Ye mi va tugha lang be Ô momo be ye mbu wi ? Yeneghane nge mi ne yalane minsili mi :

Za éfônane Jehôva a ve, nfa aval ba yiène ñong binenga ?

Jehôva éé se ki ôbangam ya binenga, aa dang ki dzing befam a lôr binenga. Nzame a bèè binenga, a bis awôrane deba, ye é mam me tsii be a n’nem. A tobe a be mebun nfa ya bo ésèñ dèñ (w24.01, p. 15-16).

Aval avé bi ne dzale nten Beéphésien 5:7, wa dzô naa : « Mi taa bo élat ye be » ?

Ntôô Pablo a nga bame bia naa, bi taa bo élat ye é bôr be ne ve naa é bo bia ndzukh naa, bi tsini naa bia sèhane Jehôva a sôsôe été. Dzam té da daghe é bôr bia be-be bi ne vôm mboo, ya fe éba bia be-be bia kobe ngalane metôbane me ya nden (w24.03, p. 22-23).

Za aval mefuèñ me ne minèè bia yiène bo me nkee ?

Bia yiène bo nkee y’aval minlang biaa yem ki nge me ne bebela nge ki kaa, memvuiñ mèè ma kane bia, becorreos eléctronicos nge ki b’email ba so ébe é bôr biaa yem ki, ye fe ébe baspóstatas ba bo ane ba kômô yem bebela (w24.04, p. 12).

Za dzam bia yem, ye naa, za dzam biaa yem ki, nfa aval Jehôva a ye kikh nsang kéza Salomón, éwi é bôr besese be nga wu a Sodoma ye Gomorra, ya fe éwi é bôr be nga wu é tam Ndôn mendzim ?

Bii se ki ban naa Jehôva a nga tsam be mbèmbèè nge ki kaa. Ve, bia yem naa, Nzame a yem mam mesese, ye naa a ne édedèè n’nem éngôngoo (w24.05, p. 3-4).

Éyong Biblia a dzô naa Nzame a ne « Akoa », da ban bia za dzam ? (Deut. 32:4)

Bi ne ke sobe ébe Jehôva. A ne é môr bi ne tobe ñe mebun, a dzale mengiagh mèñ éyong ésese. A ne kaa tsen, mefulu ye nsonghane wèñ, me ne kaa tsen (w24.06, p. 26-28).

Dzé é ne wô vole a vebane nféféñ ékôan ?

Yagbe ébe Jehôva, a ye wô vole aval a nga vole bebo-bisèñ bèñ be ye melu mvus. Ô taa dzeng naa ô vaghane mam me ye nféféñ ékôan ô ntoo, ye n’nôm ékôan duè. Dzenghe naa ô bo abuiñ mam ye bôr be ye nféféñ ékôan duè, ye dzeng naa ô bele minféféñ mengom (w24.07, p. 26-28).

Za meyeghle bia ñong ye bifônan bilal bia yen nten Matthieu abong 25 ?

Éfônane mintôma ye bikela da ngônô éban sôsôe ye tetele be bele. Éfônan bidun bingoan bi ne nkee ye ébi bi ne kaa éyii, bia lere naa bia yiène tobe nkoghane ye évévéñ. Éfônane betalentos ki, daa, da lere éban é ne naa môr a sèñ ngu’u ye yem a bo ésèñ (w24.09, p. 20-24).

É templo Salomon a mbe a bele za ntéñ ?

Nten 2 Milang 3:4, min’nôm mitsilane mizing mia lang naa, « becoudé 120 », da ve naa pórtico a bo ôyap yôp tang bemetros 53. Ve, mintsili mife mi ne éban mia dzô naa « becoudé 20 », da ve naa a bo ôyap yôp tang bemetros ébuu. É nomo bi va sughlane ve alé, éñe a yiène abim ébap minfin mi ye templo mi mbe (w24.10, p. 31).

Éfiè ‘n’nôm minenga mboo’ da yili za dzam akal amvene ? (1 Tim. 3:12)

Da yili naa a ne nlughane fave ye minenga mboo, ye naa aa yiène ki bo nsem évakh. Ya fe naa, aa yiène ki daghe binenga befe aval daa yiène ki (w24.11, p. 19).

Amu dzé bi nedzô naa, nten Jean 6:53 wéé mbe ki éfônan akal Ésesang ndziane Nti ?

Jean 6:53 a kobe adzô éban é ne naa be dzi nsôn wèñ ye ñu mekî mèñ. Yésu a nga kule bifiè bité mbu 32 ye melu mèè, a Galilea, akal Bejudíos be nga yi naa be ve mebun meba ébe ñe. Ve, Ésesang ndziane Nti é nga sum a Jerusalén mbu mboo ôsu vèè. E wéñ, Yésu a nga kobe ye éba ba ye djié ya ñe a dzôp été (w24.12, p. 10-11).