AYEGHLE 4
DZIA 18 Akiba akal ntang
Za dzam ntang wa yeghle bia ?
« Aval di, éde édzing Nzame é nga lereban » (1 JEAN 4:9).
É DZAM BIA YE YEN
Bia ye yen é dzam ntang wa yeghle bia ébe é mbemba mefulu Nzame, ye Yésu Krist.
1. Za biborane bia ñong éyong bia tobe Ésesang ôsiman awu Yésu Krist kada mbu ?
JEHÔVA a nga ve bia é das é ne tang nden, éyong a nga lôm Ndôma dzèñ naa é zu wu akal boan be-bôt ! (2 Becor. 9:15). Amu Yésu a nga ve éning moan môt dèñ ane atunegha, éde ô ne bele élar é ne ngu’u ye Jehôva Nzame. Ô ne fe bele ngiagh ye éning é ne mbèmbèè. Bi bele abuiñ mekalgha ye a ve Jehôva akiba, Éñe, é môr a nga ve ntang, amu a bira bia dzing ! (Bero. 5:8). Nfa ye a vole bia naa, bi tsini naa, bia yem mbeng té, ye naa, bi taa vaghle vuèn é dzam Jehôva ba Yésu be nga bo akal dèè, éde Yésu a saghe bia naa, bi tobe ésesang ôsiman awu dèñ, kada mbu (Luc 22:19, 20).
2. Za dzam bia ye yen ayeghle di été ?
2 Mbu wi, Ésesang ôsiman awu Yésu da ye boban, sono alu saman, é too alu 12 ye Ngoan nii, ye mbu 2025. Kaa bisô naa, bia besese bia kômane naa, bi tobe ésesang té. Da ye bo mbeng naa, kada môr ye be bia, a ñong tam, besono kaa naa ésesang té é kuiñ, ye besono ba berane Ésesang ôsiman awu Yésu, naa a tugha fas, é dzam Jehôva ba Yésu, é Moan wèñ, be nga bo akal dèè a. Ayeghle di été, bia ye yen é dzam ntang wa yeghle bia, nfa Jehôva ya Ndôma dzèñ. Ayeghle da zu, da ye bia vole a wokh, abuan bi ne ñong ébe ntang, ye aval bi ne lere naa bia yem mbeng akal ntang.
É DZAM NTANG WA YEGHLE BIA NFA JEHÔVA
3. Amu dzé boan be-bôr be ne bo fili nfa nsem ye awu, étom awu môr mboo ? (A daghe fe évaghle).
3 Ntang wa yeghle bia é sôsôe Jehôva (Deut. 32:4). Aval avé ? N’yeneghan é dzam di : Éyong Adán a nga bo Nzame melo, éde a nga venghane moan môr a minsem, ye ane a nga wu. Amu bi ne é boan bèñ, éde bia fe bia bo minsem ye wu (Bero. 5:12). Nfa ye naa, bi tobe fili ébe nsem ye awu, éde Jehôva a nga lôm Yésu naa a zu ve ntang. Ve, aval avé awu é moan môr mboo a ne kaa nsem é mbe kôre bakuru be-bôt ébe nsem ye awu ? Ntôô Pablo a lere naa : « Aval ane melo moan môr mboo [Adán] me nga ve naa, abuiñ bôr é bo bebo-minsem, aval dèè fe, éde mewokh môr mboo [Yésu] ma ye ve naa, abuiñ bôr é bo besôsôe » (Bero. 5:19 ; 1 Tim. 2:6). Nge bi ne dzô aval éfe, étom mimboane môr mboo a mbe kaa nsem, ve, a too melo, éde bi nga bo minkôm nsem ye awu. Nfa mboo, moan môr mboo a ne kaa nsem, ve a too mewokh, éñe a mbe ve naa, bi tobe nkôran.
Étom moan môr mboo, Adán, bia besese bia bo minsem ye wu. Ngalane moan môr nfe, Yésu, bi ne tobe nkôrane nsem ye awu (A daghe éfaghle 3).
4. Amu dzé Jehôva éé dzi likh naa, é boan Adán ba bo ñe mewokh be ning mbèmbèè ?
4 Ye Jehôva a nga lôm faa Yésu a si va naa a zu wu akal dèè ? Ye Jehôva éé mbe ki sia kikh naa, é boan Adán be ning mbèmbèè a si va ? Amu naa, bi ne bôr a minsem, bi ne tem naa, nkighane té éwô ô nga ye dang bo mbeng nfa ye a kôm ntsiè té. Ve, ébe Jehôva, déé nga ye ki bo sôsôe naa a bo de. Amu é mbe bo ane Adán éé dzi ki vaghle bo mbia nsem, ye naa, é boan bèñ béé se ki bebo-minsem. Vedèè, déé mbe ki bebela.
5. Amu dzé bi ne bele ndzi-n’nem naa, Jehôva a ye bo é dzam é ne sôsôe éyong ésese ?
5 Za dzam é nga ye boban, nge Jehôva éé dzi ki ve ntang, ve, kaa dzale é sôsôe dèñ, é likh naa bendôma ye bengoan Adán be mbe bebo-minsem be ning mbèmbèè ? Bôr be mbe simane naa, Jehôva aa ye ki bo sôsôe ébe minfa mife. Éfônan, be mbe simane naa, a ne bo kaa dzale mengiagh mèñ mézing a nga bo. Ve, biaa yiène ki bele meyep naa, aval dzam té é ne boban. Bebela a ne naa, Jehôva a nga bo é dzam é ne sôsôe, amben dzam té é nga sili naa a yaane tang nden. Bia dzô vèè, a ve é Moan wèñ a bira dzing ane atunegha. Ye mboane té, a nga ban bia naa, a ye bo é dzam é ne sôsôe éyong ésese.
6. Aval avé ntang wa lere édzing Jehôva ? (1 Jean 4:9, 10).
6 Ntang wa vole bia a wokh naa, Jehôva a ne é Nzame a ne sôsôe. Vedèè, é fulu éfe é nga dang tsini Jehôva naa a ve é Moan wèñ ane ntang é ne édzing (Jean 3:16 ; a lang 1 Jean 4:9, 10). Ayeghle da tsinane ntang da lere naa, Jehôva, aa kômô ki fave naa, bi bele éning é ne mbèmbèè, ve, a kômô fe naa, bi bo bôr be ye é nda-bôr dzèñ. Ntamane fas é dzam di : Éyong Adán a nga bo nsem, éé mbe ki fe bo môr mboo ye é nda-bôr Jehôva. Asughlan, bia fe, bii mbe ki fe bo bôr be ye é nda-bôr Jehôva. Vedaa, ngalane ntang, Jehôva a djii minsem mia, ye naa, a ye sughlane ve naa, é bôr besese ba bo ñe mewokh, ye lere mebun ébe ñe, be bera bo bôr be ye é nda-bôr dzèñ. Ému fe, bi ne bele élar é ne ngu’u ye Jehôva, ve, ye fe ya é bôr bia be-be bia kang ñe. Bebela, Jehôva a bira bia dzing ! (Bero. 5:10, 11).
7. Yésu a nga bira dzukh naa a yaane ntang. Za ayeghle dzam té da ve bia nfa édzing Jehôva a bele akal dèè ?
7 Bi ne tugha wokh nté mbé Jehôva a dzing bia, nge bia tugha fas é dzam ntang ô nga sili ñe. Satan a ban naa, mbo ésèñ Nzame ézing aa ye ki tsini naa a tobe ñe sôsôe, éyong é ne ñe ndzukh naa, a bo de. Nfa ya lere naa Satan a bo minèè, Jehôva a nga likh naa, Yésu a dzukh kaa naa a wu (Job 2:1-5 ; 1 Pierre 2:21). Jehôva a nga yen ane bôr be mbe bé pogho Yésu, ane bizima bi nga yir ñe, ye ane be nga kele ñe nkum. Éyong té, Jehôva a nga yen ane é Moan wèñ a wu, é bira wokh mintéñ (Mat. 27:28-31, 39). Jehôva a mbe ve naa, dzam té é taa boban. Éyong minzizing mièñ mi nga dzô naa : « Abong di, [Nzame] a kôreghe ñe nge a kômô de. » Dzam té éde faa Jehôva a mbe bo (Mat. 27:42, 43). Ve, nge a bo naa, Jehôva a nga ve naa dzam té é taa boban, nge béé dzi ki yaane ntang, bia, bi kaa ki bele ôyane. Dzam té éde é nga ve naa, Jehôva a likh naa, é Moan wèñ a bira dzukh ya ke kuiñ ane a nga wu.
8. Ye Jehôva a nga bira wokh n’nem mintéñ, éyong a nga yen ane é Moan wèñ a dzukh ? Vakh ayilgha. (A daghe fe évaghle).
8 Bi taa tem naa, amu Jehôva a ne mengu’u mese, éde aa wôrane ki mam ! Bi ne mboan éfônane dèñ, mvelan aval da ve naa, bia wôrane mam. Éde da yili naa, Jehôva é môr a nga vele bia, a wôrane fe mam. Biblia a lere naa a « dzukh » ye « bo éwiñ » (Bya 78:40, 41). Ntamane ñong éfônan Abrahán ye Isaac. Ke wa simane naa, Jehôva a nga dzô Abrahán naa, a ve ndôma dzèñ ane atunegha, nga ! (Atar. 22:9-12 ; Behéb. 11:17-19). Tamane siman é mam mesese Abrahán a nga wôran, nté a mbe é kômane naa, a wiñ é moan wèñ Isaac ya ôkeng. Éde, tamane simane nté mbé, ye abim avé dzam té é nga ve Jehôva n’nem mintéñ, éyong a nga yen ane bôr ba tsible Ndôma dzèñ, ye wiñ ñe ! A daghe a nden jw.org éngengeng, Vughane mebun meba—Abraham, Étun 2.
Jehôva a nga wokh édedèè mintéñ, éyong a nga yen ane Ndôma dzèñ da dzukh (A daghe éfaghle 8).
9. Za dzam ô ne yeghe ébe nten Beromain 8:32, 38, 39 nfa édzing Jehôva a bele akal duè, ye é bôr bevoo ba sèhane ñe ?
9 Ntang wa yeghle bia naa, môr ézing aa dzing ki bia a dang Jehôva. Da daghe fe bebyèñ baa, nge ki faa angom dèè bia bira dzing (a lang Beromain 8:32, 38, 39). Bi ne bele mebun naa, Jehôva a dzing bia a lôr bia bebién. Ye wa kômô ning mbèmbèè ? Jehôva éñe a dang de kômô ye wa. Ye wa kômô yen minsem muè mi too ndjiane ? Abim wa kômô de, da dang ki abim Jehôva a kômô mi dzame. É dzam étam a sili bia é ne naa, bi yebe é mbemba das a nga ve bia, bi lere mebun ébe ntang ye bo mewokh. Ntang ô ne é das é ne tang nden da tugha lere é môra édzing Jehôva a bele akal dèè. Nféféñ éning da zu, bia ye tugha bera yeghe abuiñ mam mefe nfa édzing Jehôva (Eccl. 3:11).
É DZAM NTANG WA YEGHLE BIA NFA YÉSU
10. (a) Amu dzé Yésu a nga yep a n’nem akal awu dèñ ? (b) Za dzam awu Yésu é nga lere ? (A daghe fe nkaale, « Atunegha Yésu é nga lere naa Jehôva a ne sôsôe »).
10 Yésu a bira bis é dzam bôr ba tem nfa Ésaa (Jean 14:31). Yésu a mbe édedèè éwiñ éyong a mbe é siman aval ba ye ñe bôre naa, a va tè Ésaa ye aval dzam té é mbe ve naa, éyôla Ésaa é bo mvin. Ya dzam té, éde a nga yaghlane naa : « A Tat, nge é ne boban, dzam té é keng ôyap ye ma » (Mat. 26:39). Éyong a nga tobe sôsôe ya Jehôva ya ke kuiñ awu, Yésu a nga lere ya ngu’u naa, bibôra Satan a nga dzô nfa Ésaa, bi mbe minèè.
11. Aval avé Yésu a nga lere é môra édzing a bele akal boan be-bôr ? (Jean 13:1).
11 Ntang wa yeghle fe bia naa, Yésu a bira bis boan be-bôr, dang-dang beyeghe bèñ (Mink. 8:31 ; a lang Jean 13:1). Éfônan, Yésu a nga yem naa, mam mézing ma tsinan ésèñ minkanghle a nga zu bo a si va, ma ye bo édedèè ndzukh, dang-dang naa a nga ye bele awu é ne mintéñ. Ve, Yésu a nga bo mam meté mesese me fiang bo ndzukh. Se ki fave amu a mbe é bo é dzam Jehôva a nga dzô ñe naa a bo, ve, amu a mbe é dzing boan be-bôt. Ndaane de, Yésu a nga lere édzing akal boan be-bôr, é kanghle be, é yeghle be, ye vole be. Amben alu kaa naa a wu, Yésu a nga ñong tam naa, a sôp mebo mintôô mièñ, ye kobe be abuiñ bifiè bi nga ye be fôlô, ye ve fe be melepgha (Jean 13:12-15). Éde, amben a mbe é dzukh éyong a mbe kele nkum, ye naa, a kuane naa a nga zuhang wu, Yésu a nga ve mbia môr a mbe kele ñe nfeng ôyane, é dzô ñe naa, a ye bo ba ñe ô paraíso (Luc 23:42, 43 ; Jean 19:26, 27). A lere-lere fe naa, a simane ñia, éyong a nga sili Jean naa, a lighe a kale ñe. Aval té, é môra édzing Yésu a nga lereban se ki fave ye awu dèñ, ve ye fe, ébe éning ésese dèñ a si va.
12. Za dzam Yésu a tsini naa a bo akal dèè ému ?
12 É ne bebela naa, Yésu a nga wu « éyong dèè », ve, a tsini naa a bo mam akal dèè (Bero. 6:10). Aval avé ? A ngen a tsini naa a sèñ ngu’u, naa, a ve bia abuiñ mbemba be-mam bi ne bele éndagha amu ntang. Ntamane yen é mam a bo éndagha. A ne é Kéza wèè, é Fara-n’nen wèè, ye Ndjié y’ékôan (1 Becor. 15:25 ; Beéph. 5:23 ; Behéb. 2:17). A bele ayem naa a kôane minwoane mboan ye fe môra nsama bôt. Ésèñ da ye man, kaa naa bitsible binen bi man b (Mat. 25:32 ; Marc 13:27). A ve fe naa, besôsôe bebo-bisèñ bèñ, be tugha yem dzi nfa ya nsisim melu me ye asughlane ma (Mat. 24:45). Ye fe naa, é tam Toyini a mimbu a ye djié, a ye tsini naa a bo mbemba be-mam akal dèè. Yésu a nga ve faa éning dèñ akal dèè. Jehôva a nga ve faa é Moan wèñ akal dèè.
KENG ÔSU NAA WA YEGHE MINFÉFÉÑ MI-MAM
13. Aval avé a binan, é ne bia vole a tsini naa bia yeghe mam nfa édzing Nzame ye Krist be bele akal dèè ?
13 Ô ne tsini naa, wa yeghe abuiñ mam nfa édzing Jehôva Nzame ye édi Yésu Krist be bele akal dèè, nge wa tsini naa wa binane nfa té. Ngeng ézing, é tam bia kôman Ésesang ôsiman awu dèñ, ô ne tugha lang Evangelio évoo, nge ki abuiñ. Ô taa dzeng naa wa lang abuiñ mebong éyong dèè. Ndaane de, keng ôtetekh, wé dzeng mekalgha mefe bi bele naa, bi dzing Jehôva ba Yésu. Édi da bera dang éban, kabeghe é mam wa yeghe ya é bôr bevoo, meval mesese.
14. Aval ane bia lang de nten Bya 119:97 ye atoan, aval avé a bo mindzeng da vole bia, a tsini naa bia yeghe mam nfa ntang, ye nfa abuiñ meyeghle mefe ? (A daghe fe évaghle).
14 Nge ave ô ñii a bebela été é nto abuiñ mimbu, éyong ézing ô ne sili nge ô ne bera yeghe minféféñ mi-mam nfa, é sôsôe Nzame, édzing dèñ, ye fe ntang. Bebela a ne naa, biaa ye ki sim naa, bia yeghe abuiñ mam nfa minlô-medzô mité ye fe mife. Éde, za dzam ô ne bo ? Tugha buan é mam wa yen mebakh mèè été. Éyong wa yen éfus waa tugha ki wokh, boghe mindzeng nfa té. Éyong té, nté sese môs wa ye ke wa lôt, dzeng naa, ô binan ébe é mam ô va yen, ye é dzam mam meté ma yeghle wa nfa Jehôva, é Moan wèñ ye fe édzing deba akal duè (a lang Bya 119:97 ye atoan).
Amben bi tobeyang a bebela été tang abuiñ mimbu, bi ne bera yeghe minféféñ mi-mam nfa ntang, ma ye ve naa, bi bira ve Jehôva ba Yésu, akiba akal é dzam be nga bo (A daghe éfaghle 14).
15. Amu dzé é ne éban naa, bi tsini naa bia yeghe minféféñ mi-mam a Biblia été ?
15 Ô taa sili mo ôsi nge waa yen ki nféféñ dzam ézing éyong ésese wa lang Biblia nge ki a bo mindzeng. Bi ne dzô naa, ô ne ane é môr a dzeng kông. Ya ôdzibi, é bôr ba dzeng kông, ba lôr abuiñ mewala nge ki môs, kaa naa ba yen moan éfus kông dèè-dèè. Ve, ba ke ôsu amu é moan éfus kông ba ye yen, a ne tang nden akal deba. Minféféñ mi-mam bia yen a Biblia été, mia lôr kông tang nden ! (Bya 119:127 ; Mink. 8:10). Éde, boghe ôdzibi ye kang mewala ô va kikh naa, wa lang Biblia (Bya 1:2).
16. Aval avé bi ne vu Jehôva ba Yésu ?
16 Nté wa yeghe, dzenghe naa, ô dzale é mam ô va yeghe. Éfônan, vughe é sôsôe Jehôva, wé belan a bôr kaa bo ôbangam. Vughe édzing Yésu a bele akal Ésaa ya é bôr bevoo, wé tobe nkoghane naa, wa dzukh akal éyôla Jehôva, ye ve mengu’u mesese muè naa, wa sèhane é bobeñong be ne bekristen. Vughe fe Yésu, wé kanghle é bôr bevoo, nfa ye naa baa fe, be bele maa ya yebe, é mbemba das Jehôva a nga ve bia.
17. Za dzam bia ye yen ayeghle da zu ?
17 Nge bi tsini naa bia yeghe abuiñ mam nfa ntang, bia ye bira dzing Jehôva ba Yésu. Nfa wôba ki, ba fe, ba ye veme édzing deba akal dèè (Jean 14:21 ; Jacq. 4:8). Ya dzam té, ntsinighane naa, bia yem baghle é biôm bisese Jehôva a ve bia, nfa ya tsini naa bia yeghe mam nfa ntang. Ayeghle da zu, bia ye yen meval mézing bi ne buane ntang, ye lere naa bia yem mbeng akal édzing Jehôva.
DZIA 107 Bia yiène vu édzing Nzame
a AYILGHA ÉFIÈ : A « binan » da yili naa, a bem ôsiman ébe nlô-adzô ézing, ye tugha wô fas.
b Akôane « biôm a dzôp été » Pablo a tu nten Beéphésien 1:10, da selan ya akôane « mintopban » Yésu a tu nten Matthieu 24:31 ye Marc 13:27. Pablo a kobe adzô éyong Jehôva a top bendôma be ya nsisim bèñ é waa be mboan ngalane nfufup nsisim wèñ. Yésu, ñe a kobe adzô, éyong ba ye kôan a dzôp été, minwoane mboan mi ligheyang a si va, é tam bitsible binen.
