1-2. Amu dzé Jehôva a nga vele bia naa bi bo mvom éyong bia ve é bôr bevoo ?

 ÉYONG Jehôva a nga vele boan bebôt, a nga vele be aval da ve naa be ne koghle é mvom deba éyong ba ve (Bisè mintôl 20:35). Ye da yili naa bii bele ki mvom ézing éyong bia ñong ? Kaa dzôm. Bia besese bia yem naa bi wôla wôrane mvom éyong ba ve bia das ézing. Ve, bebela a ne naa, bi wôla wôran é mvom da dang n’nen éyong bia, bia ve. Ye fe naa, é ne faa akal mbeng wèè éde Jehôva a nga vele bia aval té. Amu dzé ?

² Éyong a nga vele bia aval a nga bo de, Jehôva a nga ve bia vèè, naa bi ne koghle é mvom dzèè. Bi ne koghle mevakh mèè éyong bia dzeng meval mefe naa bi ve é bôr bevoo. É ne faa édedèè mbemba dzam naa Jehôva a nga vele bia aval té (Bya 139:14).

3. Amu dzé ba dzô naa Jehôva a ne é « Nzame a ne mvom » ?

³ Bible a ban bia naa, a ve da so mvom, ye dzam té biaa kam ki éyong Bible a dzô naa Jehôva a ne « é Nzame a ne mvom » (1 Tim. 1:11). Éñe a ne é môr a nga tare ve é bôr bevoo, ye naa môr nfe aa ve ki ane Jehôva. Ngalane ñe « bi bele éning, bia fonghan ye ning », aval ane ntôl Pablo nge ki Paul a dzô de (Bisè mintôl 17:28). Ye de, « mbemba das ése ye fe mbemba nvehane ôsese » wa so ébe Jehôva (Jacq. 1:17).

4. Dzé da ye bia vole naa bi koghle é mvom dzèè ?

⁴ Ngeng ézing bia besese bi ne dzing bia wôran é mvom da so éyong bia ve. Bi ne de bo éyong bia vu é fulu akap Jehôva (Beéph. 5:1). Ayeghle di été, bia ye yeghe é mbemba éfônane Jehôva nfa ya ve, bia ye fe yen é dzam bi ne bo nge bia wôrane naa é bôr bevoo baa ve ki bia akiba éyong bia ve  be. Melepgha meté ma ye bia vole naa bi baghle ye fe a koghle mevakh ma so éyong bia ve.

VUGHAN É FULU AKAP JEHÔVA

5. Biôm bimo bivé Jehôva a ve bia ?

⁵ Meval mevé Jehôva a lere bia é fulu akap dèñ ? N’tamane ñong ayôm bifônan. Jehôva a ve bia biôm bi ye mo. Ngeng ézing naa bii bele ki akum, ve ngalane avole Jehôva, abuiñ y’ébe bia, bi bele abim da yiène bia. Éfônan, a ve bia naa bi bele bidzi, bitô ye vôm ya tobe (Bya 4:8 ; Mat. 6:31-33 ; 1 Tim. 6:6-8). Ye Jehôva a ve bia biôm bité fave amu a yiène de bo ? Kaa dzôm ! Édeeng, amu dzé Jehôva a bo mam meté akal dèè ?

6. Za dzam nten Matthieu 6:25, 26 wa yeghle bia ?

⁶ Nge bi ne de dzô aval é ne ébubu a wokh, Jehôva a ve bia biôm bi ya nsôn amu a dzing bia. N’tamane yen bifiè Yésu bia yen nten Matthieu 6:25, 26 (A lang). Yésu a belane bifônane bi ye avele. Nfa wa daghe anoan, Yésu a dzô naa : « Baa béñ ki, baa sap ki, ye naa, baa ñiè ki bidzi menda été. » Ve bilighan é dzam a dzô ôsu vèè : « Ésaa wônan a ne a dzôp été a ve be bidzi. » Éde Yésu a sili naa : « Ye mii se éban a lôr anoan té ? » Za ayeghle a kômô bia ve ? Jehôva a yen bebo bisèñ bèñ édedèè éban a lôr betsit be ye avele. Nge Jehôva a baghle betsit, bi ne bele ndzi-n’nem naa, a ye bia ve é dzôm bia yi ! Aval ane bésaa ba yem baghle menda mebôr meba, Jehôva ñ’a fe, a yem baghle é nda-bôr dzéñ ye édzing (Bya 145:16 ; Mat. 6:32).

7. Aval évoo évé bi ne vu é fulu akap Jehôva ? (A daghe fe évaghle).

⁷ Ane Jehôva, bia fe, bi ne ve é bôr bevoo é mam ba yi amu bia dzing be. Éfônan, ye mia yem é kristen ézing a yi naa be ve ñe bidzi nge ki bitô ? Jehôva a ne belane wa naa a ve ñe é dzôm a yi. Ba yem bebo bisèñ Jehôva ye é fulu akap deba éyong minfonghane misi nge ki bibubua bimam bia boban. Éfônan, é tam môra ôkoan COVID-19, bobedzang ye bekal bèè, be nga kap bidzi, bitô, ye abuiñ biôm bife naa be vole é bôr be mbe bé yi biôm bité. Abuiñ ye été, be nga ve fe bivevee akal ésèñ minkanghle da boban si se ngura. Dzam té é nga ve naa, be ke ba vole bobedzang ye bekal bèè be ya si ése ngura. Be nga ñong ye n’nem ôse bifiè bia yen nten Behébreu 13:16 bia dzô naa : « Mi taa vuène naa mi bo é dzam é ne mbeng ye  kap é dzôm mi bele ye é bôr bevoo, amu naa Nzame a yen aval metunegha meté mbeng. »

8. Aval avé Jehôva a vole bia éyong a ve bia é ngu’u dzèñ ? (Bephilippien 2:13)

⁸ Jehôva a ve ngu’u. Jehôva a ne mvom éyong a ve besôsôe bebo bisèñ béñ é ngu’u dzèñ é ne kaa meniè (A lang Bephilippien 2:13). Ye mi yaghlaneya naa mi bele ngu’u nfa ya zôme meboblan nge ki faa naa mi dang dzukh ézing ? Nge ki naa, ô yièneyang fe yaghlane naa, a ve wa é ngu’u wa yi naa ô dzale é mam wa yiène bo ébe môs. Éyong a yalane meyaghlane muè, éma ô va sili ñe ngu’u, ô ne bo king dzèè ye bifiè Pablo nge ki Paul a nga tsili éyong a nga dzô naa : « Nfa mam mesese me bele é ngu’u Tare a ve ma » (Beph. 4:13).

9. Meval mevé bi ne vu Jehôva éyong bia belan é ngu’u dzèè naa bia vole é bôr bevoo ? (A daghe fe évaghle).

⁹ Bii bele ki aval ngu’u Jehôva é ne kaa meniè, ye naa, bii se ki ve é bôr bevoo ngu’u aval Jehôva a bo de. Ve dèè, bi ne vu Jehôva bi belan é ngu’u dèè naa bia vole é bôr bevoo. Éfônan, bi ne vole é kristen ézing a ne ñamôrô nge ki éñi a bele éyem ézing, éyong bia mem naa bia ke sôm biôm akal dèñ nge ki a vole ñe bo bisèñ bi ya nda. Nge étéñ dèè da ve bia naa bi bo de, bi ne mem naa bia ke vole bisèñ bia boban a Nda ékôan. Éyong bia belan é ngu’u dèè meval meté, bi ne bo abuiñ mam akal bobedzang ye bekal bèè.

10. Aval avé bi ne wône é bôr bevoo ye bifiè bia ?

¹⁰ Bi taa ki vuène naa, bifiè bi bele ngu’u. Ye mia siman é môr ézing mi ne saghe ye é mbemba bifiè ? Ye mia yem é môr ézing éndagha a yi afôlô ? Nge é ne aval té, amu dzé mia bebién miaa tare ki kôre naa mi ke ñe fep ? Mi ne de bo éyong mia ke ñe fep é nda dzèñ, a luè ñe nkoo, nge ki faa a lôm ñe moan édzangô, a tsili ñe, a lôm ñe sms nge ki email. Mi taa bele meyep ye é dzam mia ye dzô. Fave ayôm bifiè, bi ne ñe bira name, ye bo é dzam moadzang té a va yi, nfa ye naa, a tsini ôsu ye tobe sôsôe môs té, nge ki naa, a wôrane mvèñ (Mink. 12:25 ; Beéph. 4:29).

11. Aval avé Jehôva a belane é fakh dèñ ?

¹¹ Jehôva a ve fakh. Jacques a nga tsili naa : « Nge môr y’ébe mina a ne kaa fakh, a tsinighe naa a sili de Nzame, amu naa a ye ñe de ve ye n’nem ôsese, kaa ki ñe ve bidzô » (Jacq. 1:5). Aval bifiè bité bia lere de, Jehôva aa ñim ki é fakh dèñ. A ve de é bôr bevoo ye n’nem ôsese. Bilighane fe naa, éyong Jehôva a ve fakh, a bo de « kaa ve bidzô » nge ki « kaa yen ékop. » Aa  kômô ki naa bi wokh ôsoan éyong bia sili ñe é fakh dèñ. A ne ne naa, a saghe bia naa bi dzeng de (Mink. 2:1-6).

12. Biyong bivé bi bele naa bi ne kap n’yemane wèè ye é bôr bevoo ?

¹² Bia ki, ye bi ne vu Jehôva bi kap é fakh dèè ye é bôr bevoo ? (Bya 32:8) Bebo bisèñ Jehôva be bele abuiñ mefôô naa be kap ye é bôr bevoo é mam be nga yeghe. Éfônan, bia bo de éyong bia lere é bôr be ndaghe sum ésèñ minkanghle aval ba bo de. Bemvene ba vole bamvene ye ôdzibi ye é bobedzang be dubaneyang aval be ne yem dzale meyem ba ve be ékôan. É bôr ki be bele n’yeman nfa bisèñ melong ye nfa aval ba baghle menda bikôan, ba vole a yeghle é bôr bevoo nfa y’aval be ne tugha yem ke ba bo bisèñ bité akal Menda bikôan ya fe be Bethel.

13. Éyong bia yeghle é bôr bevoo, aval avé bi ne vu Jehôva ye aval a kap é fakh dèñ ?

¹³ É bôr ki ba yeghle é bôr bevoo ba bo mvèñ naa be vu Jehôva ye aval a kap é fakh dèñ. Simeghane naa, Jehôva a ve é fakh dèñ ye n’nem ôsese. Aval dèè fe, bia kap ye n’nem ôsese é mam bia yem ye é bôr ba yeghe. Biaa kômô ki baghle é mam mézing bia yem akal dèè bia bebién, bi ko wong naa é môr bia yeghle a ye bia zu tsen. Biaa bele ki aval mesimane ma : ‘Môr ézing éé dzi ki me yeghle ! Éde, a tameghe yeghe étam.’ Aval mbia nfasane mam té, waa yiène ki ézizang bebo bisèñ Jehôva. Ndaane naa bia siman aval té, bia yiène kap ye n’nem ôsese, se ki fave n’yemane wèè, « ve, ya fe bia bebién » akal é bôr bia yeghle (1 Beth. 2:8). Bia bunu naa, baa fe, « ba ye tobe nkôman aval da yiène, naa be yeghle fe é bôr bevoo » (2 Tim. 2:1, 2). Nge bia ve n’yemane wèè ye n’nem ôsese, bia, ye é bôr bevoo, bia ye bera dang n’yeman ye bele abuiñ mevakh.

ÉYONG BÔR BA YENE ANE BAA YEM KI MBENG

14. Za dzam abuiñ bôr be wôla bo éyong bia lere be fulu akap ?

¹⁴ Éyong bi ne akap, a dang-dang ye bobedzang ye bekal bèè, abuiñ biyong be wôla bia lere naa ba yem mbeng bi va bo be. Be ne bia lôm moan édzangô naa ba ve bia akiba nge ki faa be ne de bo meval mefe (Becol. 3:15). Éyong ba ve bia akiba aval té, dzam té da koghle bia mevakh.

15. Za dzam bia yiène baghle ôsiman éyong bôr bézing baa lere ki naa ba yem mbeng bi va bo be ?

¹⁵ Biyong bizing, da fônane naa bôr baa bis ki mbeng bi va bo be. Nge ki naa, baa yem ki abim éyong, ngu’u ye miang bi va belane de naa bia vole be. Nge éñe da boban aval té, za dzam bi ne bo naa bi taa dzimle mevakh mèè nge ki a sili mo ôsi ? Simghane bifiè bia kuiñ nten ye nlô adzô wi, Bisè mintôl 20:35. Mevakh mèè méé tsii ki ye aval bôr ba ñong mbeng bia bo be. Bi ne top naa bia dzing bia ve é bôr bevoo, amben baa lere ki bia naa ba yem mbeng bia bo be. Aval avé ? N’tamane yen ayôm meval.

16. Dzé é ne bia vole naa bi ke ôsu ye ve é bôr bevoo ye mevakh ?

¹⁶ Simeghane naa éyong wa ve é bôr bevoo wa vu Jehôva. A ve bôr mbemba be biôm, a bo naa ba lere naa ba yem mbeng té nge ki kaa (Mat. 5:43-48). Jehôva a kiagh naa, nge bia fe, bia ve é bôr bevoo aval dèè, « kaa naa bia yane dzôm ézing ayat », « ôba [wèè] wa ye bo édedèè n’nen » (Luc 6:35). Éfiè « dzôm ézing » été, bi ne lang, aval ésese be ne bia ve akiba. A bo naa ba ve bia akiba, nge ki kaa, Jehôva a ye borane bia éyong ésese, akal mbeng bia bo naa bia vole é bôr bevoo, amu naa, bi ne ‘é bôr ba ve ya mevakh’ (Mink. 19:17 ; 2 Becor. 9:7).

17. Akalgha évé bi bele naa bia ve é bôr bevoo ? (Luc 14:12-14)

 ¹⁷ É dzam éfe bi ne bo naa bi vu Jehôva éyong bia ve é ne a dzale bifiè Yésu bi ne nten Luc 14:12-14 (A lang). É ne été, déé se ki abé naa bi lere é bôr bevoo añep, nge ki, naa bi bo akap ya é bôr befe, be ne fe bia de lere. Ve, za dzam bi ne bo nge bi yen naa, bi va bo bi ve amu bi va bo bi simane naa tam ézing baa fe, be ne bia bulane mbeng bi va bo be ? Nge éñe ne nèè, bia yiène dzeng naa bi dzale bifiè Yésu. Bi ne lere é fulu akap dèè ya é môr bia yem naa, éé bele ki mono ya bulane bia de. Dzam té da ye bia ve mevakh amu bia yem naa bi va vu Jehôva. Da ye fe bia vole naa, bi baghle mevakh mèè éyong é bôr bevoo baa lere ki naa ba yem mbeng bi va bo be.

18. Za dzam bia yiène dzeng naa bi taa vaghle bo, amu dzé ki ?

¹⁸ Mi taa sia kikh naa é bôr bevoo baa yem ki mbeng (1 Becor. 13:7). Nge é bôr bevoo baa ve ki bia akiba, bi ne sili bia bebién naa : ‘Yé é ne amu naa baa yem ki mbeng, nge ki naa, be va vuène fave naa be dzô bia de ?’ Ngeng ézing mekalgha mefe me ne, me va tsini be naa be taa bia de dzô aval bi mbaa bi yane de. Bevoo bézing be ne wokh ôsoan éyong ba vole be, dang-dang nge melu mvus ébe be mbe bé vole é bôr bevoo. Aval sese é ne bo, édzing bekristen bi bele da ye bia tsini naa bi taa bele mbia mesiman nfa bobedzang ye bekal bèè, ye tsini ôsu naa bia bele mevakh éyong bia ve (Beéph. 4:2).

19-20. Amu dzé fulu ôdzibi é ne éban éyong bia ve é bôr bevoo ? (A daghe fe évaghle).

¹⁹ Boghane ôdzibi. Nfa wa daghe fulu akap, nfefakh kéza Salomón a nga tsili naa : « wuaghe mfem wiè mendzim été, amu naa ébe abuiñ melu ôsu vèè, wa ye wô bera yen » (Eccl. 11:1). Aval bifiè bité bia lere de, bôr bézing be ne lere naa ba yem mbeng bi nga bo be « fave abuiñ melu ôsu. » N’tamane yen éfônan ézing da ngône bebela té.

²⁰ É ntoo abuiñ mimbu, é minenga ndeghe  bikôan ézing, a nga tsili kal dzèè ézing a ndaghe duban mbemba kalare, é saghe ñe naa a tsini ôsu ye tobe sôsôe. Éyong bébéñ mimbu muom mi nga lôt, éde kal dzèè té, a nga yalane é kalare wéñ é dzô ñe naa : « Me nga wôrane fave naa ma yiène wô tsili ye kane wa avole ô nga ve ma mimbu misese mi, kaa naa wa yem de. » A tsini naa : « [Édzangô duè] été, ô nga tsili ma édedèè mbemba bifiè, ye naa, méé se ki vaghle vuèn éfus ô nga ve été a. » Niène fe a nga mane kane abim mindzukh mizing a nga tubane mio, kal dzèè a nga bera dzô naa : « Biyong bizing me mbe mé kômô likh meyem mam mese, ye sim naa ma sèhane Jehôva. Ve, éfus ô nga tsili ma, é nga bira me name n’nem, é nga ve me ngu’u naa me tsini naa ma tobe sôsôe. » A nga koghle naa : « Dzôm a dzôm ézing mimbu muom mi ndaghe lôr mi, déé dzi ki me name aval té. » Tame siman mevakh minenga ndeghe bikôan té a nga wôran éyong be nga kee ñe édzangô té a kuane naa « abuiñ melu ôsu vèè » me lôrang ! Nfa wèè fe, be ne bia ve akiba, nge ki a lere naa ba yem mbeng bi nga bo fave abuiñ tam ôsu.

21. Amu dzé mi bele nkômane abong di naa mia ye tsini ôye ye vu é fulu akap Jehôva ?

²¹ Aval bi va dzô de ôyô, Jehôva a nga vele bia ye ngum aval fulu. Amben bia dzing ba ve bia, bia dang ñong mevakh éyong bia, bia ve é bôr bevoo. Da tobe bia mvèñ éyong bia vole bekristen bevoo. Dzam té da so fe bia abuiñ mevakh éyong ba lere bôr ba lere naa, ba yem mbeng bi nga bo be. Ve, a bo naa ba lere naa ba yem mbeng té nge ki kaa, bi ne bele mevakh amu bia yem naa bi va bo é dzam é ne mvèñ. Bi taa ki vaghle vuène naa, a bo é dzôm ésese bi ne ve, « Jehôva a ne wô ve abuiñ a lôr abim té » (2 Mila. 25:9). Da yili naa, abim Jehôva a ye borane bia da ye lôr-lôt abim bi va bo ! Mevakh mefe maa lôr ki éma bia wôran éyong Jehôva a borane bia. Éde, n’tsinighane ôsu naa bia vu é fulu akap Ésaa wèè a ne a dzôp été.