Ntôo Pablo a nga tsili Timothée, éñi a mbe fe mvene ane émièn, é dzô ñe naa : « Ma ve wô atsing asu Nzame ye Krist Yésu, ye fe asu mintopbane bangele, naa ô béé melepgha ma, kaa tare kikh môr nsang nge ki, a bo ôbangam » (1 Tim. 5:21).

Ôsusua, nfa ya vole bia a yem beza be ne bangele beté, bia ye yen é bangele bii se ki lang nsama té été. Bebela a ne naa, bangele beté, béé se ki bo ngap ye be 144 000. Éyong Pablo a nga tsili Timoteo, a ke kuane naa, awôme bekristen be ne minwoane mboan daa be ki sum. Tam té, a kuane naa, mintôô ye minwoane mboan mivoo, béé be ki venghane minsisim, éde béé mbe ki dzô naa ébe be ne « mintopbane bangele » (1 Becor. 15:50-54 ; 1 Beth. 4:13-17 ; 1 Jean 3:2).

Ya fe naa, « mintopbane bangele » béé mbe ki bo é bangele be nga bo Nzame melo, é tam Ndôn mendzim é nga boban. Bangele beté be nga top é ngam Satan ye venghane mbia minsisim, ye bo minzizing Yésu (Atar. 6:2 ; Luc 8:30, 31 ; 2 Pierre 2:4). Melu ma zu, a ye ba wua abismo nge ki abîme été, tang 1 000 mimbu, ye naa, ôsu vèè, a ye be mane wiñ nsama mboo ye Satan (Jude 6 ; Mel. 20:1-3, 10).

« Mintopbane bangele » Pablo a nga kobe be, be nga yiène bo éba be ne a dzôp été, be nga sukh « Nzame ye Krist Yésu », ba tu fe éfus té été.

Abuiñ bizukh bangele be ne besôsôe a dzôp été (Behéb. 12:22, 23). É ne bo naa, Jehôva éé dzi ki ve bangele besese naa be bo ésèñ évoo, éyong évoo (Mel. 14:17, 18). Éfônan, a nga lôm fave angele mboo naa a ke wiñ basirios 185 000 (2 Bed. 19:35). Ve, abuiñ bangele befe be ne bele ayem naa be « kôan é biôm bisese bia kole-ôbakh ye fe é bôt ngalane mimboane mieba, ba biane atsing ye tsirane be, Édjié [Yésu] atan » (Mat. 13:39-41). Bevoo bézing be ne « kôan é bôr a nga top » a dzôp été (Mat. 24:31). Éba bevoo ki, be ne nlômane naa, be ‘baghle bia mezen maa mese’ (Bya 91:11 ; Mat. 18:10 ; a vaghane ye Matthieu 4:11 ; Luc 22:43).

« Mintopbane bangele » ba tu nten 1 Timothée 5:21 be nga yiène bele ngura aval ayem da tsinan é mam ma daghe bikôan. Tam té, Pablo a nga ve melepgha nfa aval bemvene ba yiène dzale meyem meba, ye naa, bôr be ye ékôan, nfa wôba, baa, ba yiène lere bemvene ngang. Nfa mboo ki, bemvene ba yiène dzale meyem meba « kaa tare kikh môr mbia nsang nge ki, a bo ôbangam » ye naa, baa yiène ki ñong nkighane ézing nge ki a kikh nsang ézing avôô-avôô. Akalgha é ne édedaa éban bemvene ba yiène béé de melepgha Pablo a nga ve be, é mbe naa be mbe be tele « asu Nzame ye Krist Yésu, ye fe asu mintopbane bangele. » Dzam té é nga lere faa naa, be nga ve bangele bézing meyem ma daghe ékôan, ane, a kame de, a wulu ésèñ minkanghle, ye ke dzô Jehôva a mam ba yen (Mat. 18:10 ; Mel. 14:6).