AYEGHLE ARTICLE 7
DZIA 15 Lughane ntôô Moan Jehôva !
Aval avé bi ne ñong abuan ébe é fulu ndjiane Jehôva ?
« Ña ndjiane ô ne ébe wa »—BYA. 130:4.
É DZAM BIA YE YEN
Bia ye yen bifônane bi ya Bible bizing bia lere aval Jehôva a djii bia. Ayeghle di da ye fe bia vole a veme n’yemane mbeng wèè akal ndjiane wèñ.
1. Amu dzé é ne ndzukh a yem é dzam môr a kômô dzô, éyong a dzô bia naa a djiiya bia ?
« ME DJIIYA WA. » Ke bifiè bité bi ne mia tobe édedèè mbeng, dang-dang éyong bia bi va bo nge ki a dzô é dzam da tobe é môr mboo abé nga ! Ve daa, bifiè « Me djiiya wa » bia tugha faa yili yè ? Ye dzam té da yili naa mia tsini angom denan ôsu ? Nge ki, ye a kômô mia dzô naa aa kômô ki bera tsiè adzô té ? Bebela a ne naa, éyong boan be-bôr ba dzô naa be djiiyang, dzam té é ne yili abuiñ mam akal deba.
2. Aval avé Bible a kobe adzô ndjiane Jehôva ? (A daghe fe atoan).
2 Aval bia djiane bevoo ye éba bevoo da selane ye aval Jehôva a djii bia, bia bi ne bôr a minsem. Môr ézing éé se ki djii aval Jehôva a bo de. Ntsili Bya a nga dzô nfa Jehôva naa : « Ña ndjiane ô ne ébe wa nfa ye naa be ko wô wong a » (Bya 130:4). Ôwé, ndjiane Jehôva ô ne faa « ña ndjiane. » Éñe a lere bia é dzam ña ndjiane wa yili. Ébe biyong bizing, betsili Bible be nga belane éfiè Hébreu ézing, akal ndjiane, be ne kaa vaghle belane de éyong moan môr a djii.
3. Nfa mbé é fulu ndjiane Jehôva da selan ye é dèè ? (Esaïe 55:6, 7).
3 Éyong Jehôva a djii môt, a tsam nsem wéñ. Aval té, môr té a ntoo bera bele élar é ne ngu’u ye Jehôva. Da ve bia édedèè n’nem mbeng naa Jehôva a djii bia minsem misese miè (a lang Esaïe 55:6, 7).
4. Aval avé Jehôva a vole bia a tugha wokh ña ayilgha ye fulu ndjiane ?
4 Nge ndjiane Jehôva wa selane ye é wèè, aval avé bia bebo minsem bi ne tugha yem wokh dzé é ne ña ndjiane ? Jehôva a vole bia a wokh de, ngalane bifônan a belane bie. Ayeghle di, bia ye yen bifônane bizing bi ye été. Bia ye bia lere aval Jehôva a vèè nsem, ye bera kôm élat é nga ndaman étom nsem. Nté bi yeghe bifônane bité, bia ye tugha veme édzing bi bele akal ndzidzing Ésaa wèè, éñi a lere bia é fulu ndjiane déñ, abuiñ meval.
JEHÔVA A VÈÈ NSEM
5. Za dzam da boban éyong Jehôva a djii minsem miè ?
5 Bible a wôla kobe a minsem, ane mimbeghe mi ne adzit. Kéza David a nga kobe a minsem mièñ aval di : « Bikop biam bi ne ma nlô ayô ; ane mbeghe ô ne adzit, ô ne ma édedèè ndzukh a beghe » (Bya 38:4). Ve, Jehôva a djii minsem bikoar-koat bi-bôr ba dzôban (Bya 25:18 ; 32:5). Éfiè Hebreo ba konghlane naa « a djii » da yili naa, « a vèè » nge ki « a beghe. » Éde, éyong Jehôva a djii minsem miè, a vèè bidzô bia wôran. A ne ane bi mbaa bi beghe mbeghe ô ne adzit bituu, éyong té Jehôva a vèè bia wô.
« A nga djii » (Bya 32:5)
6. Ya ke kuiñ vé Jehôva a beghe minsem miè ?
6 Bifiè bife bia lere nté mbé Jehôva a beghe ye wua minsem miè ôyap. Nten Bya 103:12 wa dzô bia naa : « Aval ane é vôm nlô-dzôp wa véé ô ne ôyap ye é vôm wa ke bôme, aval té évoo, éde fe a wua minsem miè ôyap ya bia. » É vôm nlô-dzôp wa véé, ô ne é vôm wa dang ôyap ye é vôm wa ke bôme. Mevôm mebèñ meté méé se ki vaghle tubane môs ézing. Bifiè bité bia lere bia naa, Jehôva a wua minsem miè édedèè ôyap ye bia. Dzam té da ban bia naa, Jehôva a djii bia minsem miè misese !
« Aval ane é vôm nlô-dzôp wa véé ye ke bôme be ne ôyap » (Bya 103:12)
7. Aval avé Bible a lere é dzam Jehôva a bo ya minsem miè ? (Michée 7:18, 19).
7 Amben Jehôva a wua minsem miè ôyap, ye a baghle mie vôm ézing ? Kaa. Kéza Hézékias a nga tsili é dzam di dé daghe Jehôva : « Ô nga wua minsem miam misese é mvus duè. » Nge ki faa ane atoan ya Bible da dzô de, « Ô nga vèè minsem miam mise asu duè » (Esaïe 38:9, 17 ; atoan). Bifiè bité bia lere naa, Jehôva a ñong minsem é bôr ba dzôban, ye wua mio ôyap, é vôm aa se ki fe mi bera yen. Be ne fe bera dzô dzam té aval di : « Ô va bo ane [minsem miam] mii dzi ki vaghle boban. » Bible a tugha fir ôsimane té ébe bifiè bife a belane bie, bia yen nten Michée 7:18, 19 (a lang). Bifus bité été, Jehôva dzô naa, a wua minsem miè édudokh mang ôsi. Metam ô mvus, môr éé mbe ki vaghle ke toa é dzôm be wuayang édudokh mang ôsi.
« Ô nga wua minsem miè misese é mvus duè » (Esaïe 38:17)
« Wa ye wua minsem mieba mise édôdua mang ôsi » (Michée 7:19)
8. Za mam bi yegheyang ya zu kuiñ éndagha ?
8 Ngalane bifiè bité, bi va yeghe naa, éyong Jehôva a djii bia, a vèè bia mbeghe ye minsem miè. Bebela a ne naa, ane David a nga dzô de : « mesan ébe é bôr mbia mimboan mi ntoo ndjiane, ye é bôr minsem mi ntoo mburan ; mevakh ébe é môr Jehôva aa ye ki fe lang minsem » (Bero. 4:7, 8). Aval té éde é ne ña ndjiane !
JEHÔVA A TSAM NSEM
9. Za bifiè Jehôva a belane bie naa a lere bia abim avé a djii bia ?
9 Ngalane ntang, Jehôva a ne kuiñ naa, a mane tsam minsem é bôr besese ba dzôban. Éyong bia tugha wokh bifiè bité, bi ne dzô naa, Jehôva a sôp ye ngenghlé minsem mité. Asughlane ye été, éde mbo minsem a tobe nfuban (Bya 51:7 ; Esaïe 4:4 ; Jér. 33:8). Jehôva émièn a kanghle asughlane ye mboane té aval di : « Amben minsem mienan mi ne évele naa tsang, mia ye mane tobe nfum ane nieve nge ki neige ; amben ki mi ne édedèè évele, mia ye bo ane lana nge ki laine » (Esaïe 1:18). É ne édedèè ndzukh naa be vèè é mvîn é ne évele, étôp ayô. Ve, Jehôva a belan éfônane té, naa a ban bia naa, minsem miè mi ne mane tobe nsôban, aval da ve naa mi taa bera yene.
« Amben minsem mienan mi ne évele naa tsang, mia ye mane tobe nfum ane nieve nge ki neige » (Esaïe 1:18)
10. Za éfié éfe Jehôva a belane de, naa a lere bia abim avé a djii bia ?
10 Aval bi va yen de ayeghle bi ndaghe mane di, ba ñong fe minsem ane « memvôla » (Mat. 6:12 ; Luc 11:4). Éde, éyong ésese bia bo minsem asu Jehôva, a ne ane bi ne va ñong mvôla. Dzam té da ve naa, bi mbele ñe môra mvôla ! Ve, éyong Jehôva a djii bia, a ne ane a tsam mvôla té, kaa fe bia de bera lang. Aa yemle ki bia naa bi yaane akal minsem a djiiya bia. Aval dèè ane é môr a bele bura mesan éyong be dzameya ñe mvôla, bia fe, bia wôrane bura mesan éyong Jehôva a djii bia !
« Djiighe bia memvôla mèè » (Mat. 6:12)
11. Éyong Bible a dzô naa minsem miè « mi ntoo ntsaman », dzam té da yili yè ? (Bisè mintôl 3:19).
11 Jehôva aa bo ki ve a dzame memvôla mèè, nge ki minsem miè, a tsam fe mio (a lang Bisè mintôl 3:19). Éyong ba vèè môr mvôla, a cuenta bancaria nge ki compte bancaire été, asi, bi ne bera ke bia yen benomo be ye é tang mono a mbe a bele ane mvôla. Atoo naa, éyong ba tsam môr mvôla, déé se ki aval dèè. Naa bi tugha yem wokh éfônane té, bia yiène simane naa, metam ô mvus, é tinta nge ki é encre be mbe bé belane ñe, a mbe nfulan ô mbe ô bele carbon, goma nge ki gomme, ya fe mendzim. Môr a mbe du étôp mendzim été, ye tsam ye de. Aval té, éyong mvôla é mbe « ntsaman », dé mbe dé dzang. Béé mbe ki fe de vaghle bera yen. Béé mbe ki bera yen ye mis, minten mi mbe mi lere é dzôm é mbe ntsilan asi. A mbe ane béé dzi ki vaghle ñong mvôla té môs ézing. Bia bira yen n’nem mbeng a yem naa, éyong Jehôva a djii minsem miè, a ne ane bii dzi ki mio vaghle bo môs ézing ! (Bya 51:9).
« Nfa ye naa minsem mienan mi tobe ntsaman » (Bisè mintôl 3:19)
12. Za dzam bia yeghe nfa éfônane môra mvôla ?
12 Jehôva a belane bifiè bife, naa a lere bia aval a djii minsem miè misese. A dzô naa : « Ma ye bo naa bikop buè bi dzang aval ane é ne bo nge mi shuale nkur ayat, ye naa minsem muè, mi bo fave ane mi ne môra nkur a mvus » (Esaïe 44:22). Éyong Jehôva a djii, a ne ane a belane môra nkut, naa a shuale bikop biè nfa ye naa bi mane dzang.
« Ma ye bo naa bikop buè bi dzang aval ane é ne bo nge bi shuale nkur ayat » (Esaïe 44:22)
13. Za dzam bia wôran éyong Jehôva a djii minsem miè ?
13 Za ayeghle bia ñong bifiè bité été ? Éyong Jehôva a djii minsem miè, biaa yiène ki fe tsini naa bia ve bia bebién bidzô akal minsem mité éning sese dèè. Ngalane ntang Yésu Krist, Jehôva a maneya tsam minsem miè misese. Niène Jehôva a djiiya nsem, a ne ane bii dzi ki vaghle bo nsem té môs ézing. Dzam té éde é ña djiane wa so ébe Jehôva wa yili akal dèè, éyong bia dzôbane minsem miè ye n’nem ôsese.
JEHÔVA A BERA KÔM MBEMBA ÉLAT
Ndjiane Ésaa wèè a ne a dzôp été wa ve naa bi bele mbemba élar ye ñe (A daghe abong 14)
14. Amu dzé bia yiène tobe ndjiane Jehôva mebun ? (A daghe fe bivaghle).
14 Éyong Jehôva a djii bia, bi ne tobe mebun naa, a bereya bo mvuiñ dzèè. Dzam té da vole bia naa bi taa bera tsini naa bia ve bia bebién bidzô. Biaa yiène ki ko wong naa, Jehôva a tsini ôsu ashuèñ naa a wokh bia ôlun ye dzeng aval avé a ne bia suru. Dzam té daa ye ki vaghle boban. Amu dzé bia yiène tobe Jehôva mebun éyong a dzô naa a djiiya bia ? Jehôva a nga dzô nkule medzô Jérémie naa : « Ma ye djii nsem wôba, maa ye ki vaghle bera siman nsem wôba » (Jér. 31:34). É kobe bifiè bité, ntôl Pablo nge ki Paul a nga belane bifiè bife bia fônane bio, é dzô naa : « Maa ye ki vaghle bera simane minsem mieba » (Behéb. 8:12). Ve, bifiè bité bia yili-yili yè ?
« Maa ye ki vaghle bera simane nsem wôba » (Jér. 31:34)
15. Éyong ba dzô naa Jehôva aa simane ki fe minsem miè, da kômô yili yè ?
15 A Bible été, éfiè « a simane » daa kobe ki éyong ésese, é môr a simane é dzam ézing é nga boban metam ô mvus. É ne fe tsinane ye é môr a bo dzam ézing. Mbo-abé a mbe a kele élé ba Yésu, a nga dzaa ñe naa : « A Yésu, simghane ma éyong wa ye ñii Édjié duè » (Luc 23:42, 43). Aa mbe ki é dzaa ñe fave naa a bele ñe ôsiman tam té. Éyalane Yésu a nga ve ñe é mbe dé lere naa, Yésu a ye bo mam mézing naa a wôme mbo-abé té. Éde, éyong Jehôva a dzô naa, aa simane ki fe minsem miè, a kômô dzô vèè naa, aa ye ki bo dzam ézing da ke bia é ngam ayat, étom minsem a dzameya bia.
16. Bible a vaghane bia ya dzé ?
16 Éyong Jehôva a djii bia, bia wôrane naa, bi ne fili. Bible a belane bifiè bife naa a vole bia a tugha wokh dzam té. Amu naa, bi ne bôr a minsem, Bible a vaghane bia ye « aloo ya nsem. » Ve, ngalane ndjiane Jehôva, bi ntoo ane aloo « be kôreyang nfa nsem » (Bero. 6:17, 18 ; Mel. 1:5). Ôwé, éyong bi yemang naa, Jehôva a djiiya minsem miè, bi ne tobe mesan ane ôloo be va bera ve fili.
« Be kôre mina nsem » (Bero. 6:18)
17. Aval avé ndjiane Jehôva wa lerre bia ? (Esaïe 53:5).
17 A lang Esaïe 53:5. Bible a dzô naa, amu naa bi ne bôr a minsem, bi ne ane é bôr be bele ôkoan wa wiñ. Ngalane ntang é Moan wèñ a nga ve, Jehôva a nga lerre bia (1 Pierre 2:24). Éyong bia bo nsem, bia ndaman élar dèè ye Jehôva, ve, ngalane ntang, a ne bia djii, éyong té bi ne bera bele mbemba élar ye ñe. Aval ane é môr a bele mbimbia ôkoan a wôrane bura mesan éyong a let, aval dèè fe, bia wôrane bura mesan éyong bia bera bele mbemba élar ye Jehôva, amu naa a djii bia.
« Amu meveng mèñ, éde bi nga tobe de nleran » (Esaïe 53:5)
É DZAM É FULU NDJIANE JEHÔVA DA YILI AKAL DÈÈ
18. Za mam bi va yeghe ébe bifiè bisese bi va kobe bio bia so a Bible été, bi tsinane ndjiane Jehôva ? (A daghe nkaale « Aval Jehôva a djii bia »).
18 Éde, za mam bi va yeghe ébe bifiè bisese bi va kobe bio bia so a Bible été, bi tsinane ndjiane Jehôva ? Éyong Jehôva a djii minsem miè, é ne ane biaa be ki mi tare vaghle bo. Éde bi ne bele ndzi-n’nem naa, aa ye ki bia suru melu ma zu akal minsem mité. Dzam té da ve bia naa, bi bele mbemba élat ye Ésaa wèè a ne a dzôp été. Tame té ébién fe, bia yiène fe simane naa, ña ndjiane ô ne é das a ve bia. Da so ébe édzing ye é môra mvam Jehôva a lere é boan be-bôr bese be ne bebo minsem. Aa djii ki bia amu bia yiène de (Bero. 3:24).
19. (a) Amu dzé bia yiène ve Jehôva akiba ? (Beromain 4:8). (b) Za mam bia ye yen ayeghle da zu ?
19 (A lang Beromain 4:8). Ke kada môr y’ébe bia a yiène ve Jehôva akiba, amu a ne é Nzame a ve « ña ndjiane ! » (Bya 130:4). Ve dèè, nge bia kômô naa Jehôva a djii bia, bia yiène bo dzam ézing é too édedèè éban. Yésu a nga dzô naa : « Nge mi bo kaa djii bôr bikop bieba, Ésaa wônan aa ye ki mina djii minsem mienan » (Mat. 6:14, 15). Dzam té da lere bia naa, bia yiène vu é fulu ndjiane Jehôva. Ve, aval avé bi ne de bo ? Ayeghle da zu di, da ye bia lere aval bi ne de bo.
DZIA 46 A Jehôva, bia ve wa akiba
a Mintsili Hébreu mia belan « éfiè ndjiane », nfa ye naa, mi tsiè dzam ña ndjiane, afiang bo naa abuiñ meval mendjiane me ne. Abuiñ minkonghlane mi Bible, miaa ve ki môra nkanane té, ve daa, Traducción del Nuevo Mundo nge ki Traduction du monde nouveau, éé dzi ki bo ane minkoghlane mi Bible mivoo, éyong a nga konghlane nten Bya 130:4.
