1-2. Dzé da ve naa bebo bisèñ Nzame be tobe a mvom été ? (Jacques 1:22-25)

 JEHÔVA baa ndzidzing Ndôma dzèñ, ba kômô naa bi tobe a mvom été. Ntsili Bya 119:2 a dzô naa : « Mvom ébe é bôr ba béé melepgha, ye dzeng ñe ye n’nem ôsese. » Yésu a nga ve fe é mbemba ngiagh ñi, é dzô naa : « Mvom ébe é bôr ba wokh Éfiè Nzame ye dzale de ! » (Luc 11:28)

² Bia, bebo bisèñ Jehôva, bi ne ayong é ne mvom. Amu dzé ? Bi bele abuiñ mekalgha ma ve de, ve akalgha avoo ye été é ne éban, é ne naa, bia lang kalare Nzame kada môs, ye ve mengu’u naa bi dzale é dzam bia lang été (A lang Jacques 1:22-25).

3. Za abuane bia ñong éyong bia dzale é dzam bia lang Éfiè Nzame été ?

³ Bi ne buane de abuiñ meval éyong bi ne « é bôr ba dzale Éfiè Nzame. » Éfônan, éyong bia dzale é mam bia lang Éfiè Nzame été, bia ve Jehôva n’nem mbeng. Dzam té da ve fe naa bia bebién bi tobe a mvom été (Eccl. 12:13). Ye fe naa, éyong bia dzale é mam bia lang a Bible été, da bera wône élar bi bele ye bobedzang ye bekal bèè, ya fe édi bôr be ye menda me bôr mèè. Miè fe, mi yièneyang fe yen naa dzam té é ne bebela nfa wônan. Ya fe naa, bia saalé mindzukh é bôr baa bèè ki melepgha Jehôva, ba tubane mio. Dzam té faa kéza David a nga dzô. A dzia été, niène a nga mane tu atsing, menvena ye minkighane minsang Jehôva, a nga mane é dzô naa : « A baghle mo, da so môra ôba » (Bya 19:7-11).

4. Amu dzé déé se ki ébubu éyong ésese naa bi dzale é mam bia lang a Bible été ?

 ⁴ Bebela a ne naa, déé se ki ébubu éyong ésese naa bi lang Éfiè Nzame ye dzale é mam bi va yeghe. Afang faa bo naa, bi bele abuiñ mam ya bo bining bia été, ve bia yiène top é tam bia ye bo bi lang ye binane Bible nfa ye naa, bi tugha wokh é dzam Jehôva a kômô naa bi bo. Ntamane yen ayôm mam me ne bia vole naa bi bele fulu ya lang Bible mban. Bia ye fe yen é mam me ne bia vole naa bi tugha binan é mam bi va lang ye aval bi ne me dzale bining bia été.

ÑONGHANE TAM NAA MIA LANG ÉFIÈ NZAME

5. Mam mevé ma ñong bia tam ?

⁵ Abuiñ bebo bisèñ Jehôva, be bele abuiñ mam ya bo bining bieba été. Bia lôr abuiñ tam naa bi dzale é mam Bible a dzô naa me ne édedèè éban. Éfônan, abuiñ ye ébe bia, bi bele bisèñ bia ve naa bi baghle bia bebién, ya fe bôr be ye menda me bôr mèè (1 Tim. 5:8). Abuiñ bekristen ba baghle bebyèñ beba be ne min’nôm nge ki minkôkoan. Bia besese bia yiène fe ñong tam naa bi kale é mvoa minsôn dèè, a bo mam mese meté da sili abuiñ tam. Bi bele fe meyem mefe me ne éban bia yiène dzale ékôan été. Ayem dèè ye meyem ma dang éban bi bele é ne a kanghle mbemba fuèñ ye ayông. Amben ô bele meyem mesese meté, z’aval ô ne bo naa, ô bele tam ya lang Bible éyong ésese, a binane é mam wa yeghe, ye dzale mo ?

6. Za dzam mi ne bo naa mi tele nlanghane Bible ôsu ? (A daghe fe évaghle).

⁶ Nlanghane Bible ô ne « é dzam évoo da dang éban » akal bekristen besese, ye dzam té, éde bia tele de ôsu (Beph. 1:10). Nfa é môr a ne mvom, nten bya ôsua wa dzô naa : « Mevakh mèñ me ne atsing Jehôva été, éde a lang de alu ye ômôs » (Bya 1:1, 2). Da yili naa, bia yiène ñong ngura tam naa bi bo bi lang Biblia. Éyong évé da dang mbeng naa bi lang Biblia ? Kada môr y’ébe bia, a bele éyalane dèñ é  ne selane ye édi é bôr bevoo. Ve, é dzam é ne éban é ne naa, kada môr ye été, a yiène top é tam da ye ñe vole naa a bo é lang Bible mban. Moadzang ézing a too éyôla naa Victor, a dzô naa : « Ma dzing ma lang Bible kikiri. Amben méé se ki é môr a ne ékuna, ve ékuna kikiri, bidung bii se ki, nge ki é mam me ne bia likh naa bi taa bembe ébe é mam bia lang. Ôsiman ô yoo ma, ye naa me ne yem binan. » Ye dzam té é ne fe bo bebela nfa wiè ? Silighe wamién naa, ‘tam évé é ne mbeng akal dam naa me lang Biblia ?’

FASGHAN É MAM MIA LANG

7-8. Za mam me ne bia ve naa bi taa tugha buane é mam bia lang ? Vahk éfônan.

⁷ Bebela a ne naa, bi ne lang abuiñ mam, ve dèè, kaa me baghle. Ye é kuiñ wô naa, ô va lang dzam ézing, ve, niène ôyôm tam ô lôrang, waa simane ki fe é dzam ô va lang ? Dzam té da biane bia bese. É dzam é ne éngôngoo é ne naa, é ne fe boban nfa nlanghan. A ne bo nde bi va ñong nkighane naa, bia lang ayôm mebong me ya Bible kada môs. Dzam té é ne mvèñ. Bia yiène bele minsonghan, ye ve mengu’u naa bi dzale me (1 Becor. 9:26). Nlanghane Bible, ô ne mbemba asumgha, ve, a ne fave asumgha. Bia yiène bera bo abuiñ mam mefe, nge bia kômô tugha buane nlanghane Bible wèè.

⁸ Tame fas éfônane di : Biloa nge ki bilé, bia yi mendzim nge ki nveng naa bi vem. Ve, nge menveng me dang nong abuiñ ébe ôyôm tam, mendzim meté me ne mane taghbe. Éyong é ne aval té, mendzim me nveng maa ye ki fe bo éban. Si da yi tam naa é tugha mane vili mendzim me va ku, ye belane mo nfa ye naa biloa bi vem. Aval dèè fe, biaa yiène ki dzeng naa bi lang Bible mbîî, da yili naa édedèè avôô, aval da ve naa bii se ki fe binan, a siman, ye belan é mam bi va lang (Jacq. 1:24).

9. Za dzam bia yiène bo, nge bi bele fulu ya lang Bible mbîî ?

⁹ Ye é kuiñ wa tam ézing naa, wa lang Bible mbîî ? Za dzam wa yiène bo ? Langhe ñe ôtetak. Vakh mengu’u naa ô tem é  dzam wa lang nge ki é dzam ô ndaghe lang. Dzam té déé se ki ndzukh. Nge a sili wô naa ô binan da yene wô ndzukh, ô ne ñong naa a binan é ne naa ba sili wô naa, ô tem nge ki a fas é dzam ô ndaghe lang. Ô ne top naa wa lôr abuiñ tam éyong wa yeghe, nfa ye naa ô tem nge ki a binan. Nfa mboo ki, ô ne top naa wa lang fave avitsang bifus, nfa ye naa ô belane é tam da lighi naa ô binan é dzam ô va lang. Victor éñi bi va yen ôyô, a dzô naa : « Me wula lang avitsang bifus, ngeng ézing abong dèè. Amu ma lang ékuna kikiri, da ve me naa me binane ngum nté môs ébe é mam me va lang. » Wamién ô ne top abim bifus wa kômô lang, ve, édi é ne éban é ne naa, ô lang ôtetak aval da ve wô naa, ô yem ke wa binan é dzam wa lang (Bya 119:97 ; a daghe nkaalé «  Minsili wa yiène fas »).

10. Vakh éfônan da lere aval mi ne tugha dzale é mam mia yeghe. (1 Bethessalonicien 5:17, 18)

¹⁰ Éyong mia top naa mia lang bifus bi ya Bible, ye é tam mia ye de bo, vehane mengu’u naa mi dzale é mam mia lang. Éyong ô manang lang éfus ya Bible ézing, silighe wamién naa : ‘Aval avé me ne dzale é dzam di, éndagha nge ki faa melu ma zu ?’ Éfônan, tame simane naa, nlanghane Bible wiè été, wa yiène lang 1 Bethessalonicien 5:17, 18 (A lang). Éyong ô mana lang Bifus bibèñ bité, ô ne sim ye tem abim tam ye abim édoa évé meyaghlan muè me ne. Ô ne fe fas nfa é mam ô ne ve de akiba. Ngeng ézing ô ne sim ye ve Jehôva akiba akal mam melal mézing ô va siman. Éyong wa ñong ôyôm tam té naa wa bo de, wa ye tobe vèè é môr a bèè ye fe éñi a dzale Éfiè Nzame. Tame siman abuan wa ye ñong nge ô bo dzam té môs misese nfa bifus bi ya Bible wa lang ! Ôwé wa ye tobe é mbemba mbo ésèñ Jehôva. Ve, wa ye bo yè nge a kuiñ naa, ô bele abuiñ mam wa yiène songhan ?

BELEGHANE MINSONGHANE MIA YIÈNE

11. Amu dzé biyong bizing ô ne wôrane naa, ô bele édedèè abuiñ mam ya bo ? Vakh éfônan.

¹¹ Éyong wa lang Bible ye dzeng abuiñ meval ô ne dzale melepgha me y’été, ô ne wôrane naa, mam meté me ne édedèè abuiñ. Tame tem é dzam di : É môs ôsua, nlanghane Bible wiè ô bele melepgha nfa ye naa ô taa bo ôbangam (Jacq. 2:1-8). Éde wa yen naa ô ne songhan aval wa yen é bôr bevoo, éyong té wa ñong nkighane naa wa zu tsen é mam ma yiène. É ne édedèè mvèñ ! Éyong té, é môs bèè wa lang éfus da lere éban é ne naa, bi bo nkee ye bifiè bia kulu anu (Jacq. 3:1-12). Éyong té, ô ne simane naa biyong bizing ô nga belane mbimbia bifiè. Éde wa kikh naa,  wa zu belane mbemba bifiè ye ébi bia saghe. É môs lal ki, nlanghane Bible wiè ô bele mbaman, nfa ya bo angom ye émo (Jacq. 4:4-12). Éyong té, éde wa yen naa wa yiène yeme top aval bivuiñ ye bingengeng wa daghe. É môs nii, ô ne wôrane naa é mam wa yiène dzale me dang-hang abuiñ.

12. Amu dzé waa yiène ki sili mo ôsi nge nlanghane Bible wiè wa lere naa wa yiène tsen mam mézing ? (A daghe fe atoan).

¹² Nge ô yene naa ô bele abuiñ mam wa yiène tsen nge ki a songhan, ô taa sili mo ôsi. Dzam té da lere naa, ô ne asili ñuu, ye naa, ô bele mbemba nkôman. É môr a ne asili ñuu ye sôsôe ye émièn, a lang Bible ye nkômane ya yen é mam a yiène tsen a. Bi taa ki vuène naa, bia yiène tsini naa « bia boat nféféñ môt » (Becol. 3:10). Dzé da ye wô vole naa, ô ke ôsu ye dzale Éfiè Nzame éning duè ?

13. Aval avé ô ne ve wamièn abim minsonghane mia yiène ? (A daghe fe évaghle).

¹³ Ndaane a dzeng naa wa dzale é mam mesese wa yeghe éyong évoo, bameghe dzeng naa ô sum dzale dzam évoo nge ki mebèñ me ye été (Mink. 11:2). Ô ne vaghle é dzam di : Maneghe tsili vôm ézing é mam wa yiène dzale, éyong té éde wa top dzam évoo nge ki mebèñ wa ye sum a mo, ye likh é mam mevoo naa wa ye sughlane me dzale. Ô ne sum vôm mbé ?

14. Ô ne sum ye minsonghane mivé ?

¹⁴ Ô ne kikh naa wa sum ye nsonghane wa dang wa ébubu a dzale. Nge ki naa, ô ne top naa wa sum ye é dzam wa kômô dang tsen. Éyong ô topbang nsonghane wa kômô dzale, ô ne bo mindzeng mebakh  mèè été, éyong ézing wé belane bivole Índice de las publicaciones Watch Tower nge ki Index des publications Watch Tower. Yaghlan akal nsonghane wiè, wé dzaa Jehôva naa a ve wa « nkômane ya bo » de (Beph. 2:13). Éyong té, dzalghe é dzam ô va yeghe. Éyong wa ye yen ane wa ke wa dzale nsonghane wiè té, da ye wô ve ngu’u naa ô kômô bera dzale nsonghan ôfe. A ne ne naa, éyong ô nga yemang dzale ngura dzam ézing éning kristen duè été, nge ki nfa fulu kristen ézing, da ye bo ébubu naa ô bo fe de minfa mivoo.

ÉFIÈ NZAME « É BOGHE ÉSÈÑ ÉBE MINA »

15. Nfa mbé ayong Jehôva da selane ye abuiñ bôr befe ba lang Bible ? (1 Bethessalonicien 2:13)

¹⁵ Bôr abuiñ ba tamane naa, be langhang Bible a lôr mewôm biyong. Ve, ye ba bunu faa meyeghle me ne a Bible été ? Ye be va dzale nge ki naa ye ba likh naa Bible a tsen bining bieba ? É dzam é ne éngôngoo é ne naa, kaa dzôm. Za mura nselane ye ayong Jehôva ! Ane bekristen be ye ntet mimbu ôsua, bia yebe naa Bible « a ne faa Éfiè Nzame. » Da yili naa, bia ve mengu’u mèè mesese naa bi dzale meyeghle ma so a Bible été (A lang 1 Bethessalonicien 2:13).

16. Dzé é ne bia vole naa bi bo é bôr ba dzale Éfiè Nzame ?

¹⁶ Déé se ki ébubu éyong ésese naa bi lang ye dzale Éfiè Nzame. É ne bia bo ndzukh naa bi bele tam ya lang de. Nge ki naa, bi ne sum naa bia lang édedèè avôô, kaa naa bia baghle é dzôm bi va lang. Bi ne fe wôrane nvoaran amu bia yen naa, é mam bia yiène dzale me ne édedèè abuiñ. A bo ndzukh ôsese wa tubane wô, ô ne wô dang. Ye avole Jehôva, ô ne wun ndzukh té. Éde, vakh mengu’u naa, ô yebe avole dèñ, ye bo se ki fave é môr a bèè éyong té a vuèn, ve, é môr a dzale Éfiè Nzame (Jacq. 1:25).