YE WA ô yenang fe naa, ému, abuiñ bôr ba tem naa bôr ba yiène belane be ngum aval ? Amben éyong ba belane be ngum aval, ba tsini ôsu ye tem naa, ba yiène be ve abuiñ bemaa befe. É bôr ba tem aval té, ba simane fave bebién, ye naa, baa yem ki mbeng akal abim be bele. Aval té éde Bible a dzô naa bôr ba ye bo melu me ye asughlan (2 Tim. 3:2).

Bebela a ne naa, fulu ye a simane fave môr émièn déé se ki nféféñ dzam. Adán ba Eva be nga kikh naa bébién ba top é dzam é mbe mvèñ ye édi é mbe abé. Nkighane wôba ô nga ve naa, bia besese bi dzukh. Mintet mimbu ôsu vèè, kéza Ozias ye Juda a nga tem naa, a nga yiène ve incienso a templo été, ve, mboane té ô mbe mura ékop (2 Mila. 26:18, 19). Aval daa fe, Befariseos ye Besaduceos be mbe bé bunu naa, Nzame a nga yiène dang yem belane bo a lôr é bôr bevoo, fave amu be mbe bôr be ye é mvong Abrahán (Mat. 3:9).

Bia ning ézizang é bôr ba simane fave bébién, ye tem ba dang éban a lôr é bôr bevoo, éde bi ne kôp mbia fulu té (Begal. 5:26). Bi ne sum tem naa, ba yiène bia ve bemaa bézing, nge ki naa, be belane bia ngum aval. Dzé é ne bia vole naa bi taa bo ane bo ? Ôsusua, bia yiène yem ôtemgha Jehôva nfa té. Metsin metsing me ya Bible mebèñ ma ye bia vole.

Jehôva a ne é môr a kikh é dzam bia yiène de. N’yeneghane bifônane bizing.

•   Aval Jehôva a nga ta nda-bôr, a nga kômô naa n’nôm a wôrane naa ngal a lere ñe ngang, ye naa, ngal ñe a wôrane naa, n’nôm a dzing ñe (Beéph. 5:33). Jehôva a dzô naa é bôr be ne nlughan ba yiène leran édzing n’nôm ye ngal fave é zang bebèñ, se ki ye môr nfe (1 Becor. 7:3). Da yiène naa, bebyèñ be yane naa é boan beba, be bo be mewokh. Boan baa, ba yiène bele édzing ye nkalane bebyèñ beba (2 Becor. 12:14 ; Beéph. 6:2).

• Jehôva a dzô naa bia yiène lere ngang akal bemvene ba sèñ ngu’u ékôan été (1 Beth. 5:12). Ve, baa yiène ki djié bobeñang ye bekal beba be ye ékôan (1 Pierre 5:2, 3).

• Nzame a nga ve bidjié boan be-bôr édjié naa be ñong minfong-misi ye bele ôlughu wa so ébe é bôr ba djié (Bero. 13:1, 6, 7).

Ye édzing, Jehôva a ve bia a lôr abim bia yiène de. Amu bi ne bebo minsem, é dzam étam bia yiène de é ne awu (Bero. 6:23). Ve, Jehôva a ve bia abuiñ biboran amu édzing é ne mban dèñ akal dèè (Bya 103:10, 11). Éboran nge ki maa ésese a ve bia, é ne amu é mvam dèñ bi ne kaa yiène de (Bero. 12:6-8 ; Beéph. 2:8).

A bo nkee naa bi taa sum tem ane bôr be ye émo Satan. Nge bi bo kaa bo nkee, bi ne sum tem naa bia yiène dang bele abuiñ mam a lôr é bôr bevoo. Yésu a nga lere nté mbé aval ôtemgha té ô ne ébubu a so, éyong a nga belan éfônane bebo bisèñ be nga yaane denario nge ki denier mboo. Bebo bisèñ bézing be nga sum ésèñ ékuna kikiri ye sèñ ngum nté môs ô vièn ôsi ; bebo bisèñ bevoo be nga sèñ fave awala nkwala daa. Nsama bebo bisèñ ôsua, be nga tem naa, ba yiène yaane be abuiñ mono, amu abim ésèñ be nga bo (Mat. 20:1-16). É ve ayilgha ye éfônane té, Yésu a nga lere naa beyeghe bèñ ba yiène vakh ye abim Jehôva a yen mvèñ naa a ve bo.

A yem mbeng, kaa ki yane naa é bôr bevoo be ve bia dzôm ézing (1 Beth. 5:18). A vu ntôô Pablo, éñi éé dzi ki dzaa bobeñang bèñ be ya Corinthe naa be vole ñe, amben é nga ye yiène nge a nga bo de (1 Becor. 9:11-14). Bia yiene lere naa bia yem mbeng akal é biôm bisese bôr ba ve  bia, kaa ki yane naa é bôr bevoo be ve bia dzôm ézing, ane ba yiène de bo.

A bo asili ñuu. Éyong môr a simane fave émièn, a sum tem naa a yiène bele abuiñ biôm a lôr abim a bele. Éyong bi ne asili ñuu, bia ye saalé mbia ôsimane té.

Nkulu medzô Daniel a nga ve mbemba éfônan éyong a nga bo asili ñuu. É nda-bôr a nga byale, mbeng wèñ, akeng dèñ, ye é mam a mbe é yem bo, me mbe ve naa a sum simane naa be nga yiène belane ñe ngum aval ye naa, a nga yiène meyem a mbe a bele (Dan. 1:3, 4, 19, 20). Ve, Daniel a nga tsini naa a bo asili ñuu, éde, fulu té é nga ve naa, a bo tang nden é mis Jehôva (Dan. 2:30 ; 10:11, 12).

Ntepghane fulu ye a simane fave bia bebién, ye fulu ya tem naa, bia dang éban a lôr é bôr bevoo, émo da ngône ému. Ndaane de, nkehane ôsu ye bele mevakh ébe éboran ésese Jehôva a ve bia ngalan é mvam dèñ biaa yiène ki de.