YE É ne wô ndzukh naa a ô bo ayeghe Bible besono besese ? Ye biyong bizing, wa wôrane naa ayeghe Bible daa ve ki wô mesan ? Bia besese bia wôran aval té biyong bizing. Ve, simeghane é mam mefe bia bo éyong ésese, ane a woban. A woban da sili tam ye ngu’u, ve, éyong bia bo de, ke bia wokh ñuu édedèè mvèñ, nga ! Ayeghe Bible é ne bo ane a « wobane mendzim ngalan éfiè » (Beéph. 5:26). N’yeneghan é mam mézing me ne vole :

• A bo ntaane mam. Ayeghe Bible môr émièn é ne dzam daa ye « é mam ma dang éban » moan kristen aa yiène ki bian (Beph. 1:10). Nfa ya vole wô naa ô taa vuèn é tam wa yiène bo ayeghe Bible duè, tsilighe é môs ye awala wa yiène de bo afep ayô ye baa de é vôm da ye wa bo ébubu a yen de. Nge ki va tam té é teléfono wiè été nfa ye naa a long éyong a ligheyang avitsang tam kaa naa ô sum ayeghe Bible duè.

• Simeghan é dzam da ye wô vole a bembe ébe é dzam wa yeghe. Dzé é ne ébubu akal duè ? Éfônan, ye é ne wa ébubu naa ô bembe ébe ayeghe duè nge wa bo de tang ngura awala nkuala ? Nge ki faa, wa dzing wa yeghe avitsang tam, ve ébe abuiñ biyong ? Wa yem é dzam da dang mbeng akal duè. Éde, boghe ntaane mam wiè akal ayeghe wé baghle de ôtemgha. Nge wéé bele ki nkômane ô ne ngu’u naa wa bo ayeghe duè éyong tam té da kuiñ, amu dzè waa bo ki de fave bibuk awôm ? Amben wa bo ayeghe Bible duè fave bibuk awôm, ô ne yeghe abuiñ mam. Éde, éyong wa ye sum, éyong ézing, wa ye bele nkômane naa wa ke ôsu ye ayeghe Bible duè (Beph. 2:13).

• Topghe é dzam wa ye yeghe kaa naa tam té é kuiñ. Nge wa top é dzam wa ye yeghe éyong é tam wa yiène yeghe da kuiñ, éyong ézing waa « tugha [ki] yem belan é tam duè » (Beéph. 5:16). Amu dzè waa tsili ki afep été, nlong meyeghle nge ki minlô medzô ô ne dzing wa yeghe ? Éfônan, nge nsili wa sia wô so ôsimane nfa dzam ézing wéé dzi ki tugha wokh, tsilighe nsili té afep duè été. Éde, éyong ése wa mane yeghe dzam ézing, ô ne koghle mam mefe ô ne dzing wa yeghe afep duè été.

• Nge wa yiène tsen mam mézing, boghe de. É dzam da dang éban é ne naa ô yeghe Bible kada sono. Naa dzam té é boban, ô ne tsen é môs ye awala wa yeghe, abim tam wa yeghe nge ki é mam wa top naa wa yeghe.

Nge bia yeghe Bible kada sono, bia ye bele abuiñ biboran. Amvuiñ dzèè ya Jehôva da ye bo édedèè ngu’u, bia ye yeghe a ñong mbemba minkighan bining bia, bia ye fe wôrane naa bi ne ngu’u a nsisim (Jos. 1:8).