AYEGHLE 2
DZIA 132 Abong di bi ntoo môr mboo
Aval beyôm be ne lere beyaa édzing ya ngang
« Mina beyôm, [. . .] vahane be ngang » (1 PIERRE 3:7).
É DZAM BIA YE YEN
Bia ye yen aval n’nôm a ne ve ngal ngang ngalane bifiè ye mimboane mièñ.
1. Amu akalgha évoo évé, Jehôva a nga ve bia das ye alukh ?
JEHÔVA a ne « é Nzame a ne mvom », éde a kômô naa, bia fe bi tobe mvom (1 Tim. 1:11). A nga ve bia abuiñ bedas ba ve naa, bi buan éning (Jacq. 1:17). Das évoo y’été, é ne alukh. Éyong fam ba minenga ba lughan, ba bo ngiagh naa, ba ye leran édzing, ngang, ye ve naa, bebèñ be ning a mvom été. A baghle élar té ngu’u, é ne so be, ña mevakh (Mink. 5:18).
2. Za aval abuiñ beyôm ba belane beyaa ému ?
2 Édi é ne éngôngoo é ne naa, abuiñ beyôm ye beyaa, baa tsini ki fe naa, ba leran édzing ya é ngang be nga kiagh mboo ye éñi mboo, é môs be nga lughan. Asughlan é ne naa, baa ning ki a mvom été. Mindzeng mizing beyem mam be ndaghe bo, mia lere naa, abuiñ beyôm ba yir beyaa, ba kobe be ye nget, nge ki a tsible be abuiñ meval mefe. N’nôm a bo de, a ne ñe lere ngang a bôr été, vedaa, é tsible ñe a nda. Abuiñ beyôm baa, ba daghe pornografía. Dzam té da ve naa, beyaa be wôrane naa, baa dzing ki be, ye ve fe naa, be tobe éwiñ.
3. Amu dzé beyôm bézing ba tsible beyaa ?
3 Dzé da likh naa, beyôm bézing be belane beyaa abé ? É ne bo amu naa, be nga vem é nda bôr ésaa a mbe nget, éde ba tem naa, a tsible môr déé se ki abé. Éba bevoo ba tsible beyaa amu éñe befam ba belane beyaa aval té é vôm be nga vem. Be ne wôrane naa, éñe ba yiène belane beyaa aval té, naa be yem ye wôrane naa ébe ba dang ngu’u ye be. Befam bevoo ki, béé dzi ki be yeghle naa be yem djié é mam ba wôran nge ki ôlun wôba. Befam bézing be ne mban a yen pornografía. Dzam té é ne be ve naa be yen binenga ye nkehane binong aval daa yiène ki. Ya fe naa, abuiñ beyem mam be nga yen naa, é tam môra ôkoan COVID-19, abuiñ beyôm be nga sum tsible beyaa. É dzam é ne bebela é ne naa, a bo akalgha ésese é ne bo, n’nôm aa yiène ki vaghle tsible ngal môs ézing.
4. Za dzam beyôm be ne bekristen ba yiène tobe de nkee, amu dzé ki ?
4 Beyôm be ne bekristen ba yiène tobe nkee naa, be taa yen binenga aval é ne kaa yiène a. Amu dzé ? Akalgha évoo y’été é ne naa, aval môr a tem éde da ve ñe naa, a bo mam ngura aval. Ntôô Pablo a nga bame bekristen be ne minwoane mboan be ya Roma naa, be « sim naa ba likh naa émo éde é tsen » bo (Bero. 12:1, 2). Éyong Pablo a nga tsili Beromanos, a kuane naa, abuiñ ye été, be ntoo bekristen ayap. Ve, bifiè Pablo bi nga lere naa, a kuane naa, abuiñ ye été, é ngene da bo mam, ye siman ane émo. Ya dzam té, éde a nga saghe be naa, be tsen ôtemgha ye mboane wôba. Melepgha meté ma daghe fe beyôm be ne bekristen ému. Éngôngoo dzam é ne naa, bevoo be y’été, be va likh naa ôtemgha y’émo ô tsen be, ye ve naa be tsible beyaa b. Za aval Jehôva a kômô naa, n’nôm a belane ngal ? Bia yen éyalane ye nsili té éfus é ne nlô adzô ye ayeghle di.
5. Aval bia lang de nten 1 Pierre 3:7, za aval n’nôm a yiène belane ngal ?
5 (A lang 1 Pierre 3:7). Jehôva a saghe beyôm naa be bere beyaa ôyô. É môr bia ve ngang éñe bia bere ôyô. N’nôm a ve ngal ngang, a ye belane ñe ya mbemba n’nem ya fe édzing. Ayeghle di été, bia ye yen aval n’nôm a ne lere ngal naa a bere ñe ôyô. Ve ôsusua, bia zu yen aval abo-dulu da sili binenga ôsi.
Ô TAA BELE ABO-DULU DA SILI ÑU NGAL ÔSI
6. Za dzam Jehôva a wôran nfa befam ba tsible beyaa ? (Becolossien 3:19).
6 N’nôm aa yiène ki bo nget ya ngal. Jehôva a fem é môr ase a ne nget (Bya 11:5). Jehôva a tugha dzô naa, aa ve ki n’nôm a tsible ngal ayebe dèñ (Mal. 2:16 ; a lang Becolossien 3:19). Aval ane bia yen de nten ye nlô-adzô waa, 1 Pierre 3:7, nge n’nôm ézing a ne kaa yem belane ngal, dzam té da ye name élar dèñ ye Nzame. Jehôva a ne bo kaa bèè amben meyaghlane mèñ.
7. Aval bia lang de nten Beéphésien 4:31, 32, za aval nkobe beyôm ba yiène saalé ? (A daghe fe « Ayilgha éfiè »).
7 N’nôm aa yiène ki yèè ngal nge ki a belane bifiè bi ne nget éyong a kobe ye ñe. Beyôm bézing ba tsible beyaa bé kobe be ye abuiñ ôlun, nge ki, bé dzô be é mam ma bira be dzughu a n’nem. Vedaa, Jehôva a fem « ôlun, meyaa, zogho, ye mbia nkobe c » (a lang Beéphésien 4:31, 32). A wokh mam mese. Jehôva a bis aval n’nôm a kobe ngal, amben éyong be ne étam é nda dzeba. N’nôm a belane mbimbia bifiè éyong a kobe ngal, aa ndamane ki fave alukh dèñ, a ndamane fe angom dèñ ye Nzame (Jacq. 1:26).
8. Za dzam Jehôva a wôran nfa pornografía, amu dzé ki ?
8 A daghe pornografía. Za dzam Jehôva a wôran nfa pornografía ? A fem ñe. Ya dzam té, n’nôm a daghe bivaghle bi ne mvin, a ndaman élar dèñ ye Jehôva ye fe édi ba ngal d. Jehôva a yane naa, n’nôm a tsini naa a tobe sôsôe ya ngal se ki fave mimboan, ve, ya fe metemgha mèñ été. Yésu a nga dzô naa, é fam da daghe minenga nfe ye nkôman ye a ke binong ya ñe, a bohang medzian « n’nem wèñ été e » (Mat. 5:28, 29).
9. Amu dzé Jehôva a fem éyong n’nôm yemle ngal naa a bo é mam aa kômô ki éyong ba ke binong ?
9 N’nôm aa yiène ki yemle ngal naa a bo é mam aa kômô ki éyong ba ke binong. Beyôm bézing ba yemle beyaa naa, be bo é mam baa kômô ki éyong ba ke binong ye be. Mam meté ma ve naa, beyaa be wôrane naa be ne mvin nge ki naa, baa dzing ki be. Jehôva a fem mboane wa lere naa, môr a siman fave émién, ye naa, aa bis ki é môr mboo. A yane naa, n’nôm a dzing ye ñeghle ngal, ye lere fe naa, a kang awôrane dèñ (Beéph. 5:28, 29). Za dzam bi ne dzô nfa n’nôm a ne kristen a ngen a sili ngal ôsi, a tsible ñe, nge ki a yen pornografía ? Za aval a ne tsen ôtemgha wèñ ye mimboane mièñ ?
AVAL N’NÔM A NE LIKH ABO-DULU DA SILI NGAL ÔSI
10. Za aval beyôm be ne ñong abuan ya éfônane Yésu ?
10 Za dzam é ne vole n’nôm naa, a likh abo-dulu da sili ngal ôsi nge ki, da dzughu ñe ? A ne dzeng naa a vu Yésu. Amben éé dzi ki lughane môs ézing, aval Yésu a nga belane beyeghe bèñ, é ne mbemba éfônan ye aval n’nôm a yiène belane ngal (Beéph. 5:25). Éfônan, n’yeneghan ayeghle beyôm be ne ñong ya aval Yésu a nga belane mintôô mièñ, ye aval a nga kobe be.
11. Za aval Yésu a nga belane mintôô mièñ ?
11 Yésu a nga belane mintôô mièñ ya mbemba n’nem ye lere fe be ngang. Éé dzi ki vaghle bo nget môs ézing. Amben a mbe é dang be ngu’u, éé dzi ki vaghle belan é ngu’u dèñ naa, beyeghe bèñ be wôrane naa, be ne atekh nge ki naa, be ko ñe wong. Ndaane de, a nga sèhane be ya asili ñuu (Jean 13:12-17). A nga dzô beyeghe bèñ naa : « Ñonghan ayeghle ébe ma, amu me ne évuvuèñ, ye asili ñuu a n’nem été, ye naa, mia ye bele afôlô akal mina bebién » (Mat. 11:28-30). Baghlane naa, Yésu a mbe é môr a ne évuvuèñ. É môr a ne évuvuèñ éé se ki atekh. Ndaane de, a bele é ngu’u da ve naa, a djié émién. Éyong ba song ñe, a tobe mvoa ye djié awôrane dèñ.
12. Za aval Yésu a mbe é kobe é bôr bevoo ?
12 Yésu a mbe é belane bifiè bièñ naa, a fôlô ye saghe é bôr bevoo. Éé dzi ki vaghle belane bifiè bi ne nget éyong a mbe é kobe beyeghe bèñ (Luc 8:47, 48). Amben éyong é bôr be mbe be tele ñe é ngam ayat be nga ta ye song ñe, « éé dzi ki be bulan ata » (1 Pierre 2:21-23). Biyong bizing, Yésu a mbe é top naa a si évôô, ndaane naa a yalane ya nget (Mat. 27:12-14). Za mbemba éfônan akal beyôm be ne bekristen !
13. Aval ane nten Matthieu 19:4-6 wa lere de, za aval n’nôm a ne « bo élar ye ngal » ? (A daghe fe évaghle).
13 Yésu a nga dzô beyôm naa, be ke ôsu ye tobe sôsôe ya beyaa beba. É baalé bifiè Ésaa, a nga dzô naa, n’nôm a yiène « bo élar ye ngal » (a lang Matthieu 19:4-6). Éfiè griego « a lar ye » ba belane de éfus té, da yili naa « a lar nsama ». Ya dzam té, élar é ne ézang n’nôm ye ngal da yiène bo ngu’u ane be ne nlarane nsama. Nge môr ézing y’été a bo é dzam da dzughu é môr mboo, bebèñ bese ba ye dzukh. N’nôm a bele aval élar té ya ngal, aa ye ki yen pornografía meval mese. A ye vaa é mis mèñ étéñ té ébiéñ ébe « a daghe é dzam ése éé se ki éban » (Bya 119:37). Ane Job, a bele nkôman ô ne ngu’u naa, aa ye ki vaghle daghe minenga nfe ye nkôman ya ke binong ye ñe (Job 31:1).
N’nôm a ne sôsôe, a tep naa a daghe pornografía (A daghe éfaghle 13). g
14. Mam mevé n’nôm a tsible ngal a yiène bo nfa ye naa, a kôm élar dèñ ye Jehôva ye fe élar dèñ ya ngal ?
14 N’nôm a tsible ngal mimboan ye fe nkobe, a yiène bo mam mézing nfa ye naa, a kôm élar dèñ ye Jehôva ya fe élar dèñ ya ngal. Za mam a yiène bo ? Ôsusua, a yiène yebe naa, é dzam a bo é ne abé. Dzam ézing déé shuale ki é mis Jehôva (Bya 44:21 ; Eccl. 12:14 ; Behéb. 4:13). Édi bèè, a yiène tele naa a tsible ngal ye tsen abo-dulu dèñ (Mink. 28:13). Édi lal, a yiène yebe naa a va bo ngal ye Jehôva abé, éyong té a dzaa be bidjiigha ye n’nem ôsese (Bisè mintôl 3:19). A yiène fe dzaa Jehôva naa, a ve ñe ébe étéñ daa, nkôman ye naa a tsen, ye fe avole nfa ye naa a djié mesiman, nkobe ye mimboane mièñ (Bya 51:10-12 ; 2 Becor. 10:5 ; Beph. 2:13). Édi nii, a yiène bo é mam ma vaghane ye meyaghlane mèñ, é yeghe a fem nget meval mese ye mbia nkobe (Bya 97:10). Édi tan, avôô-avôô, a dzeng avole da so ébe mindzidzing bebaghle mintôma be y’ékôan (Jacq. 5:14-16). Édi saman, a dzeng naa a bele ntaane mam wa ye ñe vole naa, a taa bera bele aval mbia abo-dulu té melu ma zu. N’nôm a daghe pornografía, ñe a fe, a yiène béé bitéñ bité. Jehôva a ye boran mengu’u mèñ nfa ye naa, a tsen mbia abo-dulu dèñ (Bya 37:5). Vedaa, n’nôm aa yiène ki sughu fave naa a tep abo-dulu da sili ngal ôsi. A yiène fe yeghe a bere ngal ôyô. Za aval a ne de bo ?
AVAL N’NÔM A NE BERE NGAL ÔYÔ
15. Za aval n’nôm a ne lere ngal édzing ?
15 Lere ñe naa wa dzing ñe. É bobedzang bézing be ne mvom melukh meba été, ba bo ngura dzam kada môs, nfa ya lere beyaa nté mbé ba dzing be (1 Jean 3:18). N’nôm a ne lere ngal édzing ya amemam ane, a biñ ñe énam, a wubane ñe ya édzing nge ki a bane ñe naa be ke dzi vôm ézing. A ne ñe lôm mensaje é dzô ñe naa, « ma bira dzing me tèè wa » nge ki, « ye ô ne mvoa ? » A ne fe ñe tsili moan édzango, é vôm a kare ñe nté mbé a dzing ñe. Éyong n’nôm a bo mam meté, a bere ngal ôyô, a wône fe alukh deba.
16. Amu dzé n’nôm a yiène dzô ngal é mam a dzing a yen ébe ñe ?
16 Dzôghe ñe naa, a ne tang nden é mis muè. N’nôm a bere ngal ôyô, a kare ñe amu dzé a yen ñe tang nden, ye ve ñe naa a wôrane émién mvèñ. Aval évoo a ne de bo, a ne éyong a simane naa a lere ngal naa, a yem mbeng akal é mam mesese a bo naa a sukh ñe asi (Becol. 3:15). Éyong n’nôm a dzô ngal é mam a dzing a yen ébe ñe, ngal a wôrane naa, n’nôm a dzing ñe, a kame ñe, ye naa, a bere ñe ôyô (Mink. 31:28).
17. Za aval n’nôm a ne lere ngal ngang ?
17 Boghe mbemba n’nem ye lere ngang. N’nôm a dzing ngal a lere ñe naa, a ne éban, a ñeghle fe ñe. A lere ñe naa, a ne é das é ne tang nden da so ñe ébe Jehôva (Mink. 18:22 ; 31:10). Dzam té da ve naa, a belane ñe ya mbemba n’nem ye fe ngang, amben éyong ba ke binong. Aa ye ki ñe yemle naa, a bo é dzam da ve naa, a taa wôrane émién mvèñ, a wôrane naa ba tsible ñe, nge ki naa, é dzidzii wèñ a ndaghle ñe éyong ba ke binong f. Nfa wèñ, n’nôm a ye fe ve mengu’u naa a bele é dzidzii a ne nfuban asu Jehôva (Bisè mintôl 24:16).
18. Za dzam beyôm ba yiène bele nkôman ô ne ngu’u naa ba bo ? (A daghe fe nkaalé « Mam menii naa ô bo n’nôm a ne ngang »).
18 A beyôm, mi ne tobe ndzi-n’nem naa, Jehôva a dzing ye yen mengu’u mia ve minfa misese mi ye bining bienan naa, mi lere beyaa benan ngang. Beleghane nkôman ô ne ngu’u naa, mia bere beyaa benan ôyô, mi saalé abo-dulu da sili be ôsi, mi kobe be ya mbemba bifiè, ngang, ye lere be édzing. Éyong mia bo de, mia lere naa, mia dzing be, ye naa, be ne éban. Bereghe ñu ngal ôyô, aval té éde wa ye kame élar da dang wa éban ; angom duè ye Jehôva (Bya 25:14).
DZIA 131 « É dzôm Nzame a nga lat »
a Beyôm ba ye ñong abuan bé lang nlô adzô « Ye mia ñong binenga aval Jehôva a ñong be ? » Ô momo, Ngoan ôsua ye mbu 2024.
b Nge ñu n’nôm nge ki ñu ngal a tsible wa, ô ne ñong abuan wé lang nlô adzô « Ayuda para las víctimas de la violencia dómestica nge ki De l’aide pour les victimes de violence conjugale » ye nsama minlô medzô « Otros temas nge ki Divers », a nden waa jw.org ye fe a JW Library®.
c AYILGHA ÉFIÈ : « Mbia nkobe » a daghe, a belane bifiè bi ne nget ane meta, ébi bia ve môr naa, a wôrane naa a ne zeze dzôm. Da daghe fe, a dzô môr éyong ése, é dzam ô ne kaa dzing wa yen ébe ñe. Éde, é dzam ésese n’nôm a dzô ngal nfa ya dzughu ñe nge ki naa, a ta ñe, é ne mbia nkobe.
d A daghe a nden jw.org, ye JW Library nlô-adzô « La pornografía puede destruir su matrimonio nge ki La pornographie peut briser votre couple. »
e É minenga n’nôm a daghe pornografía a ne bele avole, é lang nlô adzô « Éyong é môt mia ñe mi ne nlughan a daghe pornografía nge ki pornographie » Ô momo, Ngoan muom ye mbu 2023.
f Biblia aa dzô ki é dzam é ne mbeng nge ki abé éyong n’nôm ba ngal ba ke binong. Minlughan bekristen misese, mia yiène ñong minkighane mia lere naa, mi bele nkôman ô ne ngu’u naa mi ve Jehôva ôlughu, mi bo é dzam da tobe kada môr y’ébe mvèñ, ye baghle é dzidzii wôba nfuban. É dzam é ne été é ne naa, minlughan miaa yiène ki kobe ya é bôr bevoo, mam me ye alukh deba ma daghe nkehane binong.
g AYILGHA FÔRÔ: É bôr béé se ki boan Bengaa Jehôva, bé sèñ vôm mboo ye moadzang ézing, ba dzeng naa a daghe abakh pornografía.
