu dzam té é ne lere naa, wa yiène songhane mam mézing nkighane wiè, nge ki naa, wa yiène ñong nkighane ôfe. Éyong wa ve naa môr asese ye é nda-bôr duè a ve ôtemgha wèñ, ye bèè be, da ye bo ébubu naa be sèñ ngu’u nfa ye naa, nkighane té ô wule mbeng (Mink. 15:22).
A ÑONG NKIGHANE WA YE WULE MBENG
16. Mam mevé ma ye wô vole naa ô ñong nkighane wa ye wule mbeng ? (a daghe fe nkaalé, « Aval ô ne ñong minkighane mi ne fakh »).
16 Nge ô boyang é mam mesese bi va yen ô yô, ô ntoo nkoghane naa ô ñong nkighane ô ne fakh. Ô va mane yem é mam mesese ma tsinane nkighane wiè, ye fas metsin metsing ma ye wô vole naa, ô ñong nkighane wa ye ve Jehôva n’nem mbeng. Éndagha, ô ntoo dzaa Jehôva naa a vole wa a bo naa nkighane té ô wule mbeng.
17. Dzam évé da dang éban da ye wô vole a ñong mbemba minkighan ?
17 Amben ô nga ñong minkighane mi nga wule wô mvèñ melu mvus, simane naa, é dzam da dang éban nfa ye naa ô ñong mbemba minkighan é ne naa, wa yiène yeghbe ébe Jehôva, ndaane ébe akeng duè, nge ki ébe é mbemba minkighan ô tareya ñong melu mvus. Éñe étam a ne wô ve ña n’yemane, mbemba n’woghane mam, ye fulu ye a yen mam ôyap. Mefulu mese meté me ne éban naa ô bele fakh (Mink 2:1-5). Jehôva a ne wô vole naa ô ñong minkighane mia ve ñe n’nem mbeng (Bya 23:2, 3).
DZIA 28 A Jehôva, za a ye wô bo mvuiñ ?
