María ba n’nôm, Jean a, ba ning nfa si be ne kanghle abuiñ bebo bisèñ be ne beyeng, ba so a Filipinas, mbemba fuèñ. É tam môra ôkoan COVID-19, María a nga sum meyeghe Bible se ki fave é si a too, ve ye fe ya é bôr ba ning mesi mefe. Za aval a nga bo de ?

María a mbe é sili é binenga a mbe é bo ayeghle naa : « Ye wa yem môr nfe a ne kômô yeghe Biblia ? » Nge be nga yalane naa ôwé, a mbe é sili nge a mbe yenane ye be. A sili moan nsili té a wôla bele mbemba asughlan. Amu dzé ? Amu naa, abuiñ ye é bôr ba dzing Nkobe Nzame be wôla kômô kap é dzam ba yeghe ye bôr be ye menda-mebôr meba, ye memvuiñ meba ba bira dzing. Za biyalane beyeghe Bible María be nga ve ébe moan nsili té ?

Yasmine, n’yeghe Bible María ézing, a nga lere ñe minféféñ beyeghe Bible benii. Mboo ye été, Kristine, a mbe é bira dzing ayeghe Bible dèñ, éde a nga sili María naa be bo ayeghe Bible biyong bibèñ ébe sono. Éyong María a nga sili ñe nge a mbe é yem môr nfe a kômô yeghe Bible, Kristine a nga yalane naa : « Ôwé, ma ye wô lere memvuiñ mam ». Fave ébe ayôm besono ôsu, Kristine a nga lere María memvuiñ menii mèñ me nga kômô yeghe Bible. Ôsu vèè, Kristine a nga lere ñe memvuiñ mefe, éde baa fe be nga lere ñe bôr befe be mbe bé kômô yeghe.

Kristine a nga kômô fe naa, bôr be ye é nda-bôr dzèñ ba tobe a Filipinas, be yeghe fe Biblia. Éde a nga kobe ya ngoan dzèñ, Andréa. Atarga, Andréa a nga tem naa, ‘Bengaa be ne n’yebe ô ne aval ézing. Baa bunu ki Yésu, ye naa, ba belane fave Antiguo Testamento nge Ancien Testament.’ Ve, niène a nga bo fave ayeghe daa, bivus mesiman a mbe a bele me nga mane dzang. Éyong ésese a mbe é yeghe nféféñ dzam a mbe é dzô naa, « É ne a Bible été, da yili naa é ne bebela ! »

Niène ôyôm tam ô nga lôt, Andréa a nga lere María, memvuiñ mebèñ mefe, ye é môr ba ñe be nga sèñ mbanegha mboo. Éde, baa fe be nga sum ayeghe Bible. Ya fe naa, kaa naa María a mbe é yem de, Angela, ésang Andréa a mbe ndzim, a mbe é bèè nté be mbe bé bo ayeghe Bible deba. Ane, môs ézing, Angela a nga sili Andréa naa a lere ñe María ye sili ñe naa a bo fe ayeghe Bible ya ñe. Angela a mbe é dzing é mam a mbe é yeghe. Ngoan té ébién, a nga baghle abuiñ bifus bi ya Biblia a nlô été, ye kômô bo ayeghe Biblia biyong binii a sono ! Y’avole Andréa, éde Angela a nga sum tobe mban bisulan ngalane videoconferencia.

Éyong María a nga yem naa, Joshua, n’nôm Kristine a mbe é tobe a mvus nté be mbe bé bo ayeghe Bible deba, María a nga sili ñe nge a kômô tobe ye be é tam ba bo ayeghe Biblia deba. Joshua a nga dzô ñe naa, « Ma ye bo fave a bèè, ve  ô taa me sili nsili ézing ; nge ô bo de, ma ye ke ». Niène fave bibuk bitan ave be sum ayeghe Bible bi nga lôt, éñe a nga dang sili minsili ye Kristine, ye naa, a nga kômô tsini ôsu ye minlang mi ya Biblia.

É moan nsili María a nga sili, ô nga ve naa a bele abuiñ beyeghe Biblia. A nga vole abuiñ y’été naa be tsini ayeghe Biblia ye Bengaa befe. Amu María a nga sili moan nsili, éde a nga sum yeghe Bible ye bôr 28 be ye mesi menii.

Yasmine, n’yeghe Biblia ôsua bi va tu, a nga duban é Ngoan nii ye mbu 2021. Kristine a nga duban é Ngoan tan ye mbu 2022, éyong té a nga bulan a Filipinas naa a ke tobe ye é nda-bôr dzèñ. Bôr bebèñ befe Kristine a nga lere María, baa fe, be nga duban. Angela a nga duban ayôm mengoan ôsu vèè, éde éndagha a sèñ ane mpwaghe mefan. Joshua, n’nôm Kristine, ye ngoan dzeba, Andréa ye fe abuiñ beyeghe Biblia befe, ba yem vem a nsisim.

Metam Yésu ye mintôô, abuiñ bôr be nga dzô bôr be ye menda me-bôr meba ya fe memvuiñ meba é mam be nga yeghe ébe Yésu (Jean 1:41, 42a ; Bisè mintôl 10:24, 27, 48 ; 16:25-33). Silighe beyeghe Bible buè ye fe bôr befe ba kômô yeghe Biblia naa, « Ye wa yem môr nfe a ne kômô yeghe Biblia ? Nge ô sili moan sili té, éyong ézing wa ye yen abuiñ bôr ba kômô yeghe Biblia.